مرکزی وزیر برائے کوئلہ و کانکنی جناب جی کشن ریڈی نے آج ہائیت ریجنسی، نئی دہلی میں وزارتِ کانکنی، حکومتِ ہند کی جانب سے 'مٹیریلز ری سائیکلنگ ایسوسی ایشن آف انڈیا' (ایم آر اے آئی) کے تعاون سے منعقدہ قومی سیمینار "بھارت کی اہم معدنیات ری سائیکلنگ کا ایکو سسٹم اور مدور معیشت" کا افتتاح کیا۔

دن بھر جاری رہنے والے اس سیمینار میں پالیسی سازوں، صنعت کے رہنماؤں، دوبارہ کارآمد بنانے والوں، ماہرین، محققین، ماہرینِ تعلیم اور دیگر شراکت داروں کو ایک جگہ اکٹھا کیا گیا تاکہ بھارت کے اہم معدنیات کی ری سائیکلنگ کے نظام کو مضبوط بنانے اور مدور معیشت کو آگے بڑھانے پر غور و خوض کیا جا سکے۔

اپنے کلیدی خطاب میں، جناب جی کشن ریڈی نے بھارت کے ماحول دوست توانائی کی منتقلی، دفاعی تیاریوں، ڈیجیٹل معیشت اور جدید مینوفیکچرنگ کے لیے اہم معدنیات کی ری سائیکلنگ کی کلیدی اہمیت پر روشنی ڈالی۔ انہوں نے ناکارہ یا اپنی مدت پوری کر چکنے والی مصنوعات سے اہم معدنیات کے دوبارہ حصول کو فروغ دینے اور ملک کے اندر ری سائیکلنگ کی صلاحیتوں کو مضبوط بنانے کے لیے حکومت، صنعت، تحقیقی اداروں اور اسٹارٹ اپس کے مابین وسیع تر تعاون پر زور دیا۔

وزیر موصوف نے اختراعی تکنالوجیوں، صنعت کاری کی مہارت ، ای-فضلے کے ذمہ دارانہ انتظام اور ماحولیاتی پائیداری کی ضرورت پر زور دیا۔ 'جن بھاگیداری' کی اہمیت کو اجاگر کرتے ہوئے، انہوں نے شہریوں پر زور دیا کہ وہ ای-کچرے اور اپنی مدت پوری کر چکنے والی مصنوعات کو اہم معدنیات کے حصول کے لیے قیمتی وسائل کے طور پر دیکھیں۔ انہوں نے صنعت، کمپنیوں اور محققین سے بھی اپیل کی کہ وہ 'وکست بھارت' کے وژن کے عین مطابق ایک ٹیکنالوجی سے لیس اور پائیدار ری سائیکلنگ ایکو سسٹم کی تعمیر کے لیے اپنے آئیڈیاز کا تبادلہ کریں اور مل کر کام کریں۔

مرکزی وزیرِ مملکت برائے کوئلہ و کان کنی جناب ستیش چندر دوبے نے وسائل کے بہتر استعمال کو فروغ دینے اور ایک مدور اور خود کفیل ماحولیاتی نظام کی تعمیر کے لیے اہم معدنیات کے دوبارہ حصول اور ری سائیکلنگ کی صلاحیتوں کو مضبوط بنانے کی اہمیت پر روشنی ڈالی۔ انہوں نے وسیع تر عوامی شرکت اور گاؤں گاؤں تک رسائی کے ذریعے ذمہ دارانہ کچرے کے انتظام اور ای-فضلے کی ری سائیکلنگ کے بارے میں بیداری کو نچلی سطح تک لے جانے کی ضرورت پر زور دیا، تاکہ یہ یقینی بنایا جا سکے کہ ری سائیکل ہونے کے قابل وسائل کو باضابطہ ری سائیکلنگ نیٹ ورک کا حصہ بنایا جا سکے۔

وزارتِ کان کنی کے سکریٹری جناب کیشیو چندر نے ماحول دوست توانائی کی تکنالوجیوں، جدید مینوفیکچرنگ، الیکٹرانکس، دفاع اور دیگر اسٹریٹجک شعبوں کے لیے اہم معدنیات کی تزویراتی اہمیت پر زور دیا۔ انہوں نے ملک کے اندر ایک مضبوط ایکو سسٹم کی ضرورت پر روشنی ڈالی جو تلاش، پروسیسنگ، دوبارہ حصول اور ری سائیکلنگ کے تمام مراحل کا احاطہ کرتا ہو۔

جناب کیشیو چندر نے اس بات پر زور دیا کہ ای-فضلہ، صنعتی کچرا اور دیگر اپنی مدت پوری کر چکے مواد اہم معدنیات کے حصول کے لیے اہم ثانوی ذرائع ثابت ہو سکتے ہیں، جس سے وسائل کے استعمال کی کارکردگی بہتر ہوگی، بنیادی ذرائع پر انحصار کم ہوگا اور مدور معیشت کو مدد ملے گی۔ انہوں نے بھارت کی اہم معدنی سیکیورٹی کو مضبوط بنانے کے لیے تمام شراکت داروں کی جانب سے واضح ذمہ داریوں اور مقررہ وقت کے ساتھ ایک مربوط اور وقت کے پابند عمل کی اپیل کی۔

سمینار کے دوران، مرکزی وزراء نے اہم معدنیات کی ری سائیکلنگ کے نظام پر ایک تصوراتی دستاویز بھی جاری کیا، جو بھارت میں اہم معدنیات کی ری سائیکلنگ کو مضبوط بنانے کے لیے ایک کلیدی فریم ورک کا خاکہ پیش کرتا ہے۔ اس دستاویز میں وسائل کے بہتر استعمال، ثانوی ذرائع سے دوبارہ حصول اور ایک مدور اور خود کفیل ایکو سسٹم کی ترقی پر توجہ مرکوز کی گئی ہے۔

اس سمینار میں مختلف موضوعات پر تکنیکی سیشنز شامل تھے، جن میں اہم معدنیات کی ری سائیکلنگ اور ای- فضلے کا جمع کرنا؛ لیتھیم آئن بیٹری سے دھاتوں کا دوبارہ حصول اور بلیک ماس کی برآمد؛ غیر آہنی دھاتوں کی ری سائیکلنگ؛ اور اہم معدنیات اور نان فیریس دھاتوں کی ری سائیکلنگ کا مجموعی منظرنامہ شامل تھے۔ ان مباحثوں میں تکنیکی ترقی، تحقیق و ترقی، ای-کچرے کو اکٹھا کرنے، لیتھیم آئن بیٹریوں اور دیگر ناکارہ مواد سے اہم معدنیات کے حصول، بلیک ماس پروسیسنگ، اور ری سائیکلنگ کے شعبے کو مضبوط بنانے کے لیے پالیسی اقدامات کا احاطہ کیا گیا۔

کانکنی کی وزارت پائیدار وسائل کے استعمال کی جانب اپنی وسیع تر کوششوں کے ایک حصے کے طور پر، ذمہ دارانہ ای-کچرے کے انتظام اور ری سائیکلنگ پر بھی خصوصی توجہ دے رہی ہے۔ خصوصی مہم 6.0 اور "سووَچھتا ہی سیوا" کے تناظر میں، وزارت ای-فضلے کے بارے میں بیداری، اس کے ذمہ دارانہ نکاس اور اسے باضابطہ ری سائیکلنگ نیٹ ورک کا حصہ بنانے کو فروغ دے رہی ہے۔ یہ کوششیں مدور معیشت، وسائل کے بہتر استعمال اور اہم معدنیات سمیت قیمتی مواد کے پائیدار انتظام پر وزارت کی وسیع تر توجہ کو تقویت دیتی ہیں۔

**********

 (ش ح –ا ب ن)

U.No:3889

(ریلیز آئی ڈی: 2313240) وزیٹر کاؤنٹر : 7