وزارتِ سماجی انصاف و تفویضِ اختیارات، پردھان منتری انوسوچت جاتی ابھُدیَے یوجنا (پی ایم۔اے جے اے وائی) کے ذریعے درج فہرست ذاتوں سے تعلق رکھنے والی برادریوں کی سماجی و اقتصادی خودمختاری کو فروغ دے رہی ہے۔

وزارتِ سماجی انصاف و تفویضِ اختیارات کے سکریٹری جناب سدھانش پنت نے بتایا کہ مثالی گاؤں کے جزو کے تحت، جسے پہلے پردھان منتری آدرش گرام یوجنا کے طور پر نافذ کیا جاتا تھا، مالی سال 2014-15 سے اب تک 48,811 منتخب گاؤں کے لیے 3,545.103 کروڑ روپے جاری کیے گئے ہیں۔

انہوں نے بتایا کہ ان میں سے 16,022 گاؤں کو مثالی گاؤں قرار دیا جا چکا ہے، کیونکہ انہوں نے مقررہ ترقیاتی پیمانوں کو حاصل کر لیا ہے۔ اس جزو کے تحت درج فہرست ذاتوں کی اکثریت والے گاؤں کی جامع ترقی پر توجہ مرکوز کی جاتی ہے، جس کے لیے بنیادی ڈھانچے اور ضروری خدمات میں موجود اہم کمیوں کو دور کیا جاتا ہے۔

جناب پنت نے بتایا کہ امدادی گرانٹ کے جزو کے تحت، جسے پہلے درج فہرست ذاتوں کے ذیلی منصوبے کے لیے خصوصی مرکزی امداد کے نام سے جانا جاتا تھا، مالی سال 2014-15 سے اب تک ریاستوں اور مرکز کے زیر انتظام علاقوں کو 7,142.692 کروڑ روپے جاری کیے گئے ہیں۔

انہوں نے کہا کہ اس امداد سے 34.61 لاکھ مستفیدین فائدہ اٹھا چکے ہیں۔ اس کے تحت مہارتوں کی ترقی، ذریعۂ معاش کے فروغ، آمدنی پیدا کرنے والے منصوبوں اور دیگر ایسے اقدامات پر توجہ دی گئی ہے جن کا مقصد درج فہرست ذاتوں کی برادریوں کے لیے معاشی مواقع میں اضافہ کرنا ہے۔

سکریٹری نے مزید بتایا کہ ہاسٹل کے جزو کے تحت، جسے پہلے بابو جگجیون رام چھاتراواس یوجنا کے طور پر نافذ کیا جاتا تھا، مالی سال 2014-15 سے اب تک 244 ہاسٹلوں کے لیے 498.215 کروڑ روپے جاری کیے گئے ہیں، جن سے 24,131 مستفیدین کا احاطہ کیا گیا ہے۔

انہوں نے مزید بتایا کہ اس جزو کے تحت درج فہرست ذاتوں سے تعلق رکھنے والے طلبہ کے لیے تعلیمی مواقع تک رسائی بہتر بنانے کی غرض سے طلبہ کے ہاسٹلوں کی تعمیر اور توسیع میں مدد فراہم کی جاتی ہے۔

مالی سال 2024-25 اور 2025-26 کے دوران حاصل ہونے والی کامیابیوں کو اجاگر کرتے ہوئے جناب پنت نے بتایا کہ ان دونوں مالی سالوں کے دوران مثالی گاؤں کے جزو کے تحت 629.26 کروڑ روپے جاری کیے گئے، جبکہ 8,823 گاؤں کو مثالی گاؤں قرار دیا گیا۔

سکریٹری نے مزید بتایا کہ مالی سال 2024-25 اور 2025-26 کے دوران امدادی گرانٹ کے جزو کے تحت ریاستوں اور مرکز کے زیر انتظام علاقوں کو 705.638 کروڑ روپے جاری کیے گئے، جس سے 1,782 افراد مستفید ہوئے۔

ہاسٹل کے جزو کے تحت مالی سال 2024-25 اور 2025-26 کے دوران 46 ہاسٹلوں کے لیے 80.115 کروڑ روپے جاری کیے گئے، جس سے 5,664 مستفیدین کا احاطہ کیا گیا۔

سکریٹری نے بتایا کہ پی ایم۔اے جے اے وائی کو 2021-22 سے ایک ضم شدہ مرکزی معاونت یافتہ اسکیم کے طور پر نافذ کیا جا رہا ہے۔ انہوں نے بتایا کہ اس کے تحت پہلے سے الگ الگ نافذ کی جانے والی تین مرکزی معاونت یافتہ اسکیموں کو یکجا کیا گیا ہے، جن میں پردھان منتری آدرش گرام یوجنا (پی ایم اے جی وائی)، درج فہرست ذاتوں کے ذیلی منصوبے کے لیے خصوصی مرکزی امداد (ایس سی اے برائے ایس سی ایس پی) اور بابو جگجیون رام چھاتراواس یوجنا (بی جے آر سی وائی) شامل ہیں۔

انہوں نے بتایا کہ یہ اسکیم مثالی گاؤں، امدادی گرانٹ اور ہاسٹل کے اجزا کے ذریعے نافذ کی جا رہی ہے۔ اس کا مقصد مہارتوں کی ترقی، آمدنی پیدا کرنے والی سرگرمیوں اور دیگر ترقیاتی اقدامات کے ذریعے روزگار کے اضافی مواقع پیدا کرکے درج فہرست ذاتوں کی برادریوں میں غربت کو کم کرنا ہے۔

جناب پنت نے مزید کہا کہ اس اسکیم کا مقصد درج فہرست ذاتوں کی اکثریت والے گاؤں میں مناسب بنیادی ڈھانچے اور ضروری خدمات کی فراہمی کو یقینی بنا کر سماجی و اقتصادی اشاریوں میں بہتری لانا بھی ہے۔

سکریٹری نے اعتماد کا اظہار کرتے ہوئے کہا کہ پی ایم۔اے جے اے وائی کے ذریعے حکومت ملک بھر میں درج فہرست ذاتوں کی برادریوں کی جامع ترقی کو فروغ دینے، ذریعۂ معاش اور تعلیمی مواقع کو وسعت دینے، غربت میں کمی لانے اور مجموعی معیارِ زندگی کو بہتر بنانے کے اپنے عزم پر قائم ہے۔

******

ش ح۔ ش ا ر۔ ول

Uno-3804

(ریلیز آئی ڈی: 2312642) وزیٹر کاؤنٹر : 5