কেন্দ্ৰীয় কৃষি আৰু কৃষক কল্যাণ তথা গ্ৰামোন্নয়ন মন্ত্ৰী শ্ৰী শিৱৰাজ সিং চৌহানে আজি প্ৰধানমন্ত্ৰী শ্ৰী নৰেন্দ্ৰ মোদীৰ নিৰ্দেশত বিহাৰৰ বানপীড়িত অঞ্চলসমূহ পৰিদৰ্শন কৰে আৰু স্থলভাগত পৰিস্থিতিৰ বুজ লয়। বিহাৰৰ মুখ্যমন্ত্ৰী শ্ৰী সম্ৰাট চৌধুৰী, ৰাজ্যিক মন্ত্ৰীসকল আৰু কেন্দ্ৰ তথা ৰাজ্য চৰকাৰৰ জ্যেষ্ঠ বিষয়াসকলৰ সৈতে শ্ৰী চৌহানে হাজীপুৰ, বৈশালী, মুংগেৰ আৰু ভাগলপুৰৰ বান পৰিস্থিতিৰ এক বিশদ পৰ্যালোচনা চলায়। ক্ষতিগ্ৰস্ত গাঁও আৰু কৃষিপথাৰসমূহত উপস্থিত হ’বলৈ তেওঁ মটৰবোট, দেশীয় নাও আৰু ট্ৰেক্টৰেৰে যাত্ৰা কৰাৰ লগতে পৰিস্থিতিৰ এক আকাশী জৰীপো সম্পন্ন কৰে। বানাক্ৰান্ত পৰিয়ালসমূহৰ সৈতে বাৰ্তালাপ কৰি তেওঁ আশ্বাস দিয়ে যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত কেন্দ্ৰীয় চৰকাৰে বিহাৰৰ জনসাধাৰণৰ সৈতে দৃঢ়ভাৱে থিয় দিছে আৰু এই সংকটৰ পৰা ৰাজ্যখনক উদ্ধাৰ কৰাত সহায়ৰ বাবে সম্ভৱপৰ সকলো বিত্তীয় আৰু আন্তঃগাঁথনিগত সহযোগিতা আগবঢ়াব।

কেন্দ্ৰীয় চৰকাৰে তীক্ষ্ণ নজৰ ৰাখিছে বান পৰিস্থিতিৰ ওপৰত

গংগা আৰু অন্যান্য নদীসমূহৰ জলপৃষ্ঠৰ দ্ৰুত তথা কেইবাটাও অঞ্চলত অভিলেখ বৃদ্ধিৰ পিছত কেন্দ্ৰীয় চৰকাৰে বিহাৰৰ বান পৰিস্থিতিৰ ওপৰত তীক্ষ্ণ নজৰ ৰাখিছে। প্ৰধানমন্ত্ৰীৰ নিৰ্দেশত শ্ৰী চৌহানে মঙলবাৰে কৃষি আৰু কৃষক কল্যাণ মন্ত্ৰালয়, গ্ৰামোন্নয়ন মন্ত্ৰালয় আৰু বিভিন্ন কেন্দ্ৰীয় প্ৰতিষ্ঠানৰ জ্যেষ্ঠ বিষয়া তথা কাৰিকৰী বিশেষজ্ঞসকলক লৈ গঠিত এক উচ্চস্তৰীয় কেন্দ্ৰীয় দলৰ সৈতে বিহাৰত উপস্থিত হয়। পাটনা পোৱাৰ পিছত তেওঁ মুখ্যমন্ত্ৰী শ্ৰী সম্ৰাট চৌধুৰী, ৰাজ্যিক কেবিনেটৰ সদস্যসকল আৰু জ্যেষ্ঠ প্ৰশাসনিক বিষয়াসকলৰ সৈতে স্থল পৰিদৰ্শন আৰম্ভ কৰে।

চৌহানে পৰিদৰ্শন কৰিলে বানাক্ৰান্ত গাঁও, কৃষিপথাৰ আৰু সাহায্য শিবিৰ

বৈশালীৰ হাজীপুৰত শ্ৰী চৌহানে আটাইতকৈ বেছি ক্ষতিগ্ৰস্ত টেৰাছিয়া আৰু সৰাইপুৰ গাঁও পৰিদৰ্শন কৰে, য'ত তেওঁ মটৰবোট আৰু দেশীয় নাৱেৰে যাত্ৰা কৰি জলমগ্ন আৱাসিক এলেকা আৰু কৃষিপথাৰসমূহ পৰ্যবেক্ষণ কৰে। কেইবাটাও দুৰ্গম স্থানত পৰিস্থিতিৰ বুজ ল'বলৈ তেওঁ ট্ৰেক্টৰেৰে যাত্ৰা কৰে। ইয়াৰ উপৰিও তেওঁ ৰাঘোপুৰ ছয়লেনযুক্ত দলঙৰ পৰা বানৰ প্ৰকোপ আৰু পানীৰ স্তৰ পৰ্যালোচনা কৰে। মুংগেৰত কেন্দ্ৰীয় মন্ত্ৰীগৰাকীয়ে নৱাগড়ী সাহায্য শিবিৰ আৰু কোজিকৰায়া মথাউৰি পৰিদৰ্শন কৰি নিৰাপত্তা আৰু পানী নিষ্কাশনৰ ব্যৱস্থা পৰ্যালোচনা কৰে। ভাগলপুৰত তেওঁ সাহায্য শিবিৰসমূহ পৰিদৰ্শন কৰে আৰু তাত আশ্ৰয় লৈ থকা বানাক্ৰান্ত লোকসকলৰ সৈতে বাৰ্তালাপ কৰে।

২০১৬ চনৰ বানতকৈ পানীৰ স্তৰ প্ৰায় এক ফুট অধিক

ক্ষেত্ৰ পৰিদৰ্শনৰ অন্তত শ্ৰী চৌহানে সংবাদ মাধ্যমক জনায় যে মুখ্যমন্ত্ৰী আৰু স্থানীয় ৰাইজে জনোৱা তথ্য অনুসৰি, ক্ষতিগ্ৰস্ত অঞ্চলসমূহত ২০১৬ চনৰ ঐতিহাসিক বানৰ তুলনাত পানীৰ স্তৰ প্ৰায় এক ফুট ওপৰলৈ বৃদ্ধি পাইছে। তেওঁ কয় যে ১০ দিনতকৈও অধিক সময় পানীৰ তলত থকাৰ বাবে কল আৰু মাকৈৰ খেতিৰ ব্যাপক ক্ষতিসাধন হৈছে। প্ৰায় ৫০ লাখ লোক বানৰ দ্বাৰা প্ৰত্যক্ষভাৱে প্ৰভাৱিত হৈছে। বহু পৰিয়াল নিজৰ ঘৰ-দুৱাৰ এৰি যাবলৈ বাধ্য হৈছে, ঘৰ-বাৰী বিধ্বস্ত হৈছে আৰু পশুধনৰো হানি ঘটিছে। “কৃষকসকলে নিজৰ কঠোৰ পৰিশ্ৰম আৰু জীৱিকাৰ সম্বল হিচাপে গঢ়ি তোলা শস্য বানপানীত ডুব গৈ থকা দৃশ্যটো অত্যন্ত বেদনাদায়ক। কিন্তু কৃষকসকলে মনোবল হেৰুওৱাৰ প্ৰয়োজন নাই। তেওঁলোকৰ জীৱিকা সুৰক্ষিত কৰিবলৈ আৰু এই কঠিন সময়ত তেওঁলোকক সহায় কৰিবলৈ চৰকাৰ সম্পূৰ্ণৰূপে প্ৰতিশ্ৰুতিবদ্ধ,” শ্ৰী চৌহানে কয়।

ৰাজ্য চৰকাৰৰ সাহায্য আৰু উদ্ধাৰ অভিযানৰ পৰ্যালোচনা

শ্ৰী চৌহানে পৰিস্থিতি নিয়ন্ত্ৰণত ৰাজ্য চৰকাৰৰ ভূমিকাক প্ৰশংসা কৰে আৰু কয় যে মুখ্যমন্ত্ৰী শ্ৰী সম্ৰাট চৌধুৰীৰ নেতৃত্বত প্ৰশাসনে সাহায্য আৰু উদ্ধাৰ অভিযানত দিনে-নিশাই কাম কৰি আছে। তৎকালীন সাহায্যৰ অংশ হিচাপে ৰাজ্য চৰকাৰে প্ৰত্যক্ষ লাভ হস্তান্তৰ (ডি.বি.টি.)-ৰ জৰিয়তে প্ৰতিটো ক্ষতিগ্ৰস্ত পৰিয়ালৰ বেংক একাউণ্টত পোনপটীয়াকৈ ৭,০০০ টকাকৈ জমা কৰা আৰম্ভ কৰিছে। এই প্ৰক্ৰিয়া যুদ্ধকালীন তৎপৰতাৰে চলাই থকা হৈছে। চিকিৎসক আৰু পেৰামেডিকেল দলসমূহক নাৱেৰে বানপীড়িত অঞ্চললৈ প্ৰেৰণ কৰা হৈছে যাতে লোকসকলৰ ঘৰে ঘৰে আৰু সাহায্য শিবিৰসমূহত চিকিৎসা সেৱা তথা ঔষধ যোগান ধৰিব পৰা যায়। ক্ষতিগ্ৰস্ত পৰিয়ালসমূহৰ বাবে নিৰাপদ আশ্ৰয়, বিশুদ্ধ খোৱাপানী, শুকান খাদ্য আৰু ৰন্ধা খাদ্যৰ পেকেটৰো ব্যৱস্থা কৰা হৈছে।

কেন্দ্ৰীয় দলে চলাব ক্ষয়-ক্ষতিৰ বিশদ মূল্যায়ন

শ্ৰী চৌহানে কয় যে ৰাজ্য চৰকাৰে ৰাজ্যিক দুৰ্যোগ সঁহাৰি পুঁজি (এছ.ডি.আৰ.এফ.) আৰু উপলব্ধ সম্পদৰ জৰিয়তে তৎকালীন সাহায্য আগবঢ়াই থকাৰ সময়তে কেন্দ্ৰীয় চৰকাৰেও সাহায্য, পুনৰুদ্ধাৰ আৰু পুনৰ্নিৰ্মাণৰ বাবে সকলো প্ৰয়োজনীয় সহযোগিতা আগবঢ়াব। কৃষি আৰু গ্ৰামোন্নয়ন বিভাগৰ বিষয়াসকলে পৰিস্থিতিৰ প্ৰাথমিক মূল্যায়ন চলাই আছে। পৰৱৰ্তী সময়ত ক্ষয়-ক্ষতিৰ মাত্ৰা নিৰ্ধাৰণ কৰিবলৈ বিহাৰলৈ এটা বিশদ আন্তঃমন্ত্রণালয় কেন্দ্ৰীয় দল প্ৰেৰণ কৰা হ’ব। দলটোৱে ক্ষতিগ্ৰস্ত জিলাসমূহত হোৱা লোকচান, বিশেষকৈ কৃষি শস্য, পথ, দলং, ঘৰ-দুৱাৰ আৰু পশুধনৰ ক্ষতিৰ পৰ্যালোচনা কৰিব। শ্ৰী চৌহানে উল্লেখ কৰে যে ৰাজ্য চৰকাৰে ৰাষ্ট্ৰীয় দুৰ্যোগ সঁহাৰি পুঁজিৰ অধীনত প্ৰয়োজনীয় প্ৰস্তাৱ দাখিল কৰাৰ লগে লগে কেন্দ্ৰই কোনো পলম নকৰাকৈ পৰ্যাপ্ত বিত্তীয় আৰু সামগ্ৰীগত সাহায্য প্ৰদান কৰিব।

কোনো ক্ষতিগ্ৰস্ত পৰিয়ালেই থাকিব নোৱাৰিব নিসহায় হৈ

বানাক্ৰান্ত পৰিয়ালসমূহক পুনৰ আশ্বাস দি শ্ৰী চৌহানে কয় যে কেন্দ্ৰ আৰু প্ৰধানমন্ত্ৰী বিহাৰৰ ৰাইজৰ সৈতে দৃঢ়ভাৱে থিয় দিছে। তেওঁ কয়, “মই কেন্দ্ৰীয় চৰকাৰ আৰু প্ৰধানমন্ত্ৰী শ্ৰী নৰেন্দ্ৰ মোদীৰ হৈ বিহাৰবাসীক আশ্বাস দিছোঁ যে এই সংকট যদিও গভীৰ, তথাপিও ৰাইজৰ সেৱা কৰাৰ আমাৰ সংকল্প অধিক শক্তিশালী। বিহাৰক এই সংকটৰ পৰা উদ্ধাৰ কৰাত আমি ৰাজ্য চৰকাৰৰ সৈতে কান্ধত কান্ধ মিলাই থিয় দিম। কোনো ক্ষতিগ্ৰস্ত পৰিয়ালেই নিসহায় হৈ থাকিব নোৱাৰিব।”

মুখ্যমন্ত্ৰীৰ আৱাসগৃহত উচ্চস্তৰীয় পৰ্যালোচনা বৈঠক

ৰাজ্যজুৰি বানপীড়িত অঞ্চল, মথাউৰি আৰু সাহায্য শিবিৰসমূহ দিনজোৰা পৰিদৰ্শনৰ অন্তত শ্ৰী চৌহানে আজি সন্ধিয়া ৬ বজাত এনে মাৰ্গস্থিত মুখ্যমন্ত্ৰীৰ আৱাসগৃহত এখন উচ্চস্তৰীয় পৰ্যালোচনা বৈঠকত সভাপতিত্ব কৰিব। কেন্দ্ৰ আৰু ৰাজ্য চৰকাৰৰ সংশ্লিষ্ট বিভাগসমূহৰ জ্যেষ্ঠ বিষয়াসকলে এই বৈঠকত অংশগ্ৰহণ কৰিব। পৰ্যালোচনা বৈঠকত সাহায্য সামগ্ৰী বিতৰণ, স্বাস্থ্যসেৱা, শস্যৰ ক্ষতিপূৰণ পৰিকল্পনা আৰু ক্ষতিগ্ৰস্ত আন্তঃগাঁথনিৰ পুনৰুদ্ধাৰৰ বিষয়সমূহ সামৰি লোৱা হ’ব। সেই অনুসৰি প্ৰয়োজনীয় নিৰ্দেশনাও জাৰি কৰা হ’ব।

******