ہندوستان کے گرین اسکلنگ ایکو سسٹم کو مستحکم کرنے کی سمت میں ایک اہم قدم کے طور پر، محترمہ دیب شری مکھرجی، آئی اے ایس، سکریٹری، ہنرمندی کی ترقی اور صنعت کاری کی وزارت (ایم ایس ڈی ای) نے حال ہی میں نیشنل اسکل ٹریننگ انسٹی ٹیوٹ (این ایس ٹی آئی)، بنگلورو میں اسکلز4فیوچر ای وی اور گرین اسکلز لیب کا افتتاح کیا۔ یہ لیب اسکلز4فیوچر پروگرام کے تحت قائم کی گئی ہے، جو شیل انڈیا، ڈائریکٹوریٹ جنرل آف ٹریننگ (ڈی جی ٹی)، ہنرمندی کی ترقی اور صنعت کاری کی وزارت (ایم ایس ڈی ای) اور ایڈونیٹ فاؤنڈیشن کی مشترکہ پہل ہے۔ اس کا مقصد نوجوانوں کو الیکٹرک وہیکلز (ای وی) اور گرین ٹیکنالوجیز کے شعبوں میں مستقبل کے تقاضوں سے ہم آہنگ ہنرمندی سے لیس کرنا ہے۔

اپنے دورے کے دوران، سکریٹری، ایم ایس ڈی ای نے طلبہ، تربیت کاروں اور صنعت کے نمائندوں سے بات چیت کی اور ای وی ٹیکنالوجی سے متعلق معیاری بنیادی ڈھانچے اور عملی تعلیم کے ماڈیول کا مشاہدہ کیا۔ یہ سہولت سیکھنے والوں کو الیکٹرک وہیکل سسٹم، بیٹری ٹیکنالوجی، تشخیص، حفاظتی طریقہ کار اور دیگر ابھرتی ہوئی گرین ٹیکنالوجیوں کے عملی تجربے سے آراستہ کرنے کے لیے تیار کی گئی ہے، جس کے نتیجے میں پائیدار نقل و حرکت اور صاف توانائی کے تیزی سے ترقی کرتے ہوئے شعبوں میں ان کی روزگار کی صلاحیت میں اضافہ ہوگا۔

اس موقع پر خطاب کرتے ہوئے، محترمہ دیب شری مکھرجی، آئی اے ایس، سکریٹری، ایم ایس ڈی ای نے مستقبل کی ملازمتوں کے لیے تیار افرادی قوت تشکیل دینے میں صنعت اور حکومت کے درمیان تعاون کی اہمیت پر زور دیا۔ انہوں نے کہا کہ اسکلز4فیوچر پروگرام جیسے اقدامات نوجوانوں کو گرین موبیلیٹی، قابل تجدید توانائی اور پائیدار ٹیکنالوجی کے شعبوں میں ابھرتے ہوئے مواقع کے لیے تیار کرنے میں اہم کردار ادا کرتے ہیں، جبکہ ہندوستان کی جامع اور پائیدار اقتصادی ترقی کے وژن کو بھی تقویت دیتے ہیں۔

اسکلز4فیوچر پروگرام ملک بھر میں گرین اور ای وی اسکلنگ کو آگے بڑھانے کے لیے ایک اہم اقدام کے طور پر ابھرا ہے۔ حکومت، صنعت اور نفاذی ایجنسیوں کے درمیان شراکت داری کے ذریعے اس پروگرام کے تحت پانچ ریاستوں کے 290 سے زائد اداروں تک رسائی حاصل کی جا چکی ہے، 70,000 سے زائد سیکھنے والوں کو تربیت دی گئی ہے، 258 سے زائد فیکلٹی ممبران کی مہارتوں کو مزید بہتر بنایا گیا ہے اور 20 گرین اسکلز ای وی لیب قائم کی گئی ہیں، جس سے پیشہ ورانہ تعلیم اور اسکلنگ کے پورے ایکو سسٹم میں وسیع پیمانے پر مثبت اثرات مرتب ہوئے ہیں۔

صرف کرناٹک میں اس پروگرام کے تحت 101 انڈسٹریل ٹریننگ انسٹی ٹیوٹس (آئی ٹی آئی) کو فائدہ پہنچا ہے اور 9,113 طلبہ کو تربیت دی گئی ہے، جو ریاست کی بڑھتی ہوئی گرین اکانومی کے لیے صنعت کی ضروریات کے مطابق افرادی قوت تیار کرنے میں اس کے تعاون کو ظاہر کرتا ہے۔ این ایس ٹی آئی بنگلورو میں نو افتتاح شدہ ای وی اور گرین اسکلز لیب تربیت حاصل کرنے والوں کو جدید تربیتی بنیادی ڈھانچہ اور عملی تجربے پر مبنی تعلیم کے مواقع فراہم کرکے اس ایکو سسٹم کو مزید مستحکم کرتی ہے۔

اسکلز4فیوچر پہل حکومت ہند کے اس وژن سے ہم آہنگ ہے جس کا مقصد ایسی ہنرمند افرادی قوت کو فروغ دینا ہے جو ملک کو گرین موبیلیٹی اور پائیدار ترقی کی سمت منتقلی میں معاونت فراہم کر سکے۔ صنعت سے متعلق نصاب، عملی تعلیم کے بنیادی ڈھانچے اور تقرری سے منسلک مواقع کو یکجا کرتے ہوئے، یہ پروگرام ہنرمندی کے خلا کو پُر کرنے اور نوجوانوں کو معیشت کے ابھرتے ہوئے شعبوں میں بامعنی طور پر شرکت کے قابل بنانے کی کوشش کرتا ہے۔

این ایس ٹی آئی بنگلورو میں ای وی اور گرین اسکلز لیب کا افتتاح ایم ایس ڈی ای، ڈی جی ٹی اور شیل انڈیا کے درمیان جاری شراکت داری میں ایک اور سنگ میل ہے، جو نوجوانوں کو مستقبل پر مرکوز ہنرمندی سے بااختیار بنانے اور ہندوستان کے ایک زیادہ سرسبز اور پائیدار مستقبل کی جانب سفر میں معاونت کرنے کے ان کے مشترکہ عزم کی توثیق کرتا ہے۔

 

**********

ش ح۔ ف ش ع

U: 3742

(ریلیز آئی ڈی: 2311614) وزیٹر کاؤنٹر : 4