વર્લ્ડ સર્ક્યુલર ઈકોનોમી ફોરમ 2026 (WCEF2026) સર્ક્યુલર ઈકોનોમીના સંપૂર્ણ સ્પેક્ટ્રમને આવરી લેતી બે દિવસની ગહન ચર્ચાઓ બાદ આજે ગાંધીનગર, ગુજરાત ખાતે સંપન્ન થયું. આ ફોરમે સરકારો, આંતરરાષ્ટ્રીય સંગઠનો, ઉદ્યોગો, સ્ટાર્ટ-અપ્સ, શૈક્ષણિક સંસ્થાઓ અને નાગરિક સમાજ સહિત 60 થી વધુ દેશોના આશરે 2,700 ડેલિગેટ્સ અને 260 વક્તાઓને એક મંચ પર લાવ્યા હતા.

સમાપન સત્રની શોભા ગુજરાત સરકારના વન અને પર્યાવરણ, આબોહવા પરિવર્તન, વાહનવ્યવહાર રાજ્ય મંત્રી શ્રી પ્રવીણભાઈ માળી અને ફિનલેન્ડના આબોહવા અને પર્યાવરણ કેબિનેટ મંત્રી સુશ્રી સારી મુલ્તાલાએ વધારી હતી. આ પ્રસંગે ઉપસ્થિત અન્ય મહાનુભાવોમાં પ્રેસિડેન્ટ (SITRA), શ્રી અટ્ટે જાસ્કેલાઈનન, ઉપરાંત ભારત સરકાર અને ગુજરાત રાજ્યના વરિષ્ઠ અધિકારીઓનો સમાવેશ થાય છે. આ કાર્યક્રમમાં WCEF2026ની હાઇલાઇટ ફિલ્મ અને ઇકોમાર્ક લોગોનું લોન્ચિંગ પણ દર્શાવવામાં આવ્યું હતું.

તેમના વિશેષ સંબોધનમાં, શ્રી પ્રવીણભાઈ માળીએ ફોરમના છેલ્લા બે દિવસ દરમિયાન વ્યાપક અર્થપૂર્ણ વિચારમંથન કરવા બદલ સહભાગીઓને અભિનંદન પાઠવ્યા હતા. તેમણે જણાવ્યું હતું કે આ કાર્યક્રમનો સાચો પ્રભાવ સર્ક્યુલર ઉકેલો માટે જમીની સ્તરના સહયોગમાં રહેલો છે અને પ્રતિબદ્ધતાથી ક્રિયા તરફ સાથે મળીને આગળ વધવાની જરૂરિયાત પર ભાર મૂક્યો હતો. મંત્રીશ્રીએ રેખાંકિત કર્યું હતું કે સર્ક્યુલર ઈકોનોમી એ માત્ર એક પર્યાવરણીય એજન્ડા નથી પરંતુ એક આર્થિક તક, સામાજિક જવાબદારી, દૈનિક જીવનશૈલી અને આવનારી પેઢીઓ માટે ટકાઉ ભવિષ્ય સુનિશ્ચિત કરવાનો માર્ગ છે.

સુશ્રી સારી મુલ્તાલાએ તેમના વક્તવ્યમાં WCEF 2026 નું સફળતાપૂર્વક આયોજન કરવા બદલ ભારતને અભિનંદન પાઠવ્યા હતા અને જણાવ્યું હતું કે ભારતે માત્ર આ ફોરમનું આયોજન જ નથી કર્યું પરંતુ તેને પ્રેરિત પણ કર્યું છે. સર્ક્યુલર ઈકોનોમી એ પર્યાવરણીય મુદ્દો નથી પરંતુ આર્થિક અને વિકાસાત્મક તક છે, જે હવે ભવિષ્યની શક્યતા નથી પરંતુ વૈશ્વિક સ્તરે પહેલાથી જ પ્રચલિત છે. તેમણે નોંધ્યું હતું કે સર્ક્યુલર ઉકેલોમાં વ્યાવહારિક ભાગીદારી, વ્યાપારી સહયોગ, ઇનોવેશન્સ અને રોકાણોની શક્યતાઓ ચકાસવા ઉપરાંત, WCEF2026 દરમિયાન સમાવેશીપણા અને પરિવર્તનના લોકોના પરિમાણના મહત્વને ખાસ કરીને પ્રકાશિત કરવામાં આવ્યું છે. વિચારો રોકાણ બનવા જોઈએ અને સફળ ઇનોવેશન્સ ઝડપી અમલીકરણ સાથે વિસ્તરણ પામવા જોઈએ, તેમ કહીને તેમણે વાત પૂરી કરી હતી.

અગાઉ, સમાપન સત્રનો સંદર્ભ આપતાં, એડિશનલ સેક્રેટરી (MoEFCC) અને ચેરમેન (CPCB) ડો. અમનદીપ ગર્ગે ઉપસ્થિત સભાને માહિતી આપી હતી કે છેલ્લા બે દિવસ દરમિયાન ફોરમે સર્ક્યુલર ઈકોનોમીના નાણાકીય અને તકનીકી, સામાજિક અને આર્થિક પાસાઓને આવરી લેતા ચાર પ્લેનરી સત્રો અને 16 સમાંતર સત્રો જોયા છે. રોજગાર, સમાવેશીપણા, જાતિ સમાનતા (જેન્ડર ઇક્વિટી), ભવિષ્યના પડકારો અને પૂરતા ફાઇનાન્સિંગની જરૂરિયાત જેવા વિષયો પર પણ ચર્ચા કરવામાં આવી હતી. તેમણે તમામ હિતધારકોને ફોરમ દરમિયાન થયેલા વિચારમંથનને જમીની સ્તરે સામૂહિક અને સફળ અમલીકરણ તરફ લઈ જવા માટે આહ્વાન કર્યું હતું.

ચેરમેને ભારપૂર્વક જણાવ્યું હતું કે પ્લેનરી સત્રોએ સામૂહિક રીતે રાષ્ટ્રીય અને રાજ્ય-સ્તરની પહેલો, વ્યાપારી ઇનોવેશન અને ઔદ્યોગિક વ્યૂહરચના દ્વારા સર્ક્યુલર ઈકોનોમીને આગળ ધપાવવામાં ભારતના દ્રષ્ટિકોણ અને નેતૃત્વ પર પ્રકાશ પાડ્યો છે. સત્રોમાં સક્ષમ નીતિઓ, સામગ્રી સુરક્ષા (મટિરિયલ સિક્યુરિટી), ઇનોવેશન, સાહસિકતા અને કૌશલ્ય વિકાસ પર ધ્યાન કેન્દ્રિત કરવામાં આવ્યું હતું. આ વ્યાપક સિદ્ધાંતોને પછી વિવિધ કચરાના પ્રવાહોમાં સમાંતર સત્રો દ્વારા વ્યાવહારિક, ક્ષેત્ર-વિશિષ્ટ કાર્યક્ષમ આંતરદ્રષ્ટિમાં રૂપાંતરિત કરવામાં આવ્યા હતા, જે સર્ક્યુલર ઉકેલોને માપન યોગ્ય બનાવવા માટે પુનઃકૌશલ્ય, ડિજિટલ ટેકનોલોજી, ફાઇનાન્સ, મૂલ્ય-શ્રૃંખલા ભાગીદારી અને નાગરિક ભાગીદારીની ભૂમિકાની પુનઃપુષ્ટિ કરે છે.

નોંધનીય છે કે, ફોરમની સાથે આયોજિત પ્રદર્શનમાં 135 રાષ્ટ્રીય અને આંતરરાષ્ટ્રીય પ્રદર્શનકર્તાઓ શામેલ હતા, જેણે સર્ક્યુલર ઉકેલોના જમીની સ્તરના અમલીકરણની ઝાંખી આપી હતી, જેમાં વ્યાવહારિક પડકારો અને સાથે મળીને કામ કરવાની જરૂરિયાત પર પ્રકાશ પાડવામાં આવ્યો હતો. ફોરમ દરમિયાન ઉભરેલા વિચારોને આગળ વધારવા માટે, તેને વ્યાવહારિક માર્ગોમાં રૂપાંતરિત કરવા માટે વિવિધ સહયોગીઓ દ્વારા 17 થી 18 સપ્ટેમ્બર 2026 દરમિયાન 80 એક્સિલરેટર સત્રોનું આયોજન કરવામાં આવશે. ફોરમે સંસ્થાકીય સંકલન, ક્ષમતા વિકાસ અને તમામ સ્તરે નિર્ણય લેવામાં સર્ક્યુલર સિદ્ધાંતોના એકીકરણ દ્વારા સમાવેશી અને માપન યોગ્ય સર્ક્યુલર ઈકોનોમી ઉકેલોને ઝડપી બનાવવાનું આહ્વાન કર્યું હતું.

સમાપન સમારોહ શ્રી ક્રિસ્ટો લેહટોનેન, ડાયરેક્ટર, ઇન્ટરનેશનલ પ્રોગ્રામ્સ (SITRA) દ્વારા કોલંબિયા યુનિવર્સિટી, યુનાઇટેડ સ્ટેટ્સ ઓફ અમેરિકાને WCEF 2027ના આયોજન માટે મશાલ સોંપવાની સાથે સંપન્ન થયો હતો.

SM/BS/JD

(રીલીઝ આઈડી: 2311091) મુલાકાતી સંખ્યા : 17