ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿಂದು ನಡೆದ ಕೇಂದ್ರ ಸಚಿವ ಸಂಪುಟವು ನೌಕರರ ಭವಿಷ್ಯ ನಿಧಿ ಸಂಸ್ಥೆ (ಇಪಿಎಫ್‌ಒ) ಅಡಿಯಲ್ಲಿ ಕಡ್ಡಾಯ ವ್ಯಾಪ್ತಿಗಾಗಿ ವೇತನ ಮಿತಿಯನ್ನು ತಿಂಗಳಿಗೆ 15,000 ರೂಪಾಯಿಗಳಿಂದ 25,000 ರೂಪಾಯಿಗಳಿಗೆ ಹೆಚ್ಚಿಸುವ ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯದ ಪ್ರಸ್ತಾವಕ್ಕೆ ಅನುಮೋದನೆ ನೀಡಿದೆ. ಈ ನಿರ್ಧಾರದಿಂದ 51 ಲಕ್ಷಕ್ಕೂ ಅಧಿಕ ಹೆಚ್ಚುವರಿ ಉದ್ಯೋಗಿಗಳನ್ನು ಕಡ್ಡಾಯ ಇಪಿಎಫ್‌ಒ ವ್ಯಾಪ್ತಿಯೊಳಗೆ ತರುವ ನಿರೀಕ್ಷೆಯಿದೆ, ಇದು ಕಾರ್ಮಿಕರಿಗೆ ಸಾಮಾಜಿಕ ಭದ್ರತಾ ರಕ್ಷಣೆಯನ್ನು ಗಣನೀಯವಾಗಿ ವಿಸ್ತರಿಸುತ್ತದೆ.

2004 ರಿಂದ 2014 ರವರೆಗಿನ ದಶಕದಲ್ಲಿ ಇಪಿಎಫ್ ಒ ​​ವೇತನ ಮಿತಿ ಬದಲಾಗದೆ ಉಳಿದಿತ್ತು. ಆದರೆ 2014 ರ ಸೆಪ್ಟೆಂಬರ್ ನಲ್ಲಿ ಅದನ್ನು 15,000 ರೂಪಾಯಿಗೆ ಗಣನೀಯವಾಗಿ ಹೆಚ್ಚಿಸಲಾಗಿತ್ತು. ಸದ್ಯದ ನಿರ್ಧಾರವು ನಿರಂತರ ವೇತನ ಬೆಳವಣಿಗೆ, ಹೆಚ್ಚುತ್ತಿರುವ ಆದಾಯ ಮತ್ತು ಮಧ್ಯಂತರ ವರ್ಷಗಳಲ್ಲಿ ಸಾಂಸ್ಥಿಕ ಉದ್ಯೋಗದ ನಿರಂತರ ವಿಸ್ತರಣೆಯನ್ನು ಪ್ರತಿಬಿಂಬಿಸಲು ಮಿತಿಯನ್ನು 25 ಸಾವಿರ ರೂಪಾಯಿಗೆ ಹೆಚ್ಚಿಸುವ ಮೂಲಕ ಈ ವಿಧಾನವನ್ನು ಮುಂದುವರಿಸುತ್ತದೆ.

ಸದ್ಯ ತಿಂಗಳಿಗೆ 15,000 ರೂಪಾಯಿಗಿಂತ ಅಧಿಕ ವೇತನದಲ್ಲಿ ಉದ್ಯೋಗಕ್ಕೆ ಸೇರುವ ಹೊಸ ಉದ್ಯೋಗಿ ಸ್ವಯಂಚಾಲಿತವಾಗಿ ಇಪಿಎಫ್  ಚೌಕಟ್ಟಿನಡಿ ಒಳಗೊಳ್ಳುವುದಿಲ್ಲ ಮತ್ತು ಕಡ್ಡಾಯ ಭವಿಷ್ಯ ನಿಧಿ, ಪಿಂಚಣಿ ಮತ್ತು ಸಂಬಂಧಿತ ವಿಮಾ ರಕ್ಷಣೆಯ ಹೊರಗೆ ಉಳಿಯಬಹುದು. ಮಿತಿಯನ್ನು25,000 ರೂಪಾಯಿಗೆ ಹೆಚ್ಚಳ ಮಾಡುವುದರಿಂದ 15,000 ರೂಪಾಯಿಯಿಂದ 25,000 ರೂಪಾಯಿವರೆಗಿನ ವೇತನ ಶ್ರೇಣಿಯಲ್ಲಿರುವ ಉದ್ಯೋಗಿಗಳ ಗಣನೀಯ ಭಾಗವು ಶಾಸನಬದ್ಧ ಸಾಮಾಜಿಕ ಭದ್ರತಾ ಚೌಕಟ್ಟಿನೊಳಗೆ ಬರುತ್ತದೆ.

ಈ ಅನುಮೋದನೆಯು ಅನ್ವಯವಾಗುವ ಯೋಜನೆಯ ನಿಬಂಧನೆಗಳಿಗೆ ಅನುಗುಣವಾಗಿ ಭವಿಷ್ಯ ನಿಧಿ ಉಳಿತಾಯ, ನೌಕರರ ಪಿಂಚಣಿ ಯೋಜನೆ (ಇಪಿಎಸ್) ಅಡಿಯಲ್ಲಿ ಪಿಂಚಣಿ ರಕ್ಷಣೆ ಮತ್ತು ನೌಕರರ ಠೇವಣಿ ಸಂಬಂಧಿತ ವಿಮಾ ಯೋಜನೆ (ಇಡಿಎಲ್ಐ) ಅಡಿಯಲ್ಲಿ ವಿಮಾ ರಕ್ಷಣೆಯ ಲಭ್ಯತೆಯನ್ನು ವಿಸ್ತರಣೆ ಮಾಡುತ್ತದೆ. ಇದು ಶಾಸನಬದ್ಧ ವಂತಿಗೆ ಮತ್ತು ಪಿಂಚಣಿ-ವೇತನದ ಚೌಕಟ್ಟನ್ನು ಚಾಲ್ತಿಯಲ್ಲಿರುವ ವೇತನ ಮಟ್ಟವನ್ನು ಉತ್ತಮವಾಗಿ ಪ್ರತಿಬಿಂಬಿಸಲು ಅನುವು ಮಾಡಿಕೊಡುತ್ತದೆ.

2014ರ ಸೆಪ್ಟೆಂಬರ್ ನಲ್ಲಿ ವೇತನ ಮಿತಿಯನ್ನು ಕೊನೆಯದಾಗಿ ಪರಿಷ್ಕರಿಸಿದಾಗಿನಿಂದ, ಭಾರತವು ನಿರಂತರ ವೇತನ ಬೆಳವಣಿಗೆ, ಹೆಚ್ಚುತ್ತಿರುವ ಆದಾಯ ಮತ್ತು ಸಾಂಸ್ಥಿಕ ಉದ್ಯೋಗದ ನಿರಂತರ ವಿಸ್ತರಣೆಯನ್ನು ಕಂಡಿದೆ. ಹಲವು ರಾಜ್ಯಗಳು ಮತ್ತು ವೃತ್ತಿಗಳಲ್ಲಿ, ಕನಿಷ್ಠ ವೇತನವು ಅಸ್ತಿತ್ವದಲ್ಲಿರುವ ಮಿತಿಗೆ ಹತ್ತಿರವಾಗಿದೆ. ಆದ್ದರಿಂದ 25,000 ರೂಪಾಯಿಗೆ ಹೆಚ್ಚಳವು ಹೆಚ್ಚುತ್ತಿರುವ ವೇತನ ಮಟ್ಟಗಳಿಗೆ ಅನುಗುಣವಾಗಿ ಇಪಿಎಫ್‌ಒ ಚೌಕಟ್ಟನ್ನು ನವೀಕರಿಸುತ್ತದೆ ಮತ್ತು ಸಂಘಟಿತವಲಯದ ಸಾಮಾಜಿಕ ಭದ್ರತೆಯ ಪ್ರಯೋಜನಗಳನ್ನು ದುಡಿಯುವ ಪಡೆಯ ವಿಶಾಲ ವಿಭಾಗಕ್ಕೆ ವಿಸ್ತರಿಸುತ್ತದೆ.

ಈ ಕ್ರಮವು ಉದ್ಯೋಗ, ಕಾರ್ಮಿಕರ ಧಾರಣ ಮತ್ತು ದೀರ್ಘಾವಧಿಯ ನಿವೃತ್ತಿ ಭದ್ರತೆಯ ಸಾಂಸ್ಥೀಕರಣಕ್ಕೆ ಮತ್ತಷ್ಟು ಉತ್ತೇಜನವನ್ನು ನೀಡುವ ನಿರೀಕ್ಷೆಯಿದೆ. ಹೆಚ್ಚಿನ ಸಂಖ್ಯೆಯ ಉದ್ಯೋಗಿಗಳನ್ನು ಶಾಸನಬದ್ಧ ಸಾಮಾಜಿಕ ಭದ್ರತಾ ಚೌಕಟ್ಟಿನೊಳಗೆ ಸ್ವಯಂಚಾಲಿತವಾಗಿ ತರುವ ಮೂಲಕ, ಔಪಚಾರಿಕ ಉದ್ಯೋಗವು ಪೋರ್ಟಬಲ್ ಮತ್ತು ಖಚಿತವಾದ ಸಾಮಾಜಿಕ ಭದ್ರತಾ ರಕ್ಷಣೆಯೊಂದಿಗೆ ಇರಬೇಕು ಎಂಬ ತತ್ವವನ್ನು ಈ ನಿರ್ಧಾರವು ಬಲಪಡಿಸುತ್ತದೆ. ಉದ್ಯೋಗದಾತರಿಗೂ ಸಹ, ವ್ಯಾಪಕವಾದ ಸಾಮಾಜಿಕ ಭದ್ರತಾ ವ್ಯಾಪ್ತಿಯು ಉದ್ಯೋಗಿಗಳ ಧಾರಣ, ಕಾರ್ಯಪಡೆಯ ಸ್ಥಿರತೆ, ನೈತಿಕತೆ ಮತ್ತು ಹೆಚ್ಚು ಸುರಕ್ಷಿತ ಮತ್ತು ಭವಿಷ್ಯಕ್ಕೆ ಸಿದ್ಧವಾಗಿರುವ ದುಡಿಯುವ ಪಡೆಯ ಅಭಿವೃದ್ಧಿಯನ್ನು ಬೆಂಬಲಿಸುತ್ತದೆ.

ಈ ಪ್ರಸ್ತಾವನೆಯು ವಿವರವಾದ ಅಂತರ-ಸಚಿವಾಲಯ ಸಮಾಲೋಚನೆಗಳಿಗೆ ಒಳಗಾಯಿತು ಮತ್ತು 2026ರ ಜೂನ್ 16 ರಂದು ನಡೆದ ತನ್ನ ಸಭೆಯಲ್ಲಿ ವೆಚ್ಚ ಹಣಕಾಸು ಸಮಿತಿಯು ಇದನ್ನು ಶಿಫಾರಸು ಮಾಡಿತು. ವಾರ್ಷಿಕ ಸರ್ಕಾರಿ ವೆಚ್ಚವು ಸುಮಾರು 11,339 ಕೋಟಿ ರೂ.ಗಳೆಂದು ಅಂದಾಜಿಸಲಾಗಿದೆ, ಇದು ಪ್ರಸ್ತುತ ವಾರ್ಷಿಕ ಬಜೆಟ್ ಬೆಂಬಲ ಸುಮಾರು 10,250 ಕೋಟಿ ರೂ.ಗಳಷ್ಟಿದೆ. ಐದು ವರ್ಷಗಳಲ್ಲಿ ಅಂದಾಜು ವೆಚ್ಚ ಸುಮಾರು 56,696 ಕೋಟಿ ರೂ.

ಇಪಿಎಫ್‌ಒ ಇಂದು ವಿಶ್ವದ ಅತಿದೊಡ್ಡ ಸಾಮಾಜಿಕ ಭದ್ರತಾ ವ್ಯವಸ್ಥೆಗಳಲ್ಲಿ ಒಂದನ್ನು ನಿರ್ವಹಿಸುತ್ತದೆ, ಇದು ನೌಕರರ ಭವಿಷ್ಯ ನಿಧಿ (ಇಪಿಎಫ್), ನೌಕರರ ಪಿಂಚಣಿ ಯೋಜನೆ (ಇಪಿಎಸ್) ಮತ್ತು ನೌಕರರ ಠೇವಣಿ ಸಂಬಂಧಿತ ವಿಮಾ ಯೋಜನೆ (ಇಡಿಎಲ್‌ಐ) ಅನ್ನು ನಿರ್ವಹಿಸುತ್ತದೆ. ಇತ್ತೀಚಿನ ಇಪಿಎಫ್‌ಒ ದತ್ತಾಂಶವು ಸುಮಾರು 7.68 ಲಕ್ಷ ಕೊಡುಗೆ ನೀಡುವ ಸಂಸ್ಥೆಗಳಲ್ಲಿ ಸುಮಾರು 7.98 ಕೋಟಿ ಕೊಡುಗೆ ನೀಡುವ ಸದಸ್ಯರನ್ನು ತೋರಿಸುತ್ತದೆ, ಆದರೆ ಇಪಿಎಸ್ ಸುಮಾರು 82 ಲಕ್ಷ ಪಿಂಚಣಿದಾರರಿಗೆ ಪಿಂಚಣಿ ಪ್ರಯೋಜನಗಳನ್ನು ಒದಗಿಸುತ್ತದೆ. ಇಡಿಎಲ್ಐ ಇಪಿಎಫ್ ಸದಸ್ಯತ್ವಕ್ಕೆ ಸಂಬಂಧಿಸಿದ ವಿಮಾ ರಕ್ಷಣೆಯನ್ನು ಒದಗಿಸುತ್ತದೆ.

ಭಾರತದ ದುಡಿಯುವ ಪಡೆಯು ಅದರ ಯಶೋಗಾಥೆಯ ಹೃದಯಭಾಗದಲ್ಲಿದೆ. ವೇತನ ಹೆಚ್ಚಾದಂತೆ, ಆದಾಯ ಸುಧಾರಿಸಿದಂತೆ ಮತ್ತು ಸಂಘಟಿತ ಉದ್ಯೋಗ ವಿಸ್ತರಿಸಿದಂತೆ, ಉದ್ಯೋಗ ಸೃಷ್ಟಿ ಮತ್ತು ಔಪಚಾರಿಕೀಕರಣದ ಮೇಲೆ ಸರ್ಕಾರವು ನಿರಂತರವಾಗಿ ಒತ್ತು ನೀಡುತ್ತಿರುವುದು ಕಾರ್ಮಿಕರಿಗೆ ಹೊಸ ಅವಕಾಶಗಳನ್ನು ಸೃಷ್ಟಿಸುತ್ತಿದೆ. ಇಪಿಎಫ್‌ಒ ವೇತನ ಮಿತಿಯ ಹೆಚ್ಚಳವು ಸಾಮಾಜಿಕ ಭದ್ರತಾ ಚೌಕಟ್ಟು ಕೂಡ ಈ ಪ್ರಗತಿಯೊಂದಿಗೆ ವೇಗ ಕಾಯ್ದುಕೊಳ್ಳುತ್ತದೆ ಮತ್ತು ಸಾಂಸ್ಥಿಕ  ಉದ್ಯೋಗದಲ್ಲಿರುವ ಹೆಚ್ಚಿನ ಸಂಖ್ಯೆಯ ಕಾರ್ಮಿಕರು ಶಾಸನಬದ್ಧ ಸಾಮಾಜಿಕ ಭದ್ರತಾ ರಕ್ಷಣೆಯನ್ನು ಪಡೆಯುತ್ತಾರೆ ಎಂಬುದನ್ನು ಖಾತ್ರಿಪಡಿಸುತ್ತದೆ.

ಸಚಿವ ಸಂಪುಟದ ಈ ಅನುಮೋದನೆಯು ಸಮಗ್ರ, ಸ್ಥಿತಿಸ್ಥಾಪಕ ಮತ್ತು ಭವಿಷ್ಯಕ್ಕೆ ಸಿದ್ಧವಾಗಿರುವ ಸಾಮಾಜಿಕ ಭದ್ರತಾ ವಾಸ್ತುಶಿಲ್ಪವನ್ನು ನಿರ್ಮಿಸುವತ್ತ ಮತ್ತೊಂದು ಪ್ರಮುಖ ಹೆಜ್ಜೆಯನ್ನು ಸೂಚಿಸುತ್ತದೆ. ಭಾರತವು ವಿಕಸಿತ ಭಾರತ@2047 ಕಡೆಗೆ ಸಾಗುತ್ತಿದ್ದಂತೆ ಆರ್ಥಿಕ ಬೆಳವಣಿಗೆ, ಹೆಚ್ಚುತ್ತಿರುವ ವೇತನ ಮತ್ತು ಸಾಂಸ್ಥಿಕ ಉದ್ಯೋಗವನ್ನು ವಿಸ್ತರಿಸುವುದರ ಜೊತೆಗೆ ಸಾಮಾಜಿಕ ರಕ್ಷಣೆ ಮುಂದುವರಿಯುತ್ತದೆ ಎಂದು ಖಚಿತಪಡಿಸುತ್ತದೆ.

ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯ ಮತ್ತು ಇಪಿಎಫ್‌ಒ ನಿರ್ಧಾರದ ಅನುಷ್ಠಾನಕ್ಕೆ ಅಗತ್ಯವಾದ ಶಾಸನಬದ್ಧ ಮತ್ತು ಆಡಳಿತಾತ್ಮಕ ಕ್ರಮಗಳನ್ನು ಕೈಗೊಳ್ಳಲಿದೆ.

*****