الف- تعارف

قومی شماریاتی دفتر (این ایس او) ، وزارت شماریات و پروگرام عمل درآمد (ایم او ایس پی آئی )کی جانب سے کرایا جانے والا متواتر افرادی قوت سروے (پی ایل ایف ایس) ، آبادی کی سرگرمیوں میں شرکت، روزگار اور بے روزگاری کی صورتحال سے متعلق اعداد و شمار کا بنیادی ذریعہ ہے۔ ملک کے لیے افرادی قوت سے متعلق اشاریوں کے ماہانہ اور سہ ماہی تخمینہ فراہم کرنے کے مقصد سے جنوری 2025 سے پی ایل ایف ایس کے سروے کے طریقہ کار میں تبدیلی کی گئی ہے۔

پی ایل ایف ایس کے ماہانہ نتائج ماہانہ بلیٹن کی شکل میں جاری کیے جاتے ہیں۔ ان بلیٹن میں موجودہ ہفتہ وار حیثیت (سی ڈبلیو ایس) کے طریقہ کار کے تحت پورے ملک کی سطح پر روزگار سے متعلق اہم اشاریوں، یعنی لیبر فورس پارٹیسپیشن ریٹ (ایل ایف پی آر)، ورک پاپولیشن ریشیو (ڈبلیو پی آر) اور بے روزگاری کی شرح (یو آر) کے تخمینے پیش کیے جاتے ہیں۔

اپریل 2025 سے جولائی 2026 تک کے ماہانہ بلیٹن پہلے ہی جاری کیے جاچکے ہیں۔ اگست 2026 کا موجودہ ماہانہ بلیٹن اس سلسلہ کا سترہواں بلیٹن ہے۔

موجودہ ہفتہ وار حیثیت (سی ڈبلیو ایس) کے مطابق 15 سال اور اس سے زیادہ عمر کے افراد سے متعلق اہم نتائج:

• لیبر فورس پارٹیسپیشن ریٹ (ایل ایف پی آر) میں اضافہ:

15 سال اور اس سے زیادہ عمر کے افراد کے لیے مجموعی لیبر فورس پارٹیسپیشن ریٹ (ایل ایف پی آر) جولائی 2026 کے 55.4 فیصد سے بڑھ کر اگست 2026 میں 55.6 فیصد ہوگیا۔ اسی طرح کا رجحان دیہی علاقوں میں بھی دیکھا گیا، جہاں 15 سال اور اس سے زیادہ عمر کے افراد کا ایل ایف پی آرجولائی 2026 کے 58.0 فیصد سے بڑھ کر اگست 2026 میں 58.2 فیصد ہوگیا۔ شہری علاقوں میں ایل ایف پی آراگست 2026 میں 50.4 فیصد پر برقرار رہا، جو گزشتہ ماہ بھی اتنا ہی تھا۔

گزشتہ سال کے اسی مہینے کے مقابلے میں مجموعی ایل ایف پی آرمیں 0.6 فیصد پوائنٹ کا اضافہ ہوا اور یہ اگست 2025 کے 55.0 فیصد سے بڑھ کر اگست 2026 میں 55.6 فیصد ہوگیا۔ اسی مدت کے دوران دیہی علاقوں میں ایل ایف پی آر  میں بھی 1.2 فیصد پوائنٹس کا اضافہ ہوا اور یہ 57.0 فیصد سے بڑھ کر 58.2 فیصد ہوگیا، جبکہ شہری علاقوں میں ایل ایف پی آر میں معمولی طور پر 0.5 فیصد پوائنٹ کی کمی ہوئی اور یہ 50.9 فیصد سے گھٹ کر 50.4 فیصد رہ گیا۔

• خواتین کی لیبر فورس پارٹیسپیشن ریٹ (LFPR) میں مسلسل اضافہ:

مجموعی خواتین لیبر فورس پارٹیسپیشن ریٹ (ایل ایف پی آر) جولائی 2026 کے 34.4 فیصد سے معمولی اضافے کے ساتھ اگست 2026 میں 34.8 فیصد ہوگیا۔ اس اضافے میں بنیادی طور پر دیہی خواتین کے ایل ایف پی آر کا اہم کردار رہا، جو گزشتہ ماہ کے 38.8 فیصد سے بڑھ کر رواں ماہ 39.4 فیصد ہوگیا۔ اسی مدت کے دوران شہری علاقوں میں خواتین کا ایل ایف پی آر بڑی حد تک مستحکم رہا اور جولائی 2026 کے 25.3 فیصد کے مقابلے میں اگست 2026 میں 25.4 فیصد رہا۔

گزشتہ ایک سال کے دوران مجموعی خواتین ایل ایف پی آر میں 1.1 فیصد پوائنٹس کا اضافہ ہوا اور یہ اگست 2025 کے 33.7 فیصد سے بڑھ کر اگست 2026 میں 34.8 فیصد ہوگیا۔ اسی مدت کے دوران دیہی علاقوں میں خواتین ایل ایف پی آر میں 2.0 فیصد پوائنٹس کا اضافہ ہوا اور یہ 37.4 فیصد سے بڑھ کر 39.4 فیصد ہوگیا، جبکہ شہری خواتین ایل ایف پی آر میں 0.7 فیصد پوائنٹ کی کمی ہوئی اور یہ 26.1 فیصد سے گھٹ کر 25.4 فیصد رہ گیا۔

• دیہی علاقوں میں خواتین اور مردوں-دونوں کی افرادی قوت  کی شرکت میں اضافہ:

مجموعی ورک پاپولیشن ریشیو (ڈبلیو پی آر)جولائی 2026 کے 52.5 فیصد سے بڑھ کر اگست 2026 میں 52.8 فیصد ہوگیا۔ اس اضافے کی بنیادی وجہ دیہی علاقوں میں افرادی قوت کی شرکت میں اضافہ ہے۔ دیہی علاقوں میں ڈبلیو پی آر گزشتہ ماہ کے 55.4 فیصد سے بڑھ کر اگست 2026 میں 55.8 فیصد ہوگیا، جبکہ شہری علاقوں میں ڈبلیو پی آر اگست 2026 میں 47.0 فیصد پر برقرار رہا، جو جولائی 2026 میں بھی اتنا ہی تھا۔

گزشتہ سال کے اسی مہینے کے مقابلے میں مجموعی ڈبلیو پی آر میں 0.6 فیصد پوائنٹ کا اضافہ ہوا اور یہ اگست 2025 کے 52.2 فیصد سے بڑھ کر اگست 2026 میں 52.8 فیصد ہوگیا۔ اسی مدت کے دوران دیہی علاقوں میں ڈبلیو پی آرمیں 1.3 فیصد پوائنٹس کا اضافہ ہوا اور یہ 54.5 فیصد سے بڑھ کر 55.8 فیصد ہوگیا، جبکہ شہری علاقوں میں ڈبلیو پی آر اگست 2025 کے 47.5 فیصد سے کم ہوکر اگست 2026 میں 47.0 فیصد رہ گیا، یعنی اس میں 0.5 فیصد پوائنٹ کی کمی ریکارڈ کی گئی۔

• دیہی علاقوں میں بے روزگاری کی شرح(یوآر) میں گراوٹ:

15 سال اور اس سے زیادہ عمر کے افراد میں مجموعی بے روزگاری کی شرح (یو آر)جولائی 2026 کے 5.1 فیصد سے معمولی کمی کے ساتھ اگست 2026 میں 5.0 فیصد ہوگئی۔ اسی مدت کے دوران دیہی علاقوں میں بے روزگاری کی شرح 4.5 فیصد سے کم ہوکر 4.1 فیصد رہ گئی، جبکہ شہری علاقوں میں یہ شرح جولائی 2026 کے 6.7 فیصد کے مقابلے میں اگست 2026 میں 6.8 فیصد رہی اور تقریباً مستحکم رہی۔

اگست 2025 کے مقابلے میں اگست 2026 میں مجموعی بے روزگاری کی شرح اور شہری علاقوں کی بے روزگاری کی شرح بڑی حد تک مستحکم رہی، جبکہ دیہی علاقوں میں بے روزگاری کی شرح میں 0.2 فیصد پوائنٹ کی کمی ہوئی اور یہ اگست 2025 کے 4.3 فیصد سے گھٹ کر اگست 2026 میں 4.1 فیصد رہ گئی۔

• مردوں اور خواتین، دونوں میں دیہی بے روزگاری کی شرح (یو آر) میں کمی:

پندرہ (15)سال اور اس سے زیادہ عمر کے مردوں میں مجموعی بے روزگاری کی شرح (یو آر) مسلسل تین ماہ سے کم ہوئی ہے اور مئی 2026 کے 5.4 فیصد سے گھٹ کر اگست 2026 میں 4.9 فیصد ہوگئی۔ دیہی علاقوں میں مردوں کی بے روزگاری کی شرح جولائی 2026 کے 4.6 فیصد سے کم ہوکر اگست 2026 میں 4.3 فیصد ہوگئی، جبکہ اسی مدت کے دوران شہری علاقوں میں مردوں کی بے روزگاری کی شرح معمولی اضافے کے ساتھ 5.9 فیصد سے بڑھ کر 6.1 فیصد ہوگئی۔

15 سال اور اس سے زیادہ عمر کی خواتین میں مجموعی بے روزگاری کی شرح مسلسل دو ماہ سے کم ہوئی ہے اور جون 2026 کے 5.9 فیصد سے گھٹ کر اگست- 2026 میں 5.1 فیصد ہوگئی۔ دیہی علاقوں میں خواتین کی بے روزگاری کی شرح جولائی 2026 کے 4.3 فیصد سے کم ہوکر اگست 2026 میں 3.9 فیصد ہوگئی، جبکہ شہری علاقوں میں خواتین کی بے روزگاری کی شرح گزشتہ ماہ کے مقابلے میں بڑی حد تک مستحکم رہی۔

سال بہ سال موازنہ سے ظاہر ہوتا ہے کہ اگست 2026 میں مردوں اور خواتین دونوں کی مجموعی بے روزگاری کی شرح میں کوئی نمایاں تبدیلی نہیں ہوئی۔

 

 

***

 ش ح – ظ الف –  ن ع

UR No. 3583

(ریلیز آئی ڈی: 2310572) وزیٹر کاؤنٹر : 5