کلاس روم سے لے کر کمیونٹیز تک، کیرالہ کی ایکوسینس پہل سوچھ بھارت مشن اربن 2.0 کے تحت طلبہ کو کچرے کے بہتر انتظام کے لئے فعال طور پر کام کرنے والے چمپئن میں تبدیل کر رہی ہے۔ تقریباً 46,000 اسکالرشپ دیے جانے کے ساتھ یہ پروگرام نوجوان شہریوں میں ماحول دوست صلاحیتوں کو فروغ دینے کے ساتھ ساتھ پائیدار عادات کو بھی پروان چڑھا رہا ہے۔

اگر کچرے سے پاک شہر کی طرف سفر فضلہ پروسیسنگ کی سہولت سے نہیں، بلکہ کلاس روم کے اندر شروع ہو سکتا ہے تو کیا ہوگا؟ کیرالہ بالکل ایسا ہی کر رہا ہے۔

پورے ملک میں سوچھ بھارت مشن اربن 2.0 (ایس بی ایم-یو 2.0) کے تحت ایسے نئے اقدامات کو فروغ دیا جا رہا ہے جو بنیادی ڈھانچے اور کچرے کے انتظام کے نظام سے آگے بڑھ کر عوام، ان کی شمولیت اور رویوں میں تبدیلی پر توجہ مرکوز کرتے ہیں۔ بچوں اور نوجوانوں کو کچرے کے عملی انتظام سے متعلق سرگرمیوں میں شامل کرکے یہ پروگرام کچرے کو الگ الگ کرنے، دوبارہ استعمال، وسائل کے تحفظ اور پائیدار طرز زندگی کو روزمرہ زندگی کا حصہ بنانے میں مدد دے رہے ہیں۔

کیرالہ کی اسٹوڈنٹ گرین بریگیڈ اسکالرشپ-ایکو سینس اس نقطہ نظر کی ایک طاقتور مثال ہے۔ لوکل سیلف گورنمنٹ ڈپارٹمنٹ کی قیادت میں، کیرالہ کے جنرل ایجوکیشن ڈپارٹمنٹ کے تعاون سے، یہ پہل اسکولوں کو ایسی جگہوں میں تبدیل کر رہی ہے، جہاں نوجوان ذہن نہ صرف فضلہ کے انتظام کے بارے میں سیکھتے ہیں، بلکہ وہ اس پر فعال طور پر عمل کرتے ہیں ۔

کیرالہ حکومت کے مقامی خود حکمرانی کے محکمے کی قیادت میں محکمہ عمومی تعلیم کے اشتراک سے نافذ کی گئی ایکوسینس اسکالرشپ ریاست میں کچرے کے انتظام سے متعلق طلبہ پر مرکوز سب سے بڑے پروگراموں میں سے ایک بن کر ابھری ہے۔ اس پروگرام کا مقصد کچرے کے انتظام میں فعال طور پر حصہ لینے والے 50,000 طلبہ کو اسکالرشپ فراہم کرنا ہے، ساتھ ہی ایسی نسل تیار کرنا ہے جو ماحول دوست مہارتوں اور ماحولیاتی ذمہ داری کے مضبوط احساس سے لیس ہو۔

یہ اسکالرشپ پروگرام محض بیداری پیدا کرنے تک محدود نہیں ہے۔ اس کا مقصد کچرے کے سائنسی انتظام کے طریقوں کو فروغ دینا، طلبہ کو مقامی سطح پر کچرے سے متعلق مسائل کے اختراعی حل تلاش کرنے کی ترغیب دینا، کچرے کی پیداوار میں کمی لانا اور کچرے کے پائیدار انتظام کے نظام کی عملی سمجھ پیدا کرنا ہے۔

اس اسکیم کے تحت ہر گرام پنچایت سے 50 طلباء ، ہر میونسپلٹی سے 75 طلباء اور ہر کارپوریشن سے 100 طلباء کو اسکالرشپ کے لیے منتخب کیا جاتا ہے۔ اس سال اَپر پرائمری زمرے میں کلاس 6 اور 7 ، ہائی اسکول زمرے میں کلاس 8 اور 9  اور ہائر سیکنڈری اور ووکیشنل ہائر سیکنڈری زمروں کے پہلے سال کے طلباء کو شامل کیا گیا۔

ہر منتخب طالب علم کو شناخت کے سرٹیفکیٹ کے ساتھ 1500 روپے کی اسکالرشپ ملتی ہے، جو سوچھتا کے لیے ان کے تعاون کی حوصلہ افزائی اور اعتراف دونوں فراہم کرتی ہے۔

شرکت کی اس وسیع سطح سے کیرالہ کے طلبہ میں ماحولیاتی سرگرمیوں کے تئیں بڑھتی ہوئی دلچسپی کا اندازہ ہوتا ہے۔ اس سال ریاست کے 986 مقامی خود حکمرانی کے اداروں میں 45,880 طلبہ کو اسکالرشپ دی جا رہی ہے۔ تقریباً 9,000 اسکولوں کے قریب پانچ لاکھ طلبہ نے اس پروگرام میں حصہ لیا، جس سے یہ پہل ریاست بھر میں سیکھنے اور عملی سرگرمی کا ایک وسیع پروگرام بن گئی ہے۔

اس پروگرام کو طلباء کو کلاس روم کے مباحثوں تک محدود رکھنے کے بجائے فضلہ کے انتظام کے طریقوں سے نمٹنے کے لیے ڈیزائن کیا گیا تھا۔ متعدد سرگرمیوں کے ذریعے، طلباء نے اپنے گھروں کے اندر فضلہ کے انتظام کے نظام، فضلہ کی پیداوار کو کم کرنے کے طریقے، گرین پروٹوکول کی پابندی  اور گرین اسکول اور کلین اسکول کے اقدامات کے اصولوں کی کھوج کی۔ انہوں نے کھاد بنانے اور ضائع شدہ مواد کے دوبارہ استعمال کا عملی علم بھی حاصل کیا ۔

اسکول کی سطح پر ، طلباء اور اساتذہ نے متنوع سرگرمیاں شروع کیں،جنہوں نے ان تصورات کو عملی جامہ پہنایا۔ ان میں ماخذ سطح کے کچرے کو الگ کرنے کے لیے ڈبے قائم کرنا ، بائیوڈیگریجبل کچرے کو کھاد میں تبدیل کرنے کے لیے نظام تیار کرنا، مرمت کی دکانیں قائم کرنا اور نامیاتی کاشتکاری کو فروغ دینا شامل تھا۔ طلباء نے گھریلو دوروں، دکانوں کے تبادلے اور صفائی کے کلبوں میں بھی حصہ لیا، جبکہ دستکاری کی سرگرمیوں کے ذریعے ضائع شدہ مواد کو تخلیقی طور پر دوبارہ استعمال کیا۔

پروگرام کا ایک اہم پہلو میٹریل کلیکشن فیسلٹیز  اور ریسورس ریکوری فیسلٹیز کے دوروں کے ذریعے طلبہ کو عملی معلومات فراہم کرنا تھا۔ ان دوروں سے طلبہ کو یہ سمجھنے میں مدد ملی کہ گھروں سے نکلنے کے بعد کچرے کے ساتھ کیا ہوتا ہے اور مؤثر طریقے سے وسائل کی بازیابی اور سائنسی انداز میں کچرے کے انتظام کے لیے کچرے کو اس کے ماخذ پر الگ کرنا کیوں ضروری ہے۔

طلباء کو اپنی برادریوں میں فضلہ کے انتظام کے خدشات کی نشاندہی کرنے اور ان سے نمٹنے میں فعال کردار ادا کرنے کی بھی ترغیب دی گئی۔ سرگرمیوں میں فضلہ کے انتظام سے متعلق خلاف ورزیوں کی اطلاع دینا اور طلباء کی قیادت میں گھر گھر جانا، نوجوان شرکاء کو اپنے خاندانوں اور محلوں میں ذمہ دار فضلہ کے طریقوں کا سفیر بننے کے قابل بنانا شامل تھا۔

پورے نومبر میں، کیرالہ کے اسکولوں میں بچوں کے لیے گرین اسمبلیوں (ہریتھا سبھائیں) کا انعقاد کیا گیا، جس سے طلباء کے لیے ماحولیاتی مسائل پر تبادلہ خیال کرنے، خیالات کا اشتراک کرنے اور فضلہ کے بہتر انتظام کے لیے اجتماعی طور پر حل تلاش کرنے کا ایک اور موقع پیدا ہوا ۔

طلبہ کو کچرے کے انتظام سے متعلق سرگرمیوں کے مرکز میں رکھ کر ایکوسینس نے یہ ثابت کیا ہے کہ نوجوان پائیدار معاشروں کی تعمیر میں مؤثر شراکت دار بن سکتے ہیں۔ گھر میں کچرے کو الگ کرنے اور حیاتیاتی کچرے سے کھاد بنانے سے لے کر ضائع شدہ اشیا کو دوبارہ استعمال کرنے اور وسائل کی بازیابی کو سمجھنے تک، طلبہ صرف سوچھتا کے بارے میں سیکھ نہیں رہے بلکہ عملی طور پر اسے اپنی زندگی کا حصہ بنا رہے ہیں۔

**********

 

ش ح۔ ک ا۔ن ع

U. No-3437

 

(ریلیز آئی ڈی: 2310203) وزیٹر کاؤنٹر : 7