ಈ ದೇಶಕ್ಕೆ ಸದಾ ಅನ್ನ ನೀಡುತ್ತಿದ್ದ ರೈತ, ಈಗ ಅನ್ನದಾತನಿಂದ ಇಂಧನದಾತನಾಗಿ ಬೆಳೆಯುವ ಮೂಲಕ, ದೇಶಕ್ಕೆ ಬೆಳಕನ್ನೂ ನೀಡುತ್ತಿದ್ದಾನೆ ಎಂದು ಕೇಂದ್ರ ನವ ಮತ್ತು ನವೀಕರಿಸಬಹುದಾದ ಇಂಧನ, ಶಿಕ್ಷಣ ಹಾಗೂ ಗ್ರಾಹಕ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣಾ ಸಚಿವರಾದ ಶ್ರೀ ಪ್ರಲ್ಹಾದ್ ಜೋಶಿ ಅವರು ತಿಳಿಸಿದರು. ಇಂದು ನವದೆಹಲಿಯಲ್ಲಿ ನಡೆದ 7ನೇ ಅಗ್ರಿ ವೋಲ್ಟಾಯಿಕ್ಸ್ ವಿಶ್ವ ಸಮ್ಮೇಳನ 2026 ರ ರಂಗಸಜ್ಜಿಕೆ ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡುತ್ತಾ ಅವರು ಈ ವಿಷಯ ತಿಳಿಸಿದರು.

ಪಿಎಂ-ಕುಸುಮ್ (PM-KUSUM) ಯೋಜನೆಯ ಮುಂದಿನ ಹಂತವು, ಅಗ್ರಿ ವೋಲ್ಟಾಯಿಕ್ಸ್‌ಗಾಗಿ ನಿಗದಿತ ಘಟಕವನ್ನು ಹೊಂದಿರಲಿದ್ದು, ಇದು ರೈತರಿಗೆ ಕೃಷಿಯನ್ನು ಮುಂದುವರಿಸುವುದರ ಜೊತೆಗೆ ವಿದ್ಯುತ್‌ನಿಂದ ಆದಾಯ ಗಳಿಸಲು ಅನುವು ಮಾಡಿಕೊಡುತ್ತದೆ ಎಂದು ಕೇಂದ್ರ ಸಚಿವರು ಹೇಳಿದರು. ಭೂಮಿಯ ಮಾಲೀಕತ್ವವು ರೈತರ ಬಳಿಯೇ ಉಳಿಯುವುದನ್ನು ಖಚಿತಪಡಿಸಿಕೊಳ್ಳುವಾಗ, ಸಣ್ಣ ಮತ್ತು ಅಂಚಿನ ರೈತರು, ರೈತ ಉತ್ಪಾದಕ ಸಂಸ್ಥೆಗಳು (FPOs), ಸಹಕಾರ ಸಂಘಗಳು ಮತ್ತು ಪಂಚಾಯತ್‌ಗಳ ಮೇಲೆ ಹೆಚ್ಚಿನ ಗಮನ ಹರಿಸಲಾಗುವುದು ಎಂದು ಅವರು ಹೇಳಿದರು. ಮುಂಗಾರು ಮತ್ತು ಮಾರುಕಟ್ಟೆ ಬೆಲೆಗಳನ್ನು ಅವಲಂಬಿಸಿರುವ ರೈತರಿಗೆ ಸೌರ ಆದಾಯವು ಹೆಚ್ಚಿನ ಆದಾಯ ಭದ್ರತೆಯನ್ನು ಒದಗಿಸುತ್ತದೆ ಎಂದು ಅವರು ತಿಳಿಸಿದರು.

ಒಬ್ಬ ರೈತ ಒಂದೇ ಎಕರೆ ಭೂಮಿಯಿಂದ ಮೂರು ರೀತಿಯ ಆದಾಯವನ್ನು ಗಳಿಸಬಹುದು — ಮಾರಾಟವಾದ ಬೆಳೆಯಿಂದ, ಡಿಸ್ಕಾಮ್‌ಗೆ (DISCOM) ಮಾರಾಟವಾದ ವಿದ್ಯುತ್‌ನಿಂದ ಮತ್ತು ಡೀಸಲ್ ಮೇಲೆ ಉಳಿತಾಯವಾದ ಹಣದಿಂದ ಎಂದು ಶ್ರೀ ಜೋಶಿ ಹೇಳಿದರು. ಸಣ್ಣ ರೈತನಿಗೆ ಸೌರ ಆದಾಯವು ಕೇವಲ ಹೆಚ್ಚುವರಿ ಆದಾಯವಲ್ಲ, ಅದು ಅವರ ಭದ್ರತೆಯಾಗಿದೆ ಎಂದು ಹೇಳಿದ ಅವರು, ಇದು ಒಳ್ಳೆಯ ಮತ್ತು ಕೆಟ್ಟ ವರ್ಷಗಳೆರಡರಲ್ಲೂ ನಿಯಮಿತ ಆದಾಯದ ಮೂಲವನ್ನು ಒದಗಿಸುತ್ತದೆ ಎಂದು ಸೇರಿಸಿದರು.

ಭಾರತವು ವಿಶ್ವದ ಶೇಕಡಾ 18 ರಷ್ಟು ಜನಸಂಖ್ಯೆಯನ್ನು ಹೊಂದಿದೆ, ಆದರೆ ಪ್ರಪಂಚದ ಶೇಕಡಾ 2.4 ರಷ್ಟು ಭೂಮಿಯನ್ನು ಹೊಂದಿದೆ, ಶೇಕಡಾ 85 ಕ್ಕಿಂತ ಹೆಚ್ಚು ರೈತರು 2 ಹೆಕ್ಟೇರ್‌ಗಿಂತ ಕಡಿಮೆ ಭೂಮಿಯಲ್ಲಿ ಕೃಷಿ ಮಾಡುವ ಸಣ್ಣ ಮತ್ತು ಅಂಚಿನ ರೈತರಾಗಿದ್ದಾರೆ ಎಂದು ಸಚಿವರು ಒತ್ತಿ ಹೇಳಿದರು. ಅಗ್ರಿ ವೋಲ್ಟಾಯಿಕ್ಸ್‌ನೊಂದಿಗೆ, ನಾವು ಬೆಳೆ ಅಥವಾ ಸೌರ ವಿದ್ಯುತ್ ಸ್ಥಾವರದ ನಡುವೆ ಒಂದನ್ನು ಆಯ್ಕೆ ಮಾಡಿಕೊಳ್ಳುವ ಅಗತ್ಯವಿಲ್ಲ, ನಾವು ಎರಡನ್ನೂ ಒಂದೇ ಸಮಯದಲ್ಲಿ ಮಾಡಬಹುದು ಎಂದು ಅವರು ತಿಳಿಸಿದರು. ಅದೇ ಭೂಮಿಯಲ್ಲಿ ಕೆಳಗೆ ಬೆಳೆಗಳನ್ನು ಬೆಳೆಯುವುದನ್ನು ಮುಂದುವರಿಸಬಹುದು ಮತ್ತು ಮೇಲೆ ಸ್ವಚ್ಛ ಇಂಧನವನ್ನು ಉತ್ಪಾದಿಸಬಹುದು.

ಕಳೆದ ವರ್ಷ ಭಾರತವು 55.29 ಗಿಗಾವ್ಯಾಟ್ (GW) ನಾನ್-ಫಾಸಿಲ್ (ಪಳೆಯುಳಿಕೆಯೇತರ) ಸಾಮರ್ಥ್ಯವನ್ನು ಸೇರಿಸಿದೆ ಎಂದು ಸಚಿವರು ಹೇಳಿದರು, ಇದು ನಾರ್ವೆ (40.6 GW), ಸ್ವಿಟ್ಜರ್ಲ್ಯಾಂಡ್ (ಸುಮಾರು 30 GW), ಆಸ್ಟ್ರಿಯಾ (34 GW) ಮತ್ತು ಬೆಲ್ಜಿಯಂ (ಸುಮಾರು 33 GW) ನಂತಹ ಹಲವಾರು ಅಭಿವೃದ್ಧಿ ಹೊಂದಿದ ದೇಶಗಳ ಒಟ್ಟು ಸ್ಥಾಪಿತ ವಿದ್ಯುತ್ ಸಾಮರ್ಥ್ಯಕ್ಕಿಂತ ಹೆಚ್ಚಾಗಿದೆ.

ಪಿಎಂ-ಕುಸುಮ್ ಅಡಿಯಲ್ಲಿ ಸಾಧಿಸಿದ ಪ್ರಗತಿಯನ್ನು ಉಲ್ಲೇಖಿಸಿದ ಶ್ರೀ ಜೋಶಿ ಅವರು, ಸುಮಾರು 29 ಲಕ್ಷ ಪಂಪ್‌ಗಳನ್ನು ಸೌರೀಕರಿಸಲಾಗಿದೆ ಎಂದು ಹೇಳಿದರು. ಕಳೆದ ವರ್ಷ ವಿಕೇಂದ್ರೀಕೃತ ಸೌರಶಕ್ತಿಯು 16.3 ಗಿಗಾವ್ಯಾಟ್ ಕೊಡುಗೆ ನೀಡಿದ್ದು, ಅದರಲ್ಲಿ ಪಿಎಂ-ಕುಸುಮ್‌ನಿಂದ 7.6 ಗಿಗಾವ್ಯಾಟ್ ಮತ್ತು ರೂಫ್‌ಟಾಪ್ ಸೋಲಾರ್‌ನಿಂದ 8.7 ಗಿಗಾವ್ಯಾಟ್ ಸೇರಿದೆ, ಇದು ಪ್ರಮುಖವಾಗಿ 5.6 ಮಿಲಿಯನ್ ಫಲಾನುಭವಿಗಳನ್ನು ತಲುಪುತ್ತಿರುವ ಪಿಎಂ ಸೂರ್ಯ ಘರ್ ಉಚಿತ ವಿದ್ಯುತ್ ಯೋಜನೆಯಡಿಯಲ್ಲಿದೆ ಎಂದೂ ಅವರು ಹೇಳಿದರು.

ವಿವಿಧ ಬೆಳೆಗಳು, ಹವಾಮಾನಗಳು ಮತ್ತು ಪ್ರದೇಶಗಳಿಗೆ ಯಾವುದು ಸೂಕ್ತವಾಗಿ ಕಾರ್ಯನಿರ್ವಹಿಸುತ್ತದೆ ಎಂಬುದನ್ನು ಅರ್ಥಮಾಡಿಕೊಳ್ಳಲು ಅಗ್ರಿ ವೋಲ್ಟಾಯಿಕ್ಸ್ ಕುರಿತು ಹೆಚ್ಚಿನ ಸಂಶೋಧನೆಯ ಅಗತ್ಯವನ್ನು ಕೇಂದ್ರ ಸಚಿವರು ಒತ್ತಿ ಹೇಳಿದರು. ಅವರು ಪುಣೆಯಲ್ಲಿರುವ 'ಬೈಫ್'ನ (BAIF) ಗ್ರಾಮೀಣ ನಾವೀನ್ಯತೆ ಕೇಂದ್ರದ ಉದಾಹರಣೆಯನ್ನು ನೀಡಿದರು, ಅಲ್ಲಿ ಸಂಶೋಧಕರು 30 ಬೆಳೆಗಳಲ್ಲಿ 17 ಸೌರ ಸಂರಚನೆಗಳನ್ನು ಪರೀಕ್ಷಿಸುತ್ತಿದ್ದಾರೆ. ಪ್ರತಿಯೊಂದು ಕೃಷಿ ಪರಿಸ್ಥಿತಿಗೆ ಬೆಳೆ, ಪ್ಯಾನಲ್ ಎತ್ತರ, ಅಂತರ, ಟ್ರ್ಯಾಕಿಂಗ್ ವ್ಯವಸ್ಥೆ ಮತ್ತು ಉದ್ಯಮ ಮಾದರಿಯ ಸರಿಯಾದ ಸಂಯೋಜನೆಯನ್ನು ಕಂಡುಕೊಳ್ಳುವ ಮಹತ್ವವನ್ನು ಅವರು ಒತ್ತಿಹೇಳಿದರು.

ಸಂಶೋಧಕರು, ಉದ್ಯಮ ಮತ್ತು ನಾವೀನ್ಯಕಾರರು ಸೇರಿದಂತೆ ಎಲ್ಲಾ ಪಾಲುದಾರರಿಗೆ ಶ್ರೀ ಜೋಶಿ ಅವರು ಹಲವು ಪ್ರಮುಖ ವಿಷಯಗಳ ಮೇಲೆ ಗಮನ ಹರಿಸಲು ಆಗ್ರಹಿಸಿದರು. ಟ್ರ್ಯಾಕ್ಟರ್‌ಗಳು ಮತ್ತು ಕೊಯ್ಲು ಯಂತ್ರಗಳು (ಹಾರ್ವೆಸ್ಟರ್‌ಗಳು) ಮುಕ್ತವಾಗಿ ಸಂಚರಿಸಲು ಅನುವು ಮಾಡಿಕೊಡುವ ಹಾಗೂ ಸ್ಥಳೀಯ ಹವಾಮಾನ ಪರಿಸ್ಥಿತಿಗಳನ್ನು ತಡೆದುಕೊಳ್ಳುವ ರಚನೆಗಳ ನಿರ್ಮಾಣ, ಐಸಿಎಆರ್ (ICAR), ಕೃಷಿ ವಿಶ್ವವಿದ್ಯಾಲಯಗಳು ಮತ್ತು ಕೃಷಿ ವಿಜ್ಞಾನ ಕೇಂದ್ರಗಳ ಮೂಲಕ ಬೆಳೆ-ವಾರಿ ಹಾಗೂ ಪ್ರದೇಶ-ವಾರಿ ದತ್ತಾಂಶ ಸಂಗ್ರಹಣೆ ಮತ್ತು ಸಾಂಪ್ರದಾಯಿಕ ಸೌರಶಕ್ತಿಗೆ ಹೋಲಿಸಿದರೆ ವೆಚ್ಚದ ಅಂತರವನ್ನು ಕಡಿಮೆ ಮಾಡಲು ರಚನೆಗಳು, ಸಾಮಗ್ರಿಗಳು ಹಾಗೂ ಮೌಂಟಿಂಗ್ ವ್ಯವಸ್ಥೆಗಳಲ್ಲಿ ನಾವೀನ್ಯತೆ ತರುವಂತೆ ಅವರು ಕರೆ ನೀಡಿದರು. ಭಾರತವು ಈಗಾಗಲೇ ಗ್ರಾಮ ಮಟ್ಟದಲ್ಲಿ ಕೌಶಲ್ಯಗಳನ್ನು ನಿರ್ಮಿಸುತ್ತಿದ್ದು, ಸುಮಾರು 70,000 'ಸೂರ್ಯ ಮಿತ್ರ'ರಿಗೆ ತರಬೇತಿ ನೀಡಿದೆ ಎಂದು ಅವರು ಹೇಳಿದರು.

ಅಗ್ರಿ ವೋಲ್ಟಾಯಿಕ್ಸ್‌ನಲ್ಲಿ ಭಾರತದ ಅನುಭವವು ವಿಶೇಷವಾಗಿ ಜಾಗತಿಕ ದಕ್ಷಿಣಕ್ಕೆ (Global South) ಅತ್ಯಂತ ಸೂಕ್ತವಾಗಿದೆ ಎಂದು ಸಚಿವರು ಹೇಳಿದರು, ಇಲ್ಲಿನ ಕೃಷಿ ಭೂಮಿಗಳು ಸಣ್ಣ ಹಿಡುವಳಿಗಳನ್ನು ಹೊಂದಿದ್ದು, ಹೇರಳವಾದ ಸೂರ್ಯನ ಬೆಳಕು ಮತ್ತು ಬೆಳೆಯುತ್ತಿರುವ ವಿದ್ಯುತ್ ಜಾಲಗಳನ್ನು ಹೊಂದಿವೆ. ಭಾರತದ ಈ ವಿಶಾಲ ಪ್ರಮಾಣವು ಜಾಗತಿಕ ದಕ್ಷಿಣದಾದ್ಯಂತ ಅನುಕರಿಸಬಹುದಾದ ಕೈಗೆಟುಕುವ ಮತ್ತು ಪ್ರಾಯೋಗಿಕ ಪರಿಹಾರಗಳನ್ನು ಅಭಿವೃದ್ಧಿಪಡಿಸಲು ಅವಕಾಶವನ್ನು ಒದಗಿಸುತ್ತದೆ ಎಂದು ಅವರು ತಿಳಿಸಿದರು.

ರಂಗಸಜ್ಜಿಕೆ ಕಾರ್ಯಕ್ರಮದ ಸಮಯದಲ್ಲಿ, ಕೇಂದ್ರ ಸಚಿವರು ಅಧಿಕೃತ ಸಮ್ಮೇಳನದ ಲೋಗೋವನ್ನು ಅನಾವರಣಗೊಳಿಸುವುದರ ಜೊತೆಗೆ 7ನೇ ಅಗ್ರಿ ವೋಲ್ಟಾಯಿಕ್ಸ್ ವಿಶ್ವ ಸಮ್ಮೇಳನ 2026ರ ಟೀಸರ್ ಅನ್ನು ಬಿಡುಗಡೆ ಮಾಡಿದರು. ಭಾರತದ ರಾಷ್ಟ್ರೀಯ ಸೌರಶಕ್ತಿ ಒಕ್ಕೂಟ (NSEFI), ಜ್ಞಾನ ಪಾಲುದಾರರಾಗಿ "ಫ್ಯೂಯೆಲಿಂಗ್ ಫಾರ್ಮ್ ಟು ಫೋರ್ಕ್ ಇನ್ನೋವೇಶನ್ಸ್" ವಿಷಯದ ಅಡಿಯಲ್ಲಿ 'ಅಗ್ರಿ ವೋಲ್ಟಾಯಿಕ್ಸ್ ಪಿಚ್ ಹಬ್' ಅನ್ನು ಸಹ ಪ್ರಕಟಿಸಲಾಯಿತು. ಆಹಾರ, ಇಂಧನ ಮತ್ತು ನಾರು (Food, Fuel and Fibre) ಎಂಬ 3F ಚೌಕಟ್ಟಿನ ಸುತ್ತಲೂ ನಿರ್ಮಿಸಲಾದ ಈ ಪಿಚ್ ಹಬ್, ಅಗ್ರಿ ವೋಲ್ಟಾಯಿಕ್ಸ್‌ನ ಭವಿಷ್ಯಕ್ಕೆ ಕೊಡುಗೆ ನೀಡಬಲ್ಲ ನವೀನ ಪರಿಹಾರಗಳನ್ನು ಆಹ್ವಾನಿಸಲಿದೆ.

ರಂಗಸಜ್ಜಿಕೆ ಕಾರ್ಯಕ್ರಮದಲ್ಲಿ ಹಲವಾರು ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಪಾಲುದಾರರು, ವಿವಿಧ ಸಚಿವಾಲಯಗಳು, ರಾಜ್ಯ ಇಲಾಖೆಗಳು, ಸಂಶೋಧನೆ ಮತ್ತು ಉದ್ಯಮ ವಲಯಗಳ ಹಿರಿಯ ಅಧಿಕಾರಿಗಳು ಹಾಗೂ ಪ್ರತಿನಿಧಿಗಳು ಉಪಸ್ಥಿತರಿದ್ದರು.

7ನೇ ಅಗ್ರಿ ವೋಲ್ಟಾಯಿಕ್ಸ್ ವಿಶ್ವ ಸಮ್ಮೇಳನ 2026, ಅಕ್ಟೋಬರ್ 21 ರಿಂದ 23 ರವರೆಗೆ ನವದೆಹಲಿಯ ಭಾರತ್ ಮಂಟಪಂನಲ್ಲಿ ನಡೆಯಲಿದೆ. ಈ ಮೂರು ದಿನಗಳ ಅಂತಾರಾಷ್ಟ್ರೀಯ ಸಮ್ಮೇಳನವು ಅಗ್ರಿ ವೋಲ್ಟಾಯಿಕ್ಸ್‌ನ ಭವಿಷ್ಯದ ಕುರಿತು ಚರ್ಚಿಸಲು ಮತ್ತು ಈ ವಲಯವನ್ನು ವಿಸ್ತರಿಸುವ ಮಾರ್ಗಗಳನ್ನು ಅನ್ವೇಷಿಸಲು ಪ್ರಪಂಚದಾದ್ಯಂತದ ರೈತರು, ನೀತಿ ನಿರೂಪಕರು, ಸಂಶೋಧಕರು, ಉದ್ಯಮದ ನಾಯಕರು, ಅಂತರರಾಷ್ಟ್ರೀಯ ನಿಯೋಗಗಳು ಮತ್ತು ಇತರ ಪಾಲುದಾರರನ್ನು ಒಂದೇ ವೇದಿಕೆಯಲ್ಲಿ ತರಲಿದೆ.

ಈ ಸಮ್ಮೇಳನವು ಜಾಗತಿಕ ಮತ್ತು ರಾಷ್ಟ್ರೀಯ ಪಾಲುದಾರರಿಗೆ ಅನುಭವಗಳನ್ನು ಹಂಚಿಕೊಳ್ಳಲು, ಪಾಲುದಾರಿಕೆಗಳನ್ನು ಬೆಳೆಸಲು ಮತ್ತು ಕೃಷಿ ಹಾಗೂ ಸೌರಶಕ್ತಿಯನ್ನು ಸಂಯೋಜಿಸಲು ಪ್ರಾಯೋಗಿಕ ಮಾರ್ಗಗಳನ್ನು ಗುರುತಿಸಲು ಪ್ರಮುಖ ವೇದಿಕೆಯನ್ನು ಒದಗಿಸುವ ನಿರೀಕ್ಷೆಯಿದೆ. ಇದು ಈ ವಲಯದ ಜಾಗತಿಕ ಚರ್ಚೆಯನ್ನು ರೂಪಿಸುವಲ್ಲಿ ಭಾರತದ ಪಾತ್ರವನ್ನು ಬಲಪಡಿಸುವುದರ ಜೊತೆಗೆ ರೈತ-ಕೇಂದ್ರಿತ, ಸುಸ್ಥಿರ ಮತ್ತು ವಿಸ್ತರಿಸಬಹುದಾದ ಅಗ್ರಿ ವೋಲ್ಟಾಯಿಕ್ಸ್ ಪರಿಹಾರಗಳನ್ನು ಮುನ್ನಡೆಸಲು ಶ್ರಮಿಸಲಿದೆ.

 

*****

(ಪ್ರಕಟಣೆ ಐ.ಡಿ.: 2308554) ವಿಸಿಟರ್ ಕೌಂಟರ್ : 13