وزارتِ کوئلہ نے خصوصی مہم 6.0 کے لیے ایک ابتدائی میٹنگ منعقد کی، جس کی صدارت وزارتِ کوئلہ کے جوائنٹ سکریٹری جناب سنجیو کمار کاسی نے کی۔ اس میٹنگ میں کول انڈیا لمیٹڈ (سی آئی ایل) اور اس کی ذیلی کمپنیوں، این ایل سی انڈیا لمیٹڈ (این ایل سی آئی ایل)، کول کنٹرولرز آرگنائزیشن (سی سی او) اور کول مائنز پروویڈنٹ فنڈ آرگنائزیشن (سی ایم پی ایف او) کے نوڈل افسران نے شرکت کی۔

میٹنگ میں آنے والی مہم کا ایک جائزہ پیش کیا گیا، جس کے بعد ایک تفصیلی پریزنٹیشن دی گئی جس میں مہم کے بنیادی مقاصد، توجہ کے شعبوں اور اس پر عمل در آمد کی حکمتِ عملی کی وضاحت کی گئی۔ افسران کو خصوصی مہم 5.0 کے دوران وزارتِ کوئلہ کی جانب سے حاصل کردہ کامیابیوں اور اپنائے گئے بہترین طریقوں کے بارے میں بھی بریفنگ دی گئی۔ نوڈل افسران کو اسپیشل کیمپین 6.0 کے تحت تصور کی گئی مختلف سرگرمیوں اور ترجیحات سے بھی آگاہ کیا گیا۔

خصوصی مہم 6.0 کے بنیادی توجہ کے شعبوں میں یہ چیزیں شامل ہوں گی: ای-ویسٹ (الیکٹرانک کچرے) کو مؤثر طریقے سے جمع کرنا، الگ کرنا اور اسے ٹھکانے لگانا؛ دفتری جگہوں کو بہتر بنانا؛ صفائی کے جدید طریقے اپنانا؛ کاٹھ کباڑ کو کارآمد طریقے سے ٹھکانے لگانا؛ دفتری جگہ کا بہترین استعمال؛ ڈیجیٹلائزیشن اور ماحول دوست طریقوں کو فروغ دینا؛ کچرے کو دولت میں تبدیل کرنا؛ سب کو ساتھ لے کر چلنے کی ثقافت کو فروغ دینا؛ عوامی سہولت پر مبنی نقطہ نظر اپنانا؛ اور ادارہ جاتی اصولوں اور نظاموں کو مضبوط بنانا۔

ڈی اے آر پی جی کی خصوصی مہم 5.0 کی جائزہ  رپورٹ کے مطابق، وزارتِ کوئلہ نے جگہ خالی کرانے کے معاملے میں پہلی پوزیشن اور آمدنی حاصل کرنے کے معاملے میں تیسری پوزیشن حاصل کی ہے۔ اسپیشل کیمپین 5.0 کا کامیاب نفاذ صفائی ستھرائی، ماحولیاتی پائیداری اور وسائل کے کارآمد انتظام کے لیے وزارتِ کوئلہ کے مسلسل عزم کی عکاسی کرتا ہے۔ پچھلی مہم کی کامیابیاں اسپیشل کیمپین 6.0 کے کامیاب اور بااثر نفاذ کے لیے ایک مضبوط بنیاد فراہم کرتی ہیں۔

اس ابتدائی میٹنگ نے مہم کے مقاصد کو حاصل کرنے اور صفائی ستھرائی، کام کی جگہ کی کارکردگی، زیرِ التوا معاملات کو بروقت نمٹانے اور مجموعی انتظامی افادیت پر واضح و مثبت اثرات کو یقینی بنانے کے لیے وزارت کے عزم کا اعادہ کیا۔ وزارتِ کوئلہ ان اقدامات کو ترجیح دینا جاری رکھے گی، جس میں کام کاج کی کارکردگی کو بڑھانے اور ایک صاف ستھرا، سرسبز، زیادہ کارآمد اور بہتر طور پر منظم کام کا ماحول بنانے پر مستقل توجہ مرکوز رکھی جائے گی۔

**********

 (ش ح –ا ب ن)

U.No:2897

(ریلیز آئی ڈی: 2305765) وزیٹر کاؤنٹر : 5