તેમની ઉઝબેકિસ્તાનની રાજકીય મુલાકાતના ભાગરૂપે, પ્રધાનમંત્રી શ્રી નરેન્દ્ર મોદીએ આજે ઉઝબેકિસ્તાનના રાષ્ટ્રપતિ મહામહિમ શ્રી શવકત મિર્ઝિયોયેવ સાથે સત્તાવાર વાટાઘાટો કરી હતી. કુકસારોય પ્રેસિડેન્શિયલ પેલેસ ખાતે પહોંચતા જ રાષ્ટ્રપતિ મિર્ઝિયોયેવ દ્વારા પ્રધાનમંત્રીનું ઉષ્માભર્યું સ્વાગત કરવામાં આવ્યું હતું અને તેમને ઔપચારિક સ્વાગત (સેરેમોનિયલ વેલકમ) આપવામાં આવ્યું હતું. તેમણે ઉઝબેકિસ્તાનને તેમની સ્વતંત્રતાની 35મી વર્ષગાંઠ નિમિત્તે હાર્દિક શુભેચ્છાઓ પાઠવી હતી.

બંને નેતાઓએ દ્વિપક્ષીય વ્યૂહાત્મક ભાગીદારીના સમગ્ર ક્ષેત્ર પર પ્રતિનિધિમંડળ સ્તરના ફોર્મેટમાં વ્યાપક અને સાર્થક ચર્ચાઓ કરી હતી, જેમાં વેપાર અને રોકાણ, નવીનતા અને સ્ટાર્ટ-અપ, ડિજિટલ પબ્લિક ઇન્ફ્રાસ્ટ્રક્ચર અને UPI, સંરક્ષણ અને સુરક્ષા, આરોગ્યસંભાળ અને ફાર્માસ્યુટિકલ્સ, મહત્વપૂર્ણ ખનિજો, કૃષિ, શિક્ષણ, પ્રવાસન, અંતરીક્ષ અને લોકો-સાથે-લોકોના આદાનપ્રદાનનો સમાવેશ થાય છે. પ્રધાનમંત્રીએ ઉઝબેકિસ્તાનથી ભારતમાં યુરેનિયમ પૂરા પાડવાની લાંબા ગાળાની વ્યવસ્થામાં થયેલી પ્રગતિની પ્રશંસા કરી હતી અને મહત્વપૂર્ણ ખનિજોમાં સહયોગ મજબૂત કરવાના મહત્વની પુનઃપુષ્ટિ કરી હતી. સંબંધોની દ્રઢતા અને મહત્વને પ્રતિબિંબિત કરતા, તેમણે દ્વિપક્ષીય વ્યૂહાત્મક ભાગીદારીને વ્યાપક વ્યૂહાત્મક ભાગીદારી (Comprehensive Strategic Partnership) ના સ્તરે પહોંચાડવાનો નિર્ણય કર્યો. તેઓ 2030 સુધીમાં USD 5 બિલિયનનો દ્વિપક્ષીય વેપાર લક્ષ્યાંક નક્કી કરવા માટે પણ સંમત થયા હતા અને આ સંદર્ભમાં આર્થિક અને રોકાણ સંબંધોને વધુ ગાઢ બનાવવા માટે બિઝનેસ સમિટ યોજવા આહ્વાન કર્યું હતું. વ્યાપક વ્યૂહાત્મક ભાગીદારીને અર્થપૂર્ણ રીતે આગળ ધપાવવા માટે, બંને નેતાઓ વિદેશ મંત્રીઓની આગેવાની હેઠળની પદ્ધતિ સ્થાપિત કરવા અને આંતર-સરકારી કમિશનને મંત્રી સ્તરે વધારવા માટે સંમત થયા હતા.

નેતાઓએ નોંધ્યું હતું કે પ્રાચીન નાગરિક જોડાણો અને સમકાલીન લોકો-સાથે-લોકોના સંબંધો ભાગીદારીમાં જોમ ઉમેરવાનું ચાલુ રાખે છે. આ સંદર્ભમાં, પ્રધાનમંત્રીએ ઉઝબેકિસ્તાનમાં યોગની લોકપ્રિયતાની પ્રશંસા કરી હતી. દિવસની શરૂઆતમાં, તેમણે યોગ ફેડરેશન ઓફ ઉઝબેકિસ્તાન દ્વારા આયોજિત યોગ સત્ર નિહાળ્યું હતું. પૂર્વ પ્રધાનમંત્રી લાલ બહાદુર શાસ્ત્રીના અવસાનની 60મી વર્ષગાંઠની યાદમાં, પ્રધાનમંત્રી મોદીએ ઉઝબેક વિદ્યાર્થીઓ માટે હિન્દી ભાષા માટે લાલ બહાદુર શાસ્ત્રી શિષ્યવૃત્તિની જાહેરાત કરી હતી. ઉઝબેકિસ્તાનની "યશિલ મકોન" હરિયાળી પહેલ અને ભારતના "એક પેડ મા કે નામ" પહેલ વચ્ચેના સંકલનને ઓળખીને, પ્રધાનમંત્રી મોદીએ પ્રોજેક્ટ માટે USD 1 મિલિયનની ગ્રાન્ટ સાથે અરાલ સાગર પ્રદેશમાં ચાલી રહેલા પર્યાવરણીય પુનર્વસન પ્રયાસોમાં ઉઝબેકિસ્તાન સાથે ભારતની ભાગીદારીની જાહેરાત કરી. બંને નેતાઓએ સંયુક્ત રીતે પેલેસ ગાર્ડનમાં એક છોડ વાવ્યો હતો.

વાટાઘાટોને અનુસરીને, બંને પક્ષોએ સંસ્કૃતિ, ઉચ્ચ શિક્ષણ અને સંશોધન, ક્ષમતા નિર્માણ, આર્કાઇવ્ઝ, આર્થિક સહયોગ, પર્યાવરણ, પ્રવાસન, ખનન, આયુર્વેદ અને સિસ્ટર-સ્ટેટ સંબંધો સહિતના ક્ષેત્રોની વ્યાપક શ્રેણીને આવરી લેતા MoUs અને કરારોના આદાનપ્રદાનના સાક્ષી બન્યા હતા. ઉઝબેકિસ્તાનમાં ફયાઝ તેપા અને કારાતેપાના બૌદ્ધ સ્થળોના જીર્ણોદ્ધાર માટે આશય પત્ર (Letter of Intent) પૂર્ણ કરવામાં આવ્યો હતો.  તાશ્કંદ સ્ટેટ યુનિવર્સિટી ઓફ ઓરિએન્ટલ સ્ટડીઝ ખાતે ICCR સંસ્કૃત ચેરની સ્થાપના માટેના MoU ને પણ અંતિમ રૂપ આપવામાં આવ્યું હતું. MoUs અને કરારોની સંપૂર્ણ યાદી અહીં મેળવી શકાય છે.

રાષ્ટ્રપતિ મિર્ઝિયોયેવે પ્રધાનમંત્રીના સન્માનમાં બેન્ક્વેટ લંચનું આયોજન કર્યું હતું. પ્રધાનમંત્રીએ રાષ્ટ્રપતિ મિર્ઝિયોયેવનો તેમના આતિથ્ય સત્કાર બદલ આભાર માન્યો હતો અને તેમને ભારત આવવાનું નિમંત્રણ આપ્યું હતું.