ভাৰত চৰকাৰৰ ক্ষুদ্ৰ, সৰু আৰু মজলীয়া উদ্যোগ মন্ত্ৰালয়ৰ অধীনৰ এমএছএমই-উন্নয়ন আৰু সুবিধা প্ৰদান কাৰ্যালয় শিলচৰে জিলা উদ্যোগ আৰু বাণিজ্য কেন্দ্ৰ (ডিআইচিচি), কাছাৰ আৰু ভাৰ্কাছ হিউমেনিটাৰিয়ান ফাউণ্ডেশ্যন, শিলচৰৰ সহযোগত শিলচৰৰ গান্ধী ভৱনত ২৪ আগষ্ট, ২০২৬ তাৰিখে পি এম বিশ্বকৰ্মা যোজনাৰ হিতাধিকাৰীসকলৰ বাবে ব্ৰেণ্ডিং আৰু বিপণন সম্পৰ্কীয় এখন এদিনীয়া সজাগতা কাৰ্যসূচীৰ আয়োজন কৰে।

এই কাৰ্যসূচীৰ লক্ষ্য আছিল পৰম্পৰাগত শিল্পী আৰু শিপিনীসকলক তেওঁলোকৰ সামগ্ৰীৰ ব্ৰেণ্ডিং, বিপণন আৰু বজাৰত প্ৰৱেশ বৃদ্ধিৰ বাবে ব্যৱহাৰিক জ্ঞান আৰু সঁজুলি প্ৰদান কৰা। এই সজাগতা কাৰ্যসূচীত ১১৪ জনতকৈ অধিক পি এম বিশ্বকৰ্মাৰ হিতাধিকাৰীয়ে অংশগ্ৰহণ কৰি উপকৃত হয়। এই কাৰ্যসূচীয়ে অংশগ্ৰহণকাৰীসকলক ব্ৰেণ্ডিং, বিপণন, উদ্যোগীকৰণ, ডিজিটেল সঁজুলি, ৰপ্তানিৰ সুযোগ আৰু উদীয়মান প্ৰযুক্তিৰ ব্যৱহাৰিক তথ্য প্ৰদান কৰিছিল, যাৰ ফলত তেওঁলোকে তেওঁলোকৰ পৰম্পৰাগত সামগ্ৰীৰ প্ৰতিযোগিতামূলক ক্ষমতা আৰু বজাৰত প্ৰৱেশ বৃদ্ধি কৰিবলৈ সক্ষম হৈছিল।

এই অনুষ্ঠানত শিলচৰৰ এম এছ এম ই-ডি এফ অ’ৰ সহকাৰী সঞ্চালক শ্ৰী সুমিত গুণ্ডায়্যাই প্ৰতিষ্ঠানিক সহায়, দক্ষতা বিকাশ আৰু বজাৰত প্ৰৱেশ বৃদ্ধিৰ জৰিয়তে পৰম্পৰাগত শিপিনীসকলৰ জীৱিকা উন্নত কৰাৰ ক্ষেত্ৰত পি এম বিশ্বকৰ্মা যোজনাৰ পৰিৱৰ্তনশীল ভূমিকাত আলোকপাত কৰে।

কাছাৰৰ ডি আই চি চিৰ শ্ৰী দীপায়ন বসুৱে অংশগ্ৰহণকাৰীসকলক পি এম বিশ্বকৰ্মা হিতাধিকাৰীসকলৰ উদ্যোগসমূহৰ অধিক উন্নয়ন আৰু সম্প্ৰসাৰণৰ বাবে উপলব্ধ অসম চৰকাৰৰ বিভিন্ন আঁচনি আৰু পদক্ষেপৰ বিষয়ে অৱগত কৰে।

এন আই টি শিলচৰৰ সহকাৰী অধ্যাপক ড০ দিব্য নন্দন মিশ্ৰই উদ্যোগীকৰণৰ বিকাশ, মূল্য নিৰ্ধাৰণ কৌশল, বজাৰৰ ধাৰা, ব্যৱসায় পৰিচালনাৰ বিত্তীয় আৰু ডিজিটেল দিশৰ বিষয়ে শিল্পীসকলক সংবেদনশীল কৰি তোলে। শিলচৰৰ অসম বিশ্ববিদ্যালয়ৰ সহকাৰী অধ্যাপিকা ড০ নীলাঞ্জনা চক্ৰৱৰ্তীয়ে পি এম বিশ্বকৰ্মাৰ সামগ্ৰী আন্তঃৰাষ্ট্ৰীয় বজাৰলৈ নিয়াৰ ক্ষেত্ৰত ৰপ্তানিৰ সুযোগ আৰু পদ্ধতি সম্পৰ্কে তথ্য প্ৰদান কৰে।

 

 

 

ৰাজ্যিক পৰ্যায়ৰ প্ৰকল্প পৰিচালনা গোটৰ মুৰব্বী শ্ৰী ৰাণু কুমাৰ সিঙে প্ৰডাক্ট ডিজাইন, মাৰ্কেটিং আৰু ব্ৰেণ্ডিঙত কৃত্ৰিম বুদ্ধিমত্তা (এ আই)ৰ ব্যৱহাৰৰ ওপৰত ব্যৱহাৰিক প্ৰদৰ্শন আগবঢ়ায়। তেওঁ উদীয়মান প্ৰযুক্তিয়ে শিল্পীসকলক কেনেকৈ পণ্য উপস্থাপন উন্নত কৰাত, ব্ৰেণ্ডিং শক্তিশালী কৰাত আৰু বজাৰৰ প্ৰসাৰ বৃদ্ধি কৰাত সহায় কৰিব পাৰে সেই বিষয়ে ব্যাখ্যা কৰে।

 

***

 

PG/SS/KD

(ৰিলিজ আই ডি : 2304381) অতিথি কক্ষ : 16