درست مرحلے پر مالی معاونت محروم پس منظر سے تعلق رکھنے والے باصلاحیت اسکالروں کو اعلیٰ تعلیم جاری رکھنے، بامعنی تحقیق کرنے اور ایسے کیریئر بنانے کے قابل بنا سکتی ہے جو قومی ترقی میں معاون ثابت ہوں۔

تمل ناڈو کے ضلع سیوا گنگائی سے تعلق رکھنے والے 30 سالہ اسکالر کرنن اے نے نیشنل فیلوشپ فار شیڈیولڈ کاسٹ اسٹوڈنٹس اسکیم کے تحت حاصل ہونے والی معاونت کے ذریعے یہ تبدیلی محسوس کی۔ وہ اب بنگلورو کے سی ایس آئی آر فورتھ پیراڈائم انسٹی ٹیوٹ میں سائنٹسٹ-سی کے عہدے پر کل وقتی ملازم کی حیثیت سے خدمات انجام دے رہے ہیں۔

کرنن کا تعلق درج فہرست ذات سے ہے اور وہ اپنے خاندان کے پہلے محقق ہیں، نیز اپنی برادری سے تعلق رکھنے والے بہت کم محققین میں شامل ہیں۔ ان کے والدین موسمی کسان ہیں اور ان کی آمدنی محدود اور غیر مستقل ہے، جبکہ ان کے دو بھائی بھی اپنی تعلیم کے لیے اسی خاندانی آمدنی پر منحصر تھے۔

اسکول سے لے کر پوسٹ گریجویٹ تعلیم تک، کرنن اپنی فیس ادا کرنے اور بنیادی ضروریات پوری کرنے کے لیے ہفتہ وار تعطیلات میں یومیہ اجرت پر کام کرتے رہے۔ پوسٹ گریجویٹ کورس کے آخری سال کے دوران انہوں نے ٹیوشن پڑھانا شروع کیا، لیکن اس سے حاصل ہونے والی آمدنی بھی ناکافی تھی۔ 2017 میں انہوں نے اپنی پہلی ہی کوشش میں نیشنل ایلیجیبلٹی ٹیسٹ (این ای ٹی) برائے لیکچررشپ پاس کر لیا، لیکن وہ جونیئر ریسرچ فیلوشپ کے لیے مقررہ کٹ آف سے معمولی فرق سے پیچھے رہ گئے۔

فیلوشپ نہ ملنے کی صورت میں کرنن کو اپنی پی ایچ ڈی کی فیس اور تحقیقی اخراجات مکمل طور پر ٹیوشن سے حاصل ہونے والی آمدنی سے پورے کرنے پڑے۔ اپنے گاؤں کے پہلے محقق اور اپنے تعلقے کے بہت کم محققین میں سے ایک ہونے کی وجہ سے انہیں علمی رہنمائی، سرپرستی اور پیشہ ورانہ روابط کی بھی کمی کا سامنا تھا۔ ان اقتصادی، تعلیمی اور سماجی رکاوٹوں کے باعث اپنے خاندان پر مالی بوجھ ڈالے بغیر ڈاکٹریٹ کی تعلیم جاری رکھنا ان کے لیے انتہائی مشکل ہو گیا تھا۔

 

 

2019 میں اس وقت ایک اہم موڑ آیا جب کرنن کو دسمبر 2018 کے سی ایس آئی آر-یو جی سی این ای ٹی لیکچررشپ کے اسکور کی بنیاد پر این ایف ایس سی فیلوشپ کے لیے منتخب کیا گیا۔ انہیں ستمبر 2019 سے مالی معاونت ملنا شروع ہوئی اور فیلوشپ، ہاؤس رینٹ الاؤنس اور متفرق اخراجات کی مد میں تقریباً 16 لاکھ روپے کی معاونت حاصل ہوئی۔

اس فیلوشپ نے کرنن کو ان کی تعلیمی زندگی میں پہلی بار مالی خودمختاری فراہم کی۔ اب انہیں اپنی فیس اور تحقیقی اخراجات پورے کرنے کے لیے یومیہ اجرت پر کام یا ٹیوشن کی آمدنی پر انحصار نہیں کرنا پڑتا تھا۔ اس کے نتیجے میں حاصل ہونے والے اعتماد اور ذہنی سکون نے انہیں پوری توجہ کے ساتھ اپنی تحقیق پر توجہ مرکوز کرنے کے قابل بنایا۔ معاونت سے حوصلہ پا کر انہوں نے دوبارہ این ای ٹی کا امتحان دیا اور کامیابی کے ساتھ جونیئر ریسرچ فیلوشپ کے لیے بھی کوالیفائی کر لیا۔

کرنن نے اپنی پی ایچ ڈی مکمل کی اور ان کے مقالے کو امتیاز بھی حاصل ہوا۔ انہوں نے ایس سی ائی/ایس سی آئی ای میں شامل بین الاقوامی جرائد میں چھ تحقیقی مضامین شائع کیے۔ ڈاکٹریٹ مکمل کرنے کے بعد انہیں انڈین انسٹی ٹیوٹ آف سائنس، بنگلورو میں انسٹی ٹیوشن آف ایمیننس پوسٹ ڈاکٹریٹ فیلو منتخب کیا گیا، جہاں انہیں 67,000 روپے ماہانہ فیلوشپ کے ساتھ ایچ آر اے بھی حاصل ہوا۔

اس کے بعد کرنن نے بنگلورو کے سی ایس آئی آر فورتھ پیراڈائم انسٹی ٹیوٹ میں سائنٹسٹ-سی کی حیثیت سے ملازمت اختیار کی۔ فی الحال وہ ساتویں پے کمیشن کے تحت لیول 11 میں تعینات ہیں اور ان کی بنیادی ماہانہ تنخواہ 69,700 روپے ہے۔ اس معاونت نے انہیں اپنے خاندان کی مدد کرنے اور اپنے بھائی کی تعلیم کے اخراجات میں بھی تعاون کرنے کے قابل بنایا۔ آج وہ اپنے والدین کی کفالت کرتے ہیں اور اپنی برادری کے بچوں کی تعلیم میں بھی تعاون کرتے ہیں۔

معاونت کے اثرات کے بارے میں کرنن نے کہا، ”اس فیلوشپ نے صرف میری تحقیق کے لیے مالی اعانت فراہم نہیں کی؛ اس نے مجھے آزادی، اعتماد اور ایک مستقبل دیا۔ پی ایچ ڈی مکمل کرنے کے بعد میں نے زندگی میں جو کچھ بھی حاصل کیا ہے، وہ اسی فیلوشپ کی بدولت ممکن ہوا ہے۔“

کرنن کا سفر اس بات کی عکاسی کرتا ہے کہ بروقت فیلوشپ معاونت کس طرح ایک پُرعزم اسکالر کو اقتصادی اور سماجی رکاوٹوں پر قابو پانے، علمی میدان میں نمایاں کامیابی حاصل کرنے اور سائنسی تحقیق میں کیریئر بنانے میں مدد دے سکتی ہے۔ انہوں نے فیلوشپ فراہم کرنے پر محکمہ سماجی انصاف و تفویضِ اختیار اور اس کے مؤثر نفاذ پر یونیورسٹی گرانٹس کمیشن (یو جی سی) کا تہہ دل سے شکریہ ادا کیا۔

************

 

ش ح۔ ف ش ع 

 U: 2683

(ریلیز آئی ڈی: 2303977) وزیٹر کاؤنٹر : 7