دیہی ترقی اور زراعت و کسانوں کی بہبود کے مرکزی وزیر جناب شوراج سنگھ چوہان نے آج نئی دہلی کے سینٹرل سیکریٹریٹ میٹرو اسٹیشن پر بھارت کی جدوجہدِ آزادی کے موضوع پر تیار کی گئی ایک خصوصی میٹرو ٹرین کو ہری جھنڈی دکھا کر روانہ کیا۔ اس ٹرین میں مجاہدین آزادی، انقلابیوں اور بھارت کی تحریک آزادی سے وابستہ دیگر ممتاز شخصیات کی زندگی، خیالات اور خدمات کو اجاگر کیا گیا ہے۔

 

 

اس موقع پر خطاب کرتے ہوئے جناب چوہان نے کہا کہ یہ اقدام میٹرو میں سفر کرنے والے مسافروں کو ملک کی تحریک آزادی اور قومی ہیروز کی جانب سے دی گئی قربانیوں کے بارے میں جاننے کا موقع فراہم کرے گا۔ انہوں نے کہا کہ یہ اقدام نوجوان نسل کو بھارت کی تاریخ کے اس اہم باب سے روشناس کرانے اور انہیں ملک کے لیے جدوجہد کرنے والوں کی ہمت اور حب الوطنی سے متاثر کرنے میں بھی مدد دے گا۔

 

 

اس موقع پر جناب چوہان نے ملک کے لیے اپنی جان کا نذرانہ پیش کرنے والے شہیدوں کو خراجِ عقیدت پیش کرتے ہوئے میٹرو ٹرین پر یہ حب الوطنی پر مبنی الفاظ بھی تحریر کیے: ’’شہیدوں کی چتاؤں پر ہر برس میلے لگیں گے۔‘‘

 

 

جناب چوہان نے کہا کہ بھارت کے شہیدوں اور انقلابیوں کی قربانیاں اور خدمات آنے والی نسلوں کے لیے ہمیشہ باعث تحریک بنی رہنی چاہئیں۔ انہوں نے اس اقدام کو سراہا اور بھارت کی تحریک آزادی کی متاثر کن داستانوں کو عوام کے مزید قریب لانے کی کوششوں پر پربھات پرکاشن، دہلی میٹرو کے منیجنگ ڈائریکٹر اور میٹرو کی پوری ٹیم کا شکریہ ادا کیا۔

 

 

تقریب کے دوران جناب چوہان کو پربھات پرکاشن کی شائع کردہ کتابیں بھی پیش کی گئیں، جن میں اپناپن بھی شامل ہے۔ اس موقع پر دہلی میٹرو کے سفر اور اس کی داستان کو اجاگر کرنے والی کتابیں بھی پیش کی گئیں۔

 

 

اس اقدام کا مقصد روزمرہ میٹرو سفر کو شہریوں کے لیے ملک کی تاریخ سے جڑنے اور بھارت کے مجاہدین آزادی کے نظریات اور خدمات سے تحریک حاصل کرنے کا ایک موقع بنانا ہے۔

                                               **************

 

 

ش ح۔ ف ش ع

                                                                                                                                       U: 2671

 

 

 

(ریلیز آئی ڈی: 2303948) وزیٹر کاؤنٹر : 7