نیشنل ٹریڈرس ویلفیئر  بورڈ   ( این ٹی ڈبلیو بی) نے آج اپنی 100ویں ورچوئل کانفرنس (وی سی) رابطہ  میٹنگ کا انعقاد کیا، جو ملک بھر میں تاجر برادری کے ساتھ باقاعدہ  طور پر رابطے کو مضبوط بنانے میں ایک اہم سنگِ میل ہے۔

بورڈ کے دوسرے اجلاس کے دوران خردہ  تاجروں کے لیے ایک خصوصی ورچوئل پلیٹ فارم قائم کرنے کا فیصلہ کیا گیا تھا، جو 7 فروری 2024 کو منعقد ہوا تھا اور اس کی صدارت مرکزی وزیر برائے تجارت و صنعت جناب پیوش گوئل نے کی تھی۔ اجلاس کے دوران یہ تجویز پیش کی گئی تھی کہ  خردہ  تاجروں کے ساتھ باقاعدہ بات چیت کو آسان بنانے، حکومتی اسکیموں اور پالیسیوں کے بارے میں معلومات  کی ترسیل  اور تاجروں کو اپنی شکایات اور تجاویز پیش کرنے کے لیے ایک آسان اور قابلِ رسائی میکانزم  فراہم کرنے کے لیے ایک  مخصوص ورچوئل پلیٹ فارم بنایا جائے۔

اس اقدام کا باضابطہ آغاز 11 جولائی 2024 کو منعقدہ بورڈ کے تیسرے اجلاس کے دوران کیا گیا تھا۔ اپنے آغاز کے بعد سے  وی سی  رابطہ میٹنگیں  ہر پیر کے روز  دوپہر 3:00 بجے سے شام 4:00 بجے تک منعقد کی جاتی رہی ہیں، جو تاجروں کے ساتھ رابطے کے لیے ایک منظم اور مسلسل پلیٹ فارم فراہم کرتی ہیں۔

اس ہفتہ وار وی سی پلیٹ فارم نے خردہ تاجروں کے ساتھ باقاعدہ بات چیت، حکومتی اسکیموں اور پالیسی اقدامات کے بارے میں معلومات کی ترسیل  اور شکایات و تجاویز کو آسانی سے جمع کرانے میں سہولت فراہم کی ہے۔ اس نے بار بار پیش  آنے والے مسائل کی نشاندہی کرنے اور مناسب غور و خوض  اور ازالے کے لیے متعلقہ وزارتوں اور محکموں تک انہیں پہنچانے کے قابل بھی بنایا ہے۔

100ویں وی سی رابطہ  میٹنگ تاجر برادری کے ساتھ پائیدار  اور ادارہ جاتی  رابطے کی اہمیت کی عکاسی کرتی ہے۔ اس پلیٹ فارم نے ہزاروں تاجروں کو اپنے خدشات، تجاویز اور تجربات براہِ راست حکومت کے ساتھ ساجھا  کرنے کا ایک بہترین ذریعہ فراہم کیا ہے۔

مستقبل میں  اس اقدام کا محور شراکت داری کو مزید وسعت دینے، تاثرات  اور سفارشات کے طریقہ کار کو مضبوط بنانے  اور اس پلیٹ فارم کے ذریعے اٹھائے گئے مسائل کے زیادہ ٹھوس اور واضح نتائج حاصل کرنے پر ہوگا۔

اس اجلاس کی صدارت این ٹی ڈبلیو  بی کے چیئرمین جناب سنیل جے سنگھی نے کی۔ 100ویں وی سی  رابطہ  میٹنگ حکومت اور تاجر برادری کے درمیان بات چیت، تعاون اور شراکت داری کو مضبوط بنانے کے لیے این ٹی ڈبلیو بی کی کوششوں میں ایک اہم سنگِ میل ہے، جو بھارت کے اقتصادی  ایکو سسٹم  کے ایک لازمی حصے کے طور پر تاجروں کی اہمیت کی توثیق کرتی ہے۔

اس پلیٹ فارم نے ملک بھر کے چھوٹے، درمیانے اور بڑے تاجروں کو ایک مشترکہ فورم پر اکٹھا کیا ہے اور تاجر برادری سے متعلق حکومتی اسکیموں، پالیسیوں اور اصلاحات کے بارے میں معلومات کی ترسیل کو آسان بنایا ہے۔ اس نے تاجروں کو شکایات اور تجاویز پیش کرنے کے لیے ایک آسان اور قابلِ رسائی میکانزم  بھی فراہم کیا ہے، جس کی بدولت بار بار درپیش  مسائل کی نشاندہی کرنے  اور انہیں متعلقہ وزارتوں اور محکموں تک پہنچانا ممکن ہوا ہے  اور حکومت اور تاجر برادری کے درمیان شفافیت، اعتماد اور تعاون کو مضبوطی ملی ہے۔

تاجر  ہندوستانی  معیشت میں ایک اہم کردار ادا کرتے ہیں اور  پروڈیوسروں  اور صارفین کے درمیان ایک مضبوط کڑی کا کام کرتے ہیں۔ وہ روزگار کے مواقع پیدا کرنے، مقامی بازاروں کو برقرار رکھنے اور ملک بھر میں کروڑوں لوگوں کے روزگار کو سہارا دینے میں اپنا حصہ ڈالتے ہیں۔ اس لیے، تاجروں کی بہبود اور بااختیاری کا براہِ راست اثر روزگار، گھریلو آمدنی، مقامی معیشتوں اور ملک کی مجموعی اقتصادی مضبوطی پر پڑتا ہے۔

 (ش ح- ن  ا)

U.N:2610

 

(ریلیز آئی ڈی: 2303392) وزیٹر کاؤنٹر : 6