مرکزی وزیر برائے تجارت و صنعت جناب پیوش گوئل نے آج ٹوکیو، جاپان میں ہندوستانی برادری سے خطاب کیا اور بھارت-جاپان تعلقات کو مضبوط بنانے میں ہندوستانی تارکینِ وطن کے تعاون کی تعریف کی۔ انہوں نے جاپان میں مقیم تقریباً 60,000 افراد پر مشتمل ہندوستانی برادری کو "ہندوستان کے برانڈ ایمبیسیڈرز" قرار دیتے ہوئے کہا کہ مختلف شعبوں میں ان کا طرزِ عمل، پیشہ ورانہ مہارت اور تعاون جاپانی عوام کے درمیان ہندوستان کا ایک اہم تعارف پیش کرتے ہیں۔

جناب گوئل نے کہا کہ جاپان کے دورے کے دوران دیکھنے میں آنے والی توانائی، جوش و خروش اور اعتماد بھارت-جاپان تعلقات کی بڑھتی ہوئی مضبوطی کی عکاسی کرتے ہیں۔ انہوں نے ہندوستان کے لیے "جاپان کے دروازے کھولنے" اور اپنے کام اور جاپانی معاشرے کے ساتھ میل جول کے ذریعے خیر سگالی پیدا کرنے پر ہندوستانی برادری کا شکریہ ادا کیا۔

انہوں نے اس بات کا ذکر کیا کہ ان کے دورۂ جاپان کے دوران ہندوستانی صنعت اور کاروبار کے 200 سے زائد نمائندے ان کے ہمراہ جانے والے وفد کا حصہ تھے۔ اسے جاپان لے جانے والا اب تک کا سب سے بڑا کاروباری وفد قرار دیتے ہوئے انہوں نے کہا کہ یہ بھرپور شرکت ’کاروبار سے کاروبار‘ روابط اور سرمایہ کاری کے مواقع کو وسعت دینے میں دونوں ممالک کی گہری دلچسپی کی عکاسی کرتی ہے۔

وزیر موصوف نے گزشتہ ایک دہائی کے دوران عالمی سطح پر ہندوستان کے بدلتے ہوئے مقام اور مرتبے پر روشنی ڈالی۔ انہوں نے کہا کہ ہندوستان کی ترقی، ملک کے بڑھتے ہوئے عالمی وقار اور وزیر اعظم جناب نریندر مودی کی قیادت نے دنیا بھر میں ہندوستان اور اس کے شہریوں کے لیے اعتماد اور احترام کو بڑھانے میں اہم کردار ادا کیا ہے۔

جناب گوئل نے کہا کہ 2047 تک ہندوستان کو ایک ترقی یافتہ ملک بنانے کا وژن خود انحصاری، خود داری اور خود اعتمادی پر مبنی ہے۔ انہوں نے اس بات پر زور دیا کہ یہ تبدیلی دنیا بھر میں مقیم ہندوستانی تارکینِ وطن سمیت 140 کروڑ ہندوستانیوں کا اجتماعی عزم ہے۔

ہندوستان کو آبادی کی شکل میں حاصل بالادستی کے بارے میں روشنی ڈالتے ہوئے، جناب گوئل نے کہا کہ ہندوستان کی نوجوان آبادی، جس کی اوسط عمر تقریباً 29 سال ہے، ایک اہم طاقت کی نمائندگی کرتی ہے۔ انہوں نے اس بات کا ذکر کیا کہ ہندوستان کے محنتی، پرعزم اور ٹیکنالوجی کے ماہر نوجوان محض روزگار تلاش کرنے کے بجائے تیزی سے نئے مواقع پیدا کر رہے ہیں۔

وزیر موصوف نے سرمایہ کاری اور کاروبار کے ایک پرکشش مرکز کے طور پر ہندوستان کی بڑھتی ہوئی مقبولیت پر زور دیا۔ انہوں نے کہا کہ ہندوستان کی پھیلتی ہوئی معیشت، نوجوان آبادی، اسٹارٹ اپس، تکنیکی صلاحیتیں اور کاروباری ایکو سسٹم عالمی کاروباروں اور سرمایہ کاروں کے لیے بہترین مواقع پیدا کر رہے ہیں۔

جناب گوئل نے تجارتی معاہدوں کے حوالے سے ہندوستان کے پھیلتے ہوئے نیٹ ورک پر بھی روشنی ڈالی۔ انہوں نے کہا کہ ہندوستان نے حالیہ برسوں میں کئی ممالک کے ساتھ تجارتی معاہدوں کو حتمی شکل دینے میں نمایاں پیش رفت کی ہے، جو ہندوستانی معیشت اور اس کے مستقبل کے امکانات پر عالمی شراکت داروں کے بڑھتے ہوئے اعتماد کی عکاسی کرتی ہے۔

وزیر موصوف نے کہا کہ جاپانی کمپنیوں کے ساتھ ہونے والی بات چیت، بشمول جدید ترین ٹیکنالوجیز، سیمی کنڈکٹرز اور مصنوعی ذہانت کے شعبوں میں کام کرنے والی کمپنیاں، ہندوستان میں بڑھتی ہوئی دلچسپی کو ظاہر کرتی ہے۔ انہوں نے اس بات کا ذکر کیا کہ جاپانی کاروباری ادارے ہندوستان کے ساتھ اپنے روابط بڑھانے کے لیے پرجوش ہیں اور ابھرتے ہوئے اور اعلیٰ تکنیکی شعبوں میں مواقع تلاش کر رہے ہیں۔

جناب گوئل نے جاپان میں ہندوستانی پیشہ ور افراد کے لیے موجود مواقع پر بھی روشنی ڈالی۔ انہوں نے کہا کہ مختلف شعبوں میں ہنرمند کارکنوں کی زبردست مانگ ہے، جن میں دیکھ بھال کرنے والے، نرسیں، ویلڈر، بڑھئی، الیکٹریشن، پلمبر، ڈرائیور، انجینئر، مصنوعی ذہانت کے ماہرین، چارٹرڈ اکاؤنٹنٹس اور جہاز ران شامل ہیں۔ انہوں نے ہندوستانی برادری کے ارکان کی حوصلہ افزائی کی کہ وہ مقامی ضروریات کو سمجھیں، جاپانی زبان اور ثقافت سیکھیں، اور دونوں ممالک کے مابین عوامی اور اقتصادی روابط کو مضبوط بنانے میں اپنا تعاون پیش کریں۔

وزیر موصوف نے ہندوستانی تارکینِ وطن سے اپیل کی کہ وہ جاپان کے قوانین، ضوابط اور طرزِ زندگی کا احترام کرتے ہوئے ہندوستان کے ساتھ گہرا تعلق برقرار رکھیں، جو کہ ان کی "کرم بھومی" ہے۔ انہوں نے یہ مشورہ بھی دیا کہ اس برادری کے ارکان ڈیجیٹل تعلیم، آن لائن تربیت اور علم کے اشتراک جیسے اقدامات کے ذریعے ہندوستان میں اپنے آبائی شہروں اور دیہاتوں کی ترقی میں بھی اپنا تعاون پیش کر سکتے ہیں۔

جناب گوئل نے ترسیلاتِ زر کے ذریعے ہندوستان کی معیشت میں ہندوستانی تارکینِ وطن کے اہم تعاون پر روشنی ڈالی۔ انہوں نے کہا کہ ترسیلاتِ زر سے خاندانوں کو مدد ملتی ہے، معاشی سرگرمیاں پیدا ہوتی ہیں اور بچت اور سرمایہ کاری میں اضافہ ہوتا ہے، جس کی بدولت تارکینِ وطن ہندوستان کے ترقیاتی سفر میں ایک اہم شراکت دار بن جاتے ہیں۔

انہوں نے بیرونِ ملک مقیم ہندوستانیوں کی فلاح و بہبود اور حفاظت کے لیے حکومت کے عزم پر بھی زور دیا۔ دنیا کے مختلف حصوں میں بحرانوں کے دوران اپنے شہریوں کو نکالنے اور ان کی مدد کرنے کے لیے ہندوستان کی کوششوں کا حوالہ دیتے ہوئے انہوں نے کہا کہ حکومت دنیا بھر میں جہاں کہیں بھی ہندوستانی شہری موجود ہیں، ان کی حفاظت اور بہبود کو یقینی بنانے کے لیے پرعزم ہے۔

یوکرین کے تنازعے کے دوران ہندوستان کی طرف سے لوگوں کو نکالنے کی کوششوں کو یاد کرتے ہوئے، جناب گوئل نے کہا کہ حکومت نے مختلف ممالک کے ساتھ مل کر کام کیا اور ہندوستانی طلبہ اور دیگر شہریوں کو بحفاظت ہندوستان واپس لانے کے لیے وسیع پیمانے پر کوششوں کو مربوط کیا۔

وزیر موصوف نے مغربی ایشیا میں حالیہ تنازعے کے دوران اس خطے میں پھنسے ہوئے ہندوستانی ماہی گیروں کی مدد کے لیے کی جانے والی کوششوں کا بھی ذکر کیا۔ انہوں نے شہریوں کی رجسٹریشن، ان کی نقل و حرکت کے تال میل اور ہندوستان میں ان کی بحفاظت واپسی کو ممکن بنانے میں ہندوستانی سفارتی مشنوں، مقامی حکام اور ہندوستانی تارکینِ وطن کے ارکان کے کردار پر روشنی ڈالی۔

جناب گوئل نے کہا کہ یہ کوششیں ہندوستان اور اس کے تارکینِ وطن کے مابین گہرے اور مضبوط رشتے کا ثبوت ہیں۔ انہوں نے اس بات کا اعادہ کیا کہ بیرونِ ملک مقیم ہندوستانی، ہندوستان کے ترقیاتی سفر کا ایک لازمی حصہ ہیں اور حکومت ضرورت کے وقت ہمیشہ ان کے ساتھ کھڑی رہے گی۔

جناب گوئل نے جاپان اور دنیا بھر میں مقیم ہندوستانی برادری کے تعاون کو سراہتے ہوئے کہا، "ہندوستان کو کبھی مت بھولیے گا، اور نہ ہی ہم آپ کو کبھی بھولیں گے۔"

**********

 

(ش ح –ا ب ن)

U.No:2607

(ریلیز آئی ڈی: 2303330) وزیٹر کاؤنٹر : 10