کیمیکلز اینڈ پیٹروکیمیکلز ڈپارٹمنٹ، کیمیکل اور کھاد کی وزارت نے آج 25 اگست 2026 کو انڈین انسٹی ٹیوٹ آف ٹیکنالوجی (آئی آئی ٹی) مدراس میں کیم کنکٹ 2026 کے پہلے ایڈیشن کا انعقاد کیا۔

اس تقریب میں صنعت، تعلیمی اداروں، اسٹارٹ اپ اور تحقیقی اداروں سے وابستہ 200 سے زائد رہنماؤں، محققین اور کاروباری افراد نے شرکت کی، جن میں محکمہ کی جانب سے قائم کیے گئے مراکزِ امتیاز کے نمائندگان بھی شامل تھے۔

تقریب کی افتتاحی تقریب میں کیمیکلز اینڈ پیٹروکیمیکلز ڈپارٹمنٹ (ڈی سی پی سی) کے سیکریٹری جناب تیج ویر سنگھ نے بطور مہمان خصوصی شرکت کی۔ ان کے ہمراہ آئی آئی ٹی مدراس کے ڈائریکٹر پروفیسر وی کاماکوٹی، کیمیکلز اینڈ پیٹروکیمیکلز ڈپارٹمنٹ کے جوائنٹ سیکریٹری ڈاکٹر جی وینکٹیش، سی آئی پی ای ٹی کے ڈائریکٹر جنرل پروفیسر ششر سنہا اور آئی آئی ٹی مدراس کے شعبۂ کیمیکل انجینئرنگ کے پروفیسر ایتھیاراجا مانی بھی موجود تھے۔

 

 

کیمیکلز اینڈ پیٹروکیمیکلز ڈپارٹمنٹ کے سیکریٹری جناب تیج ویر سنگھ نے تقریب کا افتتاح کیا اور آئی آئی ٹی مدراس میں بایوڈی گریڈیبل پیکیجنگ مٹیریل (بایو پیک) کے مرکز امتیاز کا بھی افتتاح کیا۔ بایو پیک کی یہ سہولت پائیدار اختراعات، صلاحیت سازی اور ماحول دوست پیکیجنگ کی صلاحیتوں کے شعبے میں جدید تحقیق کے مرکز کے طور پر کام کرے گی۔

 

 

افتتاحی خطاب کرتے ہوئے کیمیکلز اینڈ پیٹروکیمیکلز ڈپارٹمنٹ کے سیکریٹری جناب تیج ویر سنگھ نے کیمیکل شعبے کے اہم کردار پر زور دیا اور کہا کہ یہ شعبہ معیشت کے تقریباً ہر مینوفیکچرنگ شعبے کے لیے بنیادی خام مال اور وسائل فراہم کرتا ہے۔ انہوں نے اس بات پر روشنی ڈالی کہ بھارت جب 2047 تک وکست بھارت کے ہدف کی جانب آگے بڑھ رہا ہے، ایسے میں صنعت اور تعلیمی اداروں کے درمیان شراکت داری کو مضبوط بنانا نہایت اہم ہے تاکہ لیبارٹری میں ہونے والی تحقیق کو تجارتی طور پر قابلِ عمل مصنوعات میں تبدیل کیا جا سکے۔

سیکریٹری نے درآمدات کے متبادل کی ضرورت پر زور دیتے ہوئے کہا کہ زیادہ خود انحصاری کو فروغ دینے کے لیے اشیا کی پروسیسنگ ملک کے اندر ہی کی جانی چاہیے۔ انہوں نے اعتماد ظاہر کیا کہ ہدف پر مبنی تحقیق و ترقی (آر اینڈ ڈی) اور صنعت کے تعاون سے قائم تحقیقی کلسٹر عالمی سطح پر بھارت کی موجودگی کو مزید وسعت دیں گے۔ جناب سنگھ نے مزید اعلان کیا کہ کیم کنکٹ ہر سال جولائی–اگست میں منعقد ہونے والی ایک مستقل تقریب بن جائے گی، جس کے ذریعے تمام مراکز امتیاز کی پیش رفت کا جائزہ لیا جائے گا۔

اس موقع پر خطاب کرتے ہوئے آئی آئی ٹی مدراس کے ڈائریکٹر پروفیسر وی کاماکوٹی نے ٹیکنالوجی کو اس کے منطقی انجام تک پہنچانے میں ادارہ جاتی اشتراک کی اہمیت بیان کی اور کیمیکل شعبے کو مکمل تعاون کا یقین دلایا۔ انہوں نے ریورس پچنگ کا ذکر کیا، جس میں صنعت اپنے مسائل تحقیقی اداروں کے سامنے پیش کرتی ہے تاکہ ان کے حل کے لیے تحقیق کی جا سکے۔

کیمیکلز اینڈ پیٹروکیمیکلز ڈپارٹمنٹ کے جوائنٹ سیکریٹری ڈاکٹر جی وینکٹیش نے مرکز امتیاز کی اسکیم کے وژن کو واضح کیا، جبکہ سی آئی پی ای ٹی کے ڈائریکٹر جنرل پروفیسر ششر سنہا نے اس اقدام کو قومی ترقی کے اہداف سے ہم آہنگ قرار دیا۔ تقریب کے کوآرڈینیٹر آئی آئی ٹی مدراس کے پروفیسر ایتھیاراجا مانی نے استقبالیہ خطاب اور اظہار تشکر پیش کیا۔

ڈی سی پی سی کے سیکریٹری اور آئی آئی ٹی مدراس کے ڈائریکٹر نے مشترکہ طور پر کیم کنکٹ 2026 کا مجموعہ بھی جاری کیا۔

                                               **************

 

ش ح۔ ف ش ع

25-08-2026

                                                                                                                                       U: 2590

 

(ریلیز آئی ڈی: 2303277) وزیٹر کاؤنٹر : 10