لوک سبھا میں آج ایک سوال کا جواب دیتے ہوئے قبائلی امور کے مرکزی وزیر مملکت جناب درگاداس اوئیکے نے بتایا کہ قبائلی امور کی وزارت قبائلی طلبہ کو اپنے اقامتی  ماحول میں معیاری تعلیم فراہم کرنے اور مقامی فنون و ثقافت کے تحفظ کے لیے ایکلویہ ماڈل رہائشی اسکول (ای ایم آر ایس) کی اسکیم نافذ کر رہی ہے۔ ای ایم آر ایس ایسے قبائلی اکثریتی بلاکوں میں قائم کیے جاتے ہیں جہاں مردم شماری 2011 کے مطابق درج فہرست قبائل کی آبادی 50 فیصد سے زیادہ اور قبائلی افراد کی تعداد کم از کم 20,000 ہو۔ اب تک 728 ای ایم آر ایس کی منظوری دی جا چکی ہے، جن میں سے 508 ملک بھر میں سرگرم عمل  ہیں۔

ملک بھر میں واقع  ای ایم آر ایس میں تعلیم کے معیار اور غیر نصابی سرگرمیوں کو بہتر بنانے کے لیے مختلف اقدامات کیے گئے ہیں۔ ان میں جدید تدریسی معاون وسائل سے لیس کلاس رومز، برج کورسز، تعلیمی لحاظ سے کمزور طلبہ کے لیے خصوصی تدریسی کلاسیں، سائنس اور کمپیوٹر لیبارٹری ، مختلف تعلیمی وسائل سے مزین کتب خانے، کھیل کے میدان اور کھیلوں کا سامان، موسیقی، فنون اور کھیلوں جیسی غیر نصابی سرگرمیوں کی سہولیات، ڈیجیٹل تعلیم کے لیے اسمارٹ کلاس رومز، انٹرنیٹ کی سہولت سے لیس کمپیوٹر لیبارٹری اور روزگار کی صلاحیت بڑھانے کے لیے ملبوسات، آٹوموٹیو، اے آر/وی آر، مصنوعی ذہانت، فنون جمیلہ اور تندرستی ، زراعت، الیکٹرانکس اور خوردہ شعبوں میں ہنرمندی کے فروغ اور پیشہ ورانہ تربیت کے پروگرام شامل ہیں۔

ای ایم آر ایس میں ڈیجیٹل تعلیم کو مزید مضبوط بنانے کے واسطے  اسمارٹ کلاس رومز، ڈیجیٹل بورڈ، انٹرنیٹ سے منسلکہ کمپیوٹر لیبارٹری  اور مخصوص ڈی ٹی ایچ ٹی وی کی سہولت فراہم کی گئی ہے۔ ’ایکلویہ چینل‘ نویں سے بارہویں جماعت تک نصاب پر مبنی تعلیمی مواد اور مسابقتی امتحانات کی تیاری سے متعلق مواد فراہم کرتا ہے، جس سے معیاری درسی  وسائل تک مسلسل رسائی یقینی بنائی گئی ہے۔ اس وقت ملک بھر کے ای ایم آر ایس میں 284 اسمارٹ کلاس رومز موجود ہیں، جن میں شہڈول لوک سبھا حلقے کے تحت آنے والے سوہگ پور، جیت پور، انوپ پور اور امریا کے بلاکس بھی شامل ہیں۔

مزید برآں، قبائلی طلبہ کی قومی تعلیمی سوسائٹی (این ای ایس ٹی ایس) ریاستی حکومتوں اور تنفیذی  ایجنسیوں کے ساتھ مسلسل رابطے میں رہتی  ہے تاکہ ای ایم آر ایس کی تعمیر کا کام تیز کیا جا سکے اور انہیں جلد از جلد فعال بنایا جا سکے۔ اس کے علاوہ، ریاستی حکومتوں کو یہ مشورہ بھی دیا گیا ہے کہ جہاں ممکن ہو، متبادل عمارتوں میں ای ایم آر ایس کو شروع  کیا جائے۔

ایکلویہ ماڈل رہائشی اسکولوں (ای ایم آر ایس) کے نظم و نسق، انتظام وانصرام اور آپریشن کو مضبوط بنانے کے واسطے مختلف ادارہ جاتی اصلاحات بھی کی گئی ہیں، جن میں مندرجہ ذیل اقدامات  شامل ہیں:

• قبائلی طلبہ کی قومی تعلیمی سوسائٹی (این ای ایس ٹی ایس) کا قیام قبائلی امور کی وزارت کے تحت ایک خود مختار ادارے کے طور پر کیا گیا ہے، تاکہ ملک بھر میں ای ایم آر ایس اسکیم کے لیے مجموعی پالیسی ، تعلیمی معاونت، نگرانی، صلاحیت سازی، بھرتی، طریقۂ کار میں یکسانیت اور اسکیم کے نفاذ کو یقینی بنایا جا سکے۔
• ریاستی ای ایم آر ایس سوسائٹیاں اپنے متعلقہ دائرۂ اختیار میں ای ایم آر ایس کے نفاذ، نظم  اور روزمرہ کے امور کی نگرانی کرتی ہیں۔
• ضلعی سطح کی ای ایم آر ایس کمیٹیاں، ضلع کلکٹر/ضلع مجسٹریٹ کی سربراہی میں، مقامی سطح پر نگرانی کو مضبوط بنانے اور نفاذ سے متعلق مقامی مسائل کو حل کرنے کے لیے قائم کی گئی ہیں۔
• تعلیمی انتظام، مالیاتی نظم، خریداری، طلبہ کی فلاح و بہبود، صحت و تحفظ، ہاسٹل کے انتظام اور شکایات کے ازالے سے متعلق جامع عملی رہنما اصول اور سرکلر جاری کیے گئے ہیں، تاکہ تمام ای ایم آر ایس میں یکساں معیارات کو یقینی بنایا جا سکے۔
• ای ایم آر ایس اسٹاف سلیکشن ایگزام  (ای ایس ایس ای) کے ذریعے مرکزی سطح پر بھرتی کا نظام قائم کیا گیا ہے، تاکہ تمام ای ایم آر ایس میں اہل اور قابل تدریسی و غیر تدریسی عملے کی تقرری کو یقینی بنایا جا سکے۔
• پیشہ ورانہ صلاحیتوں کو بہتر بنانے اور ادارہ جاتی کارکردگی کو مضبوط کرنے کے واسطے باقاعدہ ابتدائی تعارفی تربیتی پروگرام، دورانِ ملازمت باقاعدہ تربیت اور مسلسل صلاحیت سازی کے اقدامات شروع کیے گئے ہیں۔
• ای ایم آر ایس کو بروقت فنڈ فراہم کرنے کے لیے این ای ایس ٹی ایس براہِ راست اسکولوں کو مسلسل اخراجات کے لیے گرانٹ جاری کر رہی ہے۔

ان ادارہ جاتی اصلاحات سے ای ایم آر ایس کے نظم و نسق میں جواب دہی، باہمی رابطے اور نگرانی کا نظام مضبوط ہوا ہے، جس کے نتیجے میں مجموعی انتظامی امور میں بہتری آئی ہے۔ اڈیشہ، بہار اور مدھیہ پردیش سمیت ریاست کے لحاظ سے منظور شدہ، سرگرم عمل  اور زیرِ تعمیر ای ایم آر ایس کی تفصیلات ضمیمہ  I  میں دی گئی ہیں۔

کیونجھر اور شہڈول پارلیمانی حلقوں میں منظور شدہ، سرگرم عمل  اور زیرِ تعمیر ای ایم آر ایس کی تفصیلات ضمیمہ  II  میں دی گئی ہیں۔

ارریہ لوک سبھا حلقے کا کوئی بھی بلاک ای ایم آر ایس کے قیام کے لیے مطلوبہ مقررہ معیار پر پورا نہیں اترتا ہے ۔

(ای):کیونجھر لوک سبھا حلقہ میں واقع ای ایم آر ایس میں طلبہ کا اندراج:

گزشتہ 5 سالوں کے دوران ریاست اڈیشہ کو ای ایم آر ایس اسکیم کے لیے جاری کردہ کل فنڈ 2254.71 کروڑ روپے ہے۔

خالی عہدوں کے مسئلے کو حل کرنے کے لیے، 9111 تدریسی اور غیر تدریسی عملے کو پہلے ہی بھرتی کیا جا چکا ہے اور ملک بھر میں ای ایم آر ایس کے لیے 7267 تدریسی اور غیر تدریسی عملے کے دوسرے  بیچ کے لیے امتحان کا انعقاد کیا گیا ہے۔ بھرتی کے پہلے مرحلے میں اڈیشہ بھر کے ای ایم آر ایس میں کل 514 تدریسی عملہ تعینات کیا گیا ہے جس کے تحت  کیونجھر لوک سبھا حلقہ میں  واقع ای ایم آر ایس میں 59 تدریسی عملہ  کی بھرتی بھی شامل ہے۔ اس کے علاوہ، ریاستی حکومتوں کو یہ مشورہ بھی دیا گیا ہے کہ وہ خالی عہدوں کے مسئلے کو حل کرنے کے لیے ڈیپوٹیشن اور عارضی بنیاد پر عملے کو تعینات کریں تاکہ تعلیمی سرگرمیاں متاثر نہ ہوں۔

ای ایم آر ایس جدید ڈیزائن کے لڑکوں اور لڑکیوں کے علیحدہ  ہاسٹلز، مربوط ڈائننگ ہال  اور باورچی خانے کی سہولیات، تدریسی اور غیر تدریسی عملے کے لیے کوارٹر، جدید تدریسی آلات سے لیس  اچھی ہوادار کلاس رومز، سائنس اور کمپیوٹر لیبارٹری، پڑھائی کے  متنوع وسائل پر مشتمل  لائبریریاں، کھیل کے میدان اور کھیلوں کا سامان،مقامی فن و ثقافت کے تحفظ کے لیےفنون،  کھیل اور موسیقی کی غیر نصابی سرگرمیوں کے لیے سہولیات سے آراستہ  ہیں۔

ضمیمہ  I

’’ای ایم آر ایس کی مضبوطی اور توسیع ‘‘کے حوالے سے

ریاست کے لحاظ سے 30 جون 2026 تک ای ایم آر ایس کی  موجودہ حالت

 

ضمیمہ II

’’ ای ایم آر ایس کی مضبوطی اور توسیع ‘‘ کے حوالے سے

کیونجھر اور شہڈول پارلیمانی حلقہ میں منظور شدہ، آپریشنل اور زیر تعمیر ای ایم آر ایس کی صورتحال

*************

(ش ح ۔ م ش ع ۔ت ا )

 U. No. 2426

(ریلیز آئی ڈی: 2301981) وزیٹر کاؤنٹر : 10