قبائلی امور کی وزارت، حکومتِ ہندکےسکریٹری محترمہ رنجنا چوپڑانے قبائلی امور کی وزارت کے ایڈیشنل سکریٹری جناب منیش ٹھاکر کے ہمراہ آج مدھیہ پردیش کے اندور ڈویژن میں علاقائی دورہ اور پیش رفت کا جائزہ لیا۔ اس دورے کا مقصد قبائلی امور کی وزارت کی اہم اسکیموں کے زمینی سطح پر نفاذ کا جائزہ لینا اور قبائلی مستفیدین سے براہِ راست بات چیت کرنا تھا۔ دورہ کرنے والی ٹیم میں مدھیہ پردیش حکومت کے قبائلی بہبود کے پرنسپل سکریٹری جناب گلشن بامرہ اور ریاست کے قبائلی بہبود محکمہ کے دیگر اعلیٰ افسران بھی شامل تھے۔

دن کا آغاز اندور کے ایکلویہ ماڈل رہائشی اسکول (ای ایم آر ایس)، مورود (خصوصاً کمزور قبائلی گروپ) کے دورے سے ہوا۔ سکریٹری نے چھٹی سے بارہویں جماعت تک کے طلبہ اور اساتذہ سے گرمجوشی سے بات چیت کی اور روزمرہ تدریس میں استعمال ہونے والی ڈیجیٹل اسمارٹ کلاس رومز کا مشاہدہ کیا۔ طلبہ نے مختلف شعبوں میں انجینئر، صنعت کار اور پیشہ ور بننے کی اپنی خواہشات کا اظہار کیا۔ یہ درج فہرست قبائل کے بچوں، بالخصوص انتہائی کمزور قبائلی گروپوں سے تعلق رکھنے والے بچوں کو پی ایم-جن من اور ڈی اےجے جی یو اے کے تحت فراہم کی جانے والی معیاری رہائشی تعلیم کا ایک حوصلہ افزا عکاس ہے۔

 

قبائلی امور کی وزارت کی سکریٹری اندور کے ای ایم آر ایس مورود (خصوصاً کمزور قبائلی گروہ) میں طلبہ سے بات چیت کرتے ہوئے

 

اس کے بعد ٹیم ضلع کھرگون کے مہیشور میں واقع بنکر سویدھا کیندر پہنچی، جسے قومی دیہی روزگار مشن (این آر ایل ایم) کے تحت رجسٹرڈ ایک امدادی گروپ چلا رہا ہے۔ اس کیندر میں درج فہرست قبائل سے تعلق رکھنے والی خواتین مشہور مہیشوری ساڑیاں تیار کرنے کے کام سے وابستہ ہیں۔ یہاں روزانہ ایک ہزار سے دو ہزار ساڑیاں تیار کی جاتی ہیں، جو ٹرائیفیڈ، خود امدادی گروپوں (ایس ایچ جیز) اور ضلع پنچایتوں کے ذریعے فراہم کردہ مارکیٹ سے منسلک سہولیات کے توسط سے مختلف بازاروں تک پہنچتی ہیں۔سکریٹری کو بتایا گیا کہ اس کیندر کی ایک بنکر خاتون نے حال ہی میں دہلی میں منعقدہ ایک فیشن شو میں ریمپ پر واک کی تھی۔ سکریٹری نے درج فہرست قبائل سے تعلق رکھنے والے طلبہ، جن میں نیٹ امتحان میں کامیاب ایک امیدوار بھی شامل تھا، سے ملاقات کی اور کیندر میں موجود جنگلاتی حقوق قانون (ایف آر اے) کے تحت پٹہ حاصل کرنے والے افراد سے بھی بات چیت کی۔

 

مہیشور کے بنکر سویدھا کیندر میں مہیشوری ساڑیاں بُننے کے کام میں مصروف درج فہرست قبائل سے تعلق رکھنے والی خواتین بنکر

 

ضلع کھرگون کے کیریاکھیری میں واقع آدی سیوا کیندر میں، جو قبائلیوں کو بااختیار بنانے کے لیے یک نکاتی سہولت مرکز کے طور پر کام کرتا ہے، سکریٹری نے درج فہرست قبائل سے تعلق رکھنے والے افراد کو راشن کارڈ بنوانے سے لے کر مختلف اسکیموں میں اندراج تک کی سہولیات کے لیے مخصوص مرکز میں موجود رجسٹر میں اپنی درخواستیں درج کرتے ہوئے دیکھا۔ اس کیندر میں حال ہی میں ملک گیر جن سُنوائی (عوامی سماعت) کا انعقاد بھی کیا گیا تھا، جس سے شکایات کے ازالے کی سہولت قبائلی برادری کے مزید قریب پہنچ گئی ہے۔ سکریٹری نے کیندر میں موجود درج فہرست قبائل سے تعلق رکھنے والی خواتین سے بات چیت کی، جنہوں نے اپنے محلے میں ایسی سہولت دستیاب ہونے پر اطمینان کا اظہار کیا۔

 

 

اس کے بعد ٹیم نے ضلع کھرگون میں واقع ایک قبائلی ہوم اسٹے کا دورہ کیا، جسے مقامی قبائلی خاندان چلا رہا ہے۔ یہ کمیونٹی کی قیادت میں دیہی سیاحت کو فروغ دینے کی ایک عمدہ مثال ہے۔ ہوم اسٹے میں کشادہ، صاف ستھرے اور اچھی طرح دیکھ بھال کیے گئے کمرے موجود ہیں، جن کے ساتھ الگ اندرونی باورچی خانہ بھی ہے۔ یہاں قیام کا یومیہ کرایہ مناسب ہے اور پورے ہفتے اچھی تعداد میں سیاح آتے ہیں، جبکہ اختتامِ ہفتہ پر سب سے زیادہ آمدورفت ہوتی ہے۔سکریٹری کو بتایا گیا کہ ہوم اسٹے کے مالکان کو ریاستی حکومت کی جانب سے مقرر کردہ ایک ایجنسی کے ذریعے تربیت، رہنمائی اور مسلسل نگرانی فراہم کی جاتی ہے، جس سے مزید قبائلی خاندانوں کے اس ذریعۂ معاش کو اپنانے کے ساتھ خدمات کے معیار اور یکسانیت کو یقینی بنانے میں مدد مل رہی ہے۔ سکریٹری نے ہوم اسٹے کے مالک سے بات چیت کرکے یہ سمجھنے کی کوشش کی کہ قبائلی خاندان سیاحت کے ذریعے پائیدار ذریعۂ معاش کیسے قائم کر رہے ہیں۔

 

قبائلی امور کی وزارت کی سکریٹری ضلع کھرگون میں قبائلی ہوم اسٹے کے مالک سے بات چیت کرتے ہوئے

 

اس کے بعد سکریٹری نے اندور میں سکل سیل بیماری (ایس سی ڈی) کے لیے قائم مہارت کے مرکز کا دورہ کیا۔ یہ مرکز قبائلی آبادی میں سکل سیل بیماری کے خاتمے کے لیے قبائلی امور کی وزارت کی جانب سے جاری کوششوں کے تحت قائم کیا گیا ہے۔ انہوں نے مرکز میں دستیاب اسکریننگ، مشاورت اور علاج سے متعلق معاون سہولیات کا جائزہ لیا۔

 

 

علاقائی  دورے کا اختتام اندور کے ڈویژنل کمشنر کے دفتر میں سکریٹری کی زیرِ صدارت منعقدہ پیش رفت کے جائزہ اجلاس کے ساتھ ہوا، جس میں مدھیہ پردیش، بالخصوص اندور ڈویژن میں قبائلی امور کی وزارت کی اسکیموں کے نفاذ کی صورتِ حال کا جائزہ لیا گیا۔ اجلاس میں متعلقہ محکموں کے نمائندوں کے ساتھ ریاستی قبائلی بہبود محکمہ کے اعلیٰ افسران نے بالمشافہ شرکت کی، جبکہ ڈویژن کے دیگر اضلاع کے ضلعی کلکٹروں نے ویڈیو کانفرنسنگ کے ذریعے اجلاس میں شرکت کی۔جائزے کے دوران سکریٹری نے کلکٹروں کو ہدایت دی کہ وہ زمینی سطح پر قبائلی امور کی وزارت کی تمام اسکیموں کی مکمل کوریج کو تیزی سے یقینی بنائیں۔ انہوں نے مقررہ مدت کے اندر مختلف محکموں کے درمیان مربوط کارروائی کی ضرورت پر زور دیا، تاکہ تمام اہل قبائلی خاندانوں اور بستیوں تک ان اسکیموں کے مطلوبہ فوائد پہنچ سکیں۔

 

 

قبائلی امور کی وزارت کی سکریٹری اندور کے ڈویژنل کمشنر کے دفتر میں اسکیموں کی پیش رفت کے جائزہ اجلاس کی صدارت کرتے ہوئے

 

دن بھر جاری رہنے والے فیلڈ دورے اور جائزے نے قبائلی بہبود کی اسکیموں کے فوائد آخری مرحلے تک پہنچانے، آدی سیوا کیندروں جیسے ادارہ جاتی بنیادی ڈھانچے کو مضبوط بنانے، اور ہنرمندی پر مبنی کاروبار، دیہی سیاحت اور معیاری رہائشی تعلیم کے ذریعے قبائلیوں کے پائیدار ذریعۂ معاش کو فروغ دینے پر وزارت کی مسلسل توجہ کا اعادہ کیا۔

********

ش ح۔ع ح۔ج ا

U-2355

(रिलीज़ आईडी: 2301440) आगंतुक पटल : 6