गोव्यात विविध केंद्रीय सरकारी संस्थांमध्ये देशभक्तीपूर्ण वातावरणात 80 वा स्वातंत्र्यदिन साजरा

सांस्कृतिक मंत्रालय

गोव्यात विविध केंद्रीय सरकारी संस्थांमध्ये देशभक्तीपूर्ण वातावरणात 80 वा स्वातंत्र्यदिन साजरा

Posted On: 15 AUG 2026 3:59PM by PIB Mumbai

गोवा, 15 ऑगस्ट 2026 :

गोव्यातील विविध केंद्रीय सरकारी संस्था आणि आस्थापनांनी देशाचा 80 वा स्वातंत्र्यदिन देशभक्ती, उत्साह आणि राष्ट्राभिमानाच्या वातावरणात साजरा केला. ध्वजारोहण, मानवंदना, सांस्कृतिक कार्यक्रम आणि राष्ट्राच्या प्रगतीत योगदान देणाऱ्या अधिकारी, कर्मचारी व हितधारकांचा गौरव अशा विविध उपक्रमांनी या संस्थांच्या परिसरात स्वातंत्र्यदिनाचा उत्साह साजरा करताना पाहायला मिळाला.

दाबोळी येथील गोवा आंतरराष्ट्रीय विमानतळावर विमानतळ संचालक फ्लाइट लेफ्टनंट आकाश दीप यांच्या हस्ते राष्ट्रध्वज फडकविण्यात आला. यानंतर केंद्रीय औद्योगिक सुरक्षा दलाकडून मानवंदना देण्यात आली. आपल्या संबोधनात विमानतळ संचालकांनी विमानतळाचे सुरळीत संचालन आणि प्रवाशांना उत्कृष्ट सेवा देण्यासाठी अधिकारी, कर्मचारी आणि विविध हितधारकांच्या योगदानाचे कौतुक केले. यावेळी उत्कृष्ट सेवा आणि प्रवासी सेवा सुरळीत ठेवण्यासाठी सातत्यपूर्ण योगदान देणाऱ्या कर्मचारी व प्रमुख हितधारकांचा सत्कार करण्यात आला.

स्वातंत्र्यदिनानिमित्त गोवा आंतरराष्ट्रीय विमानतळाच्या टर्मिनल परिसरात कलाकारांनी साकारलेल्या आकर्षक कलाकृतींमधून एकता, स्वातंत्र्य आणि राष्ट्राभिमानाचे विविध रंगही पाहायला मिळाले. कलाकारांच्या सादरीकरणाने विमानतळ परिसराला उत्सवी आणि देशभक्तीपूर्ण वातावरणाची विशेष झलक पाहायला मिळत आहे.

राष्ट्रीय ध्रुवीय व महासागर संशोधन संस्था, मुर्मगाव येथेही स्वातंत्र्यदिन उत्साहात साजरा करण्यात आला. संस्थेचे संचालक डॉ. थंबन मेलोथ यांच्या हस्ते राष्ट्रध्वज फडकविण्यात आला. कार्यक्रमाची सुरुवात राष्ट्रगीताने झाली आणि त्यानंतर राष्ट्रध्वज फडकवून राष्ट्रगीताचे गायन करण्यात आले.

आपल्या संबोधनात संचालक डॉ. थंबन मेलोथ यांनी संस्थेच्या पायाभूत सुविधांमध्ये झालेल्या महत्त्वपूर्ण प्रगतीचा आढावा घेतला. ध्रुवीय आणि महासागर संशोधनाच्या माध्यमातून देशाच्या वैज्ञानिक क्षमतांना बळकटी देण्यासाठी वैज्ञानिक, अभियंते, संशोधन विद्यार्थी आणि सहाय्यक कर्मचारी बजावत असलेल्या भूमिकेचे त्यांनी कौतुक केले. वैज्ञानिक उत्कृष्टतेच्या माध्यमातून राष्ट्रसेवा सुरू ठेवण्याचे आवाहन त्यांनी आपले सहकारी, अधिकारी आणि कर्मचाऱ्यांना केले. या प्रयत्नांमधून विकसित भारताच्या संकल्पनेला हातभार लागत असल्याचेही त्यांनी नमूद केले.

दूरदर्शन गोवा येथे उपमहासंचालक श्री. संदीप श्रीवास्तव यांच्या हस्ते सकाळी राष्ट्रध्वज फडकविण्यात आला. त्यानंतर राष्ट्रगीत ‘वंदे मातरम्’ आणि राष्ट्रगीत ‘जन गण मन’ यांचे गायन करण्यात आले. यावेळी उपसंचालक, विमलन जय, सहायक संचालक (कार्यक्रम) सॅव्हिओ दी. नॉरोन्हा तसेच इतर अधिकारी व कर्मचाऱ्यांनी स्वातंत्र्यलढ्याच्या आठवणी आणि स्वातंत्र्योत्तर भारताच्या वाटचालीतील महत्त्वपूर्ण घटनांवर आपले विचार व्यक्त केले.

गोव्यातील या विविध केंद्रीय संस्थांमध्ये झालेल्या स्वातंत्र्यदिनाच्या कार्यक्रमांतून देशाच्या स्वातंत्र्याचा गौरव करण्याबरोबरच राष्ट्राच्या विकासात विविध क्षेत्रांमध्ये योगदान देण्याची बांधिलकी अधोरेखित झाली. विज्ञान, विमानतळ सेवा, प्रसारण आणि इतर क्षेत्रांतील अधिकारी व कर्मचाऱ्यांनी एकत्र येत देशभक्ती, कर्तव्यनिष्ठा आणि राष्ट्रसेवेची भावना अधिक दृढ केली.