રક્ષાબંધન ભાઈ-બહેનના અતૂટ પ્રેમ, વિશ્વાસ અને સ્નેહનો પર્વ છે. જો તમારા ભાઈ વિદેશમાં રહે છે, તો હવે અંતર તમારા સ્નેહમાં અવરોધ બનશે નહીં. ભારતીય પોસ્ટ વિભાગ પોતાની ઈન્ટરનેશનલ ટ્રેકડ પેકેટ સર્વિસ દ્વારા 135 દેશોમાં અત્યંત કિફાયતી દરે રાખડી તથા ભેટ-સોગાદો સુરક્ષિત રીતે અને ટ્રેકિંગ સુવિધા સાથે મોકલવાની સુવિધા ઉપલબ્ધ કરાવી રહ્યું છે. આ અંગે માહિતી આપતાં ઉત્તર ગુજરાત ક્ષેત્રના પોસ્ટમાસ્ટર જનરલ શ્રી કૃષ્ણ કુમાર યાદવે જણાવ્યું કે ઈન્ટરનેશનલ ટ્રેકડ પેકેટ સર્વિસ આંતરરાષ્ટ્રીય ઈ-કોમર્સની વધતી જતી જરૂરિયાતોને ધ્યાનમાં રાખીને વિકસાવવામાં આવેલી વિશેષ સેવા છે. આ સેવા વ્યવસાયિક ગ્રાહકો ઉપરાંત સામાન્ય નાગરિકો માટે પણ ઉપલબ્ધ છે. આ સેવા દ્વારા ગ્રાહકો મહત્તમ 5 કિલોગ્રામ સુધીનું પાર્સલ મોકલી શકે છે, જે સંબંધિત ગંતવ્ય દેશ દ્વારા નિર્ધારિત મહત્તમ વજન મર્યાદાને આધીન રહેશે. ઈન્ટરનેશનલ ટ્રેકડ પેકેટ સર્વિસની સૌથી મોટી વિશેષતા એન્ડ-ટુ-એન્ડ ઓનલાઈન ટ્રેકિંગ સુવિધા છે. ઓછો ખર્ચ, વિશ્વસનીય સેવા, વ્યાપક પહોંચ અને ટ્રેકિંગ સુવિધાના કારણે વિદેશમાં રાખડી મોકલવા માટે આ સેવા એક વિશ્વસનીય માધ્યમ બની રહી છે.

પોસ્ટમાસ્ટર જનરલ શ્રી કૃષ્ણ કુમાર યાદવે જણાવ્યું કે ભારતીય પોસ્ટ વિભાગની ઈન્ટરનેશનલ ટ્રેકડ પેકેટ સર્વિસ એવા લાખો ભારતીય પરિવારો માટે ભાવનાત્મક સેતુનું કાર્ય કરી રહી છે, જેમના પોતાના સ્વજનો વિદેશમાં રહે છે. આ સુવિધા અંતર્ગત થાઈલેન્ડ, ભૂટાન, ચીન, મ્યાનમાર, સિંગાપોર તથા સંયુક્ત આરબ અમીરાત જેવા દેશોમાં શરૂઆતના 50 ગ્રામ સુધીનું પેકેટ માત્ર ₹185માં મોકલી શકાય છે. જ્યારે મલેશિયા, હોંગકોંગ, કઝાકિસ્તાન અને વિયેતનામ માટે શરૂઆતના 50 ગ્રામનો ચાર્જ ₹190 છે. તે જ રીતે ગ્રેટ બ્રિટન માટે ₹200, જર્મની અને દક્ષિણ આફ્રિકા માટે ₹245, નેધરલેન્ડ્સ માટે ₹320, ઓસ્ટ્રિયા અને બેલ્જિયમ માટે ₹325, ફ્રાન્સ માટે ₹335, ઇટાલી માટે ₹350, કેનેડા માટે ₹360, ઓસ્ટ્રેલિયા માટે ₹395 અને અમેરિકા માટે ₹400નો દર નિર્ધારિત કરવામાં આવ્યો છે. આ ઉપરાંત બ્રાઝિલ, મેક્સિકો, આર્જેન્ટિના સહિત અનેક દેશો માટે પણ આકર્ષક દરો ઉપલબ્ધ છે. ઉપરોક્ત દરો ઉપરાંત 18% જીએસટી વધારાના રૂપે ચૂકવવાનો રહેશે.

પોસ્ટમાસ્ટર જનરલ શ્રી કૃષ્ણ કુમાર યાદવે વધુમાં જણાવ્યું કે રક્ષાબંધનના અવસરે પોસ્ટ વિભાગ દ્વારા ગ્રાહકોને ઈનલૅન્ડ સ્પીડ પોસ્ટ (ડોક્યુમેન્ટ) ‘રાખી મેઇલ’ પર પોસ્ટેજ ચાર્જમાં 10%ની વિશેષ છૂટ આપવામાં આવી રહી છે. આ છૂટનો લાભ લેવા માટે કવર પર “રાખી મેઇલ” લખેલું હોવું આવશ્યક છે. આ છૂટ માત્ર પોસ્ટેજ ચાર્જ પર જ લાગુ પડશે અને એક ગ્રાહક એક સમયે મહત્તમ 5 રાખી મેઇલ બુક કરાવી શકશે. આ સુવિધા માત્ર રિટેલ કાઉન્ટર બુકિંગ માટે જ ઉપલબ્ધ રહેશે.

(रिलीज़ आईडी: 2299448) आगंतुक पटल : 20