ای۔کورٹس مشن موڈ پروجیکٹ ملک بھر میں مرحلہ وار  طریقے سےنافذ کیا جا رہا ہے، جس کا مقصد عدالتی نظام میں اطلاعات و مواصلاتی ٹیکنالوجی (آئی سی ٹی) کے استعمال کو مزید مستحکم کرنا ہے۔ پروجیکٹ کے موجودہ مرحلے یعنی مرحلہ سوم (27-2023) کے تحت بڑے پیمانے پر عدالتی ریکارڈ کو ڈیجیٹل شکل دینے، ورچوئل سماعتوں کے وسیع تر استعمال، انصاف کے نظام سے وابستہ اداروں کے درمیان بہتر باہمی ربط اور مصنوعی ذہانت (اے آئی) سمیت جدید ٹیکنالوجیز کو اپنانے کے ذریعے عدالتوں کو ڈیجیٹل، کاغذ سے پاک اور زیادہ مؤثربنانے کی سمت پیش رفت کا تصور پیش کیا گیا ہے۔پروجیکٹ کے مرحلہ سوم کے تحت حاصل ہونے والی پیش رفت کی تفصیلات ضمیمہ اوّل میں دی گئی ہے۔

ای۔کورٹس مشن موڈپروجیکٹ کے نفاذ سے کیس انفارمیشن سسٹم (سی آئی ایس) 4.0 اور جسٹس اپلی کیشن کے ذریعے مقدمات کے انتظام و انصرام میں بہتری آئی ہے، جس سے جج صاحبان مقدمات کا ڈیجیٹل طریقے سے انتظام اور نگرانی کر سکتے ہیں۔ ای۔فائلنگ نظام کے ذریعے ڈیجیٹل طور پر دستاویزات داخل کرنے کے عمل کو بھی مضبوط بنایا گیا ہے، جس سے مقدمات اور متعلقہ درخواستیں آن لائن دائر کرنے کی سہولت حاصل ہوتی ہے، جبکہ ای۔ادائیگی کے نظام کے ذریعے عدالتی فیس بھی آن لائن جمع کرائی جا سکتی ہے۔ اس کے علاوہ ویڈیو کانفرنسنگ کی سہولت کے ذریعے ان عدالتوں میں ورچوئل اور ہائبرڈ سماعتیں ممکن ہوئی ہیں جہاں یہ نظام نافذ کیا گیا ہے۔ ان اقدامات سے عدالتی انتظام اور خدمات کی فراہمی کی کارکردگی، رسائی اور شفافیت میں نمایاں بہتری آئی ہے۔

ای۔کورٹس مشن موڈ پروجیکٹ کے تحت مدعیان اور وکلا، بشمول آندھرا پردیش کے مدعیان اور وکلا، میں ڈیجیٹل خواندگی اور آگاہی کو فروغ دینے کے لیے بھی مختلف اقدامات کیے گئے ہیں۔ ان میں اعلیٰ عدالتوں اور ریاستی عدالتی اکیڈمیوں کے ذریعے تربیتی پروگرام، صلاحیت سازی کی ورکشاپس، صارفین کے لیے رہنما کتابچے، معلومات فراہم کرنے والے ویڈیوزاور عوامی آگاہی کی مہمات شامل ہیں۔

اس کے علاوہ ای۔سیوا کیندر مدعیان اور وکلا کو ای۔فائلنگ پورٹل پر رجسٹریشن، درخواستوں کو اسکین کرکے آن لائن اپ لوڈ کرنے، عدالتی فیس کی آن لائن ادائیگی، مقدمات کی صورتحال سے متعلق معلومات حاصل کرنے، مصدقہ نقول کے لیے درخواست دینے، ویڈیو کانفرنسنگ اور دیگر ڈیجیٹل عدالتی خدمات تک رسائی میں مدد فراہم کرتے ہیں۔

اس کے علاوہ، ای۔کورٹس خدمات، ضلع عدالتوں کی ویب سائٹس اور ای۔کورٹس موبائل ایپلی کیشن کے ذریعے مقدمات کی صورتحال، مقدمات کی سماعت کی فہرست، فیصلوں، احکامات اور عدالتوں سے متعلق دیگر معلومات آن لائن دستیاب ہیں۔ یہ اقدامات ڈیجیٹل خواندگی کو فروغ دینے، آگاہی میں اضافہ کرنے اور ای۔کورٹس خدمات تک وسیع تر رسائی کو آسان بنانے میں معاون ہیں۔