مرکزی حکومت نے درج فہرست ذاتوں (ایس سی)، دیگر پسماندہ طبقات (او بی سی) اور معذور افراد (پی ڈبلیو ڈی) سے تعلق رکھنے والے طلبہ کی اسکالرشپ درخواستوں اور زیر التوا وظائف کی صورتحال کے ساتھ ساتھ نشہ چھڑانے کے مراکز اور بزرگ شہریوں کی فلاحی اسکیموں کے لیے بجٹ مختص کیے جانے کی تفصیلات بھی پیش کی ہیں۔

راجیہ سبھا میں ڈاکٹر مینکا گروسوامی کے سوال کے تحریری جواب میں وزیر مملکت برائے سماجی انصاف و تفویض اختیارات رام داس اٹھاولے نے بتایا کہ درج فہرست ذاتوں اور دیگر کے لیے پری میٹرک اسکالرشپ اور درج فہرست ذاتوں کے طلبہ کے لیے پوسٹ میٹرک اسکالرشپ مرکزی سرپرستی والی اسکیمیں ہیں، جن میں درخواستوں کی کوئی مقررہ حد نہیں اور یہ طلب کے مطابق چلائی جاتی ہیں۔

انہوں نے بتایا کہ وظائف براہ راست فائدہ منتقلی (ڈی بی ٹی) کے ذریعے مستفدین کے آدھار سے منسلک بینک کھاتوں میں جاری کیے جاتے ہیں۔ مرکزی حصے کی رقم جاری کرنا متعلقہ ریاستی حکومت یا مرکز کے زیر انتظام علاقے کی انتظامیہ کی جانب سے اپنا حصہ جاری کرنے اور نیشنل اسکالرشپ پورٹل پر حتمی طور پر تصدیق شدہ ادائیگی کے اعداد و شمار اپ لوڈ کرنے سے مشروط ہے۔

درج فہرست ذاتوں کے لیے اعلیٰ تعلیم کے نوجوان کامیاب افراد کی اسکالرشپ کی مرکزی شعبے کی اسکیم شریاس-ایس سی کے تحت حکومت نے بتایا کہ کوئی اسکالرشپ درخواست زیر التوا نہیں ہے اور وظائف کی کوئی بقایا رقم بھی نہیں ہے۔

نشہ چھڑانے کے مراکز کے لیے بجٹ مختص کیے جانے کے حوالے سے حکومت نے واضح کیا کہ گزشتہ تین برس کے دوران بجٹ مختص کرنے میں کوئی کمی نہیں کی گئی۔

بزرگ شہریوں کی فلاحی اسکیموں کے لیے 2023-24 میں 705.11 کروڑ روپے، 2024-25 میں 539.44 کروڑ روپے اور 2025-26 میں 557.42 کروڑ روپے مختص کیے گئے۔ اس طرح تین سال کی مدت میں ان اسکیموں کے لیے مجموعی طور پر 1,801.97 کروڑ روپے مختص کیے گئے ہیں۔

 

حکومت نے مزید بتایا کہ دیگر پسماندہ طبقات (او بی سی) اور دیگر مستفدین کے لیے پردھان منتری ینگ اچیورز اسکالرشپ ایوارڈ اسکیم فار وائبرنٹ انڈیا (پی ایم-یاسسوی) کے تحت چار ذیلی اسکیمیں شامل ہیں۔ ان میں پری میٹرک، پوسٹ میٹرک، کالجوں میں ٹاپ کلاس ایجوکیشن اور او بی سی، ای بی سی اور ڈی این ٹی طلبہ کے لیے اسکولوں میں ٹاپ کلاس ایجوکیشن شامل ہیں۔

پری میٹرک اور پوسٹ میٹرک اسکالرشپ کے اجزا مرکزی سرپرستی والی اسکیمیں ہیں، جن کے تحت درخواستوں کی کارروائی، تصدیق، منظوری اور وظائف کی ادائیگی متعلقہ ریاستی حکومتوں اور مرکز کے زیر انتظام علاقوں کی انتظامیہ کرتی ہے، جبکہ مرکزی حکومت ریاستوں اور مرکز کے زیر انتظام علاقوں کو فنڈز جاری کرتی ہے۔ اسکولوں اور کالجوں میں ٹاپ کلاس ایجوکیشن کے اجزا مرکزی شعبے کی اسکیمیں ہیں۔

معذور طلبہ کے حوالے سے معذور افراد کو با اختیار بنانے سے متعلق محکمہ (ڈی ای پی ڈبلیو ڈی) مرکزی شعبے کی ’’معذور طلبہ کے لیے اسکالرشپ اسکیم‘‘ نافذ کر رہا ہے۔ اس اسکیم کے تحت موصول ہونے والی درخواستوں پر مقررہ اہلیت کی شرائط پورا کرنے اور مکمل درخواستیں جمع کرائے جانے کی صورت میں موجودہ رہنما اصولوں کے مطابق کارروائی کی جاتی ہے۔ وظائف کی منظوری اور اجرا تعلیمی سال کے دوران مسلسل جاری رہتا ہے۔

حکومت کے جواب سے اہم اسکالرشپ اسکیموں کی طلب پر مبنی نوعیت، وظائف کی رقم براہ راست فائدہ منتقلی (ڈی بی ٹی) کے ذریعے فراہم کرنے کے طریقۂ کار اور متعلقہ اسکیموں کے تحت اہل درخواستوں پر مسلسل کارروائی کیے جانے کی وضاحت ہوتی ہے۔

 

************

ش ح ۔    م د  ۔  م  ص

(U :1963  )

(रिलीज़ आईडी: 2298641) आगंतुक पटल : 2