مرکزی حکومت نے گزشتہ تین مالی سالوں کے دوران محکمہ سماجی انصاف و عطائے اختیارات کے زیر انتظام درج فہرست ذات (ایس سی) طلبا کے لیے مختلف اسکالرشپ اسکیموں کے تحت مجموعی طور پر 19,216.46 کروڑ روپے تقسیم کیے ہیں۔

سماجی انصاف و عطائے اختیارات کے مرکزی وزیر ڈاکٹر وریندر کمار نے آج لوک سبھا میں جناب راجا اے کے ایک سوال کے جواب میں یہ معلومات فراہم کی۔

انہوں نے بتایا کہ ان اسکالرشپ اسکیموں کے تحت تقسیم کی گئی مجموعی رقم 2023-24 میں 6,094.48 کروڑ روپے سے بڑھ کر 2024-25 میں 6,200.59 کروڑ روپے اور پھر 2025-26 میں 6,921.39 کروڑ روپے ہو گئی۔

انہوں نے مزید بتایا کہ ان اسکالرشپ اسکیموں میں ایس سی طلبا کے لیے پوسٹ میٹرک اسکالرشپ، ایس سی اور دیگر طلبا کے لیے پری میٹرک اسکالرشپ اسکیم، ٹاپ کلاس ایجوکیشن اسکیم (ٹی سی ایس) اور ایس سی اور دیگر اہل امیدواروں کے لیے نیشنل اوورسیز اسکالرشپ (این او ایس) اسکیم شامل ہیں۔

ڈاکٹر کمار نے بتایا کہ ایس سی طلبا کے لیے پوسٹ میٹرک اسکالرشپ کے تحت گزشتہ تین مالی سالوں کے دوران 17,224.63 کروڑ روپے تقسیم کیے گئے۔ جاری کی گئی رقم 2023-24 میں 5,475.42 کروڑ روپے سے بڑھ کر 2024-25 میں 5,562.26 کروڑ روپے اور 2025-26 میں 6,186.95 کروڑ روپے ہو گئی۔

وزیر نے مزید بتایا کہ ایس سی اور دیگر طلبا کے لیے پری میٹرک اسکالرشپ اسکیم کے تحت تین سالہ مدت کے دوران 1,469.92 کروڑ روپے تقسیم کیے گئے، جن میں 2023-24 میں 446.66 کروڑ روپے، 2024-25 میں 460.90 کروڑ روپے اور 2025-26 میں 562.36 کروڑ روپے جاری کیے گئے۔ ٹاپ کلاس ایجوکیشن اسکیم کے تحت 304.29 کروڑ روپے جبکہ اسی مدت کے دوران نیشنل اوورسیز اسکالرشپ اسکیم کے تحت 217.62 کروڑ روپے جاری کیے گئے۔

ایس سی طلبا کے لیے پوسٹ میٹرک اسکالرشپ اسکیم کے تحت تمل ناڈو کو مرکزی معاونت کے طور پر 2023-24 میں 713.70 کروڑ روپے، 2024-25 میں 1,032.09 کروڑ روپے اور 2025-26 میں 1,034.94 کروڑ روپے موصول ہوئے۔ مہاراشٹر کو تینوں برسوں کے دوران بالترتیب 1,652.98 کروڑ روپے، 929.92 کروڑ روپے اور 1,095.80 کروڑ روپے موصول ہوئے، جبکہ اتر پردیش کو بالترتیب 674.83 کروڑ روپے، 366.02 کروڑ روپے اور 617.64 کروڑ روپے موصول ہوئے۔

 

 

پری میٹرک اسکالرشپ اسکیم برائے ایس سی اور دیگر طلبا کے تحت تمل ناڈو کو 2023-24 میں 70.56 کروڑ روپے، 2024-25 میں 109.45 کروڑ روپے اور 2025-26 میں 121.49 کروڑ روپے موصول ہوئے۔

ایس سی طلبا کے لیے پوسٹ میٹرک اسکالرشپ اور ایس سی و دیگر طلبا کے لیے پری میٹرک اسکالرشپ مرکزی معاونت یافتہ اسکیمیں ہیں، جن کے تحت متعلقہ ریاستوں اور مرکز کے زیرِ انتظام علاقوں کی جانب سے اپنا حصہ جاری کیے جانے کے بعد محکمہ مرکزی پورٹل کے ذریعے مرکزی حصہ جاری کرتا ہے۔ نیشنل اوورسیز اسکالرشپ اور ایس سی طلبا کے لیے ٹاپ کلاس ایجوکیشن اسکیم مرکزی شعبے کی اسکیمیں ہیں۔

نیشنل اوورسیز اسکالرشپ اسکیم کے تحت لیٹر آف آتھرائزیشن (ایل او اے) کے ذریعے بھارتی مشن کو پیشگی فنڈز جاری کیے جاتے ہیں، جبکہ ٹاپ کلاس ایجوکیشن اسکیم کے تحت فنڈز براہ راست فائدہ منتقلی (ڈی بی ٹی) کے ذریعے اہل طلبا کو براہ راست جاری کیے جاتے ہیں۔

وزیر نے بتایا کہ اسکالرشپ کے اجرا میں تاخیر سے متعلق مسائل کو حل کرنے کے لیے محکمہ باقاعدگی سے اسکالرشپ اسکیموں کا جائزہ لیتا ہے۔ ان اقدامات میں صلاحیت سازی کے پروگرام، تکنیکی معاونت، قومی سطح کے چنتن شِور اور ورکشاپ شامل ہیں، جن میں ریاستوں، مرکز کے زیر انتظام علاقوں اور دیگر متعلقہ فریقوں کو شامل کیا جاتا ہے۔

حکومت نے مزید بتایا ہے کہ مستفیدین کے آدھار سے منسلک بینک کھاتوں میں ڈی بی ٹی کے ذریعے رقم منتقل کرنے سے ادائیگی کے عمل کو منظم کرنے اور تاخیر کم کرنے میں مدد ملی ہے۔

درج فہرست ذاتوں کے نوجوان کامیاب افراد کے لیے اعلیٰ تعلیم کی اسکالرشپ کے تحت ایس سی طلبا کے لیے ٹاپ کلاس اسکالرشپ مرکزی شعبے کی اسکیم کے طور پر نافذ کی جاتی ہے، اس لیے ریاستی یا ضلعی سطح پر کوئی مختص رقم مقرر نہیں کی جاتی۔ گزشتہ تین مالی سالوں کے دوران اس اسکیم کے تحت 304.29 کروڑ روپے جاری کیے گئے۔

حکومت ملک بھر کے اہل ایس سی طلبا کو بروقت اسکالرشپ جاری کرنے میں سہولت فراہم کرنے کے لیے ڈیجیٹل ادائیگی کے نظام، باقاعدہ جائزوں، تکنیکی معاونت اور صلاحیت سازی کے اقدامات کے ذریعے اسکالرشپ اسکیموں کے نفاذ کو مزید مضبوط بنانے کا سلسلہ جاری رکھے ہوئے ہے۔

***********

 

ش ح۔ ف ش ع

 U: 1868

(रिलीज़ आईडी: 2297970) आगंतुक पटल : 7