توانائی ، مکانات و شہری امور کے مرکزی وزیر جناب منوہر لال نے آج نئی دہلی میں بھوٹان کے توانائی اور قدرتی وسائل کے عزت مآب وزیرلیونپو جیم شیرنگ کے ساتھ دو طرفہ ملاقات کی۔

اس ملاقات میں توانائی کے شعبے میں ہندوستان اور بھوٹان کے درمیان خصوصی اور دیرینہ شراکت داری کے عزم کا اعادہ کیا گیا، جو دونوں ممالک کے درمیان قریبی دو طرفہ تعلقات کی ایک اہم بنیاد رہی ہے۔ وزراء نے جاری تعاون میں ہونے والی پیش رفت کا جائزہ لیا اور توانائی کے شعبے میں باہمی تعاون کو مزید مضبوط بنانے کے امکانات پر تبادلہ خیال کیا۔

دونوں وزراء نے پن بجلی کی ترقی، سرحد پار بجلی کی تجارت، ترسیلی رابطہ کاری، قابل تجدید توانائی، ادارہ جاتی تعاون اور صلاحیت سازی سمیت مختلف امور پر وسیع پیمانے پر تبادلہ خیال کیا۔ انہوں نے توانائی کے شعبے میں باقاعدہ روابط کو آسان بنانے اور تعاون کو فروغ دینے کے لیے قائم کیے گئے دو طرفہ ادارہ جاتی نظام کے تحت ہونے والی پیش رفت کا بھی جائزہ لیا۔ملاقات کے دوران جن اہم پن بجلی منصوبوں پر تبادلہ خیال کیا گیا، ان میں پناتسانگچھو-I، پناتسانگچھو-II، سانکوش اور چوخا شامل تھے۔

پائیدار ترقی اور علاقائی توانائی کے تحفظ کو فروغ دینے میں توانائی کے تعاون کی اہمیت کو تسلیم کرتے ہوئے دونوں فریقوں نے بات چیت میں تسلسل، قریبی رابطہ کاری اور باہمی فائدے کے اقدامات پر بروقت عمل درآمد کے ذریعے تعاون کو مزید گہرا کرنے کے عزم کا اعادہ کیا۔

جناب منوہر لال نے توانائی کے شعبے میں ہندوستان اور بھوٹان کے درمیان دیرینہ شراکت داری کو مضبوط بنانے کے لیے ہندوستان کے غیر متزلزل عزم کو دوہرایا۔ عزت مآب لیونپو جیم شیرنگ نےہندوستان کی مسلسل حمایت کو سراہا اور توانائی کے شعبے میں شراکت داری کو مزید وسعت دینے کے لیے بھوٹان کے عزم کا اظہار کیا۔

یہ ملاقات مثبت ماحول میں اختتام پذیر ہوئی، جس میں دونوں وزراء نے دو طرفہ توانائی تعاون میں حاصل ہونے والی پیش رفت پر اطمینان کا اظہار کیا اور دونوں ممالک کےمفادکے لیے ہندوستان-بھوٹان شراکت داری کو مزید مضبوط بنانے کے مشترکہ عزم کا اعادہ کیا۔

***

ش ح۔م ع ن۔ ن ع

U- 1585

                         

(रिलीज़ आईडी: 2296232) आगंतुक पटल : 4