مشن شکتی رہنما خطوط کے تحت ون اسٹاپ سینٹر (او ایس سی) تشدد سے متاثرہ اور پریشان حال خواتین کو، چاہے وہ نجی یا عوامی مقامات پر متاثر ہوئی ہوں، ایک ہی جگہ پر مربوط اور فوری مدد و معاونت فراہم کرتے ہیں۔ ان مراکز کے لیے مقررہ کم از کم بنیادی ڈھانچے اور خدمات کے معیار پر عمل کرنا ضروری ہے، جن میں مشاورت کے لیے مناسب جگہ، عارضی پناہ گاہ، طبی اور قانونی امداد، معذور افراد کے لیے قابلِ رسائی سہولتیں، اسکیم کی برانڈنگ کے ساتھ مخصوص گاڑی، تربیت یافتہ عملہ اور پولیس، محکمۂ صحت اور ضلعی قانونی خدمات اتھارٹی کے ساتھ تال میل شامل ہیں، تاکہ پریشان حال خواتین کو جامع مدد اور معاونت فراہم کی جا سکے۔

اسکیم کے آغاز، یعنی یکم اپریل 2015 سے 30 جون 2026 تک، 1,033 ون اسٹاپ سینٹروں کو انتظامی منظوری دی گئی، جن میں سے 991 ون اسٹاپ سینٹر ملک بھر میں فعال ہو چکے ہیں۔ ان مراکز کے ذریعے ملک بھر میں 15.20 لاکھ سے زائد خواتین کو مدد فراہم کی جا چکی ہے۔

اب تک ریاست اتر پردیش میں 124 ون اسٹاپ سینٹر فعال کیے جا چکے ہیں، جن کے ذریعے 3.42 لاکھ سے زائد خواتین کو مدد فراہم کی گئی ہے۔ اتر پردیش کے ضلع مین پوری میں ون اسٹاپ سینٹر ایک مخصوص سرکاری عمارت سے مقررہ معیار کے مطابق سہولتوں کے ساتھ کام کر رہا ہے۔

مشن شکتی ایک مرکزی معاونت یافتہ اسکیم ہے، جس کے نفاذ کی ذمہ داری ریاستی حکومتوں اور مرکز کے زیر انتظام علاقوں کی انتظامیہ پر عائد ہوتی ہے۔ مشن شکتی کے رہنما خطوط کے مطابق مرکزی حکومت ریاستوں اور مرکز کے زیر انتظام علاقوں کو مالی امداد فراہم کرتی ہے۔ ملک بھر میں ون اسٹاپ سینٹروں کے ہموار آپریشن کے لیے مناسب عملہ اور بنیادی ڈھانچے کی معاونت فراہم کی جاتی ہے۔

ون اسٹاپ سینٹروں کے معائنے اور کارکردگی کا جائزہ ریاستی حکومت کے مختلف افسران کے ذریعے لیا جاتا ہے اور معائنے کے دوران سامنے آنے والی خامیوں کو فوری طور پر دور کیا جاتا ہے۔

اس کے علاوہ سال میں ایک مرتبہ پروگرام اپروول بورڈ (پی اے بی) ریاستوں اور مرکز کے زیر انتظام علاقوں کے ساتھ اسکیم کے تحت جاری سرگرمیوں کی پیش رفت کا جائزہ لیتا ہے اور مقاصد کے حصول، خواتین اور بچوں کو خدمات کی مؤثر فراہمی اور اسکیم کی کارکردگی کا جائزہ لیتا ہے۔ اس کے علاوہ وزارت کے افسران اجلاسوں، ویڈیو کانفرنسنگ اور وقتاً فوقتاً ریاستوں و مرکز کے زیر انتظام علاقوں کے دوروں کے ذریعے اسکیم کی مسلسل نگرانی کرتے ہیں۔

وزارت نے مشن شکتی ڈیش بورڈ بھی تیار کیا ہے، جو ضلع، ریاست اور قومی سطح پر مشن شکتی کے تحت چلنے والی اسکیموں کے کام کاج کی حقیقی وقت میں نگرانی اور جائزہ لینے میں مدد فراہم کرتا ہے۔

خواتین و اطفال کی ترقی کی وزارت نے ریاستی حکومتوں اور مرکز کے زیر انتظام علاقوں کی انتظامیہ کے ساتھ مل کر، مشن شکتی کے تحت مستحقین کی بڑھتی ہوئی ضروریات، اسکیم کی رسائی اور بروقت معاونت کو مزید مضبوط بنانے کے لیے مسلسل کام کر رہی ہے۔

یہ معلومات خواتین و اطفال کی ترقی کی وزار ت  کی وزیر مملکت محترمہ ساوتری ٹھاکر نے لوک سبھا میں ایک سوال کے تحریری جواب میں فراہم کیں۔

********

ش ح۔   م م ۔ ش ب ن

U-NO-1574

(ریلیز آئی ڈی: 2296143) وزیٹر کاؤنٹر : 38