কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে ভাৰতৰ সামুদ্ৰিক সুৰক্ষা গাঁথনিৰ প্ৰযুক্তি-নেতৃত্বাধীন ৰূপান্তৰৰ আহ্বান জনাই কয় যে দেশৰ সম্প্ৰসাৰিত বন্দৰ নেটৱৰ্ক আৰু বিশ্ব বাণিজ্যত বৰ্ধিত ভূমিকাৰ বাবে সুৰক্ষা ব্যৱস্থাৰ প্ৰয়োজন, যি উদীয়মান চাইবাৰ আৰু ভূ-ৰাজনৈতিক ভাবুকি প্ৰতিহত কৰিবলৈ স্থিতিস্থাপক, সংহত আৰু সজ্জিত।

নতুন দিল্লীত অনুষ্ঠিত দ্বিতীয় ৰাষ্ট্ৰীয় বন্দৰ সুৰক্ষা সন্মিলন ২০২৬ সম্বোধন কৰি কেন্দ্ৰীয় মন্ত্ৰী সৰ্বানন্দ সোণোৱালে কয় যে ভাৰতৰ বন্দৰসমূহ কেৱল কাৰ্গো ক্ষমতা আৰু কাৰ্য্যকৰী দক্ষতাৰ দ্বাৰাই নহয়, বৰঞ্চ বিকশিত নিৰাপত্তা বিপদাশংকা সহন কৰাৰ সামৰ্থ্যৰ দ্বাৰাও পৰিমাপ কৰা উচিত। তেওঁ সামুদ্ৰিক অংশীদাৰসকলক উন্নত প্ৰযুক্তি গ্ৰহণ কৰিবলৈ, প্ৰতিষ্ঠানিক সমন্বয় শক্তিশালী কৰিবলৈ আৰু ভাৰতৰ দীৰ্ঘম্যাদী সামুদ্ৰিক উচ্চাকাংক্ষাক সমৰ্থন কৰা ভৱিষ্যতৰ বাবে সাজু সুৰক্ষা পৰিৱেশতন্ত্ৰ গঢ়ি তুলিবলৈ আহ্বান জনায়।

 ‘সুৰক্ষিত বন্দৰসমূহে শক্তিশালী বাণিজ্যৰ সৃষ্টি কৰে। শক্তিশালী বাণিজ্যেই এক শক্তিশালী অৰ্থনীতিৰ সৃষ্টি কৰে আৰু এক শক্তিশালী অৰ্থনীতিয়ে এক শক্তিশালী ৰাষ্ট্ৰ গঠন কৰে’, কেন্দ্ৰীয় মন্ত্ৰী সৰ্বানন্দ সোণোৱালে লগতে কয় যে চাইবাৰ আক্ৰমণ, ড্ৰোনৰ আক্ৰমণ, যোগান শৃংখলৰ দুৰ্বলতা আৰু ডিজিটেল আন্তঃগাঁথনিৰ প্ৰতি ভাবুকিৰ ফলত সামুদ্ৰিক সুৰক্ষাক কেৱল এক কাৰ্য্যকৰী প্ৰয়োজনীয়তাৰ পৰিৱৰ্তে এক কৌশলগত আৱশ্যক কৰি তুলিছে।

মন্ত্ৰীগৰাকীয়ে কয় যে মাৰ্চেণ্ট শ্বিপিং আইন, ২০২৫ -ৰ অধীনত ব্যুৰ’ অৱ পোৰ্ট ছিকিউৰিটি (বি অ’ পি এ.)-এ নিয়ামক নিৰীক্ষণ শক্তিশালী কৰা, সুৰক্ষা পদ্ধতিৰ মান নিৰ্ধাৰণ কৰা আৰু সামুদ্ৰিক সংস্থাসমূহৰ মাজত সমন্বয় উন্নত কৰাৰ বাবে এক সমৰ্পিত প্ৰতিষ্ঠানিক পৰিকাঠামো প্ৰদান কৰিব। তেওঁ ই-সমুদ্ৰ, সামুদ্ৰিক একক খিৰিকী আৰু এখন ৰাষ্ট্ৰ এটা বন্দৰ প্ৰক্ৰিয়াৰ দৰে ডিজিটেল পদক্ষেপৰ ওপৰতো আলোকপাত কৰি কয় যে স্মাৰ্ট বন্দৰৰ দিশত ভাৰতৰ পৰিৱৰ্তনৰ সৈতে সমানে শক্তিশালী চাইবাৰ সুৰক্ষা আৰু বিপদাশংকা ব্যৱস্থাপনা প্ৰণালী থাকিব লাগিব।

‘প্ৰধানমন্ত্ৰী নৰেন্দ্ৰ মোদীৰ দূৰদৰ্শী নেতৃত্বত আৰু সাগৰৰ দৃষ্টিভংগীৰ দ্বাৰা পৰিচালিত হৈ, আমি এক সুৰক্ষিত, স্থিতিস্থাপক আৰু ভৱিষ্যতৰ বাবে সাজু সামুদ্ৰিক পৰিৱেশতন্ত্ৰ গঢ়ি তুলিবলৈ প্ৰতিশ্ৰুতিবদ্ধ যি বিকশত ভাৰত ২০৪৭ ৰ দিশত ভাৰতৰ যাত্ৰাক সুৰক্ষিত কৰিব’, কেন্দ্ৰীয় মন্ত্ৰী সৰ্বানন্দ সোণোৱালে লগতে কয়।

সন্মিলনখনত বন্দৰ, জাহাজ পৰিবহণ আৰু জলপথ মন্ত্ৰালয়, গৃহ পৰিক্ৰমা মন্ত্ৰালয়, ভাৰতীয় নৌবাহিনী, ভাৰতীয় উপকূলৰক্ষী বাহিনী, ৰাজ্যিক সামুদ্ৰিক ব’ৰ্ড, মুখ্য বন্দৰ কৰ্তৃপক্ষ, অ-মুখ্য বন্দৰ আৰু উদ্যোগৰ প্ৰতিনিধিসকলে ভাৰতৰ সামুদ্ৰিক খণ্ডই সন্মুখীন হোৱা উদীয়মান সুৰক্ষা প্ৰত্যাহ্বানসমূহৰ ওপৰত আলোচনা কৰিবলৈ প্ৰায় ১৪০ গৰাকী  অংশগ্ৰহণকাৰীক একত্ৰিত কৰিছিল।

এম অ’ পি এছ ডব্লিউ-ৰ সচিব বিজয় কুমাৰে বন্দৰ উন্নয়নৰ প্ৰতিটো পৰ্য্যায়ত সুৰক্ষাক একত্ৰিত কৰাৰ আহ্বান জনাই ‘ডিজাইনৰ দ্বাৰা সুৰক্ষা’ দৃষ্টিভংগীৰ পোষকতা কৰে, আনহাতে গৃহ পৰিক্ৰমা মন্ত্ৰালয়ৰ সচিব (সীমান্ত ব্যৱস্থাপনা) ড০ ৰাজেন্দ্ৰ কুমাৰে উদীয়মান চাইবাৰ, ড্ৰোন আৰু আন্তঃৰাষ্ট্ৰীয় সামুদ্ৰিক সুৰক্ষা ভাবুকিৰ সন্মুখীন হ’বলৈ প্ৰযুক্তি আৰু আন্তঃ-সংস্থা সমন্বয়ৰ অধিক ব্যৱহাৰৰ ওপৰত গুৰুত্ব আৰোপ কৰে।

এই সন্মিলনত আন্তঃৰাষ্ট্ৰীয় জাহাজ আৰু বন্দৰ সুবিধা সুৰক্ষা (আইএছপিএছ) সংহিতা, চাইবাৰ সুৰক্ষা, বিশ্বব্যাপী জাহাজ পৰিবহণক প্ৰভাৱিত কৰা ভূ-ৰাজনৈতিক বিপদাশংকা, সামুদ্ৰিক সুৰক্ষাৰ ক্ষেত্ৰত উদীয়মান সৰ্বশ্ৰেষ্ঠ অনুশীলনৰ ওপৰত কাৰিকৰী অধিৱেশন অনুষ্ঠিত হয়, য'ত অংশগ্ৰহণকাৰীসকলে ভাৰতৰ বন্দৰ সুৰক্ষা পৰিকাঠামো শক্তিশালী কৰাৰ বাবে পৰামৰ্শ প্ৰস্তুত কৰিব বুলি আশা কৰা হৈছে।

***

MI/Indu/MK

(रिलीज़ आईडी: 2295861) आगंतुक पटल : 5