ଆସନ୍ତାକାଲି ଭୁବନେଶ୍ୱରରେ ବ୍ରିକ୍ସ ଶିକ୍ଷା ମନ୍ତ୍ରୀମାନଙ୍କର ତ୍ରୟୋଦଶ ବୈଠକ ଅନୁଷ୍ଠିତ ହେବ । କେନ୍ଦ୍ର ଶିକ୍ଷା ମନ୍ତ୍ରୀ ଶ୍ରୀ ପ୍ରହ୍ଲାଦ ଯୋଶୀ ଏହି ବୈଠକରେ ଅଂଶଗ୍ରହଣ କରିବେ । ପ୍ରାକ୍‌ ଶୈଶବ ଯତ୍ନ ଓ ଶିକ୍ଷା (ଇସିସିଇ), ଦକ୍ଷତା ବିକାଶ, ଗବେଷଣା ଓ ଉଦ୍ଭାବନ, ଯୋଗ୍ୟତା ଓ ଶିକ୍ଷାଗତ ନେତୃତ୍ୱର ଆପୋସ ମାନ୍ୟତା ସମେତ ପ୍ରମୁଖ ପ୍ରାଥମିକତା ଉପରେ ବୈଠକରେ ବିଚାରବିମର୍ଶ କରାଯିବ ।

ଅନ୍ୟପଟେ ଭାରତର ବ୍ରିକ୍ସ ଅଧ୍ୟକ୍ଷତା ଅଧୀନରେ ଶିକ୍ଷା ମନ୍ତ୍ରଣାଳୟ ପକ୍ଷରୁ ଗତକାଲି ଭୁବନେଶ୍ୱରରେ ବ୍ରିକ୍ସ ରାଷ୍ଟ୍ର ଗୋଷ୍ଠୀର ବରିଷ୍ଠ ଶିକ୍ଷା ଅଧିକାରୀମାନଙ୍କ ତୃତୀୟ ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକରେ ବ୍ରାଜିଲ, ରୁଷ, ଚୀନ, ଦକ୍ଷିଣ ଆଫ୍ରିକା, ଇଣ୍ଡୋନେସିଆ, ଇରାନ, ଇଥିଓପିଆ ଏବଂ ୟୁଏଇ ସମେତ ବ୍ରିକ୍ସ ସଦସ୍ୟ ଦେଶର ବରିଷ୍ଠ ଅଧିକାରୀ ଏବଂ ପ୍ରତିନିଧିମାନେ ଯୋଗ ଦେଇଥିଲେ। ସେମାନେ ବ୍ରିକ୍ସ ଏଜୁକେସନ ଟ୍ରାକ୍‌ ଅଧୀନରେ ସହଯୋଗକୁ ଆଗକୁ ବଢ଼ାଇବା ନେଇ ଆଲୋଚନା କରିଥିଲେ ।

ଏହି ବୈଠକ ବ୍ରିକ୍ସ ଶିକ୍ଷା ମନ୍ତ୍ରୀଙ୍କ ଘୋଷଣାପତ୍ର ଉପରେ ବିସ୍ତୃତ ଆଲୋଚନା ପାଇଁ ଏକ ମଞ୍ଚ ପ୍ରଦାନ କରିଥିଲା। ବ୍ରିକ୍ସ ସଦସ୍ୟ ଦେଶଗୁଡ଼ିକର ଅଧିକାରୀମାନେ ଘୋଷଣାପତ୍ରର ପ୍ରସ୍ତାବିତ ବିଷୟବସ୍ତୁ ସମୀକ୍ଷା କରିବା ସହିତ ମତାମତ ଓ ବିଚାରବିମର୍ଶ ବିନିମୟ କରିଥିଲେ । ଶିକ୍ଷା ମନ୍ତ୍ରୀମାନଙ୍କ ବୈଠକ ସମୟରେ ବିଚାର ଏବଂ ଗ୍ରହଣ ପାଇଁ ଉପସ୍ଥାପିତ ହେବାକୁ ଥିବା ପ୍ରମୁଖ ବିଷୟ ଉପରେ ଆଲୋଚନା ହୋଇଥିଲା।

ବ୍ରିକ୍ସ ଶିକ୍ଷା ଟ୍ରାକ ଅଧୀନରେ ଚିହ୍ନଟ ହୋଇଥିବା ପ୍ରମୁଖ ପ୍ରାଥମିକତା କ୍ଷେତ୍ରଗୁଡ଼ିକ, ଯଥା ଇସିସିଇ, ବୈଷୟିକ ଏବଂ ବୃତ୍ତିଗତ ଶିକ୍ଷା ଓ ତାଲିମ (ଟିଭିଇଟି), ସହଯୋଗୀ ଗବେଷଣା ଓ ନବସୃଜନ, ଯୋଗ୍ୟତାର ପାରସ୍ପରିକ ସ୍ୱୀକୃତି, ଶୈକ୍ଷିକ ନେତୃତ୍ୱ ଏବଂ ପାରମ୍ପରିକ ଓ ସ୍ୱଦେଶୀ ଜ୍ଞାନ ପ୍ରଣାଳୀ ଉପରେ ବ୍ରିକ୍ସର ମାର୍ଗଦର୍ଶକ ନୀତି, ସମସ୍ତ କ୍ଷେତ୍ରରେ ସହଯୋଗକୁ ସୁଦୃଢ଼ କରିବା ଉପରେ ଆଲୋଚନା ହୋଇଥିଲା। ଘୋଷଣାପତ୍ରକୁ ଆହୁରି ସମୃଦ୍ଧ କରିବା ନେଇ ଆଲୋଚନା ହୋଇଥିଲା । ବ୍ରିକ୍ସ ସଦସ୍ୟ ଦେଶଗୁଡ଼ିକର ସାମୂହିକ ଆକାଂକ୍ଷା ଏବଂ ପ୍ରାଥମିକତାକୁ ପ୍ରତିଫଳିତ କରିବା ପାଇଁ ପ୍ରତିନିଧିମାନେ ସେମାନଙ୍କର ବିଚାର ଏବଂ ପ୍ରସ୍ତାବ ଦେଇଥିଲେ ।

ଆଲୋଚନାରେ ବ୍ରିକ୍ସ ଦେଶଗୁଡ଼ିକ ମଧ୍ୟରେ ସଂସ୍ଥାଗତ ତନ୍ତ୍ରକୁ ସୁଦୃଢ଼ କରିବା, ଶିକ୍ଷାଗତ ଓ ଗବେଷଣା ସହଯୋଗକୁ ପ୍ରୋତ୍ସାହିତ କରିବା, ସର୍ବୋତ୍ତମ ଅଭ୍ୟାସର ଆଦାନପ୍ରଦାନକୁ ସହଜ କରିବା ଏବଂ କ୍ଷମତା-ନିର୍ମାଣ ପଦକ୍ଷେପକୁ ବୃଦ୍ଧି କରିବାର ଗୁରୁତ୍ୱ ଉପରେ ମଧ୍ୟ ଆଲୋକପାତ କରାଯାଇଥିଲା। ଆଗକୁ ଅଧିକ ସହଯୋଗ, ନବସୃଜନ ଓ ଜ୍ଞାନ ଆଦାନପ୍ରଦାନ ମାଧ୍ୟମରେ ସମାବେଶୀ, ସ୍ଥିର ଏବଂ ଭବିଷ୍ୟତ ପାଇଁ ପ୍ରସ୍ତୁତ ଶିକ୍ଷା ବ୍ୟବସ୍ଥାକୁ ଆଗକୁ ବଢ଼ାଇବା ପାଇଁ ଆଲୋଚନାରେ ଗୁରୁତ୍ୱ ଦିଆଯାଇଥିଲା।

ବ୍ରିକ୍ସ ଶିକ୍ଷା ମନ୍ତ୍ରୀମାନଙ୍କ ଘୋଷଣାନାମାର ପ୍ରସ୍ତାବିତ ଫଳାଫଳକୁ ଚୂଡ଼ାନ୍ତ କରିବା ସହିତ ବୈଠକ ଶେଷ ହୋଇଥିଲା। ବରିଷ୍ଠ ଶିକ୍ଷା ଅଧିକାରୀ ବୈଠକର ସଫଳ ପରିସମାପ୍ତି ଭାରତର ବ୍ରିକ୍ସ ଅଧ୍ୟକ୍ଷତା ୨୦୨୬ର ପ୍ରାଥମିକତାକୁ ଆଗକୁ ବଢ଼ାଇବା ପାଇଁ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ । ଏହା ବ୍ରିକ୍ସ ସଦସ୍ୟ ଦେଶମାନଙ୍କ ମଧ୍ୟରେ ଶିକ୍ଷା କ୍ଷେତ୍ରରେ ସହଯୋଗକୁ ଆହୁରି ମଜବୁତ କରିବ ।

******

PS/Swadhin/Manoj

 

 

 

(रिलीज़ आईडी: 2295814) आगंतुक पटल : 5