معاشی طور پر کمزور خاندانوں سے تعلق رکھنے والے ہزاروں باصلاحیت طلبا کے لیے کسی ممتاز تعلیمی ادارے میں داخلہ حاصل کرنا صرف سفر کی شروعات ہوتی ہے۔ اعلیٰ تعلیم کے بڑھتے ہوئے اخراجات اکثر ان کے خوابوں کی تکمیل میں ایک بڑی رکاوٹ بن جاتے ہیں۔

ہدف پر مبنی مالی معاونت کس طرح زندگیوں میں مثبت تبدیلی لا سکتی ہے، اس کی ایک مثال 25 سالہ راجن کمار ہیں، جن کا تعلق دیگر پسماندہ طبقہ (او بی سی) برادری سے ہے۔ انہوں نے پی ایم-یشسوی اسکیم – او بی سی، ای بی سی اور ڈی این ٹی طلبہ کے لیے اعلیٰ درجے کی تعلیم کے تحت حاصل ہونے والی معاونت کے ذریعے ماسٹر آف بزنس ایڈمنسٹریشن (ایم بی اے) کی تعلیم کامیابی کے ساتھ مکمل کی۔

محدود مالی وسائل رکھنے والے ایک سادہ خاندان سے تعلق رکھنے والے راجن کمار ہمیشہ سے ایک معروف بزنس اسکول سے انتظامی تعلیم حاصل کرنے کا خواب دیکھتے تھے۔ مسلسل محنت اور عزم کے باعث انہوں نے کامن ایڈمیشن ٹیسٹ (کیٹ) میں شاندار 99.5 پرسنٹائل حاصل کیا اور ایک ممتاز ایم بی اے پروگرام میں داخلہ حاصل کرنے میں کامیاب رہے۔ تاہم، زیادہ فیس ان کے خاندان کے لیے ایک بڑا مالی چیلنج بن گئی، کیونکہ محدود آمدنی کے باعث روزمرہ کے گھریلو اخراجات پورے کرتے ہوئے اعلیٰ تعلیم کا خرچ برداشت کرنا مشکل تھا۔

سماجی اور معاشی طور پر پسماندہ طبقات سے تعلق رکھنے والے باصلاحیت طلبہ کی معاونت کی اہمیت کو مدنظر رکھتے ہوئے، وزارتِ سماجی انصاف و تفویض اختیارات نے پی ایم-یشسوی اسکیم کے تحت راجن کمار کو 2024 سے 2026 کے دوران 15.51 لاکھ روپے کی مالی معاونت فراہم کی۔ اس اسکالرشپ نے ان کی تعلیم کی راہ میں حائل مالی رکاوٹوں کو دور کیا اور انہیں بغیر کسی تعطل کے اپنی تعلیم جاری رکھنے میں مدد فراہم کی۔

اپنے تعلیمی سفر کو یاد کرتے ہوئے راجن کمار نے کہا:

‘‘پی ایم-یشسوی اسکالرشپ حاصل کرنا میری زندگی میں ایک اہم تبدیلی کا سبب بنا۔ اس نے نہ صرف مالی طور پر میری مدد کی بلکہ مجھے یہ یقین بھی دیا کہ میرے خواب اہمیت رکھتے ہیں۔ اس اسکالرشپ نے میرے والدین پر پڑنے والے مالی بوجھ کو کم کیا اور مجھے تعلیم کے اخراجات کی مسلسل فکر کیے بغیر اپنی پڑھائی، منصوبوں اور مستقبل کی تیاری پر توجہ مرکوز کرنے کا موقع فراہم کیا۔ پی ایم-یاسسوی صرف مالی امداد نہیں ہے، بلکہ یہ کم آمدنی والے خاندانوں کے باصلاحیت طلبہ کو وقار اور اعتماد کے ساتھ معیاری تعلیم حاصل کرنے کے مواقع فراہم کرتی ہے۔’’

مہارتوں کا فروغ اور کامیاب مستقبل کی تیاری

مالی بوجھ نمایاں طور پر کم ہونے کے بعد راجن کمار اپنی مکمل توجہ تعلیم اور پیشہ ورانہ ترقی پر مرکوز کر سکے۔ ایم بی اے کے دوران انہوں نے تعلیمی پیشکشوں، انتظامی منصوبوں اور مہارتوں کی ترقی سے متعلق پروگراموں میں فعال طور پر حصہ لیا۔ انہوں نے لین سکس سگما گرین بیلٹ سرٹیفیکیشن بھی حاصل کیا اور مالیات، ایکویٹی ریسرچ اور انتظامی شعبوں میں مختلف منصوبوں پر کام کیا، جس سے ان کی پیشہ ورانہ صلاحیتوں اور مستقبل کے مواقع مزید بہتر ہوئے۔

راجن کمار کی کامیابی اس بات کی واضح مثال ہے کہ او بی سی، ای بی سی اور ڈی این ٹی طلبہ کے لیے اعلیٰ درجے کی تعلیم سے متعلق پی ایم-یشسوی اسکیم کس طرح پسماندہ طبقات سے تعلق رکھنے والے مستحق طلبہ کو ممتاز تعلیمی اداروں میں اعلیٰ تعلیم حاصل کرنے کے قابل بنا رہی ہے۔ مالی رکاوٹوں کو دور کرکے اور تعلیمی معیار و مہارت کو فروغ دے کر، وزارتِ سماجی انصاف و تفویض اختیارات نوجوان صلاحیتوں کو بااختیار بنانے، سماجی ترقی و نقل و حرکت کے مواقع پیدا کرنے اور ایک زیادہ جامع اور ہنرمند بھارت کی تعمیر میں مسلسل اپنا کردار ادا کر رہی ہے۔

*****

ش ح۔ ع و –ت ع

U.No. 1503

(रिलीज़ आईडी: 2295659) आगंतुक पटल : 7