કેન્દ્રીય માર્ગ પરિવહન અને રાજમાર્ગ મંત્રી શ્રી નિતિન ગડકરીએ આજે સિલ્ક્યારા ટનલ બચાવ કામગીરી દરમિયાન તેમની અસાધારણ હિંમત અને નિઃસ્વાર્થ સેવાની ભેટ આપવા બદલ 12 રેટ માઇનર્સને સર્વોત્તમ જીવન રક્ષા પદક એનાયત કર્યો હતો. આ અલંકરણ સમારોહ નવી દિલ્હી ખાતે માર્ગ પરિવહન અને રાજમાર્ગ રાજ્ય મંત્રી શ્રી હર્ષ મલ્હોત્રા, સચિવ, માર્ગ પરિવહન અને રાજમાર્ગ મંત્રાલય, મેનેજિંગ ડિરેક્ટર, NHIDCL અને અન્ય વરિષ્ઠ અધિકારીઓની ઉપસ્થિતિમાં યોજાયો હતો.

સભાને સંબોધતા શ્રી ગડકરીએ સિલ્ક્યારા ટનલ દુર્ઘટનાને તાજેતરના વર્ષોમાં હાથ ધરવામાં આવેલા સૌથી પડકારજનક બચાવ કાર્યોમાંના એક તરીકે વર્ણવી હતી, અને નોંધ્યું હતું કે આ ઘટનાથી સમગ્ર દેશમાં ઊંડી ચિંતા વ્યાપી ગઈ હતી. તેમણે જણાવ્યું હતું કે બચાવ કામગીરી પર ઉચ્ચતમ સ્તરે સતત ધ્યાન આપવામાં આવ્યું હતું, જેમાં વડાપ્રધાન પોતે ઘટનાક્રમ પર નજીકથી નજર રાખી રહ્યા હતા અને ફસાયેલા કામદારોના સુરક્ષિત બહાર નીકળવા માટે તમામ સંભવિત સંસાધનો એકત્રિત થાય તે સુનિશ્ચિત કરી રહ્યા હતા.

મંત્રીશ્રીએ રેખાંકિત કર્યું હતું કે માર્ગ પરિવહન અને રાજમાર્ગ મંત્રાલય, NHIDCL, બોર્ડર રોડ્સ ઓર્ગેનાઇઝેશન (BRO), ભારતીય સેના, ઉત્તરાખંડ સરકાર અને દેશભરના તકનીકી નિષ્ણાતો સહિત વિવિધ એજન્સીઓના નિષ્ણાતોએ એક અસરકારક બચાવ વ્યૂહરચના ઘડી કાઢવા માટે સુમેળભર્યા સંકલન સાથે કામ કર્યું હતું. કામગીરી દરમિયાન વર્ટિકલ ડ્રિલિંગ અને અન્ય તકનીકી હસ્તક્ષેપો સહિતના વિવિધ એન્જિનિયરિંગ ઉકેલો હાથ ધરવામાં આવ્યા હતા.

શ્રી ગડકરીએ જણાવ્યું હતું કે ટનલના ક્ષતિગ્રસ્ત હિસ્સામાં પાઇપલાઇન સફળતાપૂર્વક નાખ્યા બાદ એક મહત્વપૂર્ણ સફળતા મળી હતી, જેનાથી ફસાયેલા કામદારો સુધી ખોરાક, પાણી, દવાઓ અને અન્ય આવશ્યક ચીજવસ્તુઓ પહોંચાડવાનું શક્ય બન્યું હતું. તેમણે નોંધ્યું હતું કે બચાવ કાર્યનો સૌથી નિર્ણાયક તબક્કો રેટ માઇનર્સના અસાધારણ પ્રયાસો દ્વારા પૂર્ણ થયો હતો, જેઓ બાકી રહેલો કાટમાળ મેન્યુઅલી હટાવવા માટે સ્વેચ્છાએ સાંકડી અને જોખમી જગ્યામાં પ્રવેશ્યા હતા, જેના કારણે તમામ ફસાયેલા કામદારોનો સુરક્ષિત બચાવ શક્ય બન્યો હતો.

એવોર્ડ વિજેતાઓની પ્રશંસા કરતા શ્રી ગડકરીએ જણાવ્યું હતું કે આવી અસાધારણ બહાદુરી અને સમર્પણના કાર્યો ભાવિ પેઢીઓ માટે કાયમી ઉદાહરણ બની રહે છે. તેમણે અવલોકન કર્યું કે બીજાના જીવન બચાવવા માટે પોતાના જીવનું જોખમ ખેડવું એ હિંમત, જાહેર સેવા અને માનવતાના સર્વોચ્ચ આદર્શને દર્શાવે છે, અને રાષ્ટ્ર તેમના અમૂલ્ય યોગદાનને હંમેશા યાદ રાખશે.

એવોર્ડ મેળવનારાઓને અભિનંદન આપતાં મંત્રીશ્રીએ જણાવ્યું હતું કે સર્વોત્તમ જીવન રક્ષા પદક એ તેમની અસાધારણ હિંમત અને માનવજીવન બચાવવાની અફર કટિબદ્ધતાની યોગ્ય માન્યતા છે. તેમણે વિશ્વાસ વ્યક્ત કર્યો હતો કે તેમની આ અનુકરણીય સેવા મુશ્કેલીના સમયે નિઃસ્વાર્થ સેવાભાવના જાળવી રાખવા માટે અન્યોને પ્રેરણા આપશે.

શ્રી ગડકરીએ બચાવ મિશનમાં સંકળાયેલા તમામ હિતધારકોના સામૂહિક પ્રયાસોની પણ સરાહના કરી હતી.

સમારોહ દરમિયાન, શ્રી ગડકરીએ દરેક એવોર્ડ વિજેતાને ડેકોરેશન મેડલ અને પ્રમાણપત્ર એનાયત કર્યું હતું. મુખ્ય મેડલ ઉપરાંત, દરેક વિજેતાને લઘુચિત્ર (મિનીએચર) મેડલ પણ આપવામાં આવ્યો હતો. એવોર્ડ વિજેતાઓને રૂ. 2,00,000નું એકમ રકમનું નાણાકીય ભથ્થું મંજૂર કરવામાં આવ્યું છે, જે ઓનલાઇન માધ્યમથી વિતરિત કરવામાં આવ્યું છે.

સર્વોત્તમ જીવન રક્ષા પદક મેળવનારાઓ: શ્રી વકીલ હસન શ્રી મુન્ના શ્રી અંકુર કુમાર શ્રી મોનુ કુમાર શ્રી દેવેન્દ્ર શ્રી મોહમ્મદ રશીદ શ્રી ફિરોઝ કુરેશી શ્રી જતિન કશ્યપ શ્રી સૌરભ કશ્યપ શ્રી મોહમ્મદ ઇર્શાદ શ્રી નસરુદ્દીન શ્રી નસીમ

 

SM/JY/JD

(रिलीज़ आईडी: 2295234) आगंतुक पटल : 5