بھارت ٹیکس 2026، جس کا انعقاد بھارت ٹیکس ٹریڈ فیڈریشن (بی ٹی ٹی ایف) نے وزارتِ ٹیکسٹائل کے تعاون سے کیا، وزیر اعظم کے 5 ایف وژن یعنی فارم  سے فائبر، فائبر سے فیکٹری، فیکٹری سے فیشن اور فیشن سے بیرونِ ملک منڈیوں تک کے تصور پر مبنی ہے۔ سال 2024 میں اپنے آغاز کے بعد سے بھارت ٹیکس نے اس مکمل ویلیو چین کو اپنی نمائش کے انتظام میں نمایاں طور پر پیش کیا۔ نمائش ہالز کو فائبر، دھاگے اور خام مال سے لے کر کپڑے اور ملبوسات کی تیاری، اور پھر تیار شدہ برآمدی مصنوعات تک مرحلہ وار ترتیب دیا گیا، جس سے خریداروں کو ایک ہی پلیٹ فارم پر ٹیکسٹائل کی مکمل ویلیو چین سے جڑنے کا موقع ملا۔

 

بھارت ٹیکس ٹیکسٹائل ویلیو چین سے وابستہ عالمی اور ملکی فریقوں کے درمیان کاروبار سے کاروبار (بی 2 بی)، حکومت سے حکومت (جی2جی ) اور کاروبار سے حکومت (بی 2 جی) روابط کو فروغ دینے کے لیے ایک مؤثر پلیٹ فارم کے طور پر کام کرتا ہے۔ یہ تقریب صنعت کاروں، برآمد کنندگان، دستکار گروپوں، ہینڈلوم اور دستکاری کے کلسٹروں، ایم ایس ایم ایز، عالمی برانڈز، خوردہ فروشوں، خریداری کرنے والی کمپنیوں اور سرمایہ کاروں کو خریدار و فروخت کنندہ ملاقاتوں، کاروباری رابطہ کاری کی میٹنگوں، مختلف ممالک کے ساتھ شراکت داری اور موضوعاتی مباحثوں کے ذریعے باہمی تبادلے کے مواقع فراہم کرتی ہے۔

 

برآمدات کو  فروغ  دینے سے متعلق کونسلوں (ای پی سی) کے ذریعے علاقائی بُنکروں، ہینڈلوم کوآپریٹیو اداروں اور دستکاری سے وابستہ برآمد کنندگان نے منظم بی 2 بی  رابطہ کاری میٹنگوں  کے تحت بین الاقوامی خریداروں کے ساتھ براہِ راست رابطہ قائم کیا، جس سے روایتی دستکاری کلسٹروں کو اپنی مصنوعات عالمی خریداری اور فراہمی کرنے والی ٹیموں کے سامنے پیش کرنے کا موقع ملا۔

 

بھارت ٹیکس 2026 کے ساتھ منعقد ہونے والے انڈی ہاٹ نے بھی ان کوششوں کو مزید تقویت دی۔ اس کے ذریعے ملک بھر کے بُنکروں اور دستکاروں کو ایک مشترکہ پلیٹ فارم فراہم کیا گیا، جہاں وہ ملکی اور بین الاقوامی خریداروں سے براہِ راست رابطہ قائم کر سکیں اور اپنی مصنوعات کی مارکیٹ تک رسائی کو وسعت دے سکیں۔

 

اس کے علاوہ ، ایم ایس ایم ایز، اسٹارٹ اَپس اور چیمپئن و امنگوں والے اضلاع سے تعلق رکھنے والے بُنکروں کو بھی اس تقریب میں شرکت کے لیے مدعو کیا گیا۔ اس کے ذریعے انہیں ٹیکسٹائل کے وسیع تر نظام، ابھرتے ہوئے بازار کے رجحانات، جدید تکنیکی اختراعات اور صنعت کے سرکردہ افراد، خریداروں اور ادارہ جاتی شراکت داروں کے ساتھ رابطہ کاری کے مواقع حاصل ہوئے۔ ان تمام اقدامات کا مقصد ٹیکسٹائل شعبے کے مختلف طبقات سے وابستہ افراد کی جامع شرکت کو فروغ دینا اور انہیں مارکیٹ تک بہتر رسائی فراہم کرنا تھا۔

 

بھارت ٹیکس 2026 میں ریاست چھتیس گڑھ کو 100 مربع میٹر کا خصوصی نمائشی پویلین فراہم کیا گیا۔ اس پویلین میں ریاست کی مالا مال ٹیکسٹائل اور دستکاری کی روایات، ہینڈلوم مصنوعات، علاقائی کلسٹرز، صنعتی صلاحیتوں اور سرمایہ کاری کے مواقع کو ملکی و بین الاقوامی خریداروں، عالمی برانڈز، صنعت کے سرکردہ افراد اور سرمایہ کاروں کے سامنے پیش کیا گیا۔ اس پویلین کے ذریعے ریاست کی جانب سے روایتی دستکاریوں کے فروغ کے ساتھ ساتھ جدید ٹیکسٹائل ویلیو چین کو مضبوط بنانے کے لیے کیے جانے والے اقدامات کو بھی اجاگر کیا گیا۔

 

بھارت ٹیکس 2026 میں "پائیدار، سرکلر اور مسابقتی بھارت" کے موضوع کے تحت ایکو-اسٹیچ پائیداری اور سرکلر معیشت مرکز قائم کیا گیا، جسے کلاتھنگ مینوفیکچررز ایسوسی ایشن آف انڈیا ( سی ایم اے آئی) اور گلوبل الائنس فار ٹیکسٹائل سسٹینیبلٹی ( جی اے ٹی ایس) نے مشترکہ طور پر پیش کیا۔ اس سینٹر میں چھ خصوصی شعبے شامل تھے: انڈیا امپیکٹ وال، بڑے پیمانے پر سرکلر معیشت، کچرے سے عالمی ملبوسات تک، سرکلر بھارت میں تیار کردہ مصنوعات، مواد اور اختراعات کی لائبریری، اور سرکلر بھارت فورم۔ ان شعبوں کے ذریعے ٹیکسٹائل کے شعبے میں سرکلر حل کے لیے کام کرنے والے ری سائیکلنگ اداروں، مینوفیکچررز، برانڈز، جدت کاروں اور تکنیکی خدمات فراہم کرنے والوں کو ایک مشترکہ پلیٹ فارم پر جمع کیا گیا۔وزارت ٹیکسٹائل "ویو دی فیوچر" اقدام کے ذریعے بھی سرکلر معیشت اور پائیداری کو فروغ دے رہی ہے۔ یہ اقدام ترقیاتی کمشنر (ہینڈلوم) کے دفتر کی جانب سے شروع کیا گیا ہے، جس کا مقصد دستکاروں، ڈیزائنرز، صنعت، تعلیمی اداروں اور جدت کاروں کے درمیان تعاون کو فروغ دینا ہے تاکہ ذمہ دارانہ پیداوار، وسائل کے مؤثر استعمال، مواد میں جدت اور پائیدار روزگار کو فروغ دیا جا سکے۔یہ اقدام مصنوعات کو دوبارہ قابلِ استعمال بنانے، ری سائیکلنگ، مرمت، دوبارہ استعمال اور سرکلر ڈیزائن کے طریقوں کو بھی فروغ دیتا ہے، جس سے بھارت کے علاقائی ٹیکسٹائل مراکز کی مسابقتی صلاحیت اور پائیداری کو مزید مضبوط بنایا جا رہا ہے۔

 

علمی تبادلے اور پائیدار طریقوں کو مزید فروغ دینے کے لیے سرکلر معیشت، پائیدار ریشوں اور مواد، ٹیکسٹائل ری سائیکلنگ، ماحولیاتی، سماجی اور انتظامی (ای ایس جی) معیارات و پائیداری رپورٹنگ، مصنوعات کی سراغ رسانی، ذمہ دارانہ خریداری، کاربن اخراج میں کمی، وسائل کے مؤثر استعمال، پانی کے تحفظ، ڈیجیٹل پروڈکٹ پاسپورٹ، موسمیاتی لچک، سبز مالیات اور پائیداری سے متعلق عالمی سطح پر ابھرتے ہوئے ضوابط جیسے موضوعات پر 41 خصوصی معلوماتی اجلاس منعقد کیے گئے۔

 

اب تک منعقد ہونے والے بھارت ٹیکس کے تینوں ایڈیشن  میں بیرونِ ملک خریداروں کی شرکت کی تفصیلات درج ذیل ہیں:

 

بھارت ٹیکس 2026 میں درج ذیل اہم کامیابیاں حاصل کی گئیں: 65,000 سے زائد مربع میٹر کے نمائشی رقبے میں 1,647 نمائش کنندگان (جن میں 1,628 ملکی اور 19 بین الاقوامی کمپنیاں شامل تھیں) نے شرکت کی، جبکہ 29,000 سے زائد منظم کاروباری روابط (بی 2 بی) میٹنگیں کی گئیں۔ اس کے علاوہ تجارت، سرمایہ کاری، ٹیکنالوجی، پائیداری اور ادارہ جاتی تعاون کے شعبوں میں 40 سے زائد مفاہمت ناموں  پر دستخط کیے گئے، جن میں بھارت ٹیکس ٹریڈ فیڈریشن اور پریمیئر ویژن پیرس کے درمیان طے پانے والا ارادہ نامہ( لیٹر آف انٹینٹ ) بھی شامل ہے۔

 

بھارت ٹیکس 2026 کے دوران خریداروں کے نیٹ ورک میں 22 نئی خریدار منڈیاں شامل کی گئیں، جس سے بھارت کی عالمی خریداری اور فراہمی کے دائرہ کار میں مزید وسعت آئی۔ اس تقریب کے ذریعے شریک برآمدات کو فروغ دینے والی کونسل ( ای پی سی ) کے تعاون سے 500 سے زائد نئے بھارتی برآمد کنندگان کو بھی شامل کیا گیا، جس سے ملک کے برآمدی دائرے کو وسعت ملی اور بھارتی کاروباری اداروں کو بین الاقوامی منڈیوں میں زیادہ مؤثر شرکت کا موقع ملا۔مجموعی طور پر، ان کامیابیوں نے بھارت ٹیکس 2026 کو برآمدات کے فروغ، عالمی کاروباری شراکت داریوں کے قیام اور بھارتی ٹیکسٹائل و ملبوسات کی صنعت کو عالمی سطح پر نمایاں بنانے کے لیے ایک مؤثر پلیٹ فارم کے طور پر مزید اجاگر کیا ہے۔

 

یہ معلومات کپڑے کی وزارت  کے وزیر مملکت جناب پبتر مارگریٹا نے آج لوک سبھا میں ایک سوال کے تحریری جواب میں فراہم کیں۔

*****

ش ح ۔ع و۔ خ م

U. No.1279

(रिलीज़ आईडी: 2294316) आगंतुक पटल : 9