وزارتِ صحت و خاندانی بہبود (ایم او ایچ اینڈ ایف ڈبلیو) کی فراہم کردہ معلومات کے مطابق، سرکاری طبی مراکز میں آنے والے مریضوں کے لیے ضروری ادویات کی دستیابی یقینی بنانے اور ان کے ذاتی اخراجات (آؤٹ آف پاکٹ اخراجات) میں کمی لانے کے مقصد سے حکومت نے قومی صحت مشن (این ایچ ایم) کے تحت مفت ادویات فراہمی اقدام (فری ڈرگز سروس انیشی ایٹو) شروع کیا ہے۔

اس اقدام کے تحت ریاستوں اور مرکز کے زیر انتظام علاقوں کو ان کے پروگرام عمل درآمد منصوبوں (پی آئی پی) میں ظاہر کی گئی ضروریات اور دستیاب مجموعی وسائل کے دائرے میں رہتے ہوئے سرکاری صحت مراکز میں ضروری ادویات مفت فراہم کرنے کے لیے مالی معاونت فراہم کی جاتی ہے۔

وزارتِ صحت و خاندانی بہبود (ایم او ایچ اینڈ ایف ڈبلیو) نے سرکاری صحت مراکز پر دستیاب رکھنے کے لیے سہولت کی سطح کے مطابق ضروری ادویات کی فہرست (ایسنشل میڈیسنز لسٹ - ای ایم ایل) کی سفارش کی ہے، جس کی تفصیل درج ذیل ہے:

• سب ہیلتھ سینٹر آیوشمان آروگیہ مندر (ایس ایچ سی-اے اے ایم): 113 ادویات
• پرائمری ہیلتھ سینٹر آیوشمان آروگیہ مندر (پی ایچ سی-اے اے ایم): 179 ادویات
• کمیونٹی ہیلتھ سینٹرز (سی ایچ سیز): 301 ادویات
• ذیلی ضلع اسپتال: 318 ادویات
• ضلع اسپتال (ڈی ایچ): 381 ادویات

اس اسکیم کے تحت ادویات کی خریداری، خریداری کے مؤثر نظام کے قیام و استحکام، معیار کی یقین دہانی، سپلائی چین کے انتظام، گوداموں کے نظم و نسق، نسخوں کے آڈٹ، شکایات کے ازالے، معیاری علاج سے متعلق رہنما خطوط کی تشہیر اور ادویات و ویکسین کی تقسیم کے انتظامی نظام (ڈی وی ڈی ایم ایس) جیسے آئی ٹی پر مبنی پلیٹ فارم کے قیام کے لیے معاونت فراہم کی جاتی ہے، تاکہ ضروری ادویات کی خریداری اور دستیابی کی حقیقی صورتِ حال کی مسلسل نگرانی کی جا سکے۔ قومی سطح پر سپلائی چین کے انتظام کی نگرانی کو مؤثر بنانے کے لیے ایک مرکزی ڈیش بورڈ بھی تیار کیا گیا ہے۔

اس کے علاوہ، قومی صحت مشن (این ایچ ایم) کے تحت ہر سال کامن ریویو مشن (سی آر ایم) منعقد کیے جاتے ہیں، جن کے ذریعے مفت ادویات فراہمی اقدام (فری ڈرگز سروس انیشی ایٹو) سمیت مختلف اسکیموں کی پیش رفت اور عمل درآمد کی صورتِ حال کا جائزہ لیا جاتا ہے۔

فری ڈرگز سروس انیشی ایٹو (ایف ڈی ایس آئی) کے تحت خریدی جانے والی ادویات کے معیار کو اس اقدام کی عملی رہنما ہدایات کے ذریعے یقینی بنایا جاتا ہے۔اس کے مطابق:

1. تمام ادویات گڈ مینوفیکچرنگ پریکٹسز (جی ایم پی) کی تعمیل کرنے والے تیار کنندگان سے ایک مؤثر اور شفاف خریداری نظام کے ذریعے حاصل کی جائیں گی۔
2. صحت مراکز کو فراہمی سے قبل ہر بیچ کی سپلائی کے بعد معیار کی جانچ لازمی ہوگی۔

فارماسیوٹیکلز اینڈ میڈیکل ڈیوائسز بیورو آف انڈیا (پی ایم بی آئی)، جو پردھان منتری بھارتیہ جن اوشدھی پریوجنا (پی ایم بی جے پی) کا نفاذ کرنے والا ادارہ ہے، تمل ناڈو سمیت ملک بھر میں قائم جن اوشدھی کیندروں (جے اے کے) پر ضروری ادویات سمیت تمام ادویات کی دستیابی کی مسلسل نگرانی کرتا ہے۔

جن اوشدھی کیندروں پر ادویات کی فراہمی میں کسی بھی قسم کی کمی کو دور کرنے اور مصنوعات کی مسلسل دستیابی کو یقینی بنانے کے لیے درج ذیل اقدامات کیے گئے ہیں:

1. ستمبر 2024 سے جن اوشدھی کیندروں کو 200 عام استعمال کی ادویات کا ذخیرہ رکھنے کی ترغیب دی جا رہی ہے۔ ان میں اسکیم کے تحت سب سے زیادہ فروخت ہونے والی 100 ادویات اور بازار میں تیزی سے فروخت ہونے والی 100 ادویات شامل ہیں۔ اس کے تحت جن اوشدھی کیندر کے مالکان کو ان ادویات کا مطلوبہ ذخیرہ برقرار رکھنے پر ماہانہ ترغیبی رقم دی جاتی ہے۔
2. ملک بھر میں پانچ گوداموں اور اس وقت 42 تقسیم کاروں پر مشتمل بڑھتے ہوئے نیٹ ورک کو مربوط کرنے کے لیے مکمل طور پر معلوماتی ٹیکنالوجی پر مبنی سپلائی چین نظام قائم کیا گیا ہے، تاکہ ادویات کی فراہمی مؤثر انداز میں یقینی بنائی جا سکے۔
3. اس کے علاوہ، عام استعمال کی ادویات کی مسلسل دستیابی کو یقینی بنانے کے لیے فارماسیوٹیکلز اینڈ میڈیکل ڈیوائسز بیورو آف انڈیا (پی ایم بی آئی)، جو اس اسکیم کا نفاذ کرنے والا ادارہ ہے، 400 تیزی سے فروخت ہونے والی ادویات کی باقاعدہ نگرانی کرتا ہے اور ان کی طلب کا مسلسل تخمینہ لگاتا رہتا ہے۔ مزید برآں، خریداری کے عمل کو مزید مؤثر بنانے کے لیے مانگ کے اندازے کے طریقۂ کار کو ڈیجیٹل بنایا گیا ہے۔

اس اسکیم کے دائرۂ کار کو مزید وسعت دینے کے لیے حکومت نے مارچ 2027 تک ملک بھر میں 25,000 جن اوشدھی کیندر قائم کرنے کا ہدف مقرر کیا ہے۔ حکومت نے جن اوشدھی کیندر کھولنے کے لیے فرنچائز نما ماڈل اختیار کیا ہے۔ انفرادی کاروباری افراد، غیر سرکاری تنظیمیں، سوسائٹیاں، ٹرسٹ،ادارے، نجی کمپنیاں وغیرہ ملک بھر، بشمول تمل ناڈو، میں جن اوشدھی کیندر قائم کرنے کے لیے اسکیم کی ویب سائٹ کے ذریعے درخواست دے سکتے ہیں۔

کم سہولیات والے علاقوں میں جن اوشدھی کیندروں کے قیام کو فروغ دینے کے لیے فارماسیوٹیکلز اینڈ میڈیکل ڈیوائسز بیورو آف انڈیا (پی ایم بی آئی) متعلقہ انتظامیہ اور ضلع مجسٹریٹس کو باقاعدگی سے خطوط ارسال کرتا ہے، تاکہ درخواست دہندگان کو سرکاری اسپتالوں میں بلا معاوضہ جگہ فراہم کی جا سکے۔

پردھان منتری بھارتیہ جن اوشدھی یوجنا کے تحت دستیاب مصنوعات میں 2,110 ادویات اور 315 جراحی اشیا، طبی استعمال کی اشیا اور طبی آلات شامل ہیں، جو علاج کے تقریباً تمام بڑے شعبوں کا احاطہ کرتے ہیں، جن میں دل کی بیماریوں، سرطان، ذیابیطس، متعدی امراض، الرجی، معدہ و آنتوں کی بیماریوں کی ادویات اور غذائی تکمیلی مصنوعات (نیوٹراسیوٹیکلز) شامل ہیں۔ قومی ضروری ادویات کی فہرست میں شامل تقریباً تمام جنیرک ادویات، سوائے لیبارٹری ری ایجنٹس اور ویکسینز کے، اس مصنوعات کے ذخیرے کا حصہ ہیں۔ تمل ناڈو سمیت پورے ملک میں ضروری ادویات کی مسلسل دستیابی یقینی بنانے اور قلت کو کم سے کم رکھنے کے لیے مسلسل نگرانی اور مناسب اصلاحی اقدامات کیے جاتے ہیں۔

یہ معلومات کیمیائی مادوں اور کھادوں کی وزارت میں وزیرِ مملکت، محترمہ انوپریہ پٹیل نے آج لوک سبھا میں ایک تحریری جواب  میں فراہم کیں۔

********

ش ح۔  ع و۔ش ب ن

U-NO-1179

 

(रिलीज़ आईडी: 2293614) आगंतुक पटल : 5