இந்தியாவின் நாகரிகப் பாரம்பரியம், இயற்கை வளம், ஆன்மீகச் சிறப்பு ஆகியவை நாட்டின் சுற்றுலாப் பொருளாதாரத்திற்கு மிக வலுவான அடித்தளமாக விளங்குகின்றன. மேம்படுத்தப்பட்ட உள்கட்டமைப்பு வசதிகள், வலுவான போக்குவரத்து இணைப்பு, டிஜிட்டல் தளங்கள், தடையற்ற பயண நடைமுறைகள் ஆகியவற்றின் மூலம் இந்தியா சர்வதேச அளவில் முதன்மையான சுற்றுலா மையமாக உருவெடுத்து வருகிறது. நாட்டின் பொருளாதார வளர்ச்சி, வேலைவாய்ப்பு உருவாக்கம், பிராந்திய வளர்ச்சி ஆகியவற்றில் சுற்றுலாத் துறை மிக முக்கியப் பங்காற்றி வருகிறது. 2023-24 நிதியாண்டில் நாட்டின் மொத்த உள்நாட்டு உற்பத்தியில் (ஜிடிபி) 15.73 லட்சம் கோடி ரூபாய் இத்துறையின் மூலம் கிடைத்துள்ளது. மேலும், 84.6 மில்லியன் வேலைவாய்ப்புகளை உருவாக்கி, 2025-ல் சர்வதேச சுற்றுலா மூலம் 31.7 பில்லியன் அமெரிக்க டாலர் வருவாயை ஈட்டித் தந்துள்ளது.

இந்தியாவில் 44 யுனெஸ்கோ உலகப் பாரம்பரியச் சின்னங்கள், 106 தேசியப் பூங்காக்கள், 18 உயிர்க்கோளக் காப்பகங்கள் அமைந்துள்ளன. சார் தாம், காசி, அயோத்தி, புத்தகயா, அமிர்தசரஸ், திருப்பதி, பூரி ஆகிய புனிதத் தலங்கள் ஆன்மீகச் சுற்றுலாவை மேம்படுத்துகின்றன. இந்தியா இவ்வுலகிற்கு அளித்த கொடையாக யோகா அங்கீகரிக்கப்பட்டுள்ளது. ஆயுர்வேதம், யோகா, இயற்கை மருத்துவம் ஆகியவற்றின் மூலம் சுற்றுலாத்துறை வளர்ச்சி அடைந்து வரும் சூழலில், அதிநவீன மருத்துவ வசதிகள் மூலம் மருத்துவச் சுற்றுலாவிலும் இந்தியா உலகளவில் முன்னிலை வகிக்கிறது. கிராமப்புறங்களில் அமைக்கப்பட்டுள்ள தங்கும் விடுதிகள், பாரம்பரிய உணவு முறைகள், கைவினைப் பொருட்கள் ஆகியவை மூலமாக கிராமப்புறச் சுற்றுலாவும், பாரத் மண்டபம் போன்ற பிரம்மாண்ட உள்கட்டமைப்பு வசதிகள் மூலம் சர்வதேச மாநாடுகள், கண்காட்சிகள் நடத்துவதற்கான வர்த்தகச் சுற்றுலாவும் வேகமாக விரிவடைந்து வருகின்றன.

சுற்றுலாப் பகுதிகளை முழுமையாக மேம்படுத்தும் நோக்கில் தேசிய சுற்றுலா திட்டத்தின் கீழ்  பிரத்யேகமாக 14 வகையான சுற்றுலா பிரிவுகள் உருவாக்கப்பட்டு 5,295.24 கோடி ரூபாய் மதிப்பிலான 76 திட்டங்களுக்கு ஒப்புதல் அளிக்கப்பட்டு பணிகள் நிறைவடையும் தருவாயில் உள்ளன. இதன் தொடர்ச்சியாக, நீடித்த மற்றும் அனுபவச் சுற்றுலாவை மையமாகக் கொண்டு தேசிய சுற்றுலா திட்டம் 2.0-ன் கீழ் 2,207.08 கோடி ரூபாய் மதிப்பிலான 53 திட்டங்கள் செயல்படுத்தப்பட்டு வருகின்றன. புனிதத் தலங்களை மேம்படுத்தும் பிரசாத் திட்டத்தின் கீழ் 1,726.24 கோடி ரூபாய் செலவில் 54 திட்டங்களும், மாநிலங்களுக்கான மூலதன முதலீட்டுச் சிறப்பு உதவித் திட்டத்தின் கீழ் 3,295.76 கோடி ரூபாய் செலவில் 40 திட்டங்களுக்கும் ஒப்புதல் வழங்கப்பட்டுள்ளது.

சர்வதேசப் பயணிகளை ஈர்க்கும் விதமாக 175 நாடுகளைச் சேர்ந்த சுற்றுலாப் பயணிகளுக்கு மின்னணு-சுற்றுலா விசா வசதி நீட்டிக்கப்பட்டு, 33 சர்வதேச விமான நிலையங்கள், 19 துறைமுகங்கள் மூலம் வருகை தர அனுமதி வழங்கப்பட்டுள்ளது. சுற்றுலா சேவை வழங்குநர்களைப் பதிவு செய்ய நிதி பிளஸ் என்ற ஒற்றைச் சாளர டிஜிட்டல் தளம் உருவாக்கப்பட்டுள்ளது. சுற்றுச்சூழல் பாதுகாப்பு, வேலைவாய்ப்பு உருவாக்கம், உள்ளூர் பொருளாதார வளர்ச்சி ஆகியவற்றை ஒருங்கிணைத்து, நீடித்த பொருளாதார மற்றும் சமூக வளர்ச்சியை உறுதி செய்வதை நோக்கி இந்திய சுற்றுலாத் துறை முன்னேறி வருகிறது.

மேலும் விவரங்களுக்கு இந்த ஆங்கிலச் செய்திக்குறிப்பைக் காணவும்: https://www.pib.gov.in/PressReleasePage.aspx?PRID=2292601&reg=3&lang=1  

***

TV/PD/SE

(रिलीज़ आईडी: 2292807) आगंतुक पटल : 8