حکومت ہند نے ماحولیات (تحفظ) ایکٹ، 1986 کی دفعہ 3 کی ذیلی دفعہ (1) اور ذیلی دفعہ (2) کی شق (v) کے تحت حاصل اختیارات کا استعمال کرتے ہوئے ماحولیاتی اثرات کی تشخیص (ای آئی اے) نوٹیفکیشن، 2006 جاری کیا ہے۔ ای آئی اے نوٹیفکیشن، 2006 میں وقتاً فوقتاً کی گئی ترامیم کے مطابق، جسمانی بنیادی ڈھانچے سے متعلق منصوبے یا سرگرمیاں، جن میں ماحولیاتی خدمات بھی شامل ہیں، مذکورہ نوٹیفکیشن کے شیڈول کے آئٹم 7 کے تحت شامل کی گئی ہیں۔ ایسے منصوبوں یا سرگرمیوں کا جائزہ منصوبے سے وابستہ تمام ماحولیاتی اثرات کو مدنظر رکھتے ہوئے مرکزی سطح پر ماہر تشخیصی کمیٹی (ای اے سی) کے ذریعے زمرہ "اے" کے منصوبوں کے لیے اور ریاستی/مرکز کے زیر انتظام علاقوں کی سطح پر ریاستی ماہر تشخیصی کمیٹی (ایس ای اے سی) کے ذریعے زمرہ "بی" کے منصوبوں کے لیے لیا جاتا ہے۔ کچھ معاملات میں بنیادی ڈھانچے کے منصوبوں کے بعض حصے ٹائیگر ریزرو یا دیگر محفوظ علاقوں کے اندر یا ان سے ملحق واقع ہو سکتے ہیں۔ ایسے منصوبوں کی تجاویز جب پریویش پورٹل کے ذریعے آن لائن جمع کرائی جاتی ہیں تو وزارت کی جانب سے ان کا مسلسل جائزہ لیا جاتا ہے۔ ٹائیگر ریزرو یا دیگر محفوظ علاقوں سے متعلق ایسی تجاویز کو سخت اور کئی سطحوں پر مشتمل جانچ اور منظوری کے عمل سے گزرنا ہوتا ہے۔ اس میں پہلا مرحلہ ماحولیاتی منظوری (ای سی) حاصل کرنے کے لیے ای آئی اے نوٹیفکیشن، 2006 کے تحت ماہر تشخیصی کمیٹیوں کے ذریعے جانچ کا ہے، جبکہ دوسرا مرحلہ متعلقہ قوانین، یعنی جنگلی حیات (تحفظ) ایکٹ، 1972 کی متعلقہ دفعات، وزارت کی رہنما ہدایات اور معزز عدالتوں کی ہدایات کے مطابق مجاز اداروں اور حکام سے جنگلی حیاتیات سے متعلق منظوری حاصل کرنے کا ہے۔

منصوبوں کی مناسب جانچ اور تشخیص کے لیے وزارت نے پریویش پورٹل  پر ایک فیصلہ معاون نظام (ڈی ایس ایس) بھی تیار کیا ہے۔ یہ ایک جغرافیائی معلوماتی نظام (جی آئی ایس) پر مبنی مقامی تجزیاتی اور بصری پلیٹ فارم ہے، جو مختلف جغرافیائی اعداد و شمار کو یکجا کرکے منصوبوں کے مقامات کی ماحولیاتی حساسیت کا جائزہ لیتا ہے۔ یہ نظام محفوظ علاقوں، ماحولیاتی حساس علاقوں (ای ایس زیڈ)، جنگلات، آبی علاقوں، ساحلی ضابطہ کاری والے علاقوں اور دیگر ماحولیاتی اہمیت رکھنے والی جگہوں کے حوالے سے منصوبوں کی قربت کا خودکار تجزیہ کرنے کی سہولت فراہم کرتا ہے۔ اس کے ذریعے ماہر تشخیصی کمیٹیوں (ای اے سی) اور متعلقہ ضابطہ جاتی حکام کو باخبر اور شواہد پر مبنی فیصلے کرنے میں مدد ملتی ہے، جس سے منظوری کے عمل کو زیادہ مؤثر اور تیز بنایا جا سکتا ہے۔

محفوظ علاقوں، ماحولیاتی حساس علاقوں (ای ایس زیڈز) / ماحولیاتی حساس خطوں (ای ایس ایز) یا جنگلاتی علاقوں میں واقع منصوبوں کے لیے ضروری جنگلی حیاتیات سے متعلق منظوری کی تجاویز کی کئی سطحوں پر جانچ کی جاتی ہے۔ اس عمل میں ریاست کے چیف وائلڈ لائف وارڈن، ریاستی وائلڈ لائف بورڈ اور اس کے بعد وزارت اور قومی وائلڈ لائف بورڈ کی قائمہ کمیٹی (ایس سی این بی ڈبلیو ایل) شامل ہوتی ہے۔ یہ کمیٹی ہر معاملے کی بنیاد پر علاقے کی ماحولیاتی حساسیت، جنگلی حیاتیات کی پناہ گاہوں  اور گزرگاہوں پر پڑنے والے مجموعی اور مخصوص اثرات، اور نقصانات کو کم کرنے کے لیے تجویز کردہ اقدامات کا جائزہ لیتی ہے۔ قائمہ کمیٹی تمام اثرات، تدارکی اقدامات اور ضروری حفاظتی انتظامات کو مدنظر رکھنے کے بعد ہی جنگلی حیاتیات سے متعلق منظوری کی سفارش کرتی ہے۔ اسی طرح، پروجیکٹوں کو ماحولیاتی منظوری بھی ماحولیاتی اثرات کا مکمل جائزہ لینے اور ماحولیاتی تحفظ کے لیے ضروری اقدامات شامل کرنے کے بعد دی جاتی ہے، جن میں ماحولیاتی انتظامی پروجیکٹوں (ای ایم پی) میں تجویز کردہ تدارکی اقدامات بھی شامل ہوتے ہیں۔ جنگلی حیاتیات (تحفظ) ایکٹ، 1972 کی دفعات کے تحت، پروجیکٹ شروع کرنے والے ادارے اس وقت تک تعمیراتی یا پروجیکٹ سے متعلق دیگر سرگرمیاں شروع نہیں کر سکتے جب تک کہ ضرورت کے مطابق پہلے سے جنگلی حیات سے متعلق منظوری حاصل نہ کر لی جائے۔

مالی سال 25-2024 اور 26-2025 کے دوران مذکورہ بالا طریقہ کار پر عمل کرنے کے بعد مجموعی طور پر 20 بنیادی ڈھانچے سے متعلق  پروجیکٹوں/سرگرمیوں کو ماحولیاتی منظوری (ای سی) دی گئی، جن کے منصوبہ جاتی مقامات مکمل یا جزوی طور پر محفوظ علاقے یا ماحولیاتی حساس علاقے (ای ایس زیڈ) / ماحولیاتی حساس خطے (ای ایس اے) میں واقع تھے۔

مرکزی، ریاستی یا مرکز کے زیر انتظام علاقے کی سطح پر، جیسا کہ لاگو ہو، ماہر تشخیصی کمیٹی کی جانب سے کیے گئے جائزے کے مطابق، ماحولیاتی منظوری کی شرائط کے تحت منصوبے سے متعلق مخصوص ماحولیاتی حفاظتی اقدامات مقرر کیے جاتے ہیں، تاکہ ماحول پر پڑنے والے منفی اثرات کو روکا، کم کیا اور ان کا تدارک کیا جا سکے۔ ان اقدامات میں جنگلی حیات کے تحفظ، قدرتی مسکن کی حفاظت، آلودگی پر قابو پانے، معاوضہ جاتی شجرکاری اور ماحولیاتی نگرانی سے متعلق اقدامات شامل ہوتے ہیں، جیسا کہ ضرورت ہو۔ منظوری کے مرحلے پر سائنسی بنیادوں پر کیے جانے والے جائزے اور تفصیلی جانچ کے عمل کے ذریعے یہ یقینی بنایا جاتا ہے کہ ماحولیاتی لحاظ سے حساس علاقوں کے تحفظ کے لیے مناسب حفاظتی اقدامات شامل کیے گئے ہیں۔

یہ معلومات وزارت ماحولیات، جنگلات اور موسمیاتی تبدیلی کے وزیر مملکت جناب کیرتی وردھن سنگھ نے آج راجیہ سبھا میں ایک سوال کے تحریری جواب میں فراہم کیں۔

*****

(ش ح-ع و-ص ج )

U-970

 

(रिलीज़ आईडी: 2291967) आगंतुक पटल : 14