ہاؤسنگ اور شہری امور کے مرکزی وزیر مملکت جناب توکھن ساہو نے وزارت کے اہم  پروگراموں کو نافذ کرنے والی ٹیموں کے ساتھ مشغول ہونے کے اپنے عزم کا اعادہ کرتے ہوئے آج نئی دہلی کے سنکلپ بھون میں سب کے لیے مکان(ایچ ایف اے) ڈویژن کا دورہ کیا ۔

دورے کے دوران ، جناب ساہو ، جوائنٹ سکریٹری (ایچ ایف اے اینڈ ہاؤسنگ) جناب کلدیپ نارائن اور ڈپٹی ڈائریکٹر جنرل (ایچ ایف اے) جناب آر کے گوتم کے ہمراہ ایچ ایف اے ڈویژن کے مختلف حصوں سے گزرے اور افسران ، مشیروں ، نوجوان پیشہ ور افراد اور معاون عملے کے ساتھ ان کے کام کرنے کی جگہ پر بات چیت کی تاکہ ڈویژن کے کام کاج کے بارے میں براہ راست معلومات حاصل کی جا سکیں ۔  انہوں نے پی ایم اے وائی-یو 2.0 کو نافذ کرنے والی ٹیموں کے ساتھ بات چیت کی ، جاری ترجیحات ، کلیدی اقدامات اور مشن کی پیشرفت کا جائزہ لیا ۔  انہوں نے ٹیموں کی تجاویز بھی سنیں ، اہل شہری مستفیدین کوکفایتی رہائش کی بروقت اور موثر فراہمی کو یقینی بنانے میں ان کی سرشار کوششوں کو سراہا  اور حکومت کے سب سے زیادہ تبدیلی لانے والے شہری مشنوں میں سے ایک کو آگے بڑھانے میں ان کے انمول تعاون کو تسلیم کیا ۔

 

 

جناب ساہو نے پی ایم اے وائی-یو نگرانی ڈیش بورڈ کا بھی جائزہ لیا ، جو ڈیجیٹل نگرانی نظام کے ذریعے مشن کی پیش رفت کا ایک جامع جائزہ فراہم کرتا ہے ۔  شفافیت ، جوابدہی اور حقیقی وقت کی نگرانی کو بہتر بنانے میں ٹیکنالوجی اور ڈیٹا پر مبنی حکمرانی کے استعمال کی تعریف کرتے ہوئے ، انہوں نے ٹیم کی حوصلہ افزائی کی کہ وہ مشن کے نفاذ کو مزید موثر اور شہریوں پر مرکوز بنانے کے لیے اختراعی نقطہ نظر اپناتے رہیں ۔

ایچ ایف اے ڈویژن کی کوششوں کی ستائش کرتے ہوئے جناب ساہو نے کہا کہ وزارت نے پی ایم اے وائی-یو اور پی ایم اے وائی-یو 2.0 کے تحت 127 لاکھ سے زیادہ مکانات کی تعمیرکی منظوری دی ہے ، جن میں پی ایم اے وائی-یو 2.0 کے تحت 16 لاکھ سے زیادہ مکانات شامل ہیں ۔  ان میں سے 121 لاکھ سے زیادہ مکانات کی بنیاد رکھی جا چکی ہے ، 99 لاکھ سے زیادہ مکانات مکمل ہو چکے ہیں اور 96 لاکھ سے زیادہ کنبے  پہلے ہی ملک بھر میں اپنے گھروں میں منتقل ہو چکے ہیں ۔

ایچ ایف اے ٹیم سے خطاب کرتے ہوئے جناب ساہو نے کہا ، ‘‘یہ قابل ذکر کامیابیاں ایچ ایف اے ڈویژن کے ہر رکن کی غیر متزلزل لگن ، پیشہ ورانہ مہارت اور عزم کا ثبوت ہیں ۔  ہر مکمل گھر کے پیچھےپورا کنبہ ہوتا ہے جن کی زندگیا ں پوری طرح بدل گئی ہیں ۔  آپ محض گھر نہیں بنا رہے ہیں ، آپ مواقع پیدا کر رہے ہیں ، وقار بحال کر رہے ہیں ، تحفظ فراہم کر رہے ہیں اور لاکھوں شہریوں کو بہتر مستقبل کی بنیاد دے رہے ہیں ۔’’

پی ایم اے وائی-یو اور پی ایم اے وائی-یو 2.0 کی جامع نوعیت پر زور دیتے ہوئے جناب ساہو نے اس بات پر روشنی ڈالی کہ مشن نے معاشرے کے کچھ انتہائی کمزور طبقات کو بااختیار بنایا ہے ۔  منظور شدہ کل مکانات میں سے 21 لاکھ سے زیادہ مستفیدین کا تعلق درج فہرست ذات (ایس سی) کے زمرے سے ، 5 لاکھ سے زیادہ درج فہرست قبائل (ایس ٹی) کے زمرے سے  اور تقریباً 50 لاکھ دیگر پسماندہ طبقات (او بی سی) سے ہے ۔  اس کے علاوہ ، 22 لاکھ سے زیادہ مستفیدین کا تعلق اقلیتی برادریوں سے ہے ، جبکہ ایک کروڑ سے زیادہ مکانات کو خواتین کے نام پر یا ان کے اہل خانہ کے مرد اراکین کے ساتھ مشترکہ ملکیت کے تحت منظور کیا گیا ہے ، جو خواتین کو بااختیار بنانے ، سماجی مساوات اور مالی تحفظ کے لیے حکومت کے عزم کا اعادہ کرتا ہے ۔

جناب ساہو نے کہا کہ یہ کامیابیاں اس بات کو یقینی بنانے کے لیے حکومت کے ثابت قدم عزم کی عکاسی کرتی ہیں کہ ترقی کے فوائد معاشرے کے ہر طبقے تک پہنچیں ۔  انہوں نے کہا کہ پی ایم اے وائی-یو 2.0 سماجی شمولیت اور بااختیار بنانے کے ایک طاقتور ذریعہ کے طور پر ابھرا ہے ، جس سے وزیر اعظم جناب نریندر مودی کی دور اندیش قیادت میں ‘‘سب کا ساتھ ، سب کا وکاس ، سب کا وشواس ، سب کا پریاس’’ کے وژن کو حقیقت میں بدل دیا گیا ہے ۔

مختلف ریاستوں اور مرکز کے زیر انتظام علاقوں کے دوروں کے اپنے تجربات کا اشتراک کرتے ہوئے ، جناب ساہو نے پی ایم اے وائی-یو کے مستفیدین کے ساتھ اپنی دلی بات چیت کو یاد کیا ۔  انہوں نے کہا کہ جن کنبوں کا اپنا گھر پانے کا خواب پورا ہوا ان کی حقیقت سنتے ہوئے انہیں اس مشن کے انقلابی اثرات کا پھر سے احساس ہوا۔

جناب ساہو نے کہا کہ‘‘جب بھی میں ملک کے مختلف حصوں کا دورہ کرتا ہوں ، میں ان مستفیدین سے ملتا ہوں جن کی زندگیاں پی ایم اے وائی-یو کے ذریعے بدل گئی ہیں ۔  ان کی مسکراہٹیں اور کہانیاں ہمیں یاد دلاتی ہیں کہ ہمارا کام لاکھوں زندگیوں کو چھو رہا ہے ۔  میں ایچ ایف اے ڈویژن کے ہر افسر ، مشیر اور اسٹاف ممبر کو اس قومی مشن کے لیے ان کےبیش قیمتی تعاون کے لیے مبارکباد دیتا ہوں اور انہیں اسی لگن اور عزم کے ساتھ کام جاری رکھنے کی ترغیب دیتا ہوں ۔’’

اپنے دورے کا اختتام کرتے ہوئے جناب ساہو نے اس بات کا اعادہ کیا کہ پی ایم اے وائی-یو 2.0 جامع شہری ترقی اور وکست بھارت کے وژن کے لیے حکومت کے عزم کو مضبوط کرتے ہوئے اہل شہری خاندانوں کوکفایتی رہائش فراہم کرنے میں اہم کردار ادا کرتا رہے گا ۔

 

 ش ح۔ م ش۔ ج ا

U.No. 916

(रिलीज़ आईडी: 2291557) आगंतुक पटल : 9