نیشنل بائیو ڈائیورسٹی اتھارٹی (این بی اے) نے 11 کپاس  کی کاشت والی ریاستوں میں حیاتیاتی تنوع کے تحفظ، حیاتیاتی وسائل کے پائیدار استعمال اور روزگار کے فروغ کے لیے اکسیس اینڈ بینیفٹ شیئرنگ (رسائی اور فائدے کی تقسیم) کے نظام کے تحت 6.67 کروڑ روپے جاری کیے ہیں۔ رقم کی یہ منتقلی اس بات کو ظاہر کرتی ہے کہ حیاتیاتی تنوع ایکٹ کے تحت حیاتیاتی وسائل کے تجارتی استعمال سے حاصل ہونے والے منافع کو کس طرح دوبارہ حیاتیاتی تنوع کے تحفظ اور عوامی فلاح و بہبود میں استعمال کیا جا رہا ہے۔

فوائد کی تقسیم (بینیفٹ شیئرنگ) کی رقم 7.62 کروڑ روپے 'میسرز بائر سائنس اینڈ انوویشن پرائیویٹ لمیٹڈ' (سابقہ مونسانٹو ہولڈنگز پرائیویٹ لمیٹڈ) سے کپاس کی 25431 اقسام پر کی جانے والی تحقیق کے عوض حاصل کی گئی ہے۔ بھارت کے زرعی اور معاشی منظر نامے میں کپاس کو ایک خاص مقام حاصل ہے، اور بھارت کپاس کے جینیاتی تنوع کے عالمی ذخیرے کے طور پر کام کرتا ہے جس سے ویلیو چین کے ذریعے تقریباً 4 سے 5 کروڑ لوگوں کا روزگار جڑا ہوا ہے۔ چونکہ یہ حیاتیاتی وسائل تاجروں اور درمیانی افراد کے ذریعے حاصل کیے گئے تھے، اس لیے انفرادی طور پر تحفظ کرنے والوں یا فائدے کے حقداروں کی شناخت ممکن نہیں تھی۔

ایسی صورتحال سے نمٹنے کے لیے، نیشنل بائیو ڈائیورسٹی اتھارٹی نے ایک ماہر کمیٹی کے تعاون سے حاصل شدہ رقم کے استعمال کے لیے شفاف طریقہ کار تیار کیا ہے۔ جہاں شائع شدہ ریکارڈز کی مدد سے کسی حیاتیاتی وسیلے کی جغرافیائی موجودگی کا قابل اعتماد انداز میں تعین کیا جا سکتا ہے، وہاں اس سے متعلقہ رقم متعلقہ ریاست کے بائیو ڈائیورسٹی بورڈز کو حیاتیاتی تنوع کے تحفظ، پائیدار استعمال اور علاقے کی سماجی و معاشی ترقی کے لیے منتقل کر دی جاتی ہے۔ اور جہاں اصل ذریعہ معلوم نہ ہو سکے، وہاں یہ فنڈز 'نیشنل بائیو ڈائیورسٹی فنڈ' میں محفوظ رکھے جاتے ہیں اور ملک بھر میں حیاتیاتی وسائل کے تحفظ اور پائیدار استعمال کے لیے 'بائیولوجیکل ڈائیورسٹی ایکٹ' کی دفعہ 27 کے مطابق استعمال کیے جاتے ہیں۔

ان طریقہ کار کو نافذ کرتے ہوئے، این بی اے  نے 11 کپاس اگانے والی ریاستوں کے درمیان 6.67 کروڑ روپے  تقسیم کیے ہیں: مہاراشٹر (2.41 کروڑ روپے)، گجرات (1.38 کروڑ روپے)، تلنگانہ (1.06 کروڑ روپے)، کرناٹک (0.40 کروڑ روپے)، راجستھان (0.36 کروڑ روپے)، مدھیہ پردیش (0.31 کروڑ روپے)، آندھرا پردیش (0.23 کروڑ روپے)، ہریانہ (0.23 کروڑ روپے)، اڈیشہ (0.14 کروڑ روپے)، پنجاب (0.09 کروڑ روپے) اور تمل ناڈو (0.06 کروڑ روپے)۔ باقی ماندہ رقم (0.95 کروڑ روپے) حیاتیاتی تنوع کے قوانین کے مطابق این بی اے کے لیے مختص کی گئی ہے۔

یہ تخصیص آئی سی اے آر  کے 'آل انڈیا کوآرڈینیٹڈ ریسرچ پروجیکٹ آن کاٹن' (اے آئی سی آر پی) کے اعداد و شمار کا استعمال کرتے ہوئے کپاس کی کاشت کی جغرافیائی تقسیم پر مبنی ہے اور ہر ریاست میں کپاس کے زیرِ کاشت رقبے کے تناسب سے کی گئی ہے، جس سے فائدے کی تقسیم (اے بی ایس) کے شفاف، سائنسی اور مساویانہ نظام کو یقینی بنایا گیا ہے۔

یہ فنڈز کھیتوں پر اور دیگر جگہوں  پر حیاتیاتی وسائل کے تحفظ، عوامی بائیو ڈائیورسٹی رجسٹروں (پی بی آر) کی تیاری اور تجدید، ماحولیاتی نظام کی بحالی، بائیو ڈائیورسٹی ہیریٹیج سائٹس کی مضبوطی، روایتی علوم کی دستاویز کاری، حیاتیاتی تنوع پر تحقیق، ڈیجیٹل بائیو ڈائیورسٹی ڈیٹا بیس کی تیاری، بائیو ڈائیورسٹی مینجمنٹ کمیٹیوں کی صلاحیت سازی، بیداری کے پروگراموں اور روزگار کے فروغ کے لیے استعمال کیے جائیں گے۔ یہ سرمایہ کاری مستقبل میں فصلوں کی بہتری کے لیے قیمتی جینیاتی خصوصیات کو محفوظ رکھنے کے ساتھ ساتھ مقامی برادریوں کو بھارت کے زرعی بائیو ڈائیورسٹی کے نگہبان کے طور پر بااختیار بنانے میں مدد کرے گی۔

یہ پہل فوائد کی تقسیم کے لیے ایک شفاف اور سائنسی ماڈل بھی قائم کرتی ہے جہاں حیاتیاتی وسائل پیچیدہ سپلائی چینز کے ذریعے حاصل کیے جاتے ہیں۔ جغرافیائی موجودگی سے فائدے کی اس تقسیم کو جوڑ کر، یہ نظام اس بات کو یقینی بناتا ہے کہ رقم حیاتیاتی تنوع سے مالا مال علاقوں تک پہنچے، خواہ انفرادی طور پر مستفید ہونے والوں کی شناخت ممکن نہ بھی ہو۔

اس ادائیگی کے ساتھ ہی، این بی اے کی جانب سے جاری کردہ کل اے بی ایس  فنڈز 152.24 کروڑ روپے  تک پہنچ گئے ہیں۔ یہ پہل اس بات کا عملی ثبوت ہے کہ کس طرح 'رسائی اور فوائد کی تقسیم' (اے بی ایس) کا طریقہ کار حیاتیاتی وسائل کے تجارتی استعمال کو معیشت، ماحول اور مساوات کے امتزاج میں تبدیل کرتا ہے۔ یہ 'کنمنگ - مونٹریال گلوبل بائیو ڈائیورسٹی فریم ورک' پر عمل درآمد میں بھی اہم کردار ادا کرتا ہے، خاص طور پر جینیاتی وسائل کے استعمال سے حاصل ہونے والے فوائد کی منصفانہ اور مساویانہ تقسیم سے متعلق 'ہدف 13' اور جینیاتی تنوع کے تحفظ سے متعلق 'ہدف 4' کی تکمیل میں مدد فراہم کرتا ہے۔

نیشنل بائیو ڈائیورسٹی اتھارٹی، ماحولیات، جنگلات و آب و ہوا کی  تبدیلی  کی وزارت کے تحت کام کرنے والا ایک آئینی اور قانونی ادارہ ہے جو 'بائیولوجیکل ڈائیورسٹی ایکٹ، 2002' کے تحت قائم کیا گیا تھا۔ یہ ادارہ بھارت کے حیاتیاتی وسائل اور اس سے وابستہ روایتی علوم تک رسائی کو منظم کرتا ہے اور ناگویا پروٹوکول کے فوائد کی منصفانہ اور مساویانہ تقسیم کے اصول کو نافذ کرتا ہے۔

۔۔۔۔۔۔۔۔۔۔

ش ح۔ م م ع ۔ ن م۔

     U- 421