ارضیاتی سائنسز کی وزارت کے تحت بھارت کا محکمۂ موسمیات (آئی ایم ڈی) ضلع سطح پر روزانہ دو مرتبہ شدید گرمی سے متعلق انتباہات، الرٹس اور اثرات پر مبنی موسمی پیش گوئیاں جاری کرتا ہے۔ ان پیش گوئیوں میں شدید گرمی کے ممکنہ اثرات اور ان سے بچاؤ کے لیے قدرتی آفات کے بندوبست کی قومی اتھارٹی (این ڈی ایم اے) کی ہدایات اور ہیٹ ایکشن پلان کے مطابق احتیاطی اقدامات بھی شامل ہوتے ہیں۔ یہ اثرات پر مبنی پیش گوئیاں اور خطرے پر مبنی انتباہات ای میل، اے پی آئی، موبائل ایپلی کیشنز، سوشل میڈیا پلیٹ فارمز، ویب سائٹس، الیکٹرانک و پرنٹ میڈیا، عوامی مواصلاتی نظام اور کامن الرٹنگ پروٹوکول (سی اے پی) سمیت مختلف ذرائع کے ذریعے ڈیزاسٹر مینیجرز، متعلقہ اداروں، میڈیا اور عام عوام تک پہنچائے جاتے ہیں۔

محکمۂ موسمیات نے ’’ہیزرڈ اینڈ ولنریبلٹی اٹلس آف انڈیا‘‘ تیار کیا ہے، جس میں ملک کے تمام اضلاع کے لیے شدید گرمی سے متعلق حساسیت کا ضلع سطح پر جائزہ فراہم کیا گیا ہے۔ اس اٹلس میں راجستھان کے ضلع باڑمیر کو بھی شامل کیا گیا ہے۔ اٹلس کے مطابق باڑمیر ضلع کا ہیٹ ویو ولنریبلٹی انڈیکس صفر سے ایک کے پیمانے پر 0.54 ہے، جس کی بنیاد پر اسے ’’زیادہ حساس‘‘ زمرے میں رکھا گیا ہے۔

محکمۂ موسمیات باقاعدگی سے اپنی ہیٹ ویو بلیٹن مختلف متعلقہ اداروں، جن میں ڈیزاسٹر مینجمنٹ اتھارٹیز، محکمۂ صحت، محکمۂ محنت، بھارتی ریلوے، محکمۂ ٹرانسپورٹ، محکمۂ جنگلات وغیرہ شامل ہیں، کو فراہم کرتا ہے۔ اس کے علاوہ ویب سائٹس، ذرائع ابلاغ، سوشل میڈیا، واٹس ایپ گروپس، موبائل ایپس، اے پی آئی، کامن الرٹ پروٹوکول اور دیگر ذرائع کے ذریعے عام شہریوں کو بھی شدید گرمی سے متعلق انتباہات جاری کیے جاتے ہیں۔ ایک آزمائشی اقدام کے طور پر محکمۂ موسمیات نے غیر منظم شعبے کے کارکنوں تک ان کی متعلقہ انجمنوں کے ذریعے آسان، قابلِ فہم اور قابلِ عمل انداز میں اثرات پر مبنی ہیٹ ویو انتباہات پہنچانے کا سلسلہ بھی شروع کیا ہے۔ مزید برآں، قومی ڈیزاسٹر مینجمنٹ اتھارٹی مختلف متعلقہ اداروں کے ساتھ باقاعدگی سے اجلاس منعقد کرتی ہے تاکہ محکمۂ موسمیات کی پیش گوئیوں کی بنیاد پر پیشگی منصوبہ بندی اور زمینی سطح پر بروقت اقدامات کو یقینی بنایا جا سکے۔ شدید گرمی سے متعلق بیشتر معلومات اور خدمات ویب جی آئی ایس پر مبنی پلیٹ فارم پر دستیاب ہیں اور عام شہریوں کے لیے بلا معاوضہ قابلِ رسائی ہیں۔

حکومت نے قومی ڈیزاسٹر مینجمنٹ اتھارٹی، ریاستی اداروں اور مقامی محکمۂ صحت کے اشتراک سے بھارت کے محکمۂ موسمیات کے ذریعے شدید گرمی کی نگرانی، پیش گوئی اور پیشگی انتباہی نظام کو نمایاں طور پر مضبوط بنایا ہے۔ ملک کے کئی حصوں میں ہیٹ ایکشن پلان نافذ کیے گئے ہیں تاکہ عوام کو پیشگی انتباہات اور احتیاطی تدابیر سے متعلق رہنمائی فراہم کی جا سکے۔ سال 2016 سے محکمۂ موسمیات منصوبہ بندی میں معاونت کے لیے درجۂ حرارت اور شدید گرمی سے متعلق موسمی جائزے، ماہانہ پیش گوئیاں، توسیعی مدت (ہفتہ وار) کی پیش گوئیاں اور روزانہ دو مرتبہ ہیٹ ویو بلیٹن جاری کر رہا ہے، جن سے عوام، ڈیزاسٹر مینیجرز اور دیگر متعلقہ فریق استفادہ کرتے ہیں۔

یہ معلومات آج لوک سبھا میں ارضیاتی سائنسز کے وزیرِ مملکت (آزادانہ چارج) ڈاکٹر جتیندر سنگھ نے ایک تحریری جواب میں فراہم کیں۔

******

 

(ش ح۔ ک ح ۔ م ا)

UR No-346

 

 

 

(रिलीज़ आईडी: 2287893) आगंतुक पटल : 6