தேசிய வேளாண்மை மற்றும் ஊரக வளர்ச்சி வங்கியின் (நபார்டு) தமிழ்நாடு மண்டல அலுவலகம், தனது 45-வது நிறுவன தினத்தை இன்று சென்னையில் கொண்டாடியது. இந்த நிகழ்ச்சியில் தமிழ்நாடு அரசின் வேளாண்மை மற்றும் விவசாயிகள் நலத்துறை அமைச்சர் திரு ஆர். வினோத் சிறப்பு விருந்தினராகக் கலந்துகொண்டார். கூட்டுறவு, உணவு மற்றும் நுகர்வோர் பாதுகாப்புத் துறையின் கூடுதல் தலைமைச் செயலாளர் திருமதி பி அமுதா, இந்திய ரிசர்வ் வங்கியின் சென்னை மண்டல இயக்குநர் திருமதி உமா சங்கர் மற்றும் இந்தியன் வங்கியின் நிர்வாக இயக்குநர் திரு ஷிவ் பஜ்ரங் சிங் ஆகியோரும் விழாவில் பங்கேற்றனர். தமிழ்நாடு மற்றும் புதுச்சேரியைச் சேர்ந்த மூத்த வங்கி அதிகாரிகள், மாநில அரசு அதிகாரிகள், அரசு சாரா நிறுவனங்கள், சுயஉதவிக் குழு உறுப்பினர்கள், விவசாயிகள் மற்றும் பல்வேறு பங்குதாரர்களும்  இதில் கலந்துகொண்டனர்.

 

நிகழ்ச்சியில், நீண்ட காலப் பயிர்க் கடன் கட்டமைப்புகள் குறித்து நிதி நிறுவனங்களுக்கு வழிகாட்டும் வகையில் உருவாக்கப்பட்ட ‘2026-27 நிதியாண்டிற்கான விவசாயம் மற்றும் அது சார்ந்த துறைகளில் முதலீடுகளுக்கான உத்தேச அலகுச் செலவு குறித்த கையேடு’ மற்றும் '2025-26 ஆம் ஆண்டிற்கான வருடாந்திரச் செயல்பாடு குறித்த கையேடு’ ஆகிய இரண்டு முக்கிய வெளியீடுகள் வெளியிடப்பட்டன.

 

நபார்டு தமிழ்நாடு மண்டல அலுவலகத்தின் தலைமைப் பொது மேலாளர் திரு ஹெச். மனோஜ், நிறுவனத்தின் நிதிச் செயல்பாடுகள் குறித்த விவரங்களை வெளியிட்டார். அதன்படி, 2025–26 ஆம் ஆண்டில் விவசாயக் கடன், கிராமப்புறக் கட்டமைப்பு, மீன்வளம், உழவர் உற்பத்தியாளர் அமைப்புகளை (எஃப்பிஓ) ஊக்குவித்தல் மற்றும் நிதிச் சேர்க்கை உள்ளிட்ட முக்கியத் துறைகளில் வழங்கப்பட்ட நிதியுதவி ரூ. 73,000 கோடியைக் கடந்துள்ளது. மேலும், மாநிலத்தின் முன்னுரிமைத் துறைக்கான கடன் வழங்கும் திறன் ரூ. 10.61 லட்சம் கோடி என்ற குறிப்பிடத்தக்க அளவை எட்டியுள்ளதை அவர் சுட்டிக்காட்டினார்.

 

நிகழ்ச்சியில் உரையாற்றிய திருமதி  உமா சங்கர், வரலாற்றுச் சிறப்புமிக்க சுய உதவிக் குழு-வங்கி இணைப்புத் திட்டம், கூட்டுப் பொறுப்புக் குழு நிதியுதவி மற்றும் அடிமட்ட அளவில் நிதி உள்ளடக்கத்தைச் செயல்படுத்துவதில் நபார்டின் தலைமைத்துவத்தைப் பாராட்டினார். மேலும், பருவநிலை மாற்றச் சவால்களுக்குப் புதுமையான ஆராய்ச்சித் தீர்வுகளை முன்னெடுக்குமாறு நிறுவனத்தை அவர் வலியுறுத்தினார். நில மேம்பாடு மற்றும் நீர்வள மேலாண்மையில் நபார்டின் வரலாற்றுச் சிறப்புமிக்க முயற்சிகளுடன், சுமார் 40 கோடி மக்களின் வாழ்வில் நேர்மறையான தாக்கத்தை ஏற்படுத்திய தேசிய சுய உதவிக் குழு இயக்கத்தை விரிவுபடுத்துவதில் அதன் மாற்றியமைக்கும் பங்கையும் திரு ஷிவ் பஜ்ரங் சிங் பாராட்டினார்.

****

TV/BR/SH

(रिलीज़ आईडी: 2287475) आगंतुक पटल : 46