ಹಣಕಾಸು ಸಚಿವಾಲಯ
ಸಾರ್ವತ್ರಿಕ ಬ್ಯಾಂಕಿಂಗ್, ಸಾಮಾಜಿಕ ಭದ್ರತೆ ಮತ್ತು ಸಾಲದ ಲಭ್ಯತೆಯ ಮೂಲಕ ಆರ್ಥಿಕ ಸಬಲೀಕರಣವನ್ನು ಉತ್ತೇಜಿಸುವುದನ್ನು ಮುಂದುವರಿಸಿರುವ ಸರ್ಕಾರದ ಹಣಕಾಸು ಸೇರ್ಪಡೆ ಮಿಷನ್
01.07.2026 ರ ವೇಳೆಗೆ ₹3.08 ಲಕ್ಷ ಕೋಟಿಗೂ ಹೆಚ್ಚಿನ ಠೇವಣಿಯೊಂದಿಗೆ 58.63 ಕೋಟಿ ಖಾತೆಗಳನ್ನು ದಾಖಲಿಸಿದ ಪಿಎಂಜೆಡಿವೈ
01.07.2026 ರ ವೇಳೆಗೆ ಪಿಎಂಜೆಜೆಬಿವೈ ಅಡಿಯಲ್ಲಿ 27.84 ಕೋಟಿ ಒಟ್ಟು ನೋಂದಣಿ; ಪಿಎಂಎಸ್ಬಿವೈ ನೋಂದಣಿ 58.78 ಕೋಟಿಗೆ ಏರಿಕೆ
30.06.2026 ರ ವೇಳೆಗೆ ಎಪಿವೈ ಒಟ್ಟು ನೋಂದಣಿ 9.29 ಕೋಟಿಗೆ ಏರಿಕೆ; ಪಿಎಂ ಮುದ್ರಾ ಯೋಜನೆಯಡಿ ₹41.71 ಲಕ್ಷ ಕೋಟಿ ಮೌಲ್ಯದ 59.14 ಕೋಟಿ ಸಾಲಗಳು ಮಂಜೂರು
ಪ್ರಕಟಣಾ ದಿನಾಂಕ:
21 JUL 2026 5:43PM by PIB Bengaluru
ಅಳಿವಿನ ಅಂಚಿನಲ್ಲಿರುವ ಮತ್ತು ಸೇವೆಗಳಿಂದ ವಂಚಿತರಾದ ಸಮುದಾಯಗಳು ಸೇರಿದಂತೆ ಸಮಾಜದ ಎಲ್ಲಾ ವರ್ಗಗಳಿಗೆ ಹಣಕಾಸು ಸೇರ್ಪಡೆಯನ್ನು ಉತ್ತೇಜಿಸುವ ಮತ್ತು ಬ್ಯಾಂಕಿಂಗ್, ಸಾಲ ಹಾಗೂ ವಿಮಾ ಸೇವೆಗಳ ಲಭ್ಯತೆಯನ್ನು ಸುಗಮಗೊಳಿಸುವ ಉದ್ದೇಶದಿಂದ, ಸರ್ಕಾರವು ಆಗಸ್ಟ್, 2014 ರಲ್ಲಿ 'ರಾಷ್ಟ್ರೀಯ ಹಣಕಾಸು ಸೇರ್ಪಡೆ ಮಿಷನ್' (NMFI) ಅಂದರೆ 'ಪ್ರಧಾನ ಮಂತ್ರಿ ಜನ್ ಧನ್ ಯೋಜನೆ'ಯನ್ನು (PMJDY) ಪ್ರಾರಂಭಿಸಿತು. ಬ್ಯಾಂಕ್ ಖಾತೆ ಇಲ್ಲದವರಿಗೆ ಬ್ಯಾಂಕಿಂಗ್ ವ್ಯವಸ್ಥೆ, ಭದ್ರತೆ ಇಲ್ಲದವರಿಗೆ ಭದ್ರತೆ ಮತ್ತು ನಿಧಿ ಇಲ್ಲದವರಿಗೆ ಹಣಕಾಸು ನೆರವು ನೀಡುವುದು ಇದರ ಮಾರ್ಗದರ್ಶಿ ತತ್ವವಾಗಿದೆ.
ಎನ್ಎಮ್ಎಫ್ಐ (NMFI) ಅಡಿಯಲ್ಲಿ ವಿವಿಧ ಯೋಜನೆಗಳ ಮೂಲಕ ಫಲಾನುಭವಿಗಳ ವ್ಯಾಪ್ತಿಯನ್ನು ಕೆಳಕಂಡಂತೆ ವಿವರಿಸಲಾಗಿದೆ:
i. ಪಿಎಂಜೆಡಿವೈ (PMJDY) ಅಡಿಯಲ್ಲಿ, 01.07.2026 ರ ವೇಳೆಗೆ ₹3,08,333 ಕೋಟಿ ಠೇವಣಿ ಶಿಲ್ಕಿನೊಂದಿಗೆ ಒಟ್ಟು 58.63 ಕೋಟಿ ಜನ್-ಧನ್ ಖಾತೆಗಳನ್ನು ತೆರೆಯಲಾಗಿದೆ. ಇವುಗಳಲ್ಲಿ 32.68 ಕೋಟಿ (55.74%) ಜನ್-ಧನ್ ಖಾತೆಗಳು ಮಹಿಳೆಯರಿಗೆ ಸೇರಿವೆ ಮತ್ತು ಸುಮಾರು 45.62 ಕೋಟಿ (77.80%) ಪಿಎಂಜೆಡಿವೈ ಖಾತೆಗಳನ್ನು ಗ್ರಾಮೀಣ ಮತ್ತು ಅರೆ-ನಗರ ಪ್ರದೇಶಗಳಲ್ಲಿ ತೆರೆಯಲಾಗಿದೆ.
ii. ಪ್ರಧಾನ ಮಂತ್ರಿ ಜೀವನ್ ಜ್ಯೋತಿ ಬಿಮಾ ಯೋಜನೆ (PMJJBY) ಅಡಿಯಲ್ಲಿ, ಯಾವುದೇ ಕಾರಣದಿಂದ ಸಂಭವಿಸುವ ಸಾವುಗಳಿಗೆ ₹2 ಲಕ್ಷ ಜೀವ ವಿಮಾ ರಕ್ಷಣೆ ನೀಡಲು 27.84 ಕೋಟಿ ಒಟ್ಟು ನೋಂದಣಿಗಳನ್ನು (01.07.2026 ರಂತೆ) ಮಾಡಲಾಗಿದೆ.
iii. ಪ್ರಧಾನ ಮಂತ್ರಿ ಸುರಕ್ಷಾ ಬಿಮಾ ಯೋಜನೆ (PMSBY) ಅಡಿಯಲ್ಲಿ, ಕ್ರಮವಾಗಿ ₹2 ಲಕ್ಷ (ಸಾವು ಅಥವಾ ಶಾಶ್ವತ ಸಂಪೂರ್ಣ ಅಂಗವೈಕಲ್ಯ) ಮತ್ತು ₹1 ಲಕ್ಷ (ಶಾಶ್ವತ ಭಾಗಶಃ ಅಂಗವೈಕಲ್ಯ) ಒಂದು ವರ್ಷದ ಅಪಘಾತ ರಕ್ಷಣೆ ಒದಗಿಸಲು 58.78 ಕೋಟಿ ಒಟ್ಟು ನೋಂದಣಿಗಳನ್ನು (01.07.2026 ರಂತೆ) ಮಾಡಲಾಗಿದೆ.
iv. ಅಟಲ್ ಪಿಂಚಣಿ ಯೋಜನೆ (APY) ಅಡಿಯಲ್ಲಿ, ಅರ್ಹ ಚಂದಾದಾರರಿಗೆ ಮಾಸಿಕ ಪಿಂಚಣಿ ಒದಗಿಸಲು 9.29 ಕೋಟಿ ಒಟ್ಟು ನೋಂದಣಿಗಳನ್ನು (30.06.2026 ರ ವೇಳೆಗೆ) ಮಾಡಲಾಗಿದೆ.
v. ಪ್ರಧಾನ ಮಂತ್ರಿ ಮುದ್ರಾ ಯೋಜನೆ (PMMY) ಅಡಿಯಲ್ಲಿ, ಉತ್ಪಾದನೆ, ವ್ಯಾಪಾರ, ಸೇವಾ ವಲಯಗಳು ಸೇರಿದಂತೆ ಕೃಷಿ ಸಂಬಂಧಿತ ಚಟುವಟಿಕೆಗಳಲ್ಲಿ ಆದಾಯ ಉತ್ಪಾದಿಸುವ ಚಟುವಟಿಕೆಗಳಿಗಾಗಿ ಕಿರು/ಸಣ್ಣ ಉದ್ಯಮ ಘಟಕಗಳಿಗೆ ₹20 ಲಕ್ಷದವರೆಗೆ ಭದ್ರತಾರಹಿತ ಸಾಲ ಒದಗಿಸಲು ₹41.71 ಲಕ್ಷ ಕೋಟಿ ಮೌಲ್ಯದ 59.14 ಕೋಟಿ ಸಾಲಗಳನ್ನು ಮಂಜೂರು ಮಾಡಲಾಗಿದೆ (26.06.2026 ರಂತೆ).
vi. ಸ್ಟ್ಯಾಂಡ್-ಅಪ್ ಇಂಡಿಯಾ ಯೋಜನೆ (SUPI) ಅಡಿಯಲ್ಲಿ, ಉತ್ಪಾದನೆ, ವ್ಯಾಪಾರ, ಸೇವೆಗಳು ಮತ್ತು ಕೃಷಿ ಸಂಬಂಧಿತ ಚಟುವಟಿಕೆಗಳಂತಹ ವಲಯಗಳಲ್ಲಿ ಹೊಸ ಯೋಜನೆಗಳನ್ನು (ಗ್ರೀನ್ಫೀಲ್ಡ್ ಪ್ರಾಜೆಕ್ಟ್) ಸ್ಥಾಪಿಸಲು ಪ ಪರಿಶಿಷ್ಟ ಜಾತಿ / ಪರಿಶಿಷ್ಟ ಪಂಗಡ ಮತ್ತು ಮಹಿಳಾ ಉದ್ಯಮಿಗಳಿಗೆ ₹62,790 ಕೋಟಿ ಮೌಲ್ಯದ 2.75 ಲಕ್ಷ ಒಟ್ಟು ಸಾಲಗಳನ್ನು ಮಂಜೂರು ಮಾಡಲಾಗಿದೆ (31.03.2025 ರಂತೆ).
ಕೇಂದ್ರ ಹಣಕಾಸು ಸಚಿವಾಲಯದ ಸಹಾಯಕ ಸಚಿವರಾದ ಶ್ರೀ ಪಂಕಜ್ ಚೌಧರಿ ಅವರು ಇಂದು ರಾಜ್ಯಸಭೆಯಲ್ಲಿ ಕೇಳಲಾದ ಪ್ರಶ್ನೆಗೆ ನೀಡಿದ ಲಿಖಿತ ಉತ್ತರದಲ್ಲಿ ಈ ಮಾಹಿತಿಯನ್ನು ಮಂಡಿಸಿದ್ದಾರೆ.
*****
(ಪ್ರಕಟಣೆ ಐ.ಡಿ.: 2287427)
ವಿಸಿಟರ್ ಕೌಂಟರ್ : 52