وزارتِ محنت و روزگار کے چیف لیبر کمشنر (مرکزی) کے دہلی علاقائی دفتر نے اس ہفتے نئی دہلی کے شرمیو جیتے بھون میں ٹریڈ یونینوں کے نمائندوں کے لیے سمادھان پورٹل 2.0 سے متعلق ایک جامع بیداری پروگرام کا کامیاب انعقاد کیا۔

پروگرام کا آغاز ڈپٹی چیف لیبر کمشنر (مرکزی)، نئی دہلی، جناب پی ایس کرماسے کے خیرمقدمی خطاب سے ہوا۔ اس کے بعد ہیڈکوارٹر کے ڈپٹی چیف لیبر کمشنر (مرکزی) جناب ایس کے ساہو نے اجلاس کا پس منظر بیان کرتے ہوئے کہا کہ جدید لیبر انتظامیہ میں ڈیجیٹل اقدامات اور ٹیکنالوجی پر مبنی مؤثر نظام کی اہمیت روز بروز بڑھ رہی ہے۔ انہوں نے مزدوروں کے حقوق کے تحفظ میں ٹریڈ یونینوں کے کلیدی کردار پر بھی زور دیا۔

تکنیکی سیشن کی قیادت ریجنل لیبر کمشنر (مرکزی)، نئی دہلی، جناب کمار امریتیش نے کی۔ انہوں نے تفصیلی عملی مظاہرے کے ذریعے سمادھان پورٹل کی اہم خصوصیات سے شرکاء کو آگاہ کیا، جن میں صنعتی تنازعات کا آن لائن اور آسان اندراج، جدید لیبر ضابطوں کے تحت مختلف نوعیت کے دعووں کی ڈیجیٹل جمع آوری اور درخواستوں کی پیش رفت سے متعلق حقیقی وقت (ریئل ٹائم) میں معلومات حاصل کرنے کا نظام شامل ہے، تاکہ تمام متعلقہ فریقوں کو مزید بااختیار اور سہولت فراہم کی جا سکے۔

اس بیداری پروگرام میں مختلف ٹریڈ یونینوں اور مرکزی ٹریڈ یونین فیڈریشنوں کے 30 سے زائد نمائندوں نے بھرپور شرکت کی۔ ان میں انڈین نیشنل ٹریڈ یونین کانگریس (آئی این ٹی یو سی)، آل انڈیا ٹریڈ یونین کانگریس (اے آئی ٹی یو سی)، ہند مزدور سبھا (ایچ ایم ایس)، بھارتیہ مزدور سنگھ (بی ایم ایس)، سینٹر آف انڈین ٹریڈ یونینز (سی آئی ٹی یو) اور آل انڈیا سینٹرل کونسل آف ٹریڈ یونینز (اے آئی سی سی ٹی یو) کے نمائندے شامل تھے۔اجلاس کے دوران سوال و جواب کے ایک تعاملی سیشن کا بھی انعقاد کیا گیا، جس میں شرکاء نے متعلقہ حکام سے تفصیلی گفتگو کی، مختلف سوالات اٹھائے اور پورٹل کی مزید بہتری کے لیے اپنی تعمیری آراء اور تجاویز بھی پیش کیں۔

شرکاء نے سمادھان پورٹل کے صارف دوست نظام اور اس میں موجود شفافیت پر بھرپور اطمینان کا اظہار کرتے ہوئے وزارتِ محنت و روزگار کی اس پیشگی بیداری مہم کو سراہا۔ ٹریڈ یونینوں کے نمائندوں نے اس نوعیت کے مزید آگاہی پروگراموں کے انعقاد کا خیرمقدم کیا اور سمادھان پورٹل کو مزدوروں کی شکایات کے ازالے کے لیے آسان رسائی، شفافیت اور عوام دوست نظام کی جانب ایک اہم اور سنگِ میل اقدام قرار دیا۔

******

 

( ش ح ۔ م م ۔ م ا )

Urdu.No-91

(रिलीज़ आईडी: 2285854) आगंतुक पटल : 7