નેશનલ કોન્ફરન્સ ઓન રિસ્પોન્સિબલ બિઝનેસ કન્ડક્ટ (NCRBC) 2026 ની ચોથી આવૃત્તિનું નવી દિલ્હીમાં ઉદ્ઘાટન કરવામાં આવ્યું હતું. "વિકસિત ભારત માટે ESG-આધારિત પરિવર્તન" થીમ પર આધારિત આ બે દિવસીય પરિષદનું આયોજન ભારત સરકારના કોર્પોરેટ બાબતોના મંત્રાલય હેઠળની એક સ્વાયત્ત સંસ્થા, ઇન્ડિયન ઇન્સ્ટિટ્યૂટ ઓફ કોર્પોરેટ અફેર્સ (IICA) ના સ્કૂલ ઓફ બિઝનેસ એન્વાયર્નમેન્ટ (SBE) દ્વારા કરવામાં આવ્યું છે.

વિશેષ સંબોધન આપતાં, નેશનલ ફાઇનાન્સિયલ રિપોર્ટિંગ ઓથોરિટી (NFRA)ના અધ્યક્ષ શ્રી નીતિન ગુપ્તાએ ભારપૂર્વક જણાવ્યું હતું કે જવાબદાર વ્યવસાયિક આચરણ (રિસ્પોન્સિબલ બિઝનેસ કન્ડક્ટ) એ વિકસિત ભારતના વિઝન માટે અને સ્પર્ધાત્મક સાહસો, વિશ્વસનીય બજારો, સર્વસમાવેશક વિકાસ અને પર્યાવરણીય ટકાઉપણુંને પ્રોત્સાહન આપવા માટે અભિન્ન અંગ છે.

શ્રી ગુપ્તાએ અવલોકન કર્યું હતું કે ભારતે ટકાઉપણું સંબંધિત જાહેરાતો (સસ્ટેનેબિલિટી ડિસ્ક્લોઝર્સ)ને મજબૂત બનાવવામાં નોંધપાત્ર પ્રગતિ કરી છે અને હવે તેની ગુણવત્તા, વિશ્વસનીયતા અને નિર્ણય લેવામાં તેની ઉપયોગિતા વધારવા પર ધ્યાન કેન્દ્રિત કરવું જોઈએ. તેમણે ભારપૂર્વક જણાવ્યું હતું કે ટકાઉપણું સંબંધિત માહિતી સુસંગત, તુલનાત્મક, પુરાવા-આધારિત અને ચકાસી શકાય તેવી હોવી જોઈએ, જેને મજબૂત પદ્ધતિઓ, વિશ્વસનીય સ્રોત પ્રણાલીઓ અને અસરકારક આંતરિક નિયંત્રણો દ્વારા સમર્થન મળેલું હોય.

વિશ્વસનીય સસ્ટેનેબિલિટી રિપોર્ટિંગના વધતા મહત્વ પર પ્રકાશ પાડતા, એનએફઆરએ (NFRA) ના શ્રી ગુપ્તાએ જણાવ્યું હતું કે નાણાકીય રિપોર્ટિંગ અને ઓડિટના પાયા સમાન નિયમો અને કઠોરતા સસ્ટેનેબિલિટી માહિતી માટે પણ લાગુ થવા જોઈએ. તેમણે ભારપૂર્વક જણાવ્યું હતું કે દસ્તાવેજીકરણ, ટ્રેસેબિલિટી, સમાધાન, નિયંત્રણ માલિકી, પુરાવાઓની જાળવણી, વ્યાવસાયિક સંશયવાદ (પ્રોફેશનલ સ્કેપ્ટિસિઝમ) અને સ્વતંત્ર પરીક્ષણના સિદ્ધાંતો સસ્ટેનેબિલિટી ડિસ્ક્લોઝર્સની વિશ્વસનીયતા સુનિશ્ચિત કરવા માટે સમાન રીતે આવશ્યક છે.

શ્રી ગુપ્તાએ ટેકનોલોજીનો લાભ લેવા અને સંસ્થાકીય ક્ષમતાઓને મજબૂત બનાવવાની સાથે સાથે ખાસ કરીને વેલ્યુ ચેઇન્સ (મૂલ્ય શૃંખલાઓ) અને MSME માં સસ્ટેનેબિલિટી રિપોર્ટિંગ માટે પ્રમાણસર અને વ્યવહારુ અભિગમ અપનાવવાની જરૂરિયાત પર પણ ભાર મૂક્યો હતો.

સ્વાગત પ્રવચન આપતાં, ઇન્ડિયન ઇન્સ્ટિટ્યૂટ ઓફ કોર્પોરેટ અફેર્સ (IICA) ના ડાયરેક્ટર જનરલ અને સીઇઓ શ્રી જ્ઞાનેશ્વર કુમાર સિંહે જણાવ્યું હતું કે વર્ષ 2047 સુધીમાં ભારતને 30 ટ્રિલિયન યુએસ ડોલરની અર્થવ્યવસ્થા બનાવવાની આકાંક્ષા માટે પર્યાવરણીય, સામાજિક અને ગવર્નન્સ (ESG) સિદ્ધાંતો માત્ર નિયમનકારી પાલનથી આગળ વધીને દેશના આર્થિક વિકાસ મોડેલનો એક અભિન્ન ભાગ બને તે જરૂરી છે.

શ્રી સિંહે ભારપૂર્વક જણાવ્યું હતું કે જવાબદાર વ્યવસાયિક આચરણ ભારતની સભ્યતાના મૂલ્યોમાં ઊંડે સુધી વણાયેલું છે અને પ્રગતિશીલ નીતિ તેમજ નિયમનકારી સુધારાઓ દ્વારા વિકસિત થયું છે. દેશના જવાબદાર વ્યવસાયિક માળખાના વિકાસનો ઉલ્લેખ કરતા, તેમણે વર્ષ 2009માં બહાર પાડવામાં આવેલી કોર્પોરેટ સામાજિક જવાબદારી (CSR) પરની સ્વૈચ્છિક માર્ગદર્શિકાથી લઈને વર્ષ 2021માં ફરજિયાત બિઝનેસ રિસ્પોન્સિબિલિટી એન્ડ સસ્ટેનેબિલિટી રિપોર્ટિંગ (BRSR) માળખાની રજૂઆત સુધીની સફર પર પ્રકાશ પાડ્યો હતો.

તેમણે વધુમાં નોંધ્યું હતું કે કંપનીઝ એક્ટ, 2013ની કલમ 166 (2) એ વૈશ્વિક સ્તરે વ્યાપક માન્યતા પ્રાપ્ત થાય તે પહેલાં જ ભારતીય કોર્પોરેટ કાયદામાં હિતધારકોની પ્રાધાન્યતાના સિદ્ધાંતને સામેલ કર્યો હતો, જે કોર્પોરેટ ગવર્નન્સ સાથે ટકાઉપણુંને સાંકળવા માટે ભારતની પ્રારંભિક પ્રતિબદ્ધતા દર્શાવે છે.

ભારતના વિકસતા ટકાઉપણુંના પરિદ્રશ્યને “ESG 1.0” થી “ESG 2.0” તરફના સંક્રમણ તરીકે વર્ણવતા, શ્રી સિંહે અવલોકન કર્યું કે ESG હવે માત્ર નિયમનકારી પાલન પૂરતું મર્યાદિત નથી પરંતુ લાંબા ગાળાના એન્ટરપ્રાઇઝ મૂલ્ય, અસરકારક જોખમ સંચાલન અને વ્યવસાયિક સ્થિતિસ્થાપકતાના વ્યૂહાત્મક પ્રેરક બળ તરીકે ઉભરી રહ્યું છે.

તેમણે ભારપૂર્વક જણાવ્યું હતું કે આ સંક્રમણ માટે મજબૂત કાનૂની, શાસન અને જવાબદારીના માળખાની જરૂર છે જેથી એ સુનિશ્ચિત કરી શકાય કે ટકાઉપણું સંબંધિત પ્રતિબદ્ધતાઓ વિશ્વસનીય, અમલીકરણ યોગ્ય અને વફાદારીની જવાબદારીઓ (ફિડ્યુશિયરી રિસ્પોન્સિબિલિટીઝ) સાથે સુસંગત હોય. ભારતના ESG પ્રવાસના આગામી તબક્કા માટેની પ્રાથમિકતાઓની રૂપરેખા આપતા, શ્રી સિંહે બોર્ડ-સ્તરની નિર્ણય પ્રક્રિયામાં ટકાઉપણાની બાબતોને સાંકળવાની, ગ્રીનવોશિંગના જોખમોને પહોંચી વળવા માટે સસ્ટેનેબિલિટી ડેટા એશ્યોરન્સ માટે કાનૂની અને નિયમનકારી માળખાને મજબૂત કરવાની અને વેલ્યુ ચેઇન્સમાં સસ્ટેનેબિલિટી ડેટાની ગુણવત્તા, ટ્રેસેબિલિટી અને પારદર્શકતા વધારવા માટે આર્ટિફિશિયલ ઇન્ટેલિજન્સ સહિતની ઉભરતી ટેકનોલોજીનો લાભ લેવાની જરૂરિયાત પર ભાર મૂક્યો હતો.

એક વિશેષ સંબોધનમાં, યુનિસેફ (UNICEF) ઇન્ડિયાના ડેપ્યુટી રિપ્રેઝન્ટેટિવ (પ્રોગ્રામ્સ) શ્રી જેસ્પર મોલરે જણાવ્યું હતું કે બાળ અધિકારોને પરોપકારી ચિંતા તરીકે ગણવાને બદલે મુખ્ય વ્યવસાયિક વ્યૂહરચનામાં સાંકળવા જોઈએ, અને નોંધ્યું કે ભારત 40 કરોડથી વધુ બાળકોનું ઘર છે જે તેના ભવિષ્યના કાર્યબળ અને ગ્રાહકોનું પ્રતિનિધિત્વ કરે છે. તેમણે માતૃત્વ રજા, કાર્યસ્થળ પરના ક્રેચ અને જવાબદાર સપ્લાય ચેઇન પદ્ધતિઓ જેવા નિર્ણયો બાળકોની સુખાકારીને કેવી રીતે સીધી અસર કરે છે તેનું ઉદાહરણ આપ્યું હતું, જેમાં આસામના ચાના બગીચામાં કામ કરતી એક યુવાન માતાનું ઉદાહરણ ટાંક્યું હતું જેના એમ્પ્લોયરની ફેમિલી-ફ્રેન્ડલી નીતિઓએ તેના બાળકની સંભાળ અને કંપનીની કર્મચારી જાળવણી બંનેમાં સુધારો કર્યો હતો.

વર્ચ્યુઅલ માધ્યમથી બોલતા, એસીસીએ (ACCA - એસોસિએશન ઓફ ચાર્ટર્ડ સર્ટિફાઇડ એકાઉન્ટન્ટ્સ) ના ચીફ એક્ઝિક્યુટિવ કુમારી હેલન બ્રાન્ડે ટકાઉ વ્યવસાયિક પદ્ધતિઓ પર આઈઆઈસીએ (IICA) સાથે એસીસીએની ભાગીદારીનો પુનરોચ્ચાર કર્યો હતો અને ભારતના ઝડપી વિકાસ અને વધતા વૈશ્વિક પ્રભાવને ધ્યાનમાં રાખીને તેની અર્થવ્યવસ્થાને "ચંદ્ર તરફ જતા રોકેટ શિપ" તરીકે વર્ણવી હતી. એસીસીએના ગ્લોબલ ટેલેન્ટ ટ્રેન્ડ્સ રિપોર્ટ 2026ને ટાંકીને તેમણે નોંધ્યું હતું કે વિશ્વભરમાં ફાઇનાન્સ વ્યાવસાયિકોની વધતી જતી બહુમતી હવે એવી કારકિર્દી ઈચ્છે છે જે હકારાત્મક સામાજિક અસર ઊભી કરે અને સામાજિક તેમજ માનવ અધિકારના મુદ્દાઓ પર એમ્પ્લોયરની પ્રતિષ્ઠા એ વ્યાવસાયિકો ક્યાં કામ કરવાનું પસંદ કરે છે તેના માટે વધુને વધુ મહત્વનું પરિબળ બની રહી છે.

ઉદ્ઘાટન સત્રનું સમાપન પ્રવચન આપતાં, ઇન્ડિયન ઇન્સ્ટિટ્યૂટ ઓફ કોર્પોરેટ અફેર્સના સ્કૂલ ઓફ બિઝનેસ એન્વાયર્નમેન્ટના વડા પ્રોફેસર ગરિમા દધીચે જવાબદાર વ્યવસાયિક આચરણને વિકસિત ભારત માટે આવશ્યક ગણાવ્યું હતું અને ટકાઉપણુંને પાલનની કવાયત તરીકે જોવાને બદલે વિકાસના પાયા તરીકે જોવાની હાકલ કરી હતી. તેમણે પરિષદ માટે ત્રણ માર્ગદર્શક ફિલોસોફીની રૂપરેખા આપી હતી: પેઢીગત જવાબદારી, સામૂહિક કાર્યવાહી માટે ઋગ્વેદના આહ્વાન "સંગચ્છધ્વં સંવદધ્વં સં વો મનાંસિ જાનતામ્" માં સાંસ્કૃતિક મૂલ્યો અને ભારતના જી20 વિઝન "એક પૃથ્વી, એક પરિવાર, એક ભવિષ્ય" સાથે સુસંગતતા. તેમણે નોંધ્યું હતું કે આ વર્ષની ચર્ચાઓ કેન્દ્રીય બજેટ 2026-27 માં અંકિત થયેલી છે જેણે હરિત વિકાસ (ગ્રીન ગ્રોથ), ક્લાઇમેટ ટ્રાન્ઝિશન અને ટકાઉ માળખાકીય સુવિધાઓને દેશની નાણાકીય પ્રાથમિકતાઓના કેન્દ્રમાં રાખી છે. નાણા મંત્રાલયની સંસદીય સ્થાયી સમિતિએ પણ મજબૂત ESG માળખા, તીવ્ર જાહેરાતો અને વધુ કઠોર અસર આકારણીઓ (ઇમ્પેક્ટ એસેસમેન્ટ્સ) માટે હાકલ કરી છે.

ઉદ્ઘાટન સત્ર બાદ, પ્રોફેસર ગરિમા દધીચ દ્વારા સંચાલિત "ESG, ગવર્નન્સ અને બોર્ડ-લેવલ ડિસ્ક્લોઝર્સ" પર એક ઉચ્ચ સ્તરીય પેનલ ચર્ચા યોજાઈ હતી, જેણે કોર્પોરેટ ગવર્નન્સમાં જવાબદાર વ્યવસાયિક આચરણને કેવી રીતે સમાવી શકાય તે ચકાસવા માટે નિયમનકારો અને ઉદ્યોગ અગ્રણીઓને એકસાથે લાવ્યા હતા. સિક્યુરિટીઝ એન્ડ એક્સચેન્જ બોર્ડ ઓફ ઇન્ડિયા (SEBI) ના હોલ-ટાઇમ મેમ્બર શ્રી અમરજીત સિંહે વૈશ્વિક ધોરણો સાથે જોડાવા માટે ઉતાવળ ન કરવા ચેતવણી આપી હતી અને જણાવ્યું હતું કે ભારતે આંતરરાષ્ટ્રીય માળખા સાથે ઉતાવળે સુસંગત થવાને બદલે તેના વિકાસના તબક્કાને અનુરૂપ પોતાનો માર્ગ નક્કી કરવો જોઈએ.

ઓઇલ એન્ડ નેચરલ ગેસ કોર્પોરેશન (ONGC) ના ચેરમેન શ્રી અરુણ કુમાર સિંહે જણાવ્યું હતું કે ઓછું વચન આપીને વધારે આપવા કરતાં વધારે વચન આપીને ઓછું આપવું "ઘણું સારું" છે, અને તેમણે નિયમનકારોને અપીલ કરી હતી કે તેઓ કંપનીઓને તેમની મહત્વકાંક્ષા અને ઇરાદા માટે પુરસ્કૃત કરે, નહીં કે તેમની ખામીઓ માટે તેમને દંડિત કરે. શાસન (ગવર્નન્સ) માં ઇરાદો અને વિશ્વાસ મુખ્ય ભૂમિકા ભજવે છે.

સીઈઈડબ્લ્યુ (CEEW - કાઉન્સિલ ઓન એનર્જી, એન્વાયર્નમેન્ટ એન્ડ વોટર)ના ચીફ એક્ઝિક્યુટિવ ઓફિસર ડૉ. અરુણાભ ઘોષે જણાવ્યું હતું કે ESG ને ઘણીવાર તક તરીકે જોવાને બદલે "માથાનો દુખાવો" તરીકે ગણવામાં આવે છે, અને તેમણે ભારતની હરિત અર્થવ્યવસ્થામાં અંદાજિત 4 ટ્રિલિયન યુએસ ડોલરની રોકાણની તક તરફ ઈશારો કર્યો હતો.

નેશનલ સ્ટોક એક્સચેન્જ (NSE)ના સિનિયર એડવાઈઝર શ્રી શૈલેષ પાઠકે જણાવ્યું હતું કે મૂડી "ત્યાં જાય છે જ્યાં તેને તક દેખાય છે, પરંતુ ત્યાં જ રહે છે જ્યાં તેને વિશ્વાસ હોય છે," અને તેમણે સોશિયલ સ્ટોક એક્સચેન્જને મૂડી અને સામાજિક સાહસો વચ્ચેના પારદર્શક સેતુ તરીકે વર્ણવ્યું હતું.

કિર્લોસ્કર ઇન્ડસ્ટ્રીઝ લિમિટેડ (KIL)ના મેનેજિંગ ડિરેક્ટર શ્રી જ્યોર્જ વર્ગીસે યાદ કર્યું કે કેવી રીતે કડક ઉત્સર્જન ધોરણો, જેને શરૂઆતમાં ખર્ચના બોજ તરીકે જોવામાં આવતા હતા, તેણે આખરે તેમની કંપનીના ઉત્પાદનો માટે આંતરરાષ્ટ્રીય બજારો ખોલી દીધા.

ઇન્સ્ટિટ્યૂટ ઓફ ચાર્ટર્ડ એકાઉન્ટન્ટ્સ ઓફ ઇન્ડિયા (ICAI)ના સસ્ટેનેબિલિટી રિપોર્ટિંગ સ્ટાન્ડર્ડ્સ બોર્ડ (SRSB) ના ચેરમેન સીએ પ્રમોદ જૈને જણાવ્યું હતું કે ભારત ESG એશ્યોરન્સને સ્વૈચ્છિકને બદલે ફરજિયાત બનાવનારા પ્રથમ દેશોમાંનો એક બન્યો છે, જે બોર્ડના ડિસ્ક્લોઝર્સને નાણાકીય નિવેદનો જેટલી જ વિશ્વસનીયતા પ્રદાન કરે છે. આ પેનલ ચર્ચાનું યોગ્ય સંચાલન આઈઆઈસીએ (IICA) ના સ્કૂલ ઓફ બિઝનેસ એન્વાયર્નમેન્ટના વડા પ્રોફેસર ગરિમા દધીચ દ્વારા કરવામાં આવ્યું હતું.

સાડા ​​ત્રણસોથી વધુ વરિષ્ઠ કોર્પોરેટ અગ્રણીઓ, ESG વ્યાપાવસાયિકો, નીતિ નિર્માતાઓ અને આંતરરાષ્ટ્રીય પ્રતિનિધિઓની નોંધપાત્ર ભાગીદારી અને પ્રતિષ્ઠિત વક્તાઓ આગેવાની હેઠળના વિચારપ્રેરક વિચારો સાથે, NCRBC 2026ના પ્રથમ દિવસે આગામી સત્રો માટે મજબૂત પાયો નાખ્યો હતો.

બીજા દિવસે ESG સંકલનને મજબૂત કરવા માટે ક્ષેત્ર-વિશિષ્ટ માર્ગદર્શિકા, વૈશ્વિક અને સ્થાનિક સપ્લાય નેટવર્ક્સમાં જવાબદાર મૂલ્ય શૃંખલાઓ, સ્પર્ધાત્મક અને સર્વસમાવેશક વિકાસ માટે એમએસએમઇ (MSMEs)માં ESGને મુખ્ય પ્રવાહમાં લાવવા, BRSRથી આગળ ક્ષેત્રીય ESG ના અમલીકરણને મજબૂત બનાવવા અને ESG રિપોર્ટિંગ માળખામાં પર્યાવરણીય મેટ્રિક્સની પુનઃ પરિકલ્પના કરવા પર વધુ ઉચ્ચ સ્તરીય પેનલ ચર્ચાઓ યોજાશે, જે સમાપન સત્ર સાથે પૂર્ણ થશે. તેથી, વિસ્તૃત બે દિવસીય એજન્ડા સાથે, આઈઆઈસીએ (IICA) ની NCRBC 2026, જે લીડ પાર્ટનર્સ તરીકે યુનિસેફ (UNICEF), પાર્ટનર્સ ઇન ચેન્જ અને એસીસીએ (ACCA), એસોસિયેટ પાર્ટનર્સ તરીકે ઇન્સ્ટિટ્યૂટ ઓફ ચાર્ટર્ડ એકાઉન્ટન્ટ્સ ઓફ ઇન્ડિયા (ICAI) અને ગ્લોબલ એલાયન્સ ફોર ઇમ્પ્રૂવ્ડ ન્યુટ્રિશન (GAIN), અને સેશન પાર્ટનર્સ તરીકે યુએન વિમેન (UN Women), સીએઈઈડબ્લ્યુ (CEEW), ડબલ્યુઆરઆઈ (WRI) ઇન્ડિયા અને ઇન્ટરનેશનલ લેબર ઓર્ગેનાઇઝેશન (ILO) જેવી ભાગીદાર સંસ્થાઓના સહયોગથી યોજાઈ રહી છે, તેનો ઉદ્દેશ્ય વર્ષ 2047 સુધીમાં ભારતને વિકસિત, સર્વસમાવેશક અને નૈતિક રીતે મજબૂત રાષ્ટ્ર બનાવવાની સફરમાં જવાબદાર વ્યવસાયિક આચરણને અભિન્ન અંગ તરીકે સ્થાપિત કરવાનો છે.

SM/BS/JD

(रिलीज़ आईडी: 2285793) आगंतुक पटल : 10