இந்திய வேளாண் ஆராய்ச்சிக் கழகத்தின் (ICAR) 98-வது நிறுவன நாள் விழா, 2026 ஜூலை 16 அன்று புது தில்லியில் கொண்டாடப்பட்டது. மத்திய வேளாண்மை, விவசாயிகள் நலன் மற்றும் ஊரக வளர்ச்சித் துறை அமைச்சர் திரு சிவராஜ் சிங் சௌஹான், வளர்ச்சி அடைந்த இந்தியா என்ற தொலைநோக்குப் பார்வைக்கு இணங்க, மேம்பட்ட வேளாண்மை மற்றும் செழிப்பான விவசாயிகளுக்கான செயல் திட்டத்தை முன்வைத்தார். இந்த நிகழ்வில், மத்திய அமைச்சர்களான திரு சிவராஜ் சிங் சௌஹான், திரு ராஜீவ் ரஞ்சன் சிங், திரு ராம்நாத் தாக்கூர், திரு பகீரத் சௌத்ரி, திரு எஸ்.பி. சிங் பாகேல் ஆகியோர் முன்னிலையில், கோயம்புத்தூரில் உள்ள ஐசிஏஆர்-கரும்பு இனப்பெருக்க நிறுவனத்திற்கும், சேலத்தைச் சேர்ந்த முன்னணி தனியார் பருத்தி விதை உற்பத்தியாளரான ராசி சீட்ஸ் (பி) லிமிடெட் நிறுவனத்திற்கும் இடையே, பருத்தியில் போல் கார்டு II எதிர்ப்புத் திறன் கொண்ட இளஞ்சிவப்பு காய்ப்புழுவிற்கு எதிர்ப்புத்திறனை வழங்கும் புதிய கிரிஸ்டல் டாக்சின் மரபணுவுக்கான புரிந்துணர்வு ஒப்பந்தம் பரிமாறப்பட்டது.

இளஞ்சிவப்பு காய்ப்புழு, பருத்தியின் மிக முக்கியமான பூச்சியாகும். கடந்த இருபது ஆண்டுகளாக, பி.டி. மரபணு மாற்றப்பட்ட பருத்தியை அறிமுகப்படுத்துவதன் மூலம் இந்தப் பூச்சி வெற்றிகரமாகக் கட்டுப்படுத்தப்பட்டு வருகிறது. கடந்த சில ஆண்டுகளில் பி.டி. பருத்திக்கு எதிராக இளஞ்சிவப்பு காய்ப்புழு எதிர்ப்புத் திறன் தோன்றிப் பரவியிருப்பது, இந்தியாவில் போல் கார்டு II பருத்தி சாகுபடியின் நிலைத்தன்மைக்கு ஒரு குறிப்பிடத்தக்க அச்சுறுத்தலாக உள்ளது. பருத்தி சாகுபடிப் பரப்பில் ஏற்படும் இந்த வீழ்ச்சியைத் தடுத்து, பருத்தி உற்பத்தியை அதிகரிப்பதற்காக, எதிர்ப்புத் திறன் கொண்ட பருத்திக் கலப்பினங்களை உருவாக்குவது தற்போது ஒரு தேசிய முன்னுரிமையாக உள்ளது.

இது தொடர்பாக, கோயம்புத்தூரில் உள்ள ஐசிஏஆர் கரும்பு இனப்பெருக்க நிறுவனத்தின் இயக்குநர் கோவிந்தராஜ் கூறுகையில், " சிங்காரவேலு தலைமையிலான விஞ்ஞானிகள் குழு 15 ஆண்டுகளுக்கும் மேலாக விரிவான ஆய்வுப் பணிகளை மேற்கொண்டு, பூச்சிகளுக்கு எதிராகச் செயல்படும், பொருளாதார ரீதியாக நம்பிக்கைக்குரிய புதிய பேசில்லஸ் துரிஜியென்சிஸ் படிக நச்சு மரபணுக்களை வெற்றிகரமாகப் பிரித்தெடுத்துள்ளது" என்றார். கண்டுபிடிக்கப்பட்ட புதிய படிக நச்சு மரபணுக்களில் ஒன்று, போல் கார்டு II-க்கு எதிர்ப்புத் திறன் கொண்ட இளஞ்சிவப்பு காய்ப்புழுவுக்கு எதிராகச் செயல்படுவதில் நம்பிக்கையளிப்பதாகக் கண்டறியப்பட்டது. ஐசிஏஆர் - எஸ்பிஐ மற்றும் முன்னணி பிடி பருத்தி விதை உற்பத்தியாளர்களில் ஒன்றான, சேலம், ஆத்தூரைச் சேர்ந்த ராசி சீட்ஸ் (பி) லிமிடெட் ஆகியவை, ஒரு பொது-தனியார் ஒத்துழைப்பு ஒப்பந்தத்தின் மூலம், போல் கார்டு II-க்கு எதிர்ப்புத் திறன் கொண்ட இளஞ்சிவப்பு காய்ப்புழுவை எதிர்க்கும் மரபணு மாற்றப்பட்ட பருத்திக் கலப்பினங்களை உருவாக்கும் நோக்கத்துடன் ஒன்றிணைந்து, அந்த மரபணுவை மேம்படுத்தி, மாதிரித் தாவர அமைப்பில் வெற்றிகரமாக வெளிப்படுத்தின. இந்தப் புரிந்துணர்வு ஒப்பந்தப் பரிமாற்றம், 2026 ஜூலை 16 அன்று புது தில்லியில் நடைபெற்ற நிறுவன தின விழாவில் வேளாண்மை மற்றும் விவசாயிகள் நலத்துறை அமைச்சர், ஐசிஏஆர் தலைமை இயக்குநர் ஆகியோர் முன்னிலையில் நடைபெற்றது.

மரபணு மாற்றம் செய்யப்பட்ட வணிக ரீதியான விதைகள் 2030 ஆம்  ஆண்டளவில் கிடைக்கும் என்றும் அவர் மேலும் கூறினார்.  

****

(Release ID: 2285546)

TV/PLM/RJ

(रिलीज़ आईडी: 2285598) आगंतुक पटल : 23