بھارتی ٹیلی کام ریگولیٹری اتھارٹی (ٹرائی)  نے عام ٹیلی کام صارفین کی معلومات کے لیے  مئی 2026  میں  کیرالہ لائسنس یافتہ سروس ایریا (ایل ایس اے)  کے  کاسرگوڈ ضلع  میں کیے گئے  آزادانہ ڈرائیو ٹیسٹ (آئی ڈی ٹی)  کے نتائج جاری کر دیے ہیں۔

اس ڈرائیو ٹیسٹ کا مقصد ٹیلی کام سروس فراہم کرنے والی کمپنیوں (ٹی ایس پیز) کی جانب سے فراہم کی جانے والی موبائل نیٹ ورک خدمات (آواز اور ڈیٹا دونوں) کے حقیقی وقت کے معیار کا جائزہ لینا اور اس کی تصدیق کرنا ہے۔ ڈرائیو ٹیسٹ کے دوران ٹرائی، سروس فراہم کنندگان کی کارکردگی کو معیارِ خدمت (کیو او ایس) کے اہم اشاریوں، جیسے نیٹ ورک کوریج، کال منقطع ہونے کی شرح، کال کامیابی سے قائم ہونے کی شرح، ڈیٹا ڈاؤن لوڈ اور اپ لوڈ کی رفتار وغیرہ کی بنیاد پر جانچتی ہے۔ بعد ازاں یہ نتائج عوام کے لیے جاری کیے جاتے ہیں تاکہ صارفین کو درست معلومات فراہم کی جا سکیں اور ٹیلی کام کمپنیاں اپنی خدمات کے معیار کو مزید بہتر بنانے کی ترغیب حاصل کریں۔

ان آزادانہ ڈرائیو ٹیسٹ کو اس انداز سے ترتیب دیا گیا ہے کہ تمام ٹیلی کام سروس فراہم کنندگان کی زمینی سطح پر موبائل نیٹ ورک کی کارکردگی مختلف استعمال کے مقامات، جیسے شہروں، زیادہ استعمال والے مقامات، عوامی نقل و حمل کے مراکز وغیرہ میں جانچی جا سکے۔ اس عمل کے دوران تمام کمپنیوں کے سم کارڈز استعمال کرتے ہوئے 2جی، 3جی، 4جی اور 5جی نیٹ ورکس پر حقیقی آواز اور ڈیٹا سیشن قائم کیے جاتے ہیں۔ اس مقصد کے لیے جدید ترین ٹیسٹنگ موبائل آلات استعمال کیے جاتے ہیں اور جدید سافٹ ویئر نظاموں کی مدد سے ان سیشنز کی حقیقی وقت میں نگرانی اور تجزیہ کیا جاتا ہے۔

ٹرائی نے اپنی مقررہ ایجنسی کے ذریعے  5 مئی سے 8 مئی 2026  کے دوران  کیرالہ ایل ایس اے  کے  کاسرگوڈ ضلع  میں  414.2 کلومیٹر  سٹی ڈرائیو،  12 ہاٹ اسپاٹ مقامات ،  6.5 کلومیٹر  واک ٹیسٹ اور  10.0 کلومیٹر  ساحلی علاقے میں ڈرائیو ٹیسٹ انجام دیے۔ یہ تمام ٹیسٹ  ٹرائی کے علاقائی دفتر، بنگلورو  کی نگرانی میں کیے گئے۔ ڈرائیو ٹیسٹ کی رپورٹ میں پیش کیے گئے مشاہدات، ٹیسٹ کیے گئے علاقوں اور راستوں میں ٹیسٹ کے انعقاد کے دن اور وقت کے دوران ٹیلی کام سروس فراہم کنندگان کی کارکردگی کی عکاسی کرتے ہیں۔

 

 

ڈرائیو ٹیسٹ روٹ کا نقشہ:مندرجہ ذیل نقشہ ڈرائیو ٹیسٹ کے راستوں کا مجموعی جائزہ پیش کرتا ہے، جس میں  شہری ڈرائیو، مختلف آپریٹروں کے درمیان کالنگ، ہاٹ اسپاٹ مقامات  اور  واک ٹیسٹ  شامل ہیں، جیسا کہ نقشے میں دی گئی علامات میں ظاہر کیا گیا ہے۔

جانچے گئے اہم اشاریے

1. کوریج گیپ:  ان نمونوں کا تناسب جن میں متعلقہ ٹیکنالوجی (2جی/3جی/4جی/5جی) کے لیے مقررہ کم از کم معیار سے کم سگنل کی طاقت ریکارڈ کی گئی۔

 

2. وائس سروسز:  کال کامیابی سے قائم ہونے کی شرح (سی ایس ایس آر)، کال منقطع ہونے کی شرح (ڈی سی آر)، کال قائم ہونے میں لگنے والا وقت، کال کے دوران خاموشی کی شرح، اور آواز کا معیار (ایم او ایس)۔
3. کال خاموشی کے واقعات:  کال کے دوران تین سیکنڈ سے زیادہ دورانیے کے خاموشی کے واقعات کی تعداد۔
4. ڈیٹا خدمات:  ڈاؤن لوڈ اور اپ لوڈ کی رفتار، تاخیر (لیٹنسی)، جِٹر، اور پیکٹ ضائع ہونے کی شرح۔

 

کاسرگوڈ ضلع میں موبائل نیٹ ورک کی مجموعی کارکردگی کا خلاصہ درج ذیل ہے:

 

 الف) کوریج گیپ: آواز کی جانچ کے دوران آٹو سلیکشن موڈ (5جی/4جی/3جی/2جی) میں ریکارڈ کیے گئے سگنل کی طاقت کے مطابق کمزور سگنل والے نمونوں کی تعداد درج ذیل رہی:  ایئرٹیل:  46,617 میں سے 2,105 نمونے، بی ایس این ایل:  46,207 میں سے 3,203 نمونے،  آر جے آئی ایل:  45,532 میں سے 1,252 نمونے،  وی آئی ایل:  47,035 میں سے 2,105 نمونے،کوریج گیپ کی تفصیلات منسلک نقشے میں دی گئی ہیں۔

 ب) منقطع ہونے والی کالیں: کامیابی سے ہونے والی کالوں میں سے منقطع ہونے والی کالوں کی تعداد درج ذیل رہی:  ایئرٹیل:  419 میں سے 1 کال،  بی ایس این ایل:  402 میں سے 18 کالیں،  آر جے آئی ایل:  421 میں سے کوئی کال منقطع نہیں ہوئی،  وی آئی ایل:  421 میں سے 1 کال،منقطع ہونے والی کالوں کے مقامات کی تفصیلات منسلک نقشے میں موجود ہیں۔

 ج) کال خاموشی کے واقعات: کامیابی سے قائم ہونے والی کالوں میں تین سیکنڈ سے زیادہ خاموشی کے واقعات درج ذیل رہے:  ایئرٹیل:  403 کالوں میں 6 واقعات،  بی ایس این ایل:  368 کالوں میں 16 واقعات،  آر جے آئی ایل:  405 کالوں میں 4 واقعات،  وی آئی ایل:  404 کالوں میں 10 واقعات،ان مقامات کی تفصیلات بھی منسلک نقشے میں فراہم کی گئی ہیں۔

 د) ڈیٹا ڈاؤن لوڈ اور اپ لوڈ کی رفتار :

1. ڈیٹا ڈاؤن لوڈ کارکردگی (مجموعی طور پر): ایئرٹیل کے لیے اوسط ڈاؤن لوڈ رفتار 139.44 ایم بی پی ایس (5 جی/4 جی) بی ایس این ایل کے لیے 10.73 ایم بی پی ایس (4 جی) آر جے آئی ایل (5 جی/4 جی) کے لیے 294.88 ایم بی پی ایس اور وی آئی ایل (5 جی/4 جی/2 جی) کے لیے 18.85 ایم بی پی ایس دیکھی گئی ۔  ڈاؤن لوڈ تھرو پٹ کی تفصیل نقشہ ضمیمہ میں فراہم کی گئی ہے ۔
2. ڈیٹا اپ لوڈ کی کارکردگی (مجموعی طور پر): اوسط اپ لوڈ کی رفتار ایئرٹیل کے لیے 23.36 ایم بی پی ایس (5 جی/4 جی) بی ایس این ایل کے لیے 3.78 ایم بی پی ایس (4 جی) آر جے آئی ایل (5 جی/4 جی) کے لیے 22.81 ایم بی پی ایس اور وی آئی ایل (5 جی/4 جی/2 جی) کے لیے 8.18 ایم بی پی ایس دیکھی گئی ۔  اپ لوڈ تھرو پٹ کی تفصیل نقشہ ضمیمہ میں فراہم کی گئی ہے ۔

 

منسلک نقشے میں  سرخ نقطے  پر کلک کرکے منقطع ہونے والی کالوں اور کال خاموشی کے واقعات کے مقامات دیکھے جا سکتے ہیں۔

 

ڈرائیو ٹیسٹ کے راستے اور شامل علاقے درج ذیل ہیں:-

 الف) شہری ڈرائیو: منجیشور، اُپالا، کمبلا، کاسرگوڈ، کلناد، کانہنگاڈ، نیلیشور، چیروواتھور، تھریکری پور، چیمینی، بھیمنادی، راجاپورم، کٹیکول، پنایال، پوئیناچی، چرکالا، مولیریا، بڈیادکا، سیتھانگولی اور پائیوالیکے سمیت کاسرگوڈ ضلع کے مختلف علاقوں کا احاطہ کیا گیا۔

 ب) ساحلی راستہ: کوٹاپورم بوٹ ٹرمینل سے ازھیتھالا، میڈاکیرا فشنگ ہاربر اور نیلیشور بوٹنگ ٹرمینل تک، جس میں  دی لوٹس ہاؤس بوٹ، تھائیکڈاپورم بوٹ جیٹی  اور  اچم تھروتھی  سمیت دیگر مقامات شامل تھے۔

 ج) ہاٹ اسپاٹ مقامات: مستقل مقام پر موجود صارفین کے تجربے کا جائزہ لینے کے لیے منتخب کیے گئے ہاٹ اسپاٹ مقامات میں بیکل قلعہ، چیروواتھور بس اسٹینڈ، سی پی سی آر آئی کاسرگوڈ، ضلع کلکٹریٹ کاسرگوڈ، گورنمنٹ جنرل اسپتال کاسرگوڈ، کانہنگاڈ ریلوے اسٹیشن، کاسرگوڈ میونسپل دفتر، کاسرگوڈ نیا بس اسٹینڈ، کاسرگوڈ ریلوے اسٹیشن، کے ایس آر ٹی سی بس اسٹینڈ کاسرگوڈ، نیلیشورم مارکیٹ اور اُپالا ٹاؤن جنکشن شامل ہیں۔

 د) واک ٹیسٹ: 5 سے 8 مئی 2026 کے دوران کیے گئے واک ٹیسٹ میں  بیکل بیچ پرومینیڈ، کانہنگاڈ مارکیٹ، کاسرگوڈ بیچ واک وے  اور  کاسرگوڈ ریلوے اسٹیشن  سمیت دیگر مقامات شامل تھے۔

اس آزادانہ ڈرائیو ٹیسٹ کی رپورٹ کے نتائج متعلقہ ٹیلی کام سروس فراہم کرنے والی کمپنیوں کے ساتھ شیئر کر دیے گئے ہیں تاکہ وہ اپنی جانب سے ضروری اصلاحی اقدامات کر سکیں۔ ڈرائیو ٹیسٹ کی تفصیلی رپورٹیں ٹرائی کی ویب سائٹ پر دستیاب ہیں۔ مزید وضاحت یا اضافی معلومات کے لیے  adv.bengaluru@trai.gov.in  پر ای میل کی جا سکتی ہے یا ٹرائی کے بنگلورو علاقائی دفتر سے ٹیلی فون نمبر  +91-80-22865004  پر رابطہ کیا جا سکتا ہے۔

 ضمیمہ دیکھنے کیلئے یہاں کلک کریں۔

 ****

ش ح۔ ع ح۔ خ م

U.NO.27

(रिलीज़ आईडी: 2285399) आगंतुक पटल : 13