بھارت -برطانیہ جامع اقتصادی اور تجارتی معاہدہ (سی ای ٹی اے)، سماجی تحفظ کے معاہدے کے ساتھ، جسے ڈبل کنٹری بیوشن کنونشن (ڈی سی سی) کے نام سے بھی جانا جاتا ہے، آج باضابطہ طور پر نافذ ہو گیا، جس سے دونوں ممالک کے درمیان اقتصادی شراکت داری میں ایک اہم سنگ میل ہے۔

سی ای ٹی اے کے نافذ ہونے کے موقع پر ایک رسمی افتتاحی تقریب کا انعقاد ونجیہ بھون، نئی دہلی میں کیا گیا۔ تقریب میں ہندوستان میں برطانوی ہائی کمشنر محترمہ لنڈی کیمرون، کامرس سکریٹری جناب راجیش اگروال، غیر ملکی تجارت کے ڈائریکٹر جنرل، انڈسٹری ایکسپورٹ پروموشن کونسلز کے نمائندوں، صنعتی انجمنوں اور متعدد برآمد کنندگان نے شرکت کی۔

ایکس پر ایک پوسٹ میں، کامرس اور صنعت کے مرکزی وزیر جناب پیوش گوئل نے کہا کہ بھارت -برطانیہ جامع اقتصادی اور تجارتی معاہدے (سی ای ٹی اے) اور سماجی تحفظ کے معاہدے کا نافذ ہونا بھارت -برطانیہ تعلقات میں ایک اہم سنگ میل کی نشاندہی کرتا ہے۔ وزیر اعظم جناب نریندر مودی کی قیادت میں، معاہدات نافذ ہو گئے ہیں، جو بھارت کی تقریباً 99 فیصد برآمدات کے لیے صفر ڈیوٹی مارکیٹ تک رسائی فراہم کرتے ہیں اور تقریباً 100 فیصد تجارتی قیمت کا احاطہ کرتے ہیں۔

وزیر نے نوٹ کیا کہ یہ معاہدہ ٹیکسٹائل، چمڑے، جواہرات اور زیورات، انجینئرنگ کے سامان، سمندری مصنوعات، کیمیکلز اور ڈبہ بند خوردنی مصنوعات سمیت شعبوں کے لیے بے مثال مواقع پیدا کرتا ہے، جبکہ ایم ایس ایم ایز ، کاشتکاروں اور صنعت کاروں کو فائدہ پہنچتا ہے۔ انہوں نے مزید مشاہدہ کیا کہ یہ معاہدہ ہندوستان کے آئی ٹی، پیشہ ورانہ، مالیاتی، تعلیم اور کاروباری خدمات کے شعبوں کے لیے نئے مواقع کھولتا ہے اور ہندوستانی ٹیلنٹ کے لیے نقل و حرکت کو وسعت دیتا ہے۔

جناب گوئل نے اس بات پر زور دیا کہ سماجی تحفظ کا یہ معاہدہ برطانیہ میں عارضی اسائنمنٹس پر جانے والے بھارتی پیشہ ور افراد کو پانچ سال تک کے لیے دونوں ممالک میں سماجی تحفظ کے دہراؤ سے استثنیٰ دے کر شراکت داری کو مزید مضبوط کرتا ہے، جس سے عالمی سطح پر بھارت کی افرادی قوت کی مسابقت میں اضافہ ہوتا ہے۔ انہوں نے اس انقلابی معاہدے کو پایہ تکمیل تک پہنچانے کے لیے اپنے برطانوی ہم منصب اور دونوں مذاکراتی ٹیموں کے عزم کو بھی سراہا، اور ایک ایسے لچکدار اور جدت پر مبنی شراکت داری کی تعمیر کے لیے دونوں ممالک کے مشترکہ عزم کا اعادہ کیا جو ترقی، سرمایہ کاری اور باہمی خوشحالی کو فروغ دیتی ہے۔

تقریب سے خطاب کرتے ہوئے، سیکرٹری تجارت جناب راجیش اگروال نے سی ای ٹی اے کے نفاذ کو بھارت اور برطانیہ کے گہرے ہوتے ہوئے تعلقات میں ایک اہم سنگِ میل اور محکمہ تجارت کے سفر میں سب سے نمایاں کامیابیوں میں سے ایک قرار دیا۔ انہوں نے کہا کہ یہ معاہدہ بھارت-برطانیہ شراکت داری کو مضبوط بنانے کے لیے وزیر اعظم جناب نریندر مودی کے وژن کے عین مطابق ہے، اور انہوں نے مذاکرات کو کامیاب انجام تک پہنچانے میں مرکزی وزیرِ تجارت و صنعت جناب پیوش گوئل کی قیادت کو سراہا۔

سیکرٹری تجارت نے مذاکرات کے دائرہ کار اور پیچیدگی کو اجاگر کرتے ہوئے بتایا کہ اس معاہدے کو حتمی شکل دینے سے قبل، مذاکرات کے 14 باقاعدہ ادوار کے دوران 800 سے زائد تکنیکی سیشنز منعقد کیے گئے۔ انہوں نے اس کامیابی کو حاصل کرنے کے لیے کئی سالوں تک مسلسل کوششیں کرنے پر دونوں اطراف کی مذاکراتی ٹیموں کی ستائش کی۔

جناب اگروال نے اس بات کا مشاہدہ کیا کہ یہ معاہدہ دو بڑی اور تکمیلی معیشتوں کے درمیان ہے، اور احاطہ کی وسعت اور گہرائی دونوں کے لحاظ سے بھارت کے پچھلے آزاد تجارتی معاہدوں کی مثالوں سے کہیں آگے جاتا ہے۔ انہوں نے کہا کہ جہاں یہ معاہدہ اشیاء کی تجارت میں مارکیٹ تک رسائی کے خاطر خواہ مواقع پیدا کرتا ہے، وہیں یہ خدمات کی تجارت میں بھی اہم فائدے فراہم کرتا ہے۔ اس بات کے پیشِ نظر کہ بھارت کی جی ڈی پی میں خدمات کا حصہ 50 فیصد سے زیادہ اور برطانیہ کی جی ڈی پی میں 70 فیصد سے زیادہ ہے، انہوں نے واضح کیا کہ اس معاہدے کے ذریعے پیش کیے جانے والے وعدے اور پیش گوئی کی سہولت آنے والے سالوں میں دوطرفہ خدمات کی تجارت کو ایک مضبوط تحریک دیں گے۔

معاہدے کے نفاذ کی اہمیت پر زور دیتے ہوئے، جناب اگروال نے کہا کہ اس معاہدے کی اصل کامیابی کا اندازہ روزگار، ذرائع معاش اور معاشی مواقع کی تخلیق کے ذریعے دونوں ممالک کے لوگوں کی زندگیوں پر پڑنے والے اثرات سے لگایا جائے گا۔ انہوں نے صنعت سے وابستہ شراکت داروں پر زور دیا کہ وہ اس معاہدے سے پیدا ہونے والے مواقع کو ٹھوس نتائج میں تبدیل کریں، اور یقین دلایا کہ محکمہ تجارت ملکی سطح پر برآمدات کے فروغ کی کونسلوں اور انڈسٹری کلسٹرز کے ساتھ مل کر کام کرے گا تاکہ سیکٹر، پروڈکٹ اور کلسٹر کی سطح پر اس معاہدے کے فوائد کو پہنچایا جا سکے۔

سیکرٹری تجارت نے مطلع کیا کہ اس معاہدے کو 15 جولائی 2026 سے نافذ العمل کرنے کا فیصلہ دونوں ممالک کے رہنماؤں نے اس سے تیس دن قبل فرانس میں جی 7 سربراہ اجلاس کے موقع پر اپنی ملاقات کے دوران کیا تھا۔ انہوں نے بتایا کہ تمام زیرِ التوا مسائل کو مقررہ وقت کے اندر حل کر لیا گیا ہے اور دونوں اطراف سے تمام ضروری نوٹیفیکیشنز بھی جاری کر دیے گئے ہیں۔ تجارت کو آسان بنانے کے لیے ضروری اقدامات بشمول 'رولز آف اوریجن' کی تصدیق اور کسٹمز کی تیاریوں سے متعلق انتظامات بھی مکمل کر لیے گئے ہیں تاکہ شراکت دار پہلے ہی دن سے اس معاہدے کے فوائد حاصل کرنا شروع کر سکیں۔

انہوں نے بتایا کہ بھارت-برطانیہ سی ای ٹی اے کے تحت نفاذ کے پہلے ہی دن برطانیہ کو 140 ملین امریکی ڈالر سے زائد مالیت کی اشیاء برآمد کی جا رہی ہیں۔ انہوں نے اس اعتماد کا اظہار کیا کہ اس معاہدے کا مسلسل استعمال بھارت اور برطانیہ کی تجارت کو مضبوط کرے گا اور فی الوقت زیرِ غور دیگر تجارتی اقدامات کو آگے بڑھانے کی حوصلہ افزائی کرے گا۔

معاہدے کے نفاذ کی یادگار کے طور پر، بھارت-برطانیہ سی ای ٹی اے کے ترجیحی ٹیرف نظام کے تحت پہلی برآمداتی کھیپوں کو روانہ کرنے کے لیے ملک بھر میں تقریبات کا انعقاد کیا گیا۔ دن کے دوران، پورے بھارت میں 20 سے زائد بندرگاہوں، ہوائی اڈوں، ان لینڈ کنٹینر ڈپو، خصوصی اقتصادی حلقوں اور فیکٹریوں سے 140 ملین امریکی ڈالر سے زیادہ مالیت کی 50 سے زائد برآمدی کھیپوں کو ہری جھنڈی دکھا کر روانہ کیا گیا۔ ان کھیپوں میں الیکٹرانکس، ادویات، اور جواہرات و زیورات سمیت مصنوعات کی ایک وسیع رینج شامل تھی، اور انہیں مندرا، نہاوا شیوا اور چنئی کی سمندری بندرگاہوں کے ساتھ ساتھ ممبئی (سہار)، کولکتہ اور حیدرآباد کے ایئر کارگو کمپلیکس جیسے مقامات سے روانہ کیا گیا۔

اس موقع پر گفتگو کرتے ہوئے، بھارت میں برطانوی ہائی کمشنر محترمہ لنڈی کیمرون نے معاہدے کے نفاذ کو ایک تاریخی سنگِ میل اور برطانیہ اور بھارت کے درمیان بلندیوں کو چھوتے دوطرفہ تعلقات کا منہ بولتا ثبوت قرار دیا۔

باہمی تعلقات کی مضبوطی کو اجاگر کرتے ہوئے انہوں نے بتایا کہ بھارت سال 2025 میں برطانیہ کا گیارہواں سب سے بڑا تجارتی شراکت دار تھا، جس کے ساتھ باہمی تجارت سالانہ تقریباً 48 ارب پاؤنڈ تک پہنچ گئی تھی۔ انہوں نے یہ مشاہدہ بھی کیا کہ دونوں ممالک کے درمیان سرمایہ کاری کے تعلقات 700,000 سے زائد ملازمتوں کو سہارا دیتے ہیں۔

محترمہ کیمرون نے کہا کہ یہ معاہدہ ایک ایسا فریم ورک فراہم کرتا ہے جو دونوں ممالک کے کاروباروں کو زیادہ تجارت کرنے، زیادہ سرمایہ کاری کرنے، مزید جدت لانے اور مل کر ترقی کرنے کے قابل بنائے گا۔ انہوں نے اسے ایک وسیع تر، زیادہ پرعزم اور مستقبل پر مرکوز شراکت داری کی طرف ایک فیصلہ کن قدم قرار دیا۔

اس کے طویل مدتی اقتصادی اثرات کا ذکر کرتے ہوئے، انہوں نے نوٹ کیا کہ اس معاہدے کے نتیجے میں طویل مدت کے دوران باہمی تجارت میں سالانہ 25 ارب پاؤنڈ سے زائد کا اضافہ متوقع ہے اور یہ برطانیہ اور بھارت دونوں کی جی ڈی پی میں سالانہ تقریباً 5 ارب پاؤنڈ کا تعاون دے گا۔ انہوں نے کہا کہ یہ معاہدہ دونوں ممالک کے کاروباروں کے لیے تجارت کو آسان، تیز تر اور زیادہ کفایتی بنا دے گا۔

انہوں نے مزید مشاہدہ کیا کہ یہ معاہدہ بھارتی کاروباروں کو لگ بھگ 99 فیصد ٹیرف لائنز پر محصول سے مبرا رسائی فراہم کرے گا جس میں برطانیہ کو ہونے والی تقریباً تمام بھارتی برآمدات شامل ہیں، جبکہ برطانوی کاروباروں کو 90 فیصد ٹیرف لائنز پر ٹیرف میں کمی یا خاتمے کا فائدہ ملے گا جس میں بھارت کو ہونے والی موجودہ برطانوی برآمدات کا 92 فیصد حصہ شامل ہے۔

ہائی کمشنر نے اس بات پر زور دیا کہ یہ معاہدہ محض اشیاء کی تجارت تک محدود نہیں ہے بلکہ کسٹمز، ڈیجیٹل تجارت، مالیاتی خدمات، ٹیلی کمیونیکیشن، دانشورانہ ملکیت، پیشہ ورانہ خدمات، شفافیت اور ضابطہ کاری میں تعاون کو بھی مضبوط کرتا ہے۔ انہوں نے واضح کیا کہ یہ معاہدہ جدید مینوفیکچرنگ، خوراک و مشروبات، لائف سائنسز، توانائی، صارفی اشیاء، ٹیکسٹائل، ملبوسات، انجینئرنگ کا سامان، سمندری مصنوعات اور کیمیکلز سمیت مختلف شعبوں میں اہم مواقع پیدا کرے گا۔

انہوں نے چھوٹے اور درمیانے درجے کے کاروباری اداروں اور صارفین کے لیے فوائد پر بھی زور دیا، اور کہا کہ یہ معاہدہ چھوٹے اور درمیانے درجے کے اداروں کو اپنی رسائی بڑھانے میں مدد دے گا جبکہ صارفین کو وسیع تر انتخاب، مضبوط مسابقت اور بہتر قیمت و معیار فراہم کرے گا۔

اس بات کا ذکر کرتے ہوئے کہ یہ معاہدہ اب مذاکرات اور دستخط کے مراحل سے نکل کر نفاذ کے مرحلے میں داخل ہو چکا ہے، محترمہ کیمرون نے مشاہدہ کیا کہ نئے فریم ورک کے تحت دونوں ممالک کے درمیان سامان کی نقل و حمل پہلے ہی شروع ہو چکی ہے اور انہوں نے اس بات پر زور دیا کہ اس کا کامیاب نفاذ اس بات کو یقینی بنانے کے لیے انتہائی اہم ہوگا کہ کاروبار، مزدور اور صارفین اس کے تمام فوائد حاصل کر سکیں۔

سی ای ٹی اے کے نفاذ کے ایک حصے کے طور پر، اس معاہدے کے تحت پہلے 'سرٹیفکیٹس آف اوریجن' برآمد کنندگان میں تقسیم کیے گئے۔ یہ سرٹیفکیٹس 'ای-سی او او 2.0' پلیٹ فارم کے ذریعے ازخود تصدیق کی بنیاد پر جاری کیے گئے۔ پہلے ہی دن ڈیجیٹل اور از خود تصدیق شدہ 'سرٹیفکیٹس آف اوریجن' کا یہ اجرا، قواعد و ضوابط کے بوجھ اور لین دین کی لاگت کو کم کرنے کی طرف ایک اہم قدم ہے، خصوصاً مائیکرو، چھوٹے اور درمیانے درجے کے کاروباری اداروں کے لیے۔

صنعتی تنظیموں، برآمدات کے فروغ کی کونسلوں اور برآمد کنندگان کے نمائندوں نے اس معاہدے کے نفاذ کا خیرمقدم کیا اور واضح کیا کہ محصول سے مبرا رسائی، آسان تربیتی طریقوں اور کاروبار دوست 'رولز آف اوریجن'  کی بدولت برطانوی مارکیٹ میں بھارتی مصنوعات کی مسابقت میں نمایاں اضافہ ہوگا۔

صنعت کے نمائندوں نے اس اعتماد کا اظہار کیا کہ یہ معاہدہ دنیا کی ترقی یافتہ ترین مارکیٹوں میں سے ایک تک بھارتی اشیاء کی بہتر رسائی فراہم کر کے 'وکست بھارت' کے وژن میں نمایاں کردار ادا کرے گا۔ انہوں نے واضح کیا کہ یہ معاہدہ بھارتی برآمد کنندگان کو دیگر ممالک کے حریفوں کے مقابلے میں یکساں مواقع فراہم کرے گا اور بھارت اور برطانیہ کے درمیان اقتصادی شراکت داری کو مزید بلند کرے گا۔

صنعتی رہنماؤں نے مزید اس بات پر زور دیا کہ زیادہ افرادی قوت والے شعبوں کو فروغ دے کر، یہ معاہدہ خواتین کاروباری شخصیات، مائیکرو، چھوٹے اور درمیانے درجے کے کاروباری اداروں، نوجوانوں اور طلبہ کے لیے نئے مواقع پیدا کرے گا، جس کے نتیجے میں معیاری روزگار پیدا ہوگا اور شمولیاتی ترقی کو مدد ملے گی۔

ممبئی میں، حکومتِ مہاراشٹرا نے وزیر اعلیٰ مہاراشٹرا جناب دیویندر فڑنویس کی موجودگی میں بھارت-برطانیہ ’سی ای ٹی اے‘ کے آغاز کی ایک باضابطہ تقریب کا انعقاد کیا۔ اس معاہدے کے تحت ترجیحی تجارت کے باقاعدہ آغاز کی یادگار کے طور پر، وزیر اعلیٰ مہاراشٹر اور برطانیہ کے ڈپٹی ہائی کمشنر نے باہم ٹرالیوں پر رکھے ہوئے کارگو (تجارتی سامان) کا تبادلہ کیا، جس میں بھارت اور برطانیہ کے درمیان دوطرفہ تجارت کی عکاسی کرنے والی مصنوعات کے منتخب ڈبے شامل تھے۔

**********

 (ش ح –م ف)

U.No:02