મધ્ય પ્રદેશના ઉજ્જૈન જિલ્લામાં ગટર ચેમ્બરની સફાઈ કરતી વખતે ઝેરી ગેસ શ્વાસમાં જવાને કારણે એક કામદારના મોત અને અન્ય બેના ઇજાગ્રસ્ત થવાના અહેવાલ પર ભારતના રાષ્ટ્રીય માનવ અધિકાર આયોગ (NHRC) એ સુઓ મોટો સંજ્ઞાન લીધું

ભારતના રાષ્ટ્રીય માનવ અધિકાર આયોગ (NHRC) એ એક મીડિયા અહેવાલ પર સુઓ મોટો સંજ્ઞાન લીધું છે જેમાં જણાવાયું છે કે 7 જુલાઈ 2026 ના રોજ મધ્ય પ્રદેશના ઉજ્જૈન જિલ્લામાં ગટર ચેમ્બરની સફાઈ કરતી વખતે ઝેરી ગેસ શ્વાસમાં જવાને કારણે એક કામદારનું મોત નીપજ્યું હતું અને અન્ય બે ઇજાગ્રસ્ત થયા હતા. અહેવાલ મુજબ, આ ઘટના ઉજ્જૈનના ભૈરવગઢ રોડ પર પીપલી નાકા નજીક બની હતી જ્યારે ભોગ બનનાર વ્યક્તિઓ ગટરની ચેમ્બરમાં પ્રવેશ્યા હતા અને બેભાન થઈ ગયા હતા.

આયોગે અવલોકન કર્યું છે કે સમાચાર અહેવાલની વિગતો જો સાચી હોય, તો તે માનવ અધિકારોના ઉલ્લંઘનની ગંભીર સમસ્યાઓ ઊભી કરે છે. તેથી, આયોગે મધ્ય પ્રદેશના મુખ્ય સચિવ અને ઉજ્જૈનના પોલીસ અધિક્ષક (સુપ્રિટેન્ડન્ટ ઓફ પોલીસ) ને નોટિસ પાઠવીને બે અઠવાડિયામાં આ બાબતે વિગતવાર અહેવાલ માંગ્યો છે. આ અહેવાલમાં તપાસની સ્થિતિ તેમજ મૃતક કામદારના આશ્રિતો અને ઇજાગ્રસ્તોને ચૂકવવામાં આવેલા વળતર (જો કોઈ હોય તો) નો સમાવેશ કરવાની અપેક્ષા રાખવામાં આવે છે.

8 જુલાઈ 2026 ના રોજ પ્રસિદ્ધ થયેલા મીડિયા અહેવાલ અનુસાર, સારવાર દરમિયાન એક કામદારનું મોત નીપજ્યું હતું, જ્યારે અન્ય બે કામદારો સારવાર હેઠળ છે.

IJ/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com