భారతీయ నౌకాదళానికి చెందిన నౌకల సింగపూర్ యాత్ర విజయవంతం

భారత నౌకాదళ నిర్వహణ పూర్వక మోహరింపులో భాగంగా, తూర్పు నౌకాదళానికి చెందిన ‘ఉదయగిరి’, ‘శక్తి’లతో పాటు ‘కవరత్తి’లు రియర్ అడ్మిరల్ ఆలోక్ ఆనంద్ నాయకత్వంలో సింగపూర్లోని చాంగీ నౌకాదళ స్థావరానికి నౌకాశ్రయ యాత్రను విజయవంతంగా ముగించాయి. ఈ కార్యక్రమం భారత్, సింగపూర్‌ పక్షాల మధ్య వ్యూహాత్మక, నౌకావాణిజ్య భాగస్వామ్యాన్ని దృఢతరం చేసింది.
ఆసియాన్-భారత్ నౌకావాణిజ్య సహకార సంవత్సరం, భారత్ ప్రభుత్వ ‘యాక్ట్ ఈస్ట్ విధానం’ లక్ష్యాలకు అనుగుణంగా  ఈ కార్యక్రమం  మూడు రోజుల పాటు సాగింది. రెండు నౌకాదళాల మధ్య అంతరనిర్వహణీయతనీ, నౌకాదళ సంబంధిత సహకారాన్నీ పటిష్ఠపరుచుకొనే ఉద్దేశంతో క్రాస్-డెక్ యాత్రలు సహా అనేక వృత్తి నైపుణ్య ప్రధాన సమావేశాలను నిర్వహించారు. ఐఎన్ఎస్ కవరత్తిని పాఠశాల విద్యార్థులు చూశారు. వారు నౌకాదళ కార్యకలాపాలు, యుద్ధనౌకలో జీవితం, భారతీయ నౌకాదళానికి మార్గదర్శకంగా ఉండే విలువల గురించి తెలుసుకున్నారు.
విజయవంతంగా ముగిసిన ఈ కార్యక్రమం భారత్, సింగపూర్ మధ్య అంతకంతకు విస్తరిస్తున్న నౌకావాణిజ్య సహకారంలో మరో కీలక ప్రగతి ప్రస్థానాన్ని సూచిస్తోంది. నౌకాశ్రయం వద్ద నిర్వహించిన సమావేశాలతో వృత్తినైపుణ్యానికి సంబంధించిన అవగాహనను పెంపొందింప చేసుకోవడం, నిర్వహణ కార్యకలాపాల పరంగా సహకారాన్ని బలోపేతం చేసుకోవడంతో పాటు ఆ ప్రాంతంలో శాంతినీ, సుస్థిరత్వాన్నీ, భద్రతనీ పరిరక్షించడానికి ఉమ్మడి ప్రయత్నాల్ని ప్రోత్సహించుకోవడానికీ తోడ్పాటు లభించినట్లయింది.

***