ইকায়খুম্নরবী মিসেস আজারেল আর্নেষ্টা

নেসনেল এশেমব্লিগী স্পিকর, ইকায়খুম্নরবী, মিসেস সিলভান লেমিয়েল,

গভর্নমেন্ত ব্যুজিনেসকী লুচিংবা,

ইকায়খুম্নরবা, মিনিষ্টর বাইনো জর্জ, ওপোজিসনগী লুচিংবা,

নেসনেল এশেমব্লিগী ইকায়খুম্নরবা মেম্বরশিং,

অমসুং ঐগী নুংশিরবা ইচলশিং অমসুং ইনাওশিং,

খুরুমজরি!

বোন অপ্রেমেদি!

নেসনেল এশেমব্লি অসিদা ৱা ঙাংবা অহানবা ভারতকী প্রধান মন্ত্রী ওইনা অদোমগী মমাঙদা লেপ্পা অসি অখন্নবা ইকায়খুম্নবা অমনি। অদোমগী ৱাহৈশিংগীদমক, ঐনা মেদাম স্পিকর, অদোম থাগৎচরি।

ঙসি ঐহাক “গার্জিয়ান ওফ ব্লু হোরাইজন” পীদুনা ইকায়খুম্নবা উৎপগীদমক ঐনা রাষ্ট্রপতি এরমিনি অমসুং সেশেলসকী মীয়াম থাগৎচরি। মসিনা মহৌশাগী অকোয়বগী ফিবম ঙাক-শেন্নবা হোৎনরিবশিংগী পুক্নিং থৌগৎকনি। ঐনা ভারতকী মীওই বিল্লিয়ন ১.৪ গী য়াইফ পাউজেলশিং পুদুনা লাক্লি।

প্রধান মন্ত্রী ওইনা ভারত মহাসাগর লমদমগী লৈবাক অমদা চৎপা অহানবা ওইনা ২০১৫ দা ঐ সেশেলসদা লাকখ্রে। মদু প্রধান মন্ত্রী অমা ওইনা ঐগী অহানবা অফ্রিকা খোঙচৎনি। ভারত মহাসাগরগী ভারতকী পান্দমদা সেশেলসনা মরুওইবা মফম অমা কনবদগী ঐ মফম অসিদা লাকপনি হায়না ঐনা থাজৈ। ঙসি, ঐ চহি ১০ গী মতুংদা হল্লক্লে, থাজবা অদু হান্নদগী হেল্লে।

অদোমগী নিংতম্বা চহি ৫০ মপুংফারকপগী থৌরমদা শরুক য়াবদা ঐ অপেনবা ফাওই। অখন্নবা থৌরম অসিদা সেশেলসগী মীয়াম অমসুং অদোমগী মফমদা হরাওবা ফোঙদোকচরি।

ইকায়খুম্নরবা মেম্বরশিং,

নেসনেল এশেমব্লি অসিদা ৱা ঙাংবা অসি য়াম্না তাংনা ফংবা খুদোংচাবা অমনি। মসিগী অখন্নবা ইকায়খুম্নবা অসিগীদমক অদোম থাগৎচরি। ৮শুবা নেসনেল এশেমব্লি অসিগী নৌনা খল্লবা মেম্বরশিং থাগৎনবগী খুদোংচাবা ঐনা লৌজরি। মেদাম স্পিকর, শেংলবা হাওস অসিগী অহানবা নুপী স্পিকর ওইরকপদা, ঐনা অদোম থাগৎপা ফোঙদোকচরি।

ইকায়খুম্নরবা মেম্বরশিং,

ঐখোয়গী কুতনিতিগী মরীশিং থম্নদুনা চহি ৫০ গী মমাঙদা ঐখোয়গী মরুপ-মপাংগী মরী থম্নবা হৌখিবা নত্তে হায়না ঙসি নিংশিংবা অসি য়াম্না মরুওই। মরী অসি মমাঙদা হৌখ্রে। ওগষ্ট ১৭৭০ দা, থেলেমেক জহাজ তোংদুনা লাক্লগা সেন্ত এন্নে ইথত্ত থুংলখিবশিংগী মরক্ত ভারতমচা ৫ য়াওখি। খোঙচৎ অদুনা তুংদা মীওই কয়া লাক্নবা লম্বী শেমখি। মতমগী মতুংইন্না, মখোয়গী ৱারিশিং অনৌবা মতমগী সেশেলসগী ৱারিগী শরুক অমা ওইরে।

ঐখোয়গী মরক্ত লৈনরিবা মরী সরকারশিংনা শেম্বা নত্তে হায়বা মসিনা ঐখোয়না নিংশিংহল্লে। মখোয় মীয়াম্না শেমখিবনি, ইমুংশিংনা চাউখৎহনখিবনি অমসুং মীরোল কয়ানা হিংহনখিবনি। ভারত মহাসাগরনা মসি ওইহনখিবনি। ভারত মহাসাগরনা ভারত অমসুং সেশেলস তোখায় তাহন্দে। মসিনা ঐখোয় শম্নহল্লে। মরম অদুনা ঐখোয় লম্লানবশিং ওইনা লৌনদ্রিবনি। ঐখোয় অরিবা মরুপশিং ওইনা উনরে।

ইকায়খুম্নরবা মেম্বরশিং,

সেশেলসকী খ্বাইদগী কনবা মপাঙ্গলদি মসিগী মীয়াম্নি। মীরোল কয়া কয়া, মালেমগী মফম কয়াগী মীওইশিং লৈবাক অসিদা থুংলখি। মখোয়না মখোয়গী তোঙান তোঙানবা লোলশিং, চৎনবীশিং, লাইনিংশিং অমসুং ফিজেৎ-চাকচাশিং পুদুনা লাকখি। অমতা ওইনা, মখোয়না শরুক য়ামিন্নবা শক্তম অমা শেমগৎখি অমসু মদুদা সেশেলসমচাশিং চাউথোকচখি।

নেসনেল এশেমব্লি অসিগী মোতোনা হায়রি- খেন্নবশিংগী অপুনবা শক্তম। মসি  ক্রেয়িওল ঈশৈগী ফজরবা সুরশিংদা তাবা ফংগনি। মসি মৌত্যা জগোয়গী তান্থাদা উবা ফংগনি। মসি ক্রিওল কুহ্মৈদা উবা ফংগনি।

লৈবাক অসিনা মসিগী ইনাকখুল্লবা হেরিতেচ হরাওবা ফোঙদোকপা মতমদা, ঐখোয়গী চৎনবীশিংগী মরক্ত শম্নবা অদু নুমিৎ খুদিংগী পুন্সিদা উবা ফংলে। মখোয়না কারি কোকো, সমোসা অমসুং চতনিগী মহাও খঙলে। মখোয়না দিৱালি, থাই পোঙ্গাল অমসুং নবরাত্রি মনুংদা গর্বা জগোয় পাংথোক্লে। মসিগী ক্রিওলগী থৌনা অসিনা ঐখোয়গী তুংগী মরুপ-মপাংগী মরীদা হেন্না থাজবা লৈহল্লে।

ইকায়খুম্নরবা মেম্বরশিং,

সমুদ্রগী য়ুম্লোন্নবা লৈবাকশিং ওইনা, লৈবাক অমগী সেকুরিতিনা অতোপ্পা লৈবাক অমগী সেকুরিতি হেনগৎহল্লে হায়বা ঐখোয় খঙলে। লৈবাক অমগী নুংঙাইবনা অতোপ্পগী নুংঙাইবা হেনগৎহল্লে। লমদম অসি তুংদু-লৈতাবনা ঐখোয় খুদিংমক কান্নবা পীরে।

ঐখোয়গী অচেৎপা মরী চহি অসিদা মপুংফানা নিংশিংহনবা অমা ওইরে। চহি ৫০ গী মমাংদা, অদোম নিংতম্বা ফংবা মতমদা, মরুপ-মপাং ওইবা অমসুং অমতা ওইনা শৌগৎপগী খুদম অমা ওইনা ভারতকী লালগী জহাজ, আই.এন.এস নিলগিরি পোর্ত ভিক্তোরিয়াদা লৈখি। ঙসি, অদোমগা লোয়ননা গোল্দন জুব্লি পাংথোক্নবা পোর্ত ভিক্তোরিয়াদা আই.এন.এস তারকাস অমসুং আই.এন.এস ইকসাক খামদুনা লৈরে।

চহি ৫০ গী মতম অসিদা অহোংবা কয়া লৈরে। অদুবু মসিনা ঐখোয় অমনা অমবু থাজনবা হোংহন্দে। চহি কয়া, ঐখোয়গী দিফেন্স ফোর্সশিং, কোষ্ট গার্দশিং অমসুং মেরিতাইম এজেন্সিশিং পুন্না ত্রেনিং তৌমিন্নরে অমসুং থবক তৌমিন্নরে। সেশেলস দিফেন্স ফোর্সশিং অমসুং সেশেলস কোষ্ট গার্দকী কৎথোকপা অমসুং শীনফমদা হৈথোই-শিংথোইবা ভারতনা লুম্না লৌরি। মসিনা অদোম নশাগী পাক-চাউরবা সমুদ্রগী শরুক অমসুং পাক-চাউরবা ভারত মহাসাগর লমদম ঙাক-শেনবদা মরুওইবা থৌদাং অমা লৌরি। মেরিতাইম সেকুরিতি, কেপাসিতি বিল্দিং, হায়দ্রোগ্রাফি অমসুং মেরিতাইম দোমেন এৱারনেসতা ঐখোয় মতেং পাংনবা অসিদা অশোই-অঙাম লৈতবা লমদম অমা ওইহন্নবা ঐখোয়গী থবক্কী মমি তারে।

ঐ ঙসি অয়ুক রাষ্ট্রপতি এরমিনি-তোন পাত উনরে অমসুং ঐখোয়গী মরী শিংথানিঙাই ওইনা ফগৎলক্লিবা অসি হন্না য়েংশিনখ্রে। তুংগীদমক ঐখোয়গী মান্নবা পান্দমসু ঐখোয়না খন্নরে। মহাসাগর-ম্যুচুএল এন্দ হোলিষ্টিক এদভান্সমেন্ত ফোর সেকুরিতি এন্দ গ্রোথ এক্রোস রিজন্সগী ৱাখল্লোন্দা ঐখোয়গী পান্দম থম্লি।

ঐখোয়গী তুংগী ফিবমশিং অমা অমগা শম্নৈ অমসুং অমনা অমগী মখা পোল্লি হায়বা পান্দম অসিদা খঙলে। হেন্না অশোই-অঙাম থোক্তবা ভারত মহাসাগর লমদম অমা ওইহন্নবা ঐখোয় মখা তানা পুন্না থবক তৌমিন্নগনি।

ইকায়খুম্নরবা মেম্বরশিং,

মীয়াম্না মেপ অমা য়েংবা মতমদা, মখোয়না ভারত মহাসাগরদা সেশেলস অসি ঈথৎশিংগী কাংবু অমা ওইনা উগনি। অদুবু ঐখোয়না খর হেন্না চাউনা উরি। লৈবাক অসিগী সমুদ্র মপানশিংদগী হেন্না পাক-চাউবা লৈবাক অমা ওইনা ঐখোয়না উরি। অদোমগী সমুদ্রগী শরুক অসি ইসক্বার কিলোমিতর মিল্লিয়ন ১.৪ রোম ওইরি।

মসিনা সেশেলস অপীকপা ঈথৎ লৈবাক অমা ওইহন্দ্রে- অচৌবা সমুদ্রগী লৈবাক অমা ওইহল্লে। থায়না ব্লু ইকোনোমি অসি মালেমগী খন্ন-নৈনবগী শরুক অমা ওইবা মতমদা, সেশেলসতি মাঙজৌননা মাংজিল থাখ্রে। সমুদ্রগী শরুকশিং ঙাক-শেনবা নত্ত্রগা ব্লু বোন্দশিংগুম্বা অনৌবা থবকশিং চাউখৎহনবদা, মালেমগী মরুওইবা খন্ন-নৈনবদা অদোমগী লৈবাক্না মতেং পাংলে। অমতা ওইনা, ঐখোয়না ঙা য়োকপা, মেরিন সাইন্স, কোষ্টেল মেনেজমেন্ত, রিন্যুএবল ইনর্জি অমসুং তুরিজমদা পুন্না থবক তৌমিন্নবা য়াগনি। 

ঙরাং, ঐনা মমিং চৎলবা পাম্বী কোকো দে মেরগী চারা অমা থাখ্রে। সেশেলসগুম্না, মসি তোপ-তোপ্পা, মমল য়াম্মী অমসুং মালেমদা অখন্নবা মফম অমা কল্লি। মীওইবা খুন্নাইনা মহৌশাগী অকোয়বা ফিবমগা নুংশিন্না লৈমিন্নগদবনি হায়বা ৱাঙুলোন অমগী মমি অদোম্না পায়খৎলিবা অঙকপা মহৌশাগী অকোয়বগী ফিবম ঙাক-শেন্নবগী থবকশিংদা মমি তারে।

মসিগী ৱাখল্লোন অসি ভারত্ত য়ৌরক্লে। হেন্না অফবা, অশোই-অঙাম য়াওদবা অমসুং ঙসি লৈরিবা অসিদগী হেন্না মরাংকাইবা সমুদ্রশিং তুংগী মীরোলশিংদা পীরম্নবা ঐখোয় পুন্না থবক তৌমিন্নসি।

ইকায়খুম্নরবা মেম্বরশিং,

গ্লোবেল সাউথ অমসুং মরুওইনা ঈথৎ লৈবাকশিং, ক্লাইমেত চেঞ্জনা খ্বাইদগী য়াম্না শোকহল্লে। মসিগী অমাঙবশিং ঐখোয়গী সমুদ্র খোঙবালশিং, সমুদ্রগী ইকোসিষ্টেমশিং, নোংজু-নুংশাগী মওংশিংদা অমসুং ঐখোয়গী খুন্নাইশিংদা উবা ফংলে। ক্লাইমেত চেঞ্জদা খ্বাইদগী য়ামদনা অকায়বা পীদবা লৈবাকশিংনা খ্বাইদগী চাউবা পোৎলুমশিং পুরোইদবনি হায়বদা ঐখোয় অনিমক্না চেৎনা থাজরি।

অচুম্বা, দাইত্ব লৌবা অমসুং খুদিংমক কান্নবা ফংহনবনা ক্লাইমেত এক্সন লমজিংগদবনি। মসিনি ক্লাইমেত জজতিসকী ফজবা।

খুদম ওইনা উত্তুনা লমজিংনবা ভারতনা হোৎনরি। হৌখিবা চহি ১০ দা, ঐখোয়না মালেমদা খ্বাইদগী চাউবা রিন্যুএবল ইনর্জিগী থবক অমা পাংথোকখ্রে। মিসন লাইফ- লাইফষ্টাইল ফোর ইনভাইরোনমেন্তকী খুৎথাংদা তুংকোইনা চৎনবা য়ারবা পুন্সি মহিংশিংদা ঐখোয়না মাঙজিল থারে। ইন্তরনেসনেল সোলার এল্লাইন্স, কোলিএসন ফোর দিজাষ্টার রিসিলিয়েন্ত ইনফ্রাষ্ট্রকচর, গ্লোবেল বাইওফ্যুএল এল্লাইন্স অমসুং এক পের মা কে নামগুম্বা ঐখোয়গী থবকশিংগী খুৎথাংদা- অশঙ-অমান্না থল্লবা মালেম অমা ওইহন্নবা মরুপ ওইরিবা লৈবাকশিংগা লোয়ননা ঐখোয়না থবক তৌমিন্নরে।

অপীকপা চাউখৎলক্লিবা ঈথৎ লৈবাকশিংনা মখোয়গী ফংফম থোকপশিং ফংনবা সেশেলসকা লোয়ননা মখা তানা থবক তৌমিন্নবা ভারতনা থাজবা পীরি।

ইকায়খুম্নরবা মেম্বরশিং,

ভারত অমসুং সেশেলস অনিনা কাংলুপ খুদিংমক কোনশিনবা চাউখৎপা লৈবা মালেম অমা থিরি। মালেমগী লোয়শঙশিং হৌজিক্কী ওইরিবা ফিবমশিং মমি তাবা মালেম অমা ঐখোয় অনিমক্না থিরি। অপুনবা, কাংলুপ খুদিংমক কোনশিনবা অমসুং অচুম্বনা ঐখোয়গী তুংগী ফিবম শেমগদবনি হায়বদা ঐখোয়না থাজবা থম্লি।

ঐখোয়না জি-২০ গী প্রসিদেন্ত ওইরিঙৈদা পাংথোকখিবা ভারতকী থবকশিং থাজবা অসিনা লমজিংখি। গ্লোবেল সাউথকী মরুওইবশিং মালেমগী খন্ন-নৈনবশিংগী ময়াইদা থম্নবা ৱাখল্লোন অসিদা ঐখোয়না থবক পায়খৎখি। মসিগী ৱাখল্লোন অসিদা অফ্রিকান য়ুনিয়ন জি-২০গী লেংদ্রবা মেম্বর ওইবদা ভারতনা তরাম্না ওকখিবনি। মসিগী ৱাখল্লোন্দা গ্লোবেল সাউথ অমতা ওইনা পুনশিনবনি। মসিগী পান্দম অসিদা ভারত অমসুং সেশেলস মখা তানা পুন্না চাউখৎমিন্নগনি।

ইকায়খুম্নরবা মেম্বরশিং,

হৌখিবা চহি ৫০ গী মাইপাকপশিং ঐখোয়না হরাওবা ফোঙদোকপগা লোয়ননা, ঐখোয় মাঙলোমদা য়েংগদবনি। সেশেলসকী তুংগী ফিবম লৈবাক অসিগী নহারোলশিংনা লেপকনি। চহি কয়া সেশেলসকী মহৈরোয়শিং, শীনফম কয়াগী মীওইশিং, ওফিসিএলশিং অমসুং সেকুরিতি ফোর্সশিং ভারত্ত ত্রেনিং তৌবা অমসুং মহৈ তম্বদা ঐখোয়না চাউথোকচৈ।

তশেংনা, সেশেলসতা মীওই মঙা খুদিংগী মীওই অমা ভারত্ত ত্রেনিং তৌরি হায়রি। স্কিলশিং, মরুপ-মপাংগী মরী অমসুং  লৌশিংগা লোয়ননা মখোয় য়ুমদা হল্লকখি মদুনা মখা তানা ঙসি ঐখোয়গী মরী ফগৎহল্লে।

নহারোলশিংদা ইন্তরশিপ পীনবা অদোমগী ইগনাইত থবক্কী মরমদা তাবদা ঐ অপেনবা ফাওই। মসি অফবা ঙাক্লৌ অমনি অমসুং হিরম অসিদা মতেং পাংন্নবা ঐখোয়না অনৌবা খুদোংচাবশিং খঙদোকপা য়াগনি।

অসিগুম্বা মতেং পাংনবগী মরুওইবা হিরম অমা দিজিতেল ইন্নোবেসন্না ওইবা য়াগনি। কমদৌনা তেক্নোলোজিনা খুদোংচাবা হেনগৎহনবগে, লৈবাক ঙাকপা ফগৎহনবগে, শেন-থুমগী থবকশিংনা কোনশিনবগে অমসুং মীওই করোর কয়াদা সরকারগী কান্নবশিং ফংহনবগে হায়বা ভারতকী দিজিতেল পব্লিক ইনফ্রাষ্ট্রকচর (দি পি আই)না উৎলে।

অদোম ইশাগী দিজিতেলগী অওনবশিং পুরকপগা লোয়ননা ঐখোয়না খঙলিবশিং অদোমদা শরুক য়াবদা ঐখোয় হরাওগনি। নিংতম্বগী অহানবা চহি ৫০ লমজিংখিবা চপ মান্নবা অচেৎপা ফিরেপ অসিগা লোয়ন্না হায়রিবা খুদোংচাবশিং অসিনা সেশেলসকী নহারোলশিংনা লৌগনি হায়না ঐনা থাজৈ।

ইকায়খুম্নরবা মেম্বরশিং,

ঙসি, ঐনা পুৱারি ওইরবা গোল্দন জুব্লিদা অদোমগী মাঙদা লেপ্লি, চহি ২৫০ রোম হেনা পরিংদা লৈরিবা মরুপ-মপাং ওইবগী মরী অমা ঐখোয়গী মীয়াম্না হরাওবা ফোঙদোক্লি। মরী খরদি য়ুম্ফম য়াম্না চেৎলি। মরী খরদি অফবা, থাজবা অমসুং মীওইবগী য়াইফনবা খনবগা লোয়ননা চাউখৎলক্লি।

ঐখোয় মাঙলোমদা য়েংবগা লোয়ননা, হায়রিবা য়ুম্ফমশিং অসিদা ঐখোয় মখা তানা শাগৎলসি। ভারতনা মতম পুম্নমক্ত অদোমগী থাজবা য়ারবা মরুপ ওইগনি। অদোমগী অনিংবশিং ঐখোয়না শৌগৎকনি। মরুপশিং ওইনা অদোমগী নাকলদা ঐখোয় লেপকনি।

হৌখিবা চহি ৫০ শিংথানিঙাই ওইখি। সেশেলসকী ৱারিগী খ্বাইদগী ফবা পন্দুবশিং হৌজিক ফাওবা ইদ্রি হায়না ঐনা চেৎনা থাজৈ। ঐখোয়গী মরুপ-মপাং ওইবগী খ্বাইদগী ফবা শরুক হৌজিক লাক্ত্রি।

***