કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાએ આજે નવી દિલ્હી ખાતે નેશનલ ડોપ ટેસ્ટિંગ લેબોરેટરી (NDTL) ની કામગીરી, ક્ષમતાઓ અને ભવિષ્યના રોડમેપનું મૂલ્યાંકન કરવા માટે એક સમીક્ષા બેઠકની અધ્યક્ષતા કરી હતી.

ડોપિંગ સામેના નિવારક પગલાંના મહત્વ પર ભાર મૂકતા ડૉ. માંડવિયાએ જણાવ્યું હતું કે, "નેશનલ ગેમ્સ અને ખેલો ઇન્ડિયા સ્પર્ધાઓમાં ભાગ લેનારા એથ્લેટ્સ માટે ફરજિયાત એન્ટી-ડોપિંગ જાગૃતિ સત્રો યોજવામાં આવશે." તેમણે સ્વચ્છ રમત (ક્લીન સ્પોર્ટ) ને પ્રોત્સાહન આપવા અને અજાણતા થતા ડોપિંગ નિયમોના ઉલ્લંઘનથી રમતવીરોને બચાવવા માટે તેમની રમતગમતની કારકિર્દીના શરૂઆતના તબક્કામાં જ જાગૃતિ લાવવાની જરૂરિયાત પર ભાર મૂક્યો હતો.

જાહેર સ્તરે વ્યાપક પહોંચની જરૂરિયાત પર પ્રકાશ પાડતા મંત્રીએ જાહેરાત કરી હતી કે 'નો યોર મેડિસિન' (Know Your Medicine) મોબાઈલ એપ્લિકેશનનો પ્રાદેશિક ભાષાઓમાં અનુવાદ કરવામાં આવશે. તેમણે કહ્યું કે, "સ્થાનિક ભાષાઓમાં એન્ટી-ડોપિંગ અંગેની માહિતી ઉપલબ્ધ કરાવવાથી દેશભરના એથ્લેટ્સ, કોચ અને સહાયક સ્ટાફને પ્રતિબંધિત પદાર્થોને વધુ સારી રીતે સમજવામાં અને માહિતગાર નિર્ણયો લેવામાં મદદ મળશે."

ડૉ. માંડવિયાએ એનડીટીએલ (NDTL) ની વૈશ્વિક પહોંચ વધારવા પર પણ ભાર મૂક્યો હતો અને જણાવ્યું હતું કે, "લેબોરેટરીમાં આંતરરાષ્ટ્રીય એથ્લેટ્સના સેમ્પલના ટેસ્ટિંગમાં વધારો કરવા માટે પ્રયાસો કરવા જોઈએ." તેમણે નોંધ્યું હતું કે એનડીટીએલ (NDTL) ની વધતી જતી તકનીકી ક્ષમતાઓ અને વૈશ્વિક ધોરણોનું પાલન તેને આંતરરાષ્ટ્રીય એન્ટી-ડોપિંગ ઇકોસિસ્ટમમાં વધુ નોંધપાત્ર યોગદાન આપવા માટે સક્ષમ બનાવે છે.

કેન્દ્રીય મંત્રીએ એ પણ રેખાંકિત કર્યું કે ડોપિંગ ભારતીય રમતગમત માટે એક ગંભીર પડકાર તરીકે ઉભરી આવ્યું છે અને ભારપૂર્વક જણાવ્યું કે જાગૃતિ અને શિક્ષણ એ કાયદાકીય અમલીકરણના પગલાંના પૂરક હોવા જોઈએ.

ડૉ. માંડવિયાએ એન્ટી-ડોપિંગ જાગૃતિ અભિયાનને ગામડાઓ, શાળાઓ, કોલેજો અને રમતગમત સંસ્થાઓ સહિત પાયાના સ્તર (ગ્રાઉન્ડ લેવલ) સુધી વિસ્તારવા માટે આહવાન કર્યું હતું. તેમણે નોંધ્યું હતું કે માત્ર સજા કરવાથી આ સમસ્યાનો ઉકેલ લાવી શકાય નહીં અને સ્વચ્છ રમત તેમજ સ્વચ્છ રમતવીરોને પ્રોત્સાહન આપતું સામાજિક આંદોલન આવશ્યક છે.

એનડીટીએલ (NDTL) એ ભારતની એકમાત્ર વર્લ્ડ એન્ટી-ડોપિંગ એજન્સી (WADA) દ્વારા માન્યતા પ્રાપ્ત લેબોરેટરી છે, જે દેશના એન્ટી-ડોપિંગ કાર્યક્રમને સમર્થન આપવામાં મહત્વની ભૂમિકા ભજવે છે. આ લેબોરેટરીએ એન્ટી-ડોપિંગ સંશોધન અને ટેસ્ટિંગમાં યોગદાન આપવાની સાથે તેની માળખાકીય સુવિધાઓ, તકનીકી ક્ષમતાઓ અને વૈજ્ઞાનિક કુશળતામાં સતત વધારો કર્યો છે.

આ લેબોરેટરીએ અગ્રણી રમતગમત પ્રતિયોગિતાઓને પણ સહયોગ આપ્યો છે, ડ્રાઇડ બ્લડ સ્પોટ (DBS) જેવી અદ્યતન ટેસ્ટિંગ પદ્ધતિઓ પર કામ કર્યું છે, અને તાજેતરમાં એન્ટી-ડોપિંગ વિજ્ઞાન માટે મહત્વપૂર્ણ એવી સંદર્ભ સામગ્રી (રેફરન્સ મટીરિયલ્સ) ના સંશ્લેષણ (સિન્થેસિસ) નું કામ હાથ ધર્યું છે, જેનાથી ટેસ્ટિંગ ક્ષમતાઓ વધુ મજબૂત બની છે અને રમતગમતમાં નિષ્પક્ષતા (ફેર પ્લે) ને પ્રોત્સાહન મળ્યું છે.

આ બેઠકમાં શૂટર અને બિહાર સરકારના માનનીય ઉદ્યોગ અને રમતગમત મંત્રી સુશ્રી શ્રેયસી સિંહ; શ્રી હરિ રંજન રાવ, સચિવ (રમતગમત); યુવા બાબતો અને રમતગમત મંત્રાલયના વરિષ્ઠ અધિકારીઓ; રાષ્ટ્રીય રમતગમત મહાસંઘોના પ્રતિનિધિઓ; અગ્રણી વૈજ્ઞાનિકો; અને નેશનલ ડોપ ટેસ્ટિંગ લેબોરેટરીના ડાયરેક્ટર અને સીઈઓ (પ્રભારી) ડૉ. પી. એલ. સાહુ હાજર રહ્યા હતા.

SM/DK/JD