சேதராப்பட்டு நிலத்தை மீண்டும் ஜிப்மருக்கு ஒதுக்கிய புதுச்சேரி அரசு இரண்டு முக்கிய சிறப்பு மேம்பாட்டு மையங்களை நிறுவ ஜிப்மர் திட்டம்

பிராந்திய சுகாதார உள்கட்டமைப்பு வளர்ச்சியில் முக்கியமான முன்னேற்றமாக, புதுச்சேரி அரசு சேதராப்பட்டு நிலத்தை மீண்டும் ஜிப்மருக்கு அதிகாரப்பூர்வமாக ஒதுக்கி அதன் ஆவணங்களை வழங்கியுள்ளது. இதன் மூலம் உலகத் தரம் வாய்ந்த இரண்டு சிறப்பு மேம்பாட்டு மையங்களை (Centres of Excellence) நிறுவுவதற்கான வழி உருவாகியுள்ளது.

புதுச்சேரி துணைநிலை ஆளுநர் திரு கே. கைலாஷ்நாதன், ஜிப்மர் இயக்குநர் பேராசிரியர் வீர் சிங் நேகி - யிடம் நில ஆவணங்களை அதிகாரப்பூர்வமாக வழங்கினார். ஜிப்மரின் பிரதான வளாகத்தைத் தாண்டி மேம்பட்ட சுகாதார சேவைகள், மருத்துவக் கல்வி மற்றும் ஆராய்ச்சி வசதிகளை விரிவுபடுத்தும் நீண்டகால நோக்கில் இது ஒரு முக்கிய மைல்கல்லாகும்.

இதையடுத்து புதுச்சேரி துணைநிலை ஆளுநர் மற்றும் முதலமைச்சருக்கு ஜிப்மர் இயக்குனர் நன்றி தெரிவித்துக் கொண்டார்.

சேதராப்பட்டு நிலம் முதன்முதலில் 2018 ஆம் ஆண்டு மேம்பட்ட சுகாதார மற்றும் கல்வி வசதிகளை உருவாக்குவதற்காக ஜிப்மருக்கு ஒதுக்கப்பட்டது. இதனைத் தொடர்ந்து விரிவான திட்டமிடல், சாத்தியக்கூறு ஆய்வுகள் மற்றும் முன்தயாரிப்பு பணிகள் மேற்கொள்ளப்பட்டன. பின்னர் 2022 ஆம் ஆண்டில் நிர்வாக ரீதியான மறுஆய்வின் காரணமாக நில ஒதுக்கீட்டில் மாற்றம் செய்யப்பட்டு நிலம் புதுச்சேரி அரசின் கட்டுப்பாட்டிற்கு மீண்டும் கொண்டுவரப்பட்டது. இதையடுத்து திட்டத்தை முன்னெடுப்பதற்கான புதிய ஆலோசனைகள் மற்றும் ஒருங்கிணைப்பு முயற்சிகள் மேற்கொள்ளப்பட்டன.

இந்தத் திட்டத்தின் கீழ், “ஏர் ஆம்புலன்ஸ் வசதியுடன் கூடிய அதிநவீன விபத்து சிகிச்சை மற்றும் மறுவாழ்வு மையம்” மற்றும் “உறுப்பு மாற்று சிகிச்சை மையம்” ஆகிய இரண்டு தேசிய முக்கியத்துவம் வாய்ந்த சிறப்பு மையங்கள் நிறுவப்பட உள்ளன.

சுமார் ₹1,000 கோடி முதலீட்டில் உருவாகவுள்ள இம்மையங்கள், குறைந்த விலை மற்றும் உயர்தர மூன்றாம் நிலை சிகிச்சை சேவைகளை விரிவுபடுத்துவதுடன், மருத்துவக் கல்வி, ஆராய்ச்சி, திறன் மேம்பாடு மற்றும் சுகாதார புதுமைகளையும் வலுப்படுத்தும்.

ஏர் ஆம்புலன்ஸ் வசதியுடன் கூடிய விபத்து சிகிச்சை மற்றும் மறுவாழ்வு மையம்

தற்போது ஜிப்மர், புதுச்சேரி, தமிழ்நாடு மற்றும் அண்டை மாநிலங்களில் இருந்து வரும் காயமடைந்த நோயாளிகளுக்கான முக்கிய பரிந்துரை மருத்துவமனையாக செயல்பட்டு வருகிறது. சாலை விபத்துகள், தொழிற்சாலை விபத்துக்கள், பேரிடர் அவசரநிலைகள் மற்றும் பல்வேறு சிக்கலான ஜிப்மர் நிலைகள் அதிகரித்து வரும் நிலையில், தனித்துவமான விபத்து சிகிச்சை மையத்தின் தேவை அதிகரித்துள்ளது.

சுமார் ₹425 கோடி மதிப்பீட்டில், சேதராப்பட்டு வளாகத்தில் 25.4 ஏக்கர் பரப்பளவில் இந்த மையம் அமைக்கப்பட உள்ளது. இதில் 250 படுக்கைகள், தீவிர சிகிச்சைப் பிரிவுகள், உயர் சார்பு சிகிச்சைப் பிரிவுகள், அவசர விபத்து சிகிச்சைப் பிரிவுகள், மறுவாழ்வு சேவைகள் மற்றும் 10 அதிநவீன அறுவை சிகிச்சை அரங்குகள் இடம்பெறும்.

இந்த மையத்தின் முக்கிய அம்சமாக ஹெலிபேட் மற்றும் ஏர் ஆம்புலன்ஸ் வசதி அமைக்கப்பட உள்ளது. இதன் மூலம் அவசரநிலை நோயாளிகளை விரைவாக கொண்டு வந்து உயிர்காக்கும் சிகிச்சைகளை உடனடியாக வழங்க முடியும். மேலும் இது பிராந்திய பேரிடர் மேலாண்மை மற்றும் அவசர மருத்துவ சேவைகளுக்கான முக்கிய மையமாகவும் செயல்படும்.

விபத்து அறுவை சிகிச்சை, அவசர மருத்துவம், தீவிர சிகிச்சை, மறுவாழ்வு மருத்துவம், நரம்பியல் அறுவை சிகிச்சை, எலும்பியல், பிளாஸ்டிக் அறுவை சிகிச்சை, மனநல மருத்துவம் உள்ளிட்ட பல்வேறு துறைகள் ஒரே குடையின் கீழ் ஒருங்கிணைக்கப்படும்.

உறுப்பு மாற்று சிகிச்சை மையம்

சுமார் ₹550 கோடி மதிப்பீட்டில் உருவாகவுள்ள உறுப்பு மாற்று சிகிச்சை மையம், உறுப்பு மற்றும் திசு மாற்று சிகிச்சை மற்றும் மேம்பட்ட மாற்று மருத்துவ அறிவியலுக்கான முழுமையான பிராந்திய மையமாக செயல்படும்.

இறுதிக்கட்ட உறுப்பு செயலிழப்பால் பாதிக்கப்படும் பல நோயாளிகளுக்கு உறுப்பு மாற்று சிகிச்சையே ஒரே நிரந்தர தீர்வாக உள்ளது. நாட்டில் இச்சேவைகளுக்கான தேவை அதிகரித்து வரும் நிலையில், அவற்றின் அணுகல் தன்மை மற்றும் செலவு பலருக்கு சவாலாக உள்ளது. இந்த இடைவெளியை நிரப்பும் நோக்கில், உயர்தர மற்றும் மலிவான மாற்று சிகிச்சைகளை வழங்கும் வகையில் இம்மையம் வடிவமைக்கப்பட்டுள்ளது.

400 படுக்கைகள் கொண்ட இம்மையத்தில், சிறப்பு மாற்று சிகிச்சைப் பிரிவுகள், தீவிர சிகிச்சைப் பிரிவுகள், உயர் சார்பு சிகிச்சைப் பிரிவுகள், மேம்பட்ட நோயறிதல் வசதிகள் மற்றும் 14 அறுவை சிகிச்சை அரங்குகள் இடம்பெறும். சிறுநீரகம், கல்லீரல், இதயம், நுரையீரல், எலும்பு மஜ்ஜை மற்றும் திசு மாற்று சிகிச்சைகளுக்கான தனிப்பிரிவுகளும் அமைக்கப்படும்.

முழுமையாக செயல்படத் தொடங்கிய பின்னர், ஆண்டுதோறும் சுமார் 2,500 முதல் 2,700 உறுப்பு மற்றும் திசு மாற்று அறுவை சிகிச்சைகள் மேற்கொள்ளப்படும் என எதிர்பார்க்கப்படுகிறது.

இந்தியாவுக்கான பிராந்திய சுகாதார மையம்

சேதராப்பட்டு வளாகம் புதுச்சேரி மற்றும் தமிழ்நாட்டை மட்டுமல்லாது ஆந்திரப் பிரதேசம், தெலுங்கானா, கர்நாடகா, கேரளா, ஒடிசா, மேற்கு வங்காளம், பீகார் உள்ளிட்ட பல மாநிலங்களைச் சேர்ந்த நோயாளிகளுக்கும் மேம்பட்ட சிகிச்சை சேவைகளை வழங்கும் பிராந்திய மையமாக உருவெடுக்கும்.

பொருளாதார வளர்ச்சி மற்றும் பிராந்திய முன்னேற்றத்திற்கு ஊக்கமாக

இந்த இரண்டு மையங்களும் இணைந்து சுமார் 3,000 நேரடி வேலைவாய்ப்புகளை உருவாக்கும் என எதிர்பார்க்கப்படுகிறது. மருத்துவர்கள், செவிலியர்கள், ஆராய்ச்சியாளர்கள், தொழில்நுட்ப நிபுணர்கள், நிர்வாக மற்றும் ஆதரவு பணியாளர்கள் உள்ளிட்ட பல்வேறு பிரிவினருக்கு வேலைவாய்ப்புகள் உருவாகும்.

மேலும், விருந்தோம்பல், போக்குவரத்து, சில்லறை வணிகம், கட்டுமானம் மற்றும் பிற துணைத் துறைகளில் ஆயிரக்கணக்கான மறைமுக வேலைவாய்ப்புகளும் உருவாகும்.

எதிர்கால நோக்கம்

சேதராப்பட்டு-ல் உருவாகவுள்ள இந்த சிறப்பு மேம்பாட்டு மையங்கள், புதுச்சேரி மற்றும் நாட்டின் சுகாதாரத் துறைக்கான மாற்றத்தைக் கொண்டுவரும் தொலைநோக்கு திட்டமாகும். மேம்பட்ட நோயாளி சேவை, உலகத் தர ஆராய்ச்சி, கல்வி, புதுமை மற்றும் திறன் மேம்பாட்டை ஒருங்கிணைத்து, எதிர்கால தலைமுறைகளுக்கும் பயனளிக்கும் உலகத் தர சுகாதார மையமாக இது உருவாக்கப்படும்.

சுமார் ₹1,000 கோடி முதலீடு, 3,000 நேரடி வேலைவாய்ப்புகள் மற்றும் ஆயிரக்கணக்கான மறைமுக வேலைவாய்ப்புகளுடன், சேதராப்பட்டு வளாகம் சுகாதாரம், கல்வி, ஆராய்ச்சி மற்றும் பொருளாதார வளர்ச்சிக்கான முக்கிய மையமாக உருவெடுக்கும். அதேவேளையில், மருத்துவ சிகிச்சை, மருத்துவக் கல்வி மற்றும் உயிரியல் மருத்துவ ஆராய்ச்சியில் இந்தியாவின் முன்னணி நிறுவனங்களில் ஒன்றாக ஜிப்மரின் நிலையை மேலும் வலுப்படுத்தும்.

இந்த சிறப்பு மேம்பாட்டு மையங்கள், தேசிய முக்கியத்துவம் வாய்ந்த சுகாதார உள்கட்டமைப்பை மேம்படுத்துவதில் ஜிப்மர், இந்திய அரசு மற்றும் புதுச்சேரி அரசின் கூட்டு முயற்சிகளின் சான்றாக அமைகின்றன. முழுமையாக செயல்படத் தொடங்கிய பின்னர், விபத்து கிச்சை, உறுப்பு மாற்று சிகிச்சை, மறுவாழ்வு, மருத்துவக் கல்வி மற்றும் உயிரியல் மருத்துவ ஆராய்ச்சி துறைகளில் இந்தியாவின் திறனை குறிப்பிடத்தக்க அளவில் வலுப்படுத்தும்.

****

TV/SH