ଲୋକସଭା ବାଚସ୍ପତି ଶ୍ରୀ ଓମ୍ ବିର୍ଲା ଆଜି ଅନ୍ତର୍ଜାତୀୟ ଯୋଗ ଦିବସ ଅବସରରେ ସଂସଦ ଭବନ ପରିସରରେ ସାଂସଦମାନଙ୍କ ସହିତ ଏକ ଯୋଗ ଅଧିବେଶନର ନେତୃତ୍ୱ ନେଇଥିଲେ। ଏହି ଅବସରରେ ସମସ୍ତଙ୍କୁ ଶୁଭେଚ୍ଛା ଜଣାଇ ସେ କହିଥିଲେ ଯେ, ଏହି ଦିବସଟି ହେଉଛି ଭାରତର କାଳଜୟୀ ସଭ୍ୟତାଗତ ଐତିହ୍ୟର ଉତ୍ସବ। ଏହା ମାନବଜାତିକୁ ସ୍ୱାସ୍ଥ୍ୟ, ସନ୍ତୁଳନ ଏବଂ ଆନ୍ତରିକ ଶାନ୍ତିର ପଥ ପ୍ରଦର୍ଶନ କରିଛି। ସେ କହିଥିଲେ, "ଯୋଗ କେବଳ ଶରୀରକୁ ସନ୍ତୁଳିତ କରେ ନାହିଁ ବରଂ ମନ ଏବଂ ଚିନ୍ତାଧାରାକୁ ମଧ୍ୟ ସନ୍ତୁଳିତ କରେ। ସଂସଦରେ ମତଭେଦ ସ୍ୱାଭାବିକ, କିନ୍ତୁ ଯୋଗ ଆମକୁ ଆଲୋଚନା ଏବଂ ଆତ୍ମସଂଯମର ପଥ ଦେଖାଏ।"

ଯୋଗର ଗୁରୁତ୍ୱ ଉପରେ ଆଲୋକପାତ କରି ଶ୍ରୀ ବିର୍ଲା କହିଥିଲେ ଯେ, ଭାରତର ଋଷି ଏବଂ ବିଦ୍ୱାନମାନେ ଶତାବ୍ଦୀ ଧରି ଯୋଗର ପରମ୍ପରାକୁ ସଂରକ୍ଷଣ କରିବା ସହ ଏହାକୁ ଏକ ଜୀବନଶୈଳୀ ଭାବେ ପ୍ରତିଷ୍ଠିତ କରିଥିଲେ। ଏହାର ଉଦ୍ଦେଶ୍ୟ ଥିଲା ଶାରୀରିକ ସ୍ୱାସ୍ଥ୍ୟ, ମାନସିକ ଶାନ୍ତି ଏବଂ ମାନବ ଚେତନାର ଜାଗରଣକୁ ପ୍ରୋତ୍ସାହିତ କରିବା। ସେ କହିଥିଲେ ଯେ, ଯୋଗ ବର୍ତ୍ତମାନ ସମଗ୍ର ବିଶ୍ୱରେ ଗ୍ରହଣୀୟ ହେବା ସହିତ ଏକ ବୈଶ୍ୱିକ ଜନଆନ୍ଦୋଳନରେ ପରିଣତ ହୋଇଛି, କିନ୍ତୁ ଏହା ଭାରତର ହଜାର ହଜାର ବର୍ଷର ଜ୍ଞାନ ପରମ୍ପରାର ଏକ ଅମୂଲ୍ୟ ଉପହାର।

ସମସାମୟିକ ଜୀବନରେ ଯୋଗର ପ୍ରାସଙ୍ଗିକତା ଉପରେ ଗୁରୁତ୍ୱାରୋପ କରି ଲୋକସଭା ବାଚସ୍ପତି କହିଥିଲେ ଯେ, ଆଧୁନିକ ଜୀବନ ଚାପ, ଅସନ୍ତୁଳନ ଏବଂ ଅନିଶ୍ଚିତତାରେ ପରିପୂର୍ଣ୍ଣ। ଏପରି ପରିସ୍ଥିତିରେ, ଯୋଗ ମାନସିକ ଶାନ୍ତି, ଧୈର୍ଯ୍ୟ, ଭାବନାତ୍ମକ ସନ୍ତୁଳନ ଏବଂ ଏକ ଶୃଙ୍ଖଳିତ ଜୀବନଶୈଳୀ ବଜାୟ ରଖିବାର ଏକ ପ୍ରଭାବଶାଳୀ ମାଧ୍ୟମ ଭାବରେ କାର୍ଯ୍ୟ କରେ। ସେ ଆହୁରି ମଧ୍ୟ କହିଥିଲେ ଯେ, ଏକବିଂଶ ଶତାବ୍ଦୀର ସବୁଠାରୁ ବଡ଼ ଆହ୍ୱାନ ମଧ୍ୟରୁ ଗୋଟିଏ ହେଉଛି ମାନସିକ ଚାପ, ଏବଂ ଯୋଗ ଏହାର ଏକ ସହଜ, ବୈଜ୍ଞାନିକ ଓ ସର୍ବସମାବେଶୀ ସମାଧାନ ପ୍ରଦାନ କରେ। ସେ ଆହୁରି ମଧ୍ୟ କହିଥିଲେ ଯେ, ଆଜିର ଡିଜିଟାଲ ପିଢ଼ି ସ୍କ୍ରିନ୍ ସମୟ ଓ ଚାପ ମଧ୍ୟରେ ସନ୍ତୁଳନ ରକ୍ଷା କରିବା ପାଇଁ ଯୋଗକୁ ନିଜ ଜୀବନଶୈଳୀର ଏକ ଅଂଶ ଭାବରେ ଗ୍ରହଣ କରିବା ଉଚିତ।

ଶ୍ରୀ ବିର୍ଲା କହିଥିଲେ ଯେ, ଯୋଗ କେବଳ ଏକ ଫିଟନେସ୍ କାର୍ଯ୍ୟକ୍ରମ ନୁହେଁ; ବରଂ ବ୍ୟକ୍ତିତ୍ୱ, ଚରିତ୍ର ଏବଂ ଚେତନା ବିକାଶର ଏକ ମାଧ୍ୟମ। ଯୋଗକୁ ଦୈନନ୍ଦିନ ଜୀବନରେ ସାମିଲ କରିବା ଦ୍ୱାରା ବ୍ୟକ୍ତିମାନେ ଅଧିକ ସନ୍ତୁଳିତ ହୋଇଯାଆନ୍ତି, ସେମାନଙ୍କର ନିଷ୍ପତ୍ତି ନେବାର କ୍ଷମତା ବୃଦ୍ଧି ପାଏ ଏବଂ ସାମଗ୍ରିକ ସୁସ୍ଥତା ସୁଦୃଢ଼ ହୁଏ। ସେ କହିଥିଲେ, “ଏକ ସୁଦୃଢ଼ ଗଣତନ୍ତ୍ରର ସବୁଠାରୁ ବଡ଼ ସମ୍ପଦ ହେଉଛନ୍ତି ସୁସ୍ଥ ନାଗରିକ।” ଯଦି ଭାରତର ୧୪୦ କୋଟି ନାଗରିକ ପ୍ରତିଦିନ ମାତ୍ର କିଛି ମିନିଟ୍‌ ଯୋଗ ପାଇଁ ଉତ୍ସର୍ଗ କରନ୍ତି, ତେବେ ଏହା ଦେଶର ସବୁଠାରୁ ବଡ଼ ଜନସ୍ୱାସ୍ଥ୍ୟ ବିପ୍ଳବରେ ପରିଣତ ହୋଇପାରିବ।

ଲୋକସଭା ବାଚସ୍ପତି କହିଥିଲେ ଯେ, ଯୋଗର ବାର୍ତ୍ତା ଦେଶର ପ୍ରତ୍ୟେକ କୋଣରେ ପହଞ୍ଚିବା ଆବଶ୍ୟକ। ଜନପ୍ରତିନିଧିମାନେ ସଦାସର୍ବଦା ସମାଜ ସହ ସଂପୃକ୍ତ ରହିଥାନ୍ତି ଏବଂ ଲୋକଙ୍କୁ ଯୋଗ ଅଭ୍ୟାସ କରିବା ସହ ଏହାର ପରିବର୍ତ୍ତନକାରୀ ଶକ୍ତି ବିଷୟରେ ସଚେତନ କରିବାରେ ସେମାନେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିପାରିବେ। ଯେପରି ଗଣତନ୍ତ୍ରକୁ ସୁଦୃଢ଼ କରିବା ପାଇଁ ନିରନ୍ତର ପ୍ରୟାସ ଜାରି ରହିଛି, ସେହିପରି ଯୋଗ ମଧ୍ୟ ପ୍ରତ୍ୟେକ ନାଗରିକଙ୍କ ଜୀବନର ଅବିଚ୍ଛିନ୍ନ ଅଂଶ ହେବା ଉଚିତ।

ଶ୍ରୀ ବିର୍ଲା କହିଥିଲେ ଯେ, ଯୋଗ କେବଳ ଭାରତର ସଫ୍ଟ ପାୱାର ନୁହେଁ; ବରଂ ମାନବଜାତି ପ୍ରତି ଭାରତର ଗୁରୁଦାୟିତ୍ୱ। ସେ ସମସ୍ତ ନାଗରିକଙ୍କୁ ଯୋଗକୁ କେବଳ ଗୋଟିଏ ଦିନର ଉତ୍ସବ ଭାବରେ ନୁହେଁ ବରଂ ୩୬୫ ଦିନର ପ୍ରତିବଦ୍ଧତା ଭାବରେ ଗ୍ରହଣ କରିବାକୁ ଏବଂ ନିୟମିତ ଯୋଗ ଅଭ୍ୟାସ ମାଧ୍ୟମରେ ସ୍ୱାସ୍ଥ୍ୟ, ସମନ୍ୱୟ ଓ ଆତ୍ମଶୃଙ୍ଖଳାର ସଂସ୍କୃତିକୁ ସୁଦୃଢ଼ ​​କରିବାକୁ ଆହ୍ୱାନ କରିଥିଲେ।

*****

MT